#Tulupatrike

ಯುವವಾಹಿನಿ ಮುಲ್ಕಿ ಎಗ್ಗೆರ್ದ್ ನಿವೃತ್ತ ಯೋಧೆರೆಗ್ ಮಾನಾದಿಗೆ

Aug 3, 2026

ಕಾರ್ಗಿಲ್ ವಿಜಯ ದಿನತ್ತ ಆಚರಣೆ ಹುತಾತ್ಮ ಯೋಧೆರೆಗ್ ಕೊರ್ಪಿನ ಗೌರವ : ವೈ.ಎನ್. ಸಾಲ್ಯಾನ್

ಮುಲ್ಕಿ : ಕಾರ್ಗಿಲ್ ವಿಜಯ ಪನ್ಪಿನವು ಸುಲಭದ ಗೆಲುವತ್ತ್, ಸಾರ ಸಾರ ಯೋಧೆರ್ ಅಕ್ಲೆನ ಕುಟುಂಬದ ಬಗ್ಗೆ ಯೋಚನೆ ಮಲ್ಪಂದೆ ದೇಶ ಪ್ರೇಮನ್ ದೀವೊಂದು ಹೋರಾಟ ಮಲ್ದೆರ್ .ಅವೇತೋ ಯೋಧೆರ್ ಪ್ರಾಣ ಅರ್ಪಣೆ ಮಲ್ದೆರ್. ಕಾರ್ಗಿಲ್ ವಿಜಯ ದಿನಾಚರಣೆ ನಮ ಹುತಾತ್ಮ ಯೋಧೆರೆಗ್ ಕೊರ್ಪಿನ ಗೌರವ ಪಂದ್ ಸಮಾಜ ಸೇವಕೆರ್, ಎಂಆರ್ ಪೂಂಜ ಐಟಿಐದ ನಿವೃತ್ತ ಪ್ರಿನ್ಸಿಪಾಲ್ ವೈ. ಎನ್. ಸಾಲ್ಯಾನ್ ತೆರಿಪಾಯೆರ್.

ಆರ್ ಯುವವಾಹಿನಿ (ರಿ ) ಮುಲ್ಕಿ ಘಟಕದ ಆಶ್ರಯಡ್ ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಚಾವಡಿಡ್ ನಡತಿನ ಕಾರ್ಗಿಲ್ ವಿಜಯ ದಿನಾಚರಣೆ ಕಾರ್ಯಕ್ರಮಡ್ ಭಾರತ ಮಾತೆಗ್ ಪುರ್ಪ ಗೌರವ ಮಲ್ತ್‌ದ್ ಪಾತೆರಿಯೆರ್.
ಈ ಪೊರ್ತುಡು 17 ವರ್ಷ ದೇಶ ಸೇವೆ ಮಲ್ತ್‌ದ್ ನಿವೃತ್ತಿ ಆಯಿನ ಹಿರಿಯ ಯೋಧೆರ್ ಶಶಿಧರ್ ಶೆಟ್ಟಿ ಮೊಯ್ಲೊಟ್ಟು ಮೆರೆಗ್ ಮಾನಾದಿಗೆ ನಡತ್ಂಡ್.
“ಕಾರ್ಗಿಲ್ ಯುದ್ಧ ಪಾಕಿಸ್ತಾನದ ಕುತಂತ್ರರ್ದಾತ್ರ ಸುರುವಾಯಿನ ಯುದ್ಧ. ಕಾರ್ಗಿಲ್ ದ ಎತ್ತರದ ಜಾಗೆಡ್ ತಿಗಲೆ ನಡುಗುನ ಚಳಿತ್ತ್ ನಡುಟ್ಟುಲ ನಮ್ಮ ಮಾತಾ ಸೈನಿಕೆರ್ ಹೋರಾಟ ಮಲ್ತ್‌ದ್ ಶತ್ರು ಸೈನಿಕೆರೆನ್ ಪಿರ ಗಿಡಪುನೆಟ್ಟ್ ಯಶಸ್ವಿ ಆತೆರ್ ಪಂದ್ ಮಾನಾದಿಗೆ ಸ್ವೀಕಾರ ಮಲ್ತಿನ ಶಶಿಧರ್ ಶೆಟ್ಟಿ ತೆರಿಪಾಯೆರ್.
ಅಂಚೆನೆ ಸೇನೆಡ್ 19 ವರ್ಷ ಸೇವೆ ಸಙದಾದ್, ಕಾರ್ಗಿಲ್ ಯುದ್ಧಡ್‌ಲ ಪಾಲ್ ಪಡೆಯಿನ ನಿವೃತ್ತ ಯೋಧೆ, ಮುಲ್ಕಿ ಘಟಕದ ಮಾಜಿ ಅಧ್ಯಕ್ಷೆರ್ ಮಾಧವ ಪೂಜಾರಿ ಕಿಲ್ಪಾಡಿ ಮೆರೆಗ್‌ಲ ಮಾನಾದಿಗೆ ನಡತ್ಂಡ್.
ಕಾರ್ಯಕ್ರಮದ ಅಧ್ಯಕ್ಷತೆನ್ ಘಟಕದ ಅಧ್ಯಕ್ಷೆರ್ ಚರಿಷ್ಮ ಶ್ರೀನಿವಾಸ್ ವಹಿಸ್‌ದಿತ್ತೆರ್.
ಮಿತ್ತರ್ಮೆಡ್ ಮುಲ್ಕಿ ಬಿಲ್ಲವ ಸಂಘದ ಪ್ರಧಾನ ಕಾರ್ಯದರ್ಶಿ ಜಯಕುಮಾರ್ ಕುಬೇರ್, ಘಟಕದ ಕಾರ್ಯದರ್ಶಿ ವೇದ ಜಯ ಕುಬೇರ್ ಮೊಕುಲು ಮಾತ ಇತ್ತೆರ್.
ಚರಿಷ್ಮ ಶ್ರೀನಿವಾಸ್ ಸ್ವಾಗತ ಮಲ್ತೆರ್. ಸಿಂಚನ ಬೊಕ್ಕ ಯಶಸ್ವಿ ದೇಶಭಕ್ತಿಗೀತೆ ಪಂಡೆರ್. ಮಾಜಿ ಅಧ್ಯಕ್ಷೆ ರಿತೇಶ್ ಅಂಚನ್ ಚಿತ್ರಾಫು ಮಾನಾದಿಗೆದ ಓಲೆ ಓದಿಯೆರ್. ವೇದ ಜಯ ಕುಬೇರ್ ಸೊಲ್ಮೆ ಸಂದಾಯೆರ್. ಸತೀಶ್ ಕಿಲ್ಪಾಡಿ ಲೇಸ್ ಸುದಾರಿಕೆ ಮಲ್ತೆರ್.

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ತುಳುವ ಮಹಾಸಭೆ ಇಂಟರ್‌ನ್ಯಾಷನಲ್ ಕೊಡಗು ಜಿಲ್ಲೆ ಪೊಸ ಕಾರ್ಯಕಾರಿ ಸಮಿತಿ ರಚನೆ

Aug 3, 2026

ಮಡಿಕೇರಿ : ತುಳುವ ಮಹಾಸಭೆ ಇಂಟರ್‌ನ್ಯಾಷನಲ್‌‌ದ ಕೊಡಗು ಜಿಲ್ಲಾ ಪೊಸ ಕಾರ್ಯಕಾರಿ ಸಮಿತಿ ರಚನೆ ಆ.1 ಶನಿವಾರ ನಡತ್ಂಡ್.
ಸಭೆಟ್ಟ್ ತುಳುವ ಮಹಾಸಭೆ ಇಂಟರ್‌ನ್ಯಾಷನಲ್ ಕರ್ನಾಟಕ ರಾಜ್ಯಾಧ್ಯಕ್ಷೆರ್ ದೇವೇಂದ್ರ ಹೆಗ್ಡೆ ,
ಪ್ರಧಾನ ಕಾರ್ಯದರ್ಶಿ ಅರವಿಂದ ಬೆಲ್ಚಡ, ತುಳುವರ್ಲ್ಡ್ ಫೌಂಡೇಶನ್ ನಿರ್ದೇಶಕೆರ್ ಡಾ. ರಾಜೇಶ್ ಕೃಷ್ಣ ಆಳ್ವ , ಪ್ರಧಾನ ಕಾರ್ಯದರ್ಶಿ ವಸಂತ ರೈ ಕುತ್ತೆತ್ತೂರು, ಪ್ರಧಾನ ಕಾರ್ಯದರ್ಶಿ ಅರವಿಂದ ಬೆಲ್ಚಡ ಮೊಕುಲು ಮಾತ ಇತ್ತೆರ್.
ಸಭೆಟ್ಟ್ ಪೊಸ ಪದಾಧಿಕಾರಿಲೆನ್ ಆಯ್ಕೆ ಮಲ್ತೆರ್.
ಗೌರವ ಅಧ್ಯಕ್ಷೆರಾದ್ ಶೇಖರ್ ಭಂಡಾರಿ, ಅಧ್ಯಕ್ಷೆರಾದ್ ಬಿ. ಬಿ. ಐತಪ್ಪ ರೈ , ಉಪಾಧ್ಯಕ್ಷೆರಾದ್ ಬಿ. ವೈ. ಆನಂದ ರಘು, ಬಿ. ಕೆ. ಮೋಹನ, ಬಿ. ಶಿವಪ್ಪ ಆಯ್ಕೆ ಆಯೆರ್.
ಕೊಡಗು ಜಿಲ್ಲಾ ಪ್ರಧಾನ ಸಂಚಾಲಕೆರಾದ್ ಪಿ. ಎಂ. ರವಿ ಮೊಗೇರ, ಪ್ರಧಾನ ಕಾರ್ಯದರ್ಶಿಯಾದ್ ರಾಜೀವ ಲೋಚನ ಬಿ. ಪಿ., ಕೋಶಾಧಿಕಾರಿಯಾದ್ ರತ್ನಾಕರ ರೈ,ಜಿಲ್ಲಾ ಸಲಹೆಗಾರೆರಾದ್ ಅಶೋಕ್ ಆಚಾರ್ಯ ಬಿ. ಸಿ., ಆಯ್ಕೆ ಆಯೆರ್.
ತಾಲೂಕು ಸಂಚಾಲಕೆರಾಯಿನ ಮಡಿಕೇರಿಗ್ ಸುರೇಶ್ ಕುಲಾಲ್, ವಿರಾಜಪೇಟೆ: ಶಬರೀಶ್ ಶೆಟ್ಟಿ, ಕುಶಾಲನಗರ ಗೌತಮ ಶಿವಪ್ಪ , ಪೊನ್ನಂಪೇಟೆ ಶೇಖರ್ ಭಂಡಾರಿ, ಸೋಮವಾರಪೇಟೆ ದಾಮೋದರ ಬಿ. ಎಂ.,
ಯುವ ಘಟಕ ಅಧ್ಯಕ್ಷೆರಾದ್ ಶರದ್ ಶೆಟ್ಟಿ, ಮಹಿಳಾ ವಿಭಾಗದ ಗೌರವ ಅಧ್ಯಕ್ಷೆರಾದ್ ವಿಜಯಲಕ್ಷ್ಮಿ,ಅಧ್ಯಕ್ಷೆರ್ ಲೀಲಾ ಶೇಷಮ್ಮ, ಉಪಾಧ್ಯಕ್ಷೆರಾದ್ ಶಶಿಕಲಾ ರೈ, ಪ್ರಧಾನ ಕಾರ್ಯದರ್ಶಿಯಾದ್ ಶೋಭಾ ಮುತ್ತಪ್ಪ, ಕೋಶಾಧಿಕಾರಿಯಾದ್ ಸಾವಿತ್ರಿ, ಸಲಹೆಗಾರೆರಾದ್ ಲೀಲಾವತಿ ಬಿ. ಎಸ್., ಆಯ್ಕೆ ಆಯೆರ್.
ಸಭೆತ್ತ ಸುರುಕ್ಕು ಪಿ. ಎಂ. ರವಿ ಮೊಗೇರ ಮಾತೆರೆನ್ಲ ಎದ್ಕೊಂದು ಕಡೆಕ್ಕ್ ಸೊಲ್ಮೆ ಸಂದಾಯೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಮುಲ್ಕಿ

ಪಾವಂಜೆ ನಂದಾದೀಪ ಸೇವಾ ಬಳಗದ ಗೌರವಾಧ್ಯಕ್ಷೆರಾದ್ ಚಂದ್ರಶೇಖರ್ ಕರ್ಕೆರ ನೇಮಕ

Aug 3, 2026

ಮುಕ್ಕ : ಪಾವಂಜೆ ನಂದಾದೀಪ ಸೇವಾ ಬಳಗದ ಗೌರವಾಧ್ಯಕ್ಷೆರಾದ್ ಉದಾರ ಮನಸ್ಸ್ ದ ವ್ಯಕ್ತಿ ಚಂದ್ರಶೇಖರ್ ಕರ್ಕೇರ ಮಿತ್ರ ಪಾಟ್ನಾ ಮುಕ್ಕ ಮೇರ್ ನೇಮಕ ಆತೆರ್.

ಮೆರೆಗ್ ನಂದಾದೀಪ ಸೇವಾ ಬಳಗದ ಮಾತ ಸದಸ್ಯೆರೆನ ಪರವಾದ್ ಅಭಿನಂದನೆನ್ ಸಂದಾಯೆರ್. ಮೆರೆನ ಗೌರವಾಧ್ಯಕ್ಷತೆದ ಅವಧಿಡ್ ನಂದಾದೀಪ ಸೇವಾ ಬಳಗ ನನಾತ್ ಬುಲೆವಾಡ್ ಪಂದ್ ಪಂಡೆರ್

ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬೆದ್ರದ ಸುದ್ದಿ | Moodbidri News ಬೇಲೆ / ಕೆಲಸ | Jobs ರಪಕ್ಕ ಸುದ್ದಿ Flash News

ಆ.7,8: ಬೆದ್ರ ‘ಆಳ್ವಾಸ್ ಪ್ರಗತಿ–2026’ ಬೃಹತ್ ಉದ್ಯೋಗ ಮೇಳ

Aug 3, 2026

ಬೆದ್ರ: ದೇಶದ ಭಾರೀ ಮಲ್ಲ ಉದ್ಯೋಗ ಮೇಳಲೆಡ್ ಒಂಜಾಯಿನ ‘ಆಳ್ವಾಸ್ ಪ್ರಗತಿ–2026’ ತ್ತ 16ನೇ ಆವೃತ್ತಿ ಆ.7 ಬೊಕ್ಕ 8 ಕ್ಕ್ ಬೆದ್ರದ ಆಳ್ವಾಸ್ ವಿದ್ಯಾಗಿರಿ ಕ್ಯಾಂಪಸ್‌ಡ್ ನಡಪರೆ ಉಂಡು.

ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನ (ರಿ.) ಆಯೋಜನೆ ಮಲ್ಪುನ ಈ ಬೃಹತ್ ಉದ್ಯೋಗ ಮೇಳಡ್ 340 ರ್ದ್ ಎಚ್ಚ ಪುಗರ್ತೆದ ಕಂಪನಿಲು ಪಾಲ್ ಪಡೆಯೆರೆ ಉಂಡು. 23,900 ರ್ದ್ ಎಚ್ಚ ಬೇಲೆದ ಅವಕಾಶಲು ಉಂಡು. ಎಸ್‌ಎಸ್‌ಎಲ್‌ಸಿ, ಪಿಯುಸಿ, ಡಿಪ್ಲೊಮಾ, ಐಟಿಐ, ಒವ್ವೇ ಪದವಿ, ಬಿ.ಇ./ಬಿ.ಟೆಕ್, ಬಿ.ಕಾಂ/ಬಿಬಿಎ, ಸ್ನಾತಕೋತ್ತರ/ಎಂಬಿಎ, ಕೋರ್ ಐಟಿ ಬೊಕ್ಕ ವೈದ್ಯಕೀಯ, ಪ್ಯಾರಾಮೆಡಿಕಲ್ ಸೇರಿನಂಚೆನೆ ಬೇತೆ ಬೇತೆ ವಿದ್ಯಾರ್ಹತೆ ಪಡೆಯಿನ ಅಭ್ಯರ್ಥಿಲೆಗ್ ಬೇಲೆದ ಅವಕಾಶಲು ಉಂಡು.

ವಿದ್ಯಾರ್ಹತೆ ಆಧಾರದ ಮಿತ್ತ್ ಬೇಲೆದ ಅವಕಾಶಲೆಡ್ ಎಸ್‌ಎಸ್‌ಎಲ್‌ಸಿ ಬೊಕ್ಕ ಪಿಯುಸಿ – 5,228, ಡಿಪ್ಲೊಮಾ ಬೊಕ್ಕ ಐಟಿಐ – 8,748, ಒವ್ವೇ ಪದವಿ – 3,473, ಬಿ.ಇ./ಬಿ.ಟೆಕ್ – 1,601, ಬಿ.ಕಾಂ/ಬಿಬಿಎ – 2,149, ಒವ್ವೇ ಸ್ನಾತಕೋತ್ತರ/ಎಂಬಿಎ – 1,843, ವೈದ್ಯಕೀಯ ಬೊಕ್ಕ ಪ್ಯಾರಾಮೆಡಿಕಲ್ – 709 ಬೊಕ್ಕ ಕೋರ್ ಐಟಿ – 180 ಬೇಲೆ ಉಂಡು, ಅನುಭವ ಇಪ್ಪುನ ಅಭ್ಯರ್ಥಿಲೆಗ್ ಇಸೇಸ ಅವಕಾಶ ಉಂಡು.

ಆಳ್ವಾಸ್ ಪ್ರಗತಿ ಕೇವಲ ಉದ್ಯೋಗ ಮೇಳ ಮಾತ್ರ ಅವಂದೆ, ಬೇಲೆದ ನಿರೀಕ್ಷೆದಕ್ಲೆಗ್ ಬೊಕ್ಕ ಬೇಲೆ ಇಜ್ಜಂದಿನಕ್ಲೆಗ್ ಒಂಜೇ ವೇದಿಕೆಡ್ ಸಂಪರ್ಕ ಮಲ್ಪುನ ಮಹತ್ವದ ಉಪಕ್ರಮ ಆತ್ಂಡ್. ಕರಿನ 23 ಉದ್ಯೋಗ ಮೇಳದ ಮುಕೇನ 40,848ರ್ದ್ ಎಚ್ಚ ಬೇಲೆ ಬೊಡಾಯಿನಕುಲು ಪಾಲ್ ಪಡೆದಿತ್ತೆರ್, 66,432 ರ್ದ್ ಎಚ್ಚ ಅಭ್ಯರ್ಥಿಲು ಬೇತೆ ಬೇತೆ ಪುಗರ್ತೆದ ಸಂಸ್ಥೆಲೆಡ್ ಬೇಲೆನ್ ಪಡೆತೆರ್. ಈ ಸಾಧನೆರ್ದ್ ಆಳ್ವಾಸ್ ಪ್ರಗತಿ ಭಾರತದ ಮಲ್ಲ ಯಶಸ್ವಿ ಉದ್ಯೋಗ ಮೇಳಲೆಡ್ ಒಂಜಾತ್ಂಡ್.

ಉದ್ಯೋಗ ಮೇಳಡ್ ಪಾಲ್ ಪಡೆಪುನ ಅಭ್ಯರ್ಥಿಲೆಗ್ ವೃತ್ತಿ ಮಾರ್ಗದರ್ಶನ, ಕೌಶಲ್ಯಾಭಿವೃದ್ಧಿ ಬೊಕ್ಕ ಸಂದರ್ಶನಗ್ ಅಗತ್ಯ ಸಲಹೆನ್ ಕೊರಿಯೆರೆ ಉಂಡು. ಬೇತೆ ಬೇತೆ ಕ್ಷೇತ್ರದ ಪುಗರ್ತೆದ ಕಂಪನಿಲು ನೇರ ಸಂದರ್ಶನದ ಮುಕೇನ ಅರ್ಹ ಅಭ್ಯರ್ಥಿಲೆಗ್ ಆಯ್ಕೆ ಮಲ್ಪೊಂಡು.

ಉದ್ಯೋಗ ಮೇಳಡ್ ಪಾಲ್ ಪಡೆಪುನ ಮಾತ ಅಭ್ಯರ್ಥಿಲೆಗ್ ನೋಂದಣಿ ಸಂಪೂರ್ಣ ಧರ್ಮೊಗು, ಡಿಪ್ಲೊಮಾ ಬೊಕ್ಕ ಐಟಿಐ ಅಭ್ಯರ್ಥಿಲೆಗ್ ಬಸ್ ಸೌಲಭ್ಯ ಬೊಕ್ಕ ಪಿದಯಿ ಜಿಲ್ಲೆರ್ದ್ ಬರ್ಪಿನ ಅಭ್ಯರ್ಥಿಲೆಗ್‌‌ ಧರ್ಮೊಗು ವಸತಿ ವ್ಯವಸ್ಥೆ ಉಂಡು. ವಸತಿದ ಪೊಲಬುಗಾದ್ 99867 79182 ಕ್ಕ್ ಸಂಪರ್ಕ ಮಲ್ಪೊಲೆ.

ಎಚ್ಚದ ಪೊಲಬುಗಾದ್ 9741440490, 9190089077, 96117 50531 ಬೊಕ್ಕ 7975223865 ಸಹಾಯವಾಣಿ ಸಂಖ್ಯೆಗ್ ಸಂಪರ್ಕ ಮಲ್ಪೊಲಿ. ಅಭ್ಯರ್ಥಿಲು ತನ್ನ ವಿದ್ಯಾರ್ಹತೆಗ್ ಸರಿ ಹೊಂದುನ ಉದ್ಯೋಗದ ಪೊಲಬುನ್ www.alvaspragati.com ಡ್ ಪರಿಶೀಲಿಸಾದ್ ಧರ್ಮೊಗು ನೋಂದಾಣಿ ಮಲ್ತ್ ದ್ ಈ ಬೃಹತ್ ಉದ್ಯೋಗ ಮೇಳದ ಸದುಪಯೋಗನ್ ಪಡೆವೊನೊಡು ಪಂದ್ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನ ಪ್ರಕಟಣೆಡ್ ತೆರಿಪಾದ್ಂಡ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಸೂರಾಲು ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿ ಅಧ್ಯಕ್ಷೆರಾದ್ ತಾರಾನಾಥ್ ಕೋಟ್ಯಾನ್ ಸೂರಾಲು ಆಯ್ಕೆ

Aug 3, 2026

ಕಾರ್ಲ : ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿ(ರಿ.) ಸೂರಾಲು ನೆತ್ತ 34ನೇ ವರ್ಷದ ಸಾರ್ವಜನಿಕ ಗಣೇಶೋತ್ಸವದ ಸಮಿತಿಗ್ ಅಧ್ಯಕ್ಷೆರಾದ್ ಮಿಯ್ಯಾರು ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್, ಕಾರ್ಲ ತಾಲೂಕು ಭೂನ್ಯಾಯ ಮಂಡಳಿದ ಸದಸ್ಯೆರ್ ಬೊಕ್ಕ ಬೇತೆ ಬೇತೆ ಸಾಮಾಜಿಕ ಸಂಘಟನೆಡ್ ಸಕ್ರಿಯವಾದುಪ್ಪುನ ತಾರಾನಾಥ್ ಕೋಟ್ಯಾನ್ ಸೂರಾಲು ಮೇರ್ ಆಯ್ಕೆ ಆತೆರ್.

ಜೂನ್ 28 ಗು ನಡತಿನ ಮಹಾಸಭೆಟ್ಟ್ ಸಮಿತಿಗ್ ಪದಾಧಿಕಾರಿಲೆನ ಆಯ್ಕೆ ಮಲ್ತೆರ್.

ಕಾರ್ಯದರ್ಶಿಯಾದ್ ಜೆಸಿಐ ಕಾರ್ಕಳ ರೂರಲ್‌ದ ಪೂರ್ವಾಧ್ಯಕ್ಷೆರ್ ಮಂಜುನಾಥ್ ಕೋಟ್ಯಾನ್ ಮೆರೆಮ್ ಸರ್ವಾನುಮತಡ್ ಪುನರಾಯ್ಕೆ ಮಲ್ತೆರ್.
ಸಮಿತಿದ ಗೌರವಾಧ್ಯಕ್ಷೆರಾದ್ ಮಾದೇಶ್ ಎಂ, ಸುಧಾಕರ್ ಎಂ ಶೆಟ್ಟಿ, ಜಯಪ್ರಕಾಶ್ ದೇವಾಡಿಗ, ಶಿವಾಜಿ ರಾವ್,ಉಪಾಧ್ಯಕ್ಷೆರಾದ್ ವಸಂತ ಕುಲಾಲ್, ಪ್ರವೀಶ್ ಎಚ್ ರಾವ್,ಮೀರಾ ಜಯಪ್ರಕಾಶ್, ಪ್ರಧಾನ ಕಾರ್ಯದರ್ಶಿಯಾದ್ ಉಮೇಶ್ ಎಸ್ ಪೂಜಾರಿ,ಕೋಶಾಧಿಕಾರಿಯಾದ್ ಹರೀಶ್ ಅಂಚನ್ ಜೊತೆ ಕಾರ್ಯದರ್ಶಿಲಾದ್ ಸುಭಾಷ್ ಪೂಜಾರಿ, ದಿನೇಶ್ ಹೆಚ್. ರಾವ್, ಅರ್ಫಾನ್, ಸಂಘಟನಾ ಕಾರ್ಯದರ್ಶಿಲಾದ್ ಉಮೇಶ್ ಕುಲಾಲ್, ಪ್ರಕಾಶ್ ರಾವ್, ರಮೇಶ್ ಪೂಜಾರಿ, ರಾಜೇಶ್ವರಿ ರಾವ್, ಕ್ರೀಡಾ ಕಾರ್ಯದರ್ಶಿಲಾದ್ ವಿಷ್ಣು ಕೋಟ್ಯಾನ್, ಮನಿಷ್ ಕುಮಾರ್, ಸುಮಂತ್ ರಾವ್,
ಶುಭದರ ಪೂಜಾರಿ, ರಾಕೇಶ್ ಪೂಜಾರಿ, ಸಾಂಸ್ಕೃತಿಕ ಕಾರ್ಯದರ್ಶಿಲಾದ್ ಸುರೇಶ್ ಬಂಗೇರ, ಶಾಲಿನಿ ದೇವಾಡಿಗ, ಸತೀಶ್ ಬಂಗೇರ, ವೆಂಕಟೇಶ್, ಕಾಂಚನ ರಾವ್, ದಿಶಾ, ದೀಕ್ಷಿತಾ , ನಿಶ್ಮಿತಾ , ಸ್ವಚ್ಛತಾ ಸಮಿತಿ ಸದಸ್ಯೆರಾದ್ ದೇಜಪ್ಪ ಕುಲಾಲ್, ಪ್ರವೀಶ್ ಪಿ ರಾವ್, ರಾಮಚಂದ್ರ ಭಂಡಾರಿ,
ದೀಕ್ಷಿತ್ ಕೋಟ್ಯಾನ್, ಪ್ರವೀಣ್ ಪೂಜಾರಿ, ಸುಕೇಶ್ ಕುಲಾಲ್, ಆಶಾ ರಮೇಶ್, ಲೋಲಾಕ್ಷಿ ಜಯಂತಿ, ಶಿವಾನಂದ ಪೂಜಾರಿ, ಶ್ರೀಜಿತ್, ಸುನಿತಾ ಸತೀಶ್, ಪ್ರಸಾದ ವಿತರಣಾ ಸಮಿತಿದ ಸದಸ್ಯೆರಾದ್ ರಾಘವೇಂದ್ರ ಕುಲಾಲ್, ಗಣೇಶ್ ಕುಲಾಲ್, ಗಣೇಶ್ ರಾವ್,ರಕ್ಷಿತ್ ಕುಲಾಲ್ ಅಶೋಕ್ ಕುಲಾಲ್, ವಿಕೇಶ್ ರಾವ್,ಶಂಕರ, ಪ್ರವೀಣ್ ಮೂಲ್ಯ, ವಿಶಾಲ್ ಕುಮಾರ್, ಭರತ್ ರಾಜ್ ಸುಧಾಕರ್ ಪೂಜಾರಿ, ವಸಂತ ಶೆಟ್ಟಿ, ಅಲ್ತಾಫ್, ಮನೋಜ್,ನಿಶಿತ್ ಶೆಟ್ಟಿ, ಧನುಷ್ ರಾವ್, ಸಲಹಾ ಸಮಿತಿ ಸದಸ್ಯೆರಾದ್ ರಮೇಶ್ ಎ ದೇವಾಡಿಗ, ಓಬಯ್ಯ ಕೋಟ್ಯಾನ್,ರಮೇಶ್ ಎಂ,ಕಾರ್ಯಕಾರಿ ಸಮಿತಿ ಸದಸ್ಯೆರಾದ್
ರಮೇಶ್ ದೇವಾಡಿಗ, ಸುರೇಶ್ ಕುಲಾಲ್, ಅನಿಲ್ ಕುಲಾಲ್, ರಿತೇಶ್ ರಾವ್, ಪ್ರಸನ್ನ ಕುಲಾಲ್,ಮಂಜುನಾಥ್ ನಾಯಕ್,ರಿತೇಶ್ ಜಿ ಅಂಚನ್,ಹೇಮಂತ್,ತೇಜಸ್ ಜಿ ಅಂಚನ್, ಪ್ರಣಾಮ್ ಆರ್ ಪೂಜಾರಿ,ಸಂಕೇತ್ ಕುಲಾಲ್,ರಕ್ಷಿತ್ ಕೋಟ್ಯಾನ್,ಶ್ರೀನಿವಾಸ್ ಶೆಟ್ಟಿಗಾರ್,ಪ್ರತಿಕ್ ರಾವ್,ಅಂಕಿತ್ ಕೋಟ್ಯಾನ್, ವಿಶ್ವನಾಥ್ ನಾಯಕ್, ಹರ್ಷ ಎಸ್ ಬಂಗೇರ, ಸುಶಾಂತ್,ಸುಮಂತ್ ಪೂಜಾರಿ, ಆಯುಷ್, ಶಶಾಂಕ್ ಪೂಜಾರಿ, ಶೈಲೇಶ್, ಪುನೀತ್ ಹೆಗ್ಡೆ ಆಯ್ಕೆ ಆತೆರ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News

ಆ.9 : ಸುರತ್ಕಲ್ ಬಂಟರ ಸಂಘದ ಮುತಾಲಿಕೆಡ್ “ಆಟಿದ ಪೊರ್ಲು, ಸಾಧಕೆರೆಗೆ ಮಾನಾದಿಗೆ ಲೇಸ್

Aug 3, 2026

ಸುರತ್ಕಲ್ : ಬಂಟರ ಸಂಘ (ರಿ) ಸುರತ್ಕಲ್ ಬೊಕ್ಕ ಮಹಿಳಾ ವೇದಿಕೆ, ಬಂಟರ ಸಂಘ ಸುರತ್ಕಲ್ ಮೊಕ್ಲೆನ ಒಟ್ಟುಸೇರಿಗೆಡ್ ಆಗೋಸ್ಟ್ 9 ಐತಾರ ಕಾಂಡೆ 10.30 ಗಂಟೆಗ್ ಸುರತ್ಕಲ್ ಬಂಟರ ಭವನಡ್ “ಆಟಿದ ಪೊರ್ಲು ಬೊಕ್ಕ ಅಭಿನಂದನೆ ಲೇಸ್” ನಡಪರೆ ಉಂಡು. ಲೇಸ್‌ದ ಅಧ್ಯಕ್ಷತೆನ್ ಸಂಘದ ಅಧ್ಯಕ್ಷೆರ್ ಬಾಳ ಜಗನ್ನಾಥ ಶೆಟ್ಟಿ ಒಯಿಸೊನ್ವೆರ್. ವಿ.ಕೆ.ಸಮೂಹ ಸಂಸ್ಥೆದ ಆಡಳಿತ ನಿರ್ದೇಶಕೆರ್ ಕರುಣಾಕರ ಎಂ ಶೆಟ್ಟಿ ಮಧ್ಯಗುತ್ತು ಲೇಸ್ ಉದಿಪನ ಮಲ್ಪುವೆರ್.
ಮಲ್ಲ ಬಿನ್ನೆರಾದ್ ಸಂಸದೆರ್ ಕ್ಯಾಪ್ಟನ್ ಬ್ರಿಜೇಶ್ ಚೌಟ, ಶಾಸಕೆರ್ ಡಾ. ವೈ ಭರತ್ ಶೆಟ್ಟಿ, ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಬಂಟರ ಯಾನೆ ನಾಡವರ ಮಾತೃ ಸಂಘದ ಪ್ರಧಾನ ಕಾರ್ಯದರ್ಶಿ ಎಮ್ ಕರುಣಾಕರ ಶೆಟ್ಟಿ, ಬಂಟವಾಳ ಬಂಟರ ಸಂಘದ ಅಧ್ಯಕ್ಷೆರ್ ಜಗನ್ನಾಥ ಚೌಟ ಬದಿಗುಡ್ಡೆ, ಕಟೀಲು ತುಳು ವಲ್ಡ್೯ ಫೌಂಡೇಶನ್‌ದ ಅಧ್ಯಕ್ಷೆರ್ ಭಾನುಮತಿ ಶೆಟ್ಟಿ ಕಕ್ವಗುತ್ತು ಪಾಲ್ ಪಡೆಯರೆ ಉಲ್ಲೆರ್. ಪ್ರೊಫೆಸರ್ ಅಕ್ಷಯ ಆರ್ ಶೆಟ್ಟಿ ದಿಕ್ಸೂಚಿ ಭಾಷಣ ಮಲ್ಪುವೆರ್. ಮಹಿಳಾ ವೇದಿಕೆದ ಅಧ್ಯಕ್ಷೆ ಸರೋಜ ಟಿ ಶೆಟ್ಟಿ ಉಪಸ್ಥಿತರಾದುಪ್ಪುವೆರ್.
ಮಾನಾದಿಗೆದ ಕಜ್ಜ
ಈ ಸಂದರ್ಭಡ್ ಕೃಷಿ ಕ್ಷೇತ್ರದ ಸಾಧಕೆರ್ ವಾಮನ ಶೆಟ್ಟಿ ಸೂರಿಂಜೆ, ಸಾಹಿತ್ಯ- ರಂಗಭೂಮಿ ಕ್ಷೇತ್ರದ ಗೀತಾ ಸುರತ್ಕಲ್, ಭರತನಾಟ್ಯ ಕ್ಷೇತ್ರದ ಚಂದ್ರಶೇಖರ ನಾವಡ ಚೇಳಾಯಿರು, ಲಲಿತಕಲೆ ಕ್ಷೇತ್ರದ ಧನಪಾಲ್ ಶೆಟ್ಟಿಗಾರ್ ತಡಂಬೈಲ್, ಗುಡಿ ಕೈಗಾರಿಕೆ ಕ್ಷೇತ್ರದ ಸಾದನೆಗಾದ್ ವಾರಿಜ ಡಿ ಬಂಗೇರ ಕುಳಾಯಿ ಮೊಕ್ಲೆನ್ ಮಾನಾದಿಗೆ ಮಲ್ಪರೆ ಉಂಡು. ಸಂಘದ ಮಹಿಳಾ ಸದಸ್ಯರೆರ್ದ್ ಬೊಕ್ಕ ಜೋಕುಲೆರ್ದ್ ಗ್ರಾಮವಾರು ಜಾನಪದ ನೃತ್ಯ, ರೂಪಕ ಪ್ರದರ್ಶನ ಆವರೆ ಉಂಡು. ಅಂಚೆನೆ ಆಂಜೋವುಲೆಗ್
ತಾರಾಯಿ ಕಟ್ಟುನ, ಮುಂಡಾಸು ಕಟ್ಟುನ ಪಂತ ಪೊಂಜೊವುಲೆಗ್ ಮೈಪು ಸೂಡಿ ಮಲ್ಪುನ, ಮಡಲ್ ಮೊಡೆಪಿನ ಪಂತ ನಡಪರೆ ಉಂಡು. ಅಯಿರ್ದ್ ಬೊಕ್ಕ ಆಟಿದ ವಿಶೇಷ ವನಸ್‌ದ ವ್ಯವಸ್ಥೆ ಉಂಡು. ಬೊಕ್ಕ ಸಂಘದ ಸದಸ್ಯೆರ್ ರ್ದ್ ಸಾಂಸ್ಕೃತಿಕ ಕಾರ್ಯಕ್ರಮ, ಸಬಿ ಸವಾಲ್ ಪಂತ ನಡಪರೆ ಉಂಡು ಪಂದ್ ಸಂಘದ ಪ್ರಧಾನ ಕಾರ್ಯದರ್ಶಿ ಲೀಲಾಧರ ಶೆಟ್ಟಿ ಕಟ್ಲ ತೆರಿಪಾದೆರ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಆ.02: ಹಳೆಯಂಗಡಿ ಬಿಲ್ಲವ ಸಂಘ, ಯುವವಾಹಿನಿ ಒಟ್ಟುಸೇರಿಗೆಡ್ “ಆಟಿದ ಗೇನ’ ಲೇಸ್

Jul 28, 2026

ಹಳೆಯಂಗಡಿ : ಬಿಲ್ಲವ ಸಮಾಜ ಸೇವಾ ಸಂಘ(ರಿ) ಹಳೆಯಂಗಡಿ ಬೊಕ್ಕ ಯುವವಾಹಿನಿ (ರಿ) ಹಳೆಯಂಗಡಿ ಎಗ್ಗೆದ ಒಟ್ಟುಸೇರಿಗೆಡ್ ಆಗಸ್ಟ್ 2 ಐತಾರ ಕಾಂಡೆ 1೦ ಗಂಟರ‍್ದ್ ಸಂಘದ ಬಿಲ್ಲವ ಭವನದ ಚಾವಡಿಡ್ “ಆಟಿದ ಗೇನ’ ಲೇಸ್ ನಡಪರೆ ಉಂಡು.
ಆಟಿದ ಗೇನದ ಕುಟೊದ ಚಾವಡಿಡ್ ಯುವವಾಹಿನಿ ಕೇಂದ್ರ ಸಮಿತಿದ ಅಧ್ಯಕ್ಷೆರ್ ಅಶೋಕ್ ಕುಮಾರ್ ಪಡ್ಪು ಮೇರ್ ಲೇಸ್ ಉದಿಪನ ಮಲ್ಪುವೆರ್. ಕರ್ಣಾಟಕ ಬ್ಯಾಂಕ್ ಕುಡ್ಲ ಡಿಜಿಎಂ ಬಿ.ಗೋಪಾಲಕೃಷ್ಣ ಸಾಮಗೆರ್ ಆಟಿದ ಮದಿಪು ಮದಿಪರೆ ಬರ್ಪೆರ್. ಬಿಲ್ಲವ ಸಮಾಜ ಸೇವಾ ಸಂಘ ಹಳೆಯಂಗಡಿದ ಗುಕಾರ‍್ಲು ಚಂದ್ರಶೇಖರ ನಾನಿಲ್ ಕೂಟದ ಗರ‍್ಕಾರ‍್ಮೆದ ಮಣೆಟ್ಟ್ ಕುಲ್ಲುವೆರ್. ಕೂಟದ ತಮೆರಿಲಾದ್ ಹೋಟೆಲ್ ಸಾಯಿಲೀಲಾದ ಮಾಲಕೆರ್ ಜಗನ್ನಾಥ ಸನಿಲ್, ಕಟ್ವಾಣ ಸಮಿತಿದ ಗುಕಾರ‍್ಲು ಮೋಹನ್ ಎಸ್ ಸುವರ್ಣೆರ್, ಸಂಘದ ಮಲ್ಲ ಗರ‍್ಕಾರ‍್ಲು ಗಣೇಶ್ ಜಿ ಬಂಗೇರ, ಯುವವಾಹಿನಿದ ಅಧ್ಯಕ್ಷೆರ್ ರವಿ ಜೆ. ಅಮೀನ್ ಮಿತ್ರ‍್ಮೆಡ್ ಉಪ್ಪುವೆರ್.
ಮಾನಾದಿಗೆದ ಮಣೆಟ್ಟ್ ಸಮಾಜಸೇವಕೆರಾಯಿನ ಜೈಕೃಷ್ಣ ಬಿ. ಕೋಟ್ಯಾನ್, ತುಳು ಭೀಷ್ಮೆ ಪ್ರಶಸ್ತಿ ಪಡೆತಿನ ನಿರೂಪಕೆ ನವೀನ್ ಎಡ್ಮೆಮಾರ್ ಮೊಕ್ಲೆಗ್ ಸಮ್ಮನ ಬಲ್ಮನ ಮಲ್ಪರೆ ಉಂಡು. ಅಂಚೆನೆ ಎಸ್‌ಎಸ್‌ಎಲ್‌ಸಿ ಬೊಕ್ಕ ಪಿಯುಸಿ ಪರೀಕ್ಷೆಡ್ ಶೇ.೮೫ ರ‍್ದ್ ಎಚ್ಚ ಮಾರ್ಕ್ಸ್ ದೈದಿನಕ್ಲೆಗ್ ವಿದ್ಯಾರ್ಥಿ ವೇತನ ಕೊರಿಯರೆ ಉಂಡು. ಅಂಚೆನೆ ನಲಿಕೆದ ಕಲಟ್ಟ್ ಬಿಲ್ಲವ ಸಂಘ ಬೊಕ್ಕ ಯುವವಾಹಿನಿದ ಕಲಾವಿದೆರರ‍್ದ್ ತುಳು ನಲಿಕೆ ಬೊಕ್ಕ ಕುಸೆಲ್ದ್ ಕೂಟ ನಡಪರೆ ಉಂಡು.
ಈ ಲೇಸ್‌ಗ್ ನಿಕ್ಲೆನ್ ಮಾತೆರೆನ್ಲ ಎದ್ಕೊನುವ ಪಂದ್ ಬಿಲ್ಲವ ಸಂಘ ಹಳೆಯಂಗಡಿ, ಕಟ್ವಾಣ ಸಮಿತಿ ಬೊಕ್ಕ ಹಳೆಯಂಗಡಿ ಯುವವಾಹಿನಿದ ಅಧಕ್ಷೆರ್ ಬೊಕ್ಕ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ಬಿನ್ನಾಪು ಮಲ್ದೆರ್

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಮುಲ್ಕಿ ರಪಕ್ಕ ಸುದ್ದಿ Flash News

ಕೆಳೆಂಜಿರ್ದ್ ದಿಂಜಿದ್ ಪೊತ್ಂಡ್ ನೀರುಡೆ: ಕೋರಿ ಫಾರಂದ ಮಿತ್ತ್ ಬೆಚ್ಚ ಆಯಿನ ಗ್ರಾಮಸ್ಥೆರ್

Jul 28, 2026

ಮೂಲ್ಕಿ: ಕಲ್ಲ ಮುಂಡ್ಕೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿದ ನೀರುಡೆ ಗ್ರಾಮದ ಅಮ್ನಿ ಕೋಡಿ ಪ್ರದೇಶಡ್ ಬೇನೊಂದು ಇಪ್ಪುನ ಕೋರಿ ಫಾರಂರ್ದ್ ಸಾರರ್ದ್ ಎಚ್ಚ ಕೆಳೆಂಜಿ ಸುರು ಆದ್ ಗ್ರಾಮಸ್ಥೆರೆನ ಜೀವನ ಅಸ್ತವ್ಯಸ್ತ ಆತ್ಂಡ್ ಪಂದ್ ಸ್ಥಳೀಯೆರ್ ಆರೋಪ ಮಲ್ದೆರ್.

ಫಾರಂರ್ದ್ ಬರೊಂದು ಇಪ್ಪುನ ಕೆಳೆಂಜಿ ಕಾಟರ್ದ್ ಸಾರ್ವಜನಿಕೆರ್ ಇಲ್ಲಲ್ ನೆಮ್ಮದಿರ್ದ್ ಇಪ್ಪೆರೆ ಸಾಧ್ಯ ಆವೊಂದು ಇಜ್ಜಿ. ಅಡಿಗೆ ಮಲ್ಪೆರೆ, ವನಸ್ ಮಲ್ಪೆರೆ, ಜೋಕ್ಲೆನ ವಿದ್ಯಾಭ್ಯಾಸ, ರಾತ್ರೆ ನಿದ್ರೆ ಸೇರಿನಂಚೆನೆ ದೈನಂದಿನ ಬದ್ಕೆ ಹಾಳಾತ್ಂಡ್ ಪಂದ್ ಗ್ರಾಮಸ್ಥೆರ್ ತೆರಿಪಾದೆರ್.

ನೆತ್ತೊಟ್ಟಿಗೆ ಫಾರಂರ್ದ್ ಬರೊಂದು ಇಪ್ಪುನ ದುರ್ವಾಸನೆರ್ದ್ ಪರಿಸರ ಮಾಲಿನ್ಯ ಆತ್ಂಡ್. ಉಸಿರಾಟ ಬೊಕ್ಕ ಸಾಂಕ್ರಾಮಿಕ ಸೀಕ್ ಪಸರುನ ಪೋಡಿಗೆ ಸುರು ಆತ್ಂಡ್ ಪಂದ್ ನಿವಾಸಿಲು ತೆರಿಪಾದೆರ್.

ಈ ಬಗ್ಗೆ ಕರಿನ ವರ್ಷನೇ ಗ್ರಾಮ ಪಂಚಾಯಿತಿ ಸದಸ್ಯೆರ್ ಬೊಕ್ಕ ಸ್ಥಳೀಯ ನಿವಾಸಿಲು ಅಪಗದ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿಗ್ (ಪಿಡಿಒ) ಬರೆದ್ ದೂರು ಸಂದಾಂಡಲ ಒವ್ವೇ ಕ್ರಮ ದೆತೊಂದಿಜೆರ್ ಪಂದ್ ಗ್ರಾಮಸ್ಥೆರ್ ಆರೋಪ ಮಲ್ದೆರ್. ಅಧಿಕಾರಿಲೆನ ನಿರ್ಲಕ್ಷ್ಯರ್ದ್ ಸಮಸ್ಯೆ ನನಾತ್ ಎಚ್ಚಾತ್ಂಡ್, ಸಾರ್ವಜನಿಕ ಆರೋಗ್ಯಗ್ ತೊಂದರೆ ಆತ್ಂಡ್ ಪಂದ್ ಪಂಡೆರ್.

ಕೋರಿ ಫಾರಂ ಕಾನೂನು ನಿಯಮಲೆನ್ ಉಲ್ಲಂಘನೆ ಮಲ್ತ್ ದ್, ಬೆನೊಂದು ಉಂಡು ಪಂದ್ ಆರೋಪ ಮಲ್ತಿನ ಗ್ರಾಮಸ್ಥೆರ್, ಆರೋಗ್ಯ ಇಲಾಖೆ, ಗ್ರಾಮ ಪಂಚಾಯಿತಿ ಬೊಕ್ಕ ಸಂಬಂಧಪಟ್ಟಿನ ಅಧಿಕಾರಿಲು ಕೂಡ್ಲೆ ಜಾಗೆ ಪರಿಶೀಲನೆ ನಡಪಾದ್, ಸಮಸ್ಯೆಗ್ ಕಾರಣ ಆಯಿನ ಫಾರಂನ ಮಿತ್ತ್ ಕಾನೂನು ಕ್ರಮ ದೆತೊನೊಡು ಪಂದ್ ಸಾರ್ವಜನಿಕೆರೆಗ್ ನೆಮ್ಮದಿದ ವಾತಾವರಣ ಕಲ್ಪಿಸಾವೊಡು ಪಂದ್ ಬೆಚ್ಚ ಆಯೆರ್.

ಸಾರ್ವಜನಿಕ ಆರೋಗ್ಯ ಬೊಕ್ಕ ಪರಿಸರ ಸಂರಕ್ಷಣೆದ ದೃಷ್ಟಿರ್ದ್ ಸಂಬಂಧಪಟ್ಟಿನ ಇಲಾಖೆಲು ಕೂಡ್ಲೆ ಸೂಕ್ತ ಕ್ರಮ ದೆತೊನೊಡು ಪಂದ್ ಗ್ರಾಮಸ್ಥೆರ್ ಒತ್ತಾಯ ಮಲ್ತೆರ್.

Religious & Cultural News ಮಾತ ಧರ್ಮದ ಸುದ್ದಿ ಊರ್ದ ಸುದ್ದಿ Regional News ಗೌಜಿ ಗಮ್ಮತ್ ದ ಸುದ್ದಿ | Events & Functions ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಪುತ್ತೂರ್ದ ಸುದ್ದಿ | Puttur News ರಪಕ್ಕ ಸುದ್ದಿ Flash News

ವಿಟ್ಲ ಸ್ವಸ್ತಿಕ್ ಫ್ರೆಂಡ್ಸ್ ಮೊಕ್ಲೆರ್ದ್ ಆಟಿಡೊಂಜಿ ಕೂಟ ಲೇಸ್

Jul 28, 2026

ವಿಟ್ಲ: ವಿಟ್ಲ ಸ್ವಸ್ತಿಕ್ ಫ್ರೆಂಡ್ಸ್ ಮೊಕ್ಲೆರ್ದ್ ಆಟಿಡೊಂಜಿ ಕೂಟ ಲೇಸ್ ವಿಟ್ಲದ ಪ್ರವಾಸಿ ಮಂದಿರಡ್ ನಡತ್ಂಡ್.

ಈ ಪೊರ್ತುಡು ವಿಟ್ಲದ ಆಪದ್ಭಾಂಧವೆರ್ ಅರ್ಪಿತ್ ಚಿಕನ್ ಸೆಂಟರ್ ದ ಮಾಲಕೆರ್ ಮುರಳಿ ವಿಟ್ಲ ಇಂಚಿಪ್ಪ ವಿಟ್ಲದ ಕೋಟಿಕೆರೆಟ್ಟ್ ಮಿಂದಿಯೆರೆ ಬಾರಂದೆ ಮುರ್ಕೊಂದು ಇತ್ತಿನ ಕೆಳಿಂಜದ ಒರಿ ಬೊಕ್ಕ ಬೈರಿಕಟ್ಟೆದ ರಡ್ಡ್ ಜೋಕ್ಲೆನ್ ರಕ್ಷಣೆ ಮಲ್ತಿನ ಮಹೇಶ ಗೌಡ ಬನ ಮೊಕ್ಲೆಗ್ ಸನ್ಮಾನ ಮಲ್ತೆರ್.

ಈ ಲೇಸ್ ಡ್ ಕುಡ್ಲ ಲೋಕಸಭಾ ಕ್ಷೇತ್ರದ ಮಾಜಿ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಪುತ್ತೂರ್ ವಿಜಯ ಸಾಮ್ರಾಟ್ ದ ಸ್ಥಾಪಕ ಅಧ್ಯಕ್ಷೆರ್ ಸಹಜ್ ರೈ ಬಲ್ಲಜ, ಮೈತ್ರೇಯಿ ಗುರುಕುಲದ ಜಗನ್ನಾಥ ಕಾಸ್ರೋಡು, ವಿಟ್ಲ ಪಟ್ಟಣ ಪಂಚಾಯಿತಿ ಅಧ್ಯಕ್ಷೆರ್ ಕರುಣಾಕರ ಗೌಡ ನಾಯ್ತೊಟ್ಟು, ಮಾಜಿ ಅಧ್ಯಕ್ಷೆರ್ ಅರುಣ್ ವಿಟ್ಲ, ಮಾಜಿ ಸ್ಥಾಯಿ ಸಮಿತಿದ ಅಧ್ಯಕ್ಷೆರ್ ರವಿಪ್ರಕಾಶ್, ಸ್ವಸ್ತಿಕ್ ಫ್ರೆಂಡ್ಸ್ ಅಧ್ಯಕ್ಷೆರ್ ತಾರಾನಾಥ, ಕಾರ್ಯದರ್ಶಿ ಆಕಾಶ್ ವಿಟ್ಲ, ಕೋಶಾಧಿಕಾರಿ ಚಂದ್ರಶೇಖರ್ ವಿಟ್ಲ, ಸದಸ್ಯೆರ್ ನಾಗೇಶ್ ಬಸವನಗುಡಿ, ಸುದರ್ಶನ್ ವಿಟ್ಲ, ರಿತೇಶ್, ಜೀವನ್, ರಂಜಿತ್, ರಾಹುಲ್ ಶೆಣೈ, ವಿಘ್ನೇಶ್, ಉತ್ತೇಜ್, ಆದರ್ಶ್, ದಯಾನಂದ, ವಿಶ್ವನಾಥ ಅಳಿಕೆ, ಶರತ್, ಮನೋಜ್, ಶ್ರೀನಿವಾಸ್ ಗೌಡ, ಮೋನಪ್ಪ ಗೌಡ, ಜತ್ತಪ್ಪ ಗೌಡ, ಹೃತಿಕ್, ಸುಬ್ರಹ್ಮಣ್ಯ, ನಿತೀಶ್, ಪ್ರೀತೇಶ್, ಪ್ರಕಾಶ್ ಪಾಲ್ ಪಡೆದಿತ್ತೆರ್.

ರಿತೇಶ್ ಎದ್ಕೊನಿಯೆರ್. ಹರೀಶ್ ವಿಟ್ಲ ಸೊಲ್ಮೆ ಸಂದಾದ್ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News ರಪಕ್ಕ ಸುದ್ದಿ Flash News

ಡಿ ಗ್ರೂಪು ಕೆಲಸಡ್ ಇಪ್ಪುನ ಪೊಂಜೋವುನ ಮಿತ್ತ್ ಲೈಂಗಿಕ ಕಿರುಕುಳ: ಎಪಿಎಂಸಿ ಜಂಟಿ ನಿರ್ದೇಶಕೆರ್ ಸಿ.ಎಚ್ ಮೋಹನ್ ಮಿತ್ತ್ ಕೇಸ್

Jul 28, 2026

ಡಿ ಗ್ರೂಪು ಕೆಲಸಡ್ ಇಪ್ಪುನ ಪೊಂಜೋವುನ ಮಿತ್ತ್ ಲೈಂಗಿಕ ಕಿರುಕುಳದ ಬಗ್ಗೆ ಆರೋಪಿಸಾದ್ ಎಪಿಎಂಸಿ ಜಂಟಿ ನಿರ್ದೇಶಕೆರ್
ಸಿ.ಎಚ್ ಮೋಹನ್ ನ್
ರಾಜ್ಯ ಹಿಂದುಳಿದ ವರ್ಗಲೆನ ಆಯೋಗದ ಸದಸ್ಯೆರ್ ಪ್ರತಿಭಾ ಬೊಕ್ಕ ಪೊಂಜೋವುಲು ಗಲಾಟೆಗ್ ದೆತೊಂದೆರ್.

ಕುಡ್ಲ ಬೈಕಂಪಾಡಿಡ್ ಇಪ್ಪುನ ಎಪಿಎಂಸಿ ಕಚೇರಿಗ್ ಪೋಯಿನ ಪ್ರತಿಭಾ ಡಿ.ಗ್ರೂಪ್ ದ ಪೊಂಜೋವು ಒರ್ತಿನ ಮಿತ್ತ್ ಲೈಂಗಿಕ ಕಿರುಕುಳ ಬಗ್ಗೆ ವಿಚಾರಣೆ ಮಲ್ದೆರ್. ಈ ಬಗ್ಗೆ ಮೋಹನ್ ಯಾನ್ ಇಡೇ ಮುಟ್ಟ ಅಂಚಿನ ಕೆಲಸ ಮಲ್ದಿಜಿ ಪಂದ್ ಪಂಡೆರ್. ನೆತ್ತ ಬಗ್ಗೆ ಸುಮಾರ್ 20 ನಿಮಿಷ ಪಾತೆರಕತೆ ನಡತ್ಂಡ್.

ಬೊಕ್ಕ ಮಾದ್ಯಮದೊಟ್ಟಿಗೆ ಪ್ರತಿಭಾ ಕುಳಾಯಿ ಪಾತೆರ್ದ್, ಕರಿನ ಸುಮಾರ್ ಸಮಯರ್ದಿಂಚ ಡಿ.ಗ್ರೂಪ್ ನೌಕೆರೆರಾಯಿನ ಪೊಂಜೋವುನೊಟ್ಟಿಗೆ ಮೋಹನ್ ಪೊಂಜೋವುನ ಮೈ‌ಮುಟ್ಟುದ್ ಅಸಭ್ಯ ವರ್ತನೆ ಮಲ್ದೆರ್, ಮೋಹನ್ ಕೆಲವು ವರ್ಷೊದಿಂಚ ಮುಲ್ಪ ಕೆಲಸ ಮಲ್ತೊಂದು ಉಲ್ಲೆರ್.

ಒಂಜಿ ಸರ್ತಿ ವರ್ಗಾವಣೆಯಾದ್ ಬೇತೆ ಕಡೆಕ್ಕ್ ಪೋದಿತ್ತೆರ್. ಬೊಕ್ಕ ಕುಡ ಇಡೇಗೆ ವಾಪಾಸಾತೆರ್, ಬೇತೆ ಕಡೆಕ್ಕ್ ವರ್ಗಾವಣೆ ಆಪುನೆಕ್ಕ್ ದುಂಬುಲು ಈ ಪೊಂಜೋವುಗ್ ಲೈಂಗಿಕ ಕಿರುಕುಳ ಕೊರೊಂದು ಇತ್ತೆರ್. ಆಂಡ ದೂರು ಕೊರಿಯೆರೆ ಈ ಪೊಂಜೋವು ಪಿರ ಜರೊಂದು ಇತ್ತೆರ್, ಸುಕ್ರಾರ ಕಿರುಕುಳ ಕೊರೊಂದು ಇತ್ತಿನ ಪೊಂಜೋವುಗ್ ಎಂಕ್ ಸಹಕಾರ ಮಲ್ಪೊಡು, ನೆಕ್ಕ್ ಒಪ್ಪುಂಡ, ಸೋಮಾರ ಪಚ್ಚೆ ಸೀರೆ ತೂತ್ತೊಂದು ಬರೊಡು ಪಂದ್ ಪಂತೆರ್, ಈ ಬಗ್ಗೆ ಇನಿ ಬಯ್ಯಗ್ ಪೋಲೀಸ್ ಠಾಣೆಗ್ ದೂರು ಕೊರ್ತುಂಡು ಪಂದ್ ಪಂಡೆರ್.