ಬರವು : ನೀತು ಬೆದ್ರ
ಅಜೆ ತತ್ತಿನ ಪಾದದಡಿ ಎನ್ನ ಬಾಸೆ ಲೋಕೊಗು ಮುಟ್ಟೊಡು ಪನ್ಪಿ ಅಂಗು ಅಂಗಲಾಪು ಒಂಜಿ ಕರೆ ಬರಿಟಾಂಡ.ಅಪ್ಪೆ ಬಾಸೆಡ್ ತಾನುಲಾ ಒಂಜಿ ದಾದಂಡಲಾ ಮಲ್ಪೊಡು ಪನ್ಪಿ ಆಸೆ ನನೊಂಜಿ ಬರಿಂಟು. ತಾಂಕಿನ ಅಪ್ಪೆ, ಎನನ್ ತಾಂಕಿನ ಮಣ್ಣ್ , ಎನ್ನೊಟ್ಟಿಗಿಪ್ಪುನ ಬಾಸೆಗುಲಾ ಎನರ್ದ್ ದಾದಂಡಲಾ ಕೊರೊಡು ಪನ್ಪಿ ಅಂಗು ಅಂಗಲಾಪು ದೀವೊದಿನಕುಲು ನಮ್ಮ ತುಳುವೆರ್. ತನ್ನ ಬಾಸೆದೊಟ್ಟಿಗೆ ಬೇತೆ ಬಾಸೆದ ಪೊರ್ಲು ತಿರ್ಲು ತೆರಿಯೊಂದು ತನ್ನನೇ ಆಯಿನ ಪೊಸ ದೇಕಿ ಕೊರಿನಕುಲು ನಮ್ಮಕುಲೇ.
ಪ್ರಾಯ ದಂಗುದಿಜಿ, ಎಲ್ಯ ಪ್ರಾಯದಿಂಚ ತನರ್ದ್ ದಾದಂಡಲಾ ಮಲ್ಪೊಡು ಪನ್ಪಿ ಹಠ. ಎಲ್ಯ ಇಲ್ಲಡು ಬುಲೆಂಡಲಾ, ದೇವೆರ್ ಮನಸ್ಸು ಬೊಕ್ಕ ಚಾತುರ್ಪಗ್ ಎಲ್ಯ ಬುದ್ದಿ ಕೊರಂದೇ, ಮೂಜಿ ಮುಟ್ಟುದು ಬಾನ ಎತ್ತುನ ಬುದ್ದಿಕೊರಿಯೆರ್. ಸಾಲ್ ಸಾಲುಗ್ ಉಡಲೈಸಿರ ಮೆನ್ಕುಲೆಕಂತಿನ ಪದರಂಗಿತ, ಕೊರ್ನಾರ್, ಮೆರೆನ ಪೊರ್ಲ ನಿರ್ದೆಶನಡ್ ಅಭಿನಯ ಮಲ್ತಿನಕುಲು ಲೋಕಮಾನ್ಯ ಪುದರ್ ಪುಗಾರ್ತೆ ಗೆತೊಂದಿನಕುಲು. ಮೊನೆಡ್ ಮುಗುರು ತೆಲಿಕೆ,ಕಣ್ಣುಡು ಸಾರ ಆಸೆ, ಪೊಸತು ಕನಪೆ ಪನ್ಪಿ ಛಲ ಅಯಿಕ್ ಪುದರೇ ಅಭಿಷೇಕ್ ರಾವ್. ದಿಲ್ ರಂಗ್ ಪನ್ಪಿ ಪೊಸ ಪದ ಕೇಂಡಿನ ಮಾತ ತುಳುವೆರೆಗ್ ಗೊತ್ತು, ಆ ಪದದ ಪಿರಾವುದ ಸಾರಥಿ ಏರ್ ಪಂದು.ಎಲ್ಯ ಪ್ರಾಯದ ಜವನನ ಜೀವನದ ಕಥೆ ಬರವುದ ಒರುಟು ಬಲೇ ತೂಕ.
ಕುಡ್ಲದೂರದ ಕಮಲಾಕ್ಷ ಬೋಳಾರ್ ಬೊಕ್ಕ ಅನ್ನಪೂರ್ಣಮ್ಮ ಮೋಕೆದ ಜೋಕೆಗ್, ಇಲ್ಲದ ಬೊಲ್ಪುಗ್ ದೇವೆರೆಬಾಲೆಯಾದ್ ಉದಿತಿ ಬಾಲೆ ಅಭಿ.ಮೇರೆನ ಕಜ್ಜ ಕೊಟ್ಯದಂಚಿ ದಿಟ್ಟಿ ಪಾರಾನಗ ಪ್ರಾಥಮಿಕ ಬೊಕ್ಕ ಪ್ರೌಢ ಕಲಿಕೆ ಸೈಟ್ ಜೋಸೆಫ್ ಬಜಾಲ್ಡ್ ಕಲ್ತುದ್, ಸೈಟ್ ಅಲೋಷಿಯಸ್ ಡು ಪಿಯುಸಿ ಕಲ್ತಿನಾರ್.
ಎಲ್ಯ ಇಲ್ಲಾಂಡಲಾ ಮಲ್ಲ ಮನಸ್ಸುದಾರ್. ಇಲ್ಲ,ಕುಟುಂಬದಕುಲು,ಕಲಾ ಭೂಮಿದ ಸೇವೆ ಮಲ್ತಿಜಿಂಡಲಾ ಮೇರ್ ಸಿನೆಮಾ ಕ್ಷೇತ್ರದಂಚಿ ಕಾರ್ ದೀಪುನ ದೈರ್ಯ ಮಲ್ತಿನಾರ್. 2ಪಿಯುಸಿ ಕಲ್ತುದಾದ್ ಮುಗಿನಗ ಜೀವನದ ಬೂರ್ ಪತ್ತರೆ ಪೋನಗ,ಗೇನಗ ತಿಕ್ಕಿನ ಸಿನೆಮಾ ಪನ್ಪಿ ಬೂರುನ್ ಗಟ್ಟಿ ಪತ್ತಿಯೆರ್. ಸಂದೇಶ್ ಆಚಾರ್ಯ ಬೊಕ್ಕ ವೆಂಕಟೇಶ್ ಮಂಗಳೂರು ಮೊಕ್ಲೆರ್ದ್ ಸಂಕಲನದ ಬಗ್ಗೆ ತೆರಿಯೊಂಡೆರ್. ಯೂಟ್ಯೂಬ್ಡ್ ಸಂಕಲನ ,ಸಿನೆಮಾದ ಬಗ್ಗೆ ದಿನ ರಾತ್ರೆ ಪಗೆಲು ಕಲ್ತುದ್ ಯಾನುಲಾ ಒಂಜಿ ಜನ ಆವೊಡು ,ಎನ್ನ ಪುದರ್ ಭೂಮಿಡ್ ಮೆನ್ಕೊಡು,ಅಕ್ಕಸಡ್ ನೆಗೆತ್ ತೋಜೊಡು ಪನ್ಪಿ ಆಸೆ ದೀವೊಂದ್, ಕಾರುಗ್ ಪುರ್ಸೊತ್ತಿಜಂದೆ.ಕಣ್ಣುಗು ನಿದ್ರೆ ಇಜ್ಜಂದೆ ಸಿನೆಮಾದ ಜಾಗೆಡ್ ಬೆನ್ನಿ ಬೆನಿಯೆರ್. ಸಿನೆಮಾ ಕಲ್ಪೊಡು ಪಂದ್ ರಾಜ್ಯದ ರಾಜದಾನಿ ಬೆಂಗಳೂರುಗ್ ಪೋದು ಪೊರ್ತುದ ವನಸುಗ್ ಬಂಗ ಬರೊಂದು, ಬಿಗ್ ಬಜಾರ್ಡ್ ಬೆನಿಯರೆ ಸುರು ಮಲ್ಪುವೆರ್. ಬಂಜಿದ ಬಡವು ತೆಕ್ಕುಂಡಲಾ, ಮನಸ್ಸುದುಲಯಿ ಕನ ತೆಕ್ಕಂದಿ ಪೊರ್ತು ,ತುಳುವನಾಡುದ ಪುಣ್ಯಭೂಮಿಗ್ ಕಾರ್ ದೀಪೆರ್. ಒಂಜಿ ಕಂಪ್ಯೂಟರ್ ಗೆತೊಂದು ಸಂಕಲನದ ಬೇಲೆ ಸುರು ಮಲ್ಪುವೆರ್. ದಿನ ಕರಿಂಡು ,ಕಾಲ ಮಗುರುಂಡು ನರಮಾನಿ ಆಸೆ ,ಆಸೆ ಆವಂದೆ ಒರಿಯಂದೆ ,ಅಭಿಷೇಕನ ಪುದರ್ ಲೋಕೊರ್ಮೆ ಪುದರಾಪುಂಡು. “ದಿಲ್ ರಂಗ್” ಮೋಕೆದ ಪದಟ್ ಅಭಿಷೇಕ್ ನ ಪುದರ್ ಮೆನ್ಕರೆ ಸುರು ಆಂಡ್. ಅಯಿರ್ದುಂಬು ಅಭಿ ಪಂಡ ಎರೆಗುಲಾ ಗೊತ್ತಿಜಾಂಡ್. ಆಂಡ ಅಯಿರ್ದ್ಬೊಕ್ಕ ಗೊತ್ತಾಂಡು.
ಇನಿಮುಟ್ಟ 60 ರ್ದ್ ಜಾಸ್ತಿ ಎಲ್ಯಚಿತ್ರ,ಅಲ್ಬಮ್ ಪದಕ್ ಸಂಕಲನ ಕೊರ್ದ್ 12ಡೆತ್ತ ನಿರ್ದೆಶನ ಮಲ್ದಿನಾರ್ ಅಭಿಷೇಕ್. ಅಯಿಟ್ ಮುಖ್ಯವಾದ್ ,ಎನ್ನ ಉಡಲ ಅರಮನೆಟ್, ನಿನ್ನ ಮುಗುರು ತೆಲಿಕೆ,ಆರ್ಪಾಟರ್,ಮಿಸ್ಟರ್ ಬಂಟೆ,ಪುಟ್ಟಕ್ಕ, ಸಾರ ಕನ ,ಐತ ,ದಿಲ್ ರಂಗ್ ,ನೀನೇ ,ದಿಲ್ ರಂಗ್ 2. ಇಂಚಿತ್ತಿನ ಪುರಲಾ ಜನಮಂದೆಲು ಗೆಂದಿನ ಚಿತ್ರೊಲೇ. ಅಭಿ ಪಂಡ ತುಳು ಸಿನೆಮಾ ಕ್ಷೇತ್ರಡ್ ಪೊಸ ರಂಗ್ ಕನಪಿ ನಿರ್ದೆಶಕೆ ಪಂದ್ ತುಳು ಚಿತ್ರರಂಗ ದಿಗ್ಗಜೆ ತೆಲಿಕೆದ ಬೊಳ್ಳಿ ದೇವದಾಸ್ ಕಾಪಿಕಾಡ್ ಪಂತೆರ್. ಒಂಜಿ ಪಾತೆರ ಉಂಡು ಪರತ್ ಒಕ್ಕಂದೆ ಪೊಸತು ಕನಪಿನ ಮಲ್ಲ ಸಾಧನೆಗೆ ಆ ಸಾಧನೆದ ಪೊರ್ಲೈಸಿರದ ಮುತ್ತು ಪಂಡ ಅಭಿಷೇಕ್. ಪ್ರಾಯ ಎಲ್ಯ ಆಂಡಲಾ. ದೇವೆರ್ ಕೊರ್ನ ಗೇನದ ಮಂಡೆನ್ ತಾನೆ ಸಾನೆ ಪತ್ತುಂದಿನ ಜವನೆ. ಮೆರೆನ ದಿಲ್ ರಂಗ್ ಪದರ್ದ್ ಸಮತಾ ಅಮೀನ್, ವಿಜೇತ್ ಕೋಟ್ಯಾಮ್ ಪನ್ಪಿನ ಕಲಾವಿದೆರ್ ಲೋಕೊರ್ಮೆ ಪುದರ್ ಕನತುದೆರ್.. ಸಮತಾ ಅಮೀನ್ ತುಳುನಾಡುದ ಕ್ರಶ್ ಪನ್ಪಿ ಪುಗಾರ್ತೆನುಲಾ ಗೆತೊಂದೆರ್. ಅಕುಲೆಡ ಅಭಿಷೇಕ್ ನ ಬಗ್ಗೆ ತೆರಿಯೊನ್ನಗ. ಎಂಕುಲೆನ ಪ್ರತೊಭೆನ್ ಪಿದಯಿ ಕನತೆರ್. ಅಂಚಾದ್ ಎಂಕುಲು ಇನಿ ಲೋಕೊರ್ಮೆ ಪುದರಾಯೆ ಪಂದು ಪನ್ಪೆರ್.
ಕನ್ನಡಡು ಒಂಜಿ ಪಾತೆರ ಉಂಡು. ಬಂಡೆಕಲ್ಲನ್ನು ಬರಿದಾಗಿ ನೋಡಿದರೆ ಅದು ಕಲ್ಲು, ಶಿಲ್ಪಿಯ ಉಳಿಏಟಿಗೆ ಅದು ವಿನ್ಯಾಸಗೊಂಡರೆ ಅದು ಮೂರ್ತಿ. ಮೂಲು ಶಿಲ್ಪಿ ಅಭಿ. ಅರ್ ವಾ ಕಲ್ಲುನುಲಾ ಕೆತ್ತುದು ಮೂರ್ತಿ ಮಲ್ಪುನಾ ಸಾಮರ್ಥ್ಯದಾರ್. ಮೇರ್ ದೀತಿನ ಪಜ್ಜೆ ನನಲಾ ಮಾಜಂದೆ ಒರಿಯಡು. ತುಳುನಾಡುದ ಜವನೆ ,ಕನಾರ್ಟಕ ರಾಜ್ಯ ಅತ್ತಂದೆ ದೇಶ ಇಡೀ ಪುದರ್ ಪುಗಾರ್ತೆ ಕನವಡ್ ಪನ್ಪಿ ಎಡ್ಡೆಪು ಎನ್ನ.
Editorial