beautyoftulunaad

ಸಂಸ್ಕಾರ ದಿಂಜಿನ ಹಿಂದೂ ಸಮಾಜನ್ ಕಟ್ಟರೆ ಗಣೇಶೋತ್ಸವ ಪ್ರೇರಣೆ

Sep 17, 2026

ಬಂಟ್ಸ್ ಹಾಸ್ಟೆಲ್ ಗಣೇಶೋತ್ಸವದ 3 ನೇ ದಿನತ್ತ ಧಾರ್ಮಿಕ ಸಭೆ

ಕುಡ್ಲ : “ಸಂಸ್ಕಾರ ದಿಂಜಿನ ಹಿಂದೂ ಸಮಾಜನ್ ಒಟ್ಟು ಪಾಡರೆ ಗಣೇಶೋತ್ಸವ ಒಂಜಿ ಪ್ರೇರಣೆ. ಬಂಟ್ಸ್ ಹಾಸ್ಟೆಲ್‌ಡ್ ನಡಪುನ ಶ್ರೀ ಗಣೇಶೋತ್ಸವ ಶಿಸ್ತುಬದ್ದವಾದ್ ನಡತೊಂದು ಬತ್ತ್‌ದ್ ಮಾತೆರೆಗ್ಲ ಮಾದರಿ ಆದುಂಡು. ಶಾಸಕೆರಾದ್ ಯಾನ್ ಬಂಟ ಸಮಾಜದೊಟ್ಟಿಗೆ ಉಪ್ಪುವೆ. ಈ ಸಮಾಜದ ಋಣ ಎಂಕ್ ಉಂಡು” ಪಂದ್ ಮಂಗಳೂರು ದಕ್ಷಿಣ ಕ್ಷೇತ್ರದ ಶಾಸಕೆರ್ ವೇದವ್ಯಾಸ ಕಾಮತ್ ತೆರಿಪಾಯೆರ್.
ಬಂಟರ ಯಾನೆ ನಾಡವರ ಮಾತೃ ಸಂಘ, ಶ್ರೀ ಸಿದ್ದಿವಿನಾಯಕ ಪ್ರತಿಷ್ಠಾನ ಬೊಕ್ಕ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಆಶ್ರಯಡ್ ಬಂಟ್ಸ್ ಹಾಸ್ಟೆಲ್‌ಡ್ ನಡತಿನ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಾರಂಭಡ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್.
ಕುಡೊರಿ ಬಿನ್ನೆ ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ ಪಾತೆರ್ದ್, ರೋಗ ರುಜಿನ ದೂರ ಮಲ್ಪರೆ, ಜೀವನಡ್ ಶಾಂತಿ ನೆಮ್ಮದಿ ಪಡೆವರೆ ಗಣಪತಿ ದೇವೆರ್ನ ಆರಾಧನೆ ಅಗತ್ಯ ಪಂದ್ ಪಂಡೆರ್.
ಲೇಸ್‌ಡ್ ಮಾಜಿ ಸಂಸದೆರ್ ನಳಿನ್ ಕುಮಾರ್ ಕಟೀಲು, ಬಂಟರ ಯಾನೆ ನಾಡವರ ಮಾತೃ ಸಂಘದ ಅಧ್ಯಕ್ಷೆರ್ ಕೆ ಅಜಿತ್ ಕುಮಾರ್ ರೈ ಮಾಲಾಡಿ, ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಅಧ್ಯಕ್ಷೆರ್ ಜಯಶೀಲ ಅಡ್ಯಂತಾಯ ಅಡ್ಯಾರ್ ಗುತ್ತು, ಸಂಘದ ಉಪಾಧ್ಯಕ್ಷೆರ್ ಹೇಮನಾಥ ಶೆಟ್ಟಿ ಕಾವು, ಪ್ರಧಾನ ಕಾರ್ಯದರ್ಶಿ ಎಂ ಕರುಣಾಕರ ಶೆಟ್ಟಿ, ಕೋಶಾಧಿಕಾರಿ ಸಿಎ ರಾಮ್ ಮೋಹನ್ ರೈ, ಜೊತೆ ಕಾರ್ಯದರ್ಶಿ ಪದ್ಮನಾಭ ಶೆಟ್ಟಿ ಪುಂಚಮೆ, ಉದ್ಯಮಿ ಸುಯೋಗ್ ಶೆಟ್ಟಿ, ಮಾಜಿ ಸಚಿವ ಬಿ ನಾಗರಾಜ ಶೆಟ್ಟಿ, ಡಾ ಸತ್ಯ ಕೃಷ್ಣ ಭಟ್, ರಘುರಾಮ ಭಟ್, ಪ್ರದೀಪ್ ಕುಮಾರ್ ಕಲ್ಕೂರ, ವಿವಿಧ ಬಂಟರ ಸಂಘದ ಪದಾಧಿಕಾರಿಲಾಯಿನ ರತ್ನಾಕರ್ ಶೆಟ್ಟಿ ಎಕ್ಕಾರ್, ಅಶೋಕ್ ಶೆಟ್ಟಿ ಮುಲ್ಕಿ, ಜಯರಾಮ‌ ಬೆಳ್ತಂಗಡಿ, ಮಹಾಬಲ ಚೌಟ,
ವಿಜಯ ಶೆಟ್ಟಿ ಕಾರ್ಕಳ
ಶ್ರೀ ಗಣೇಶೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ಸದಾಶಿವ ಶೆಟ್ಟಿ ಬಿಜೈ ಮೊಕುಲು ಮಾತ ಇತ್ತೆರ್. ಈ ಪೊರ್ತುಡು ವೇದಮೂರ್ತಿ ಡಾ. ಸತ್ಯ ಕೃಷ್ಣ ಭಟ್ ಮೆರೆಗ್ ಸನ್ಮಾನ ಮಲ್ತೆರ್.
ಅಜಿತ್ ಕುಮಾರ್ ರೈ ಮಾಲಾಡಿ ಬಿನ್ನೆರೆನ್ ಎದ್ಕೊಂಡೆರ್. ಉಲ್ಲಾಸ್ ಆರ್ ಶೆಟ್ಟಿ ಪೆರ್ಮುದೆ ಸೊಲ್ಮೆ ಸಂದಾಯೆರ್. ಕಿರಣ್ ಪಕ್ಕಳ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.

ವೈಭವದ ಶೋಭಾಯಾತ್ರೆ

ಶ್ರೀ ಸಿದ್ದಿವಿನಾಯಕ ದೇವೆರ್‌ನ ಮೂರ್ತಿದ ಶೋಭಾಯಾತ್ರೆಗ್ ಉದ್ಯಮಿ ಸುಯೋಗ್ ಶೆಟ್ಟಿ ಚಾಲನೆ ಕೊರಿಯೆರ್. ಬಯ್ಯಡ್ 5 ಗಂಟೆಗ್ ಮೂರ್ತಿ ವಿಸರ್ಜನೆ ಪೂಜೆ ನಡತ್ಂಡ್. ಶೋಭಾಯಾತ್ರೆ ಓಂಕಾರ ನಗರರ್ದ್ ಶ್ರದ್ಧಾಭಕ್ತಿಡ್ ಜಿಲ್ಲೆದ ವಿವಿಧ ಭಜನಾ ತಂಡದ ಸೇವೆದ ಒಟ್ಟುಗು ಬಂಟ್ಸ್ ಹಾಸ್ಟೆಲ್ ಸರ್ಕಲ್, ಪಿವಿಎಸ್ ಸರ್ಕಲ್, ನ್ಯೂಚಿತ್ರಾ ಟಾಕೀಸ್, ರಥಬೀದಿ, ವೆಂಕಟರಮಣ ದೇವಸ್ಥಾನದ ಮಾರ್ಗೊಡು ಪೋದು ಶ್ರೀ ಮಹಮ್ಮಾಯಿ ದೇವಸ್ಥಾನದ ಕೆರೆಟ್ಟ್ ಸಿದ್ಧಿವಿನಾಯಕ ದೇವೆರೆನ ಮೂರ್ತಿನ್ ವಿಸರ್ಜನೆ ಮಲ್ತೆರ್.

ಊರುದ ಕೆಲಸ | Regional Jobs ಕಾಸ್ರೋಡ್ ಸುದ್ದಿ | Kasargod News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಜೈ ತುಲುನಾಡ್ ರಿ ಕಾಸ್ರೋಡು ಎಗ್ಗೆ ಮಧೂರು ದೇವಲ್ಯಡ್ ತುಲು ಲಿಪಿ ಪುದರ್ ಪಲವೆ ಪಾಡ್ಯೆರ್ ಬಿನ್ನಯ

Sep 17, 2026

ತುಳುನಾಡ್ ದ ಕುಂಬ್ಳೆ ಸೀಮೆದ ಪ್ರಧಾನ ನಾಲ್ ದೇವಲ್ಯಲೆಡ್ ಒಂಜಾಯಿನ ಮಧೂರು ಸಿಧ್ಧಿವಿನಾಯಕ ಮದನಂತೇಶ್ವರ ದೇವಲ್ಯ ದ ಪುದರ್ ಪಲವೆಡ್ ತುಲುಲಿಪಿ ಪಾಡೊಡು ಪಂದ್ ದೇವಲ್ಯ ದ ಕೇರಳ ದೇವಸ್ವಂ ಬೋರ್ಡ್ ದ ಎಕ್ಸಿಕ್ಯೂಟಿವ್ ಕಛೇರಿಡ್ ಜೈತುಲುನಾಡ್ ರಿ ಕಾಸ್ರೊಡು ಎಗ್ಗೆದ ಮುತಾಲಿಕೆಡ್ ಬಿನ್ನಯದೋಲೆ ಕೈಪಗರ್ಂಡ್. ತಾರೀಕ್ 17.09.2026 ಗುರುವಾರದಾನಿ ನಡತಿನ ಈ ಕಜ್ಜ ಡ್ ಎಗ್ಗೆದ ಗುರ್ಕಾರ್ಲು ಉತ್ತಮ ಉರ್ಲಿತ್ತಡ್ಕ ಕಾರ್ಯಂತೆರ್ ಕೃಷ್ಣ ಪ್ರಸಾದ್ ಕಿದೂರು ಮುತಾಲಿಕೆಡ್ ವೈಸೊಂಡೆರ್ ಹರಿಕಾಂತ್ ಕಾಸ್ರೋಡ್, ಪ್ರವೀಶ್ ಕುಲಾಲ್ ಬೀರಿಕುಂಜ ರಮೇಶ್ ಅಟ್ಟೆಗೋಳಿ ಈ ಪೊರ್ತುಡು ಉಪಸ್ಥಿತರಿತ್ತೆರ್.

ಉರ್ವಸ್ಟೋರ್ ಶ್ರೀ ಶಾರದಾ ಪೂಜಾ ಸಮಿತಿದ 54ನೇ ವರ್ಷೊದ ಶ್ರೀ ಶಾರದಾ ಪೂಜಾ ಮಹೋತ್ಸವ

Sep 16, 2026

ಕುಡ್ಲ: ಉರ್ವಸ್ಟೋರ್ ಶ್ರೀ ಶಾರದಾ ಪೂಜಾ ಸಮಿತಿ (ರಿ.) ದ ಮುತಾಲಿಕೆಡ್ 54ನೇ ವರ್ಷೊದ ಶ್ರೀ ಶಾರದಾ ಪೂಜಾ ಮಹೋತ್ಸವ ಅ.16-19 ಮುಟ್ಟ ಉರ್ವಸ್ಟೋರ್ ಜಂಕ್ಷನ್‌ದ ಮಾನಸ ಮಂಟಪದ ಕೈತಲ್ ಬೇತೆ ಬೇತೆ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಲೇಸ್ ದೊಟ್ಟಿಗೆ ಗೌಜಿಡ್ ನಡಪರೆ ಉಂಡು.

ಅ.16 ಸುಕ್ರಾರ ಬೊಲ್ಪುಗು ಶ್ರೀ ಶಾರದಾ ದೇವಿನ ಪ್ರತಿಷ್ಠೆ ನಡಪುಂಡು. ಬೊಕ್ಕ ಚಂಡಿಕಾ ಹೋಮ, ಸಹಸ್ರ ಕುಂಕುಮಾರ್ಚನೆ ಬೊಕ್ಕ ಸಾರ್ವಜನಿಕ ಅನ್ನಸಂತರ್ಪಣೆ ನಡಪರೆ ಉಂಡು. ಬಯ್ಯಗ್ ಕುಳಾಯಿ ಕಲಾಕುಂಭ ಮೊಕ್ಲೆನ ಮುತಾಲಿಕೆಡ್ ‘ಪರಮಾತ್ಮ ಪಂಜುರ್ಲಿ’ ಪನ್ಪಿನ ತುಳು ಪೌರಾಣಿಕ ನಾಟಕ ಪ್ರದರ್ಶನ ಆಯೆರೆ ಉಂಡು.

ಅ.17 ಸನಿಯಾರ ಧಾರ್ಮಿಕ ಸಭಾ ಲೇಸ್ ನಡಪುಂಡು. ಶಾರದಾ ವಿದ್ಯಾಪೀಠದ ವಿದ್ಯಾರ್ಥಿಲೆರ್ದ್ ವೈವಿಧ್ಯಮಯ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.

ಅ.18 ಐತಾರ ಬಯ್ಯಗ್ ಉರ್ವಸ್ಟೋರ್ ಶಾರದಾ ಯಕ್ಷಕಲಾಕೇಂದ್ರದ ಮುತಾಲಿಕೆಡ್ ಯಕ್ಷಗಾನ ಪ್ರದರ್ಶನ ನಡಪರೆ ಉಂಡು.

ಮಹೋತ್ಸವದ ನಾಲ್ ದಿನಟ್ಟ್ ಇಸೇಸ ಪೂಜೆ, ಅಕ್ಷರಾಭ್ಯಾಸ ಬೊಕ್ಕ ಎಪೊಲ ಭಜನೆ ನಡಪರೆ ಉಂಡು.

ಅ.19 ಸೋಮಾರ ಬಯ್ಯಗ್ ಶ್ರೀ ಶಾರದಾ ಮಾತೆದ ವೈಭವದ ಶೋಭಾಯಾತ್ರೆ ಉರ್ವಸ್ಟೋರ್–ಕೊಟ್ಟಾರ– ಅಶೋಕನಗರ–ಶೇಡಿಗುರಿ ಮಾರ್ಗವಾದ್ ಬರ್ಪುಂಡು. ಉರ್ವಸ್ಟೋರ್ ಟ್ಯಾಕ್ಸಿ ಬೊಕ್ಕ ಮ್ಯಾಕ್ಸಿ ಕ್ಯಾಬ್, ಮಾನಸ ಫ್ರೆಂಡ್ಸ್, ಕುಡ್ಲ ಟೀಮ್ ಸನಾತನ ಮೊಕ್ಲೆನ ಮುತಾಲಿಕೆಡ್ ವೈವಿಧ್ಯಮಯ ದೃಶ್ಯರೂಪಕಲು, ಚೆಂಡೆ ಬೊಕ್ಕ ಬೇತೆ ಬೇತೆ ವಾದ್ಯಲೆನ ಘೋಷದೊಟ್ಟಿಗೆ ಗೌಜಿಡ್ ನಡಪರೆ ಉಂಡು.

ಬೊಕ್ಕ ದಂಬೆಲ್ ಸುದೆ ಬರಿಟ್ಟ್ ಜನಸೇವಾ ಸಮಿತಿದಕ್ಲೆನ ಒಟ್ಟುಸೇರಿಗೆಡ್ ಶ್ರೀ ಶಾರದಾ ದೇವಿನ ಜಲಸ್ತಂಭನ ಲೇಸ್ ನಡಪರೆ ಉಂಡು.

ಈ ಧಾರ್ಮಿಕ ಬೊಕ್ಕ ಸಾಂಸ್ಕೃತಿಕ ಮಹೋತ್ಸವಗ್ ಭಕ್ತಾಭಿಮಾನಿಲು ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಶ್ರೀ ಶಾರದಾ ಮಾತೆನ ದರ್ಶನ ಪಡೆದ್, ಪ್ರಸಾದ ದೆತೊಂದು ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ತೆರಿಪಾದೆರ್.

ಬಂಟ್ಸ್ ಹಾಸ್ಟೆಲ್ : ಗಣೇಶೋತ್ಸವ ಉದಿಪನ

Sep 15, 2026

ಕುಡ್ಲ : “ಬಂಟ್ಸ್ ಹಾಸ್ಟೆಲ್‌ಡ್ ಸಿದ್ಧಿ ವಿನಾಯಕ ಪ್ರತಿಷ್ಠಾನದ ಗಣೇಶೋತ್ಸವ ಭಾರಿ ಶ್ರದ್ಧಾ ಭಕ್ತಿಡ್ ವ್ಯವಸ್ಥಿತವಾದ್ ನಡತೊಂದುಂಡು. ಈ ಗಣೇಶೋತ್ಸವ ಉದಿಪನ ಮಲ್ಪುನ ಯೋಗ ಸತತ 2ನೇ ಸರ್ತಿ ಎಂಕ್ ಒದಗಿ ಬೈದಿನಿ ಎನ್ನ ಸುದೈವ” ಪಂದ್ ದ.ಕ. ಜಿಲ್ಲಾಧಿಕಾರಿ ದರ್ಶನ್ ಎಚ್.ವಿ. ಪಂಡೆರ್.
ಆರ್ ಬಂಟರ ಯಾನೆ ನಾಡವರ ಮಾತೃ ಸಂಘ, ಶ್ರೀ ಸಿದ್ಧಿವಿನಾಯಕ ಪ್ರತಿಷ್ಠಾನ ಬೊಕ್ಕ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಆಶ್ರಯಡ್ ಬಂಟ್ಸ್ ಹಾಸ್ಟೆಲ್‌‌ಡ್ ನಡಪುನ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಉದಿಪನ ಮಲ್ತ್ ಪಾತೆರಿಯೆರ್.
ಮಲ್ಲ ಬಿನ್ನೆರಾದ್ ಬೈದಿನ ಸಂಸದೆರ್ ಕ್ಯಾ.ಬ್ರಿಜೇಶ್ ಚೌಟ ಪಾತೆರ್ದ್, ಪ್ರಧಾನ ಮಂತ್ರಿಲೆನ ಸ್ವಚ್ಛ ಭಾರತದ ಆಶಯದಂಚ ಪರಿಸರಗ್ ಪೂರಕವಾದ್ ಮಾತಾ ಗಣೇಶೋತ್ಸವಲ ನಡಪಡ್ ಪಂದ್ ಪಂಡೆರ್.
ಧ್ವಜಾರೋಹಣ ಮಲ್ತ್ ಪಾತೆರ್ನ ಗ್ರೂಪ್ ಕ್ಯಾಪ್ಟನ್ ಎಸ್. ಎಂ. ಅಡ್ಯoತಾಯೆರ್ ಪಾತೆರ್ದ್, ಬಂಟ ಸಮುದಾಯಗ್ ಶ್ರೀಮಂತ ಪರಂಪರೆದ ಹಿನ್ನೆಲೆ ಇತ್ತ್‌ದ್, ಶಿಕ್ಷಣ, ಆಡಳಿತ, ವೈದ್ಯಕೀಯ,ಕಾನೂನು ಇಂಚಿನ ಕ್ಷೇತ್ರಡ್ ಸಮಾಜಗ್ ಮಲ್ಲ ಕೊಡುಗೆ ಕೊರ್ತೆರ್ ಪಂದ್ ಪಂಡೆರ್.
ಮಾತೃ ಸಂಘದ ಮಾಜಿ ಉಪಾಧ್ಯಕ್ಷೆರ್ ರವೀಂದ್ರನಾಥ ಜಿ ಹೆಗ್ಡೆ ಬೊಕ್ಕ ನಳಿನಿ ಆರ್ ಹೆಗ್ಡೆ ಕೊರಲ್ ಪಟ್ಟಿಯೆರ್.
ಬಿನ್ನೆರಾದ್ ಗೀತಾ ಅಡ್ಯoತಾಯ, ಮಾಳವಿಕಾ ಜಯಾನಂದ್, ದಂಬೆಕಾನ ಸದಾಶಿವ ರೈ, ಪದ್ಮನಾಭ ರೈ, ಬಜಪೆ ಬಂಟರ ಸಂಘದ ಅಧ್ಯಕ್ಷೆರ್ ವೇಣುಗೋಪಾಲ್ ಶೆಟ್ಟಿ, ಜಪ್ಪಿನಮೊಗರು ಬಂಟರ ಸಂಘದ ಅಧ್ಯಕ್ಷೆರ್ ಜೆ ಸತ್ಯಪ್ರಸಾದ್ ಶೆಟ್ಟಿ, ಶೇಖರ ಶೆಟ್ಟಿ ಗಣೇಶೋತ್ಸವ ಸಮಿತಿ ಕಾರ್ಯದರ್ಶಿ ಸದಾಶಿವ ಶೆಟ್ಟಿ ಬಿಜೈ ಪಾಲ್ ಪಡೆದಿತ್ತೆರ್.
ಬಂಟರ ಯಾನೆ ನಾಡವರ ಮಾತೃ ಸಂಘದ ಅಧ್ಯಕ್ಷೆರ್ ಅಜಿತ್ ಕುಮಾರ್ ರೈ ಮಾಲಾಡಿ ಸ್ವಾಗತ ಮಲ್ತೆರ್. ಗಣೇಶೋತ್ಸವ ಸಮಿತಿಯ ಅಧ್ಯಕ್ಷೆರ್ ಜಯಶೀಲ ಅಡ್ಯoತಾಯ ಅಡ್ಯಾರುಗುತ್ತು ಸೊಲ್ಮೆ ಸಂದಾಯೆರ್. ಭಾಗ್ಯರಾಜ್ ಶೆಟ್ಟಿ ಹರೇಕಳ ನಿರೂಪಣೆ ಮಲ್ತೆರ್. ಈ ಸಂದರ್ಭಡ್ ಜಿಲ್ಲಾಧಿಕಾರಿ ದರ್ಶನ್ ದಂಪತಿಲೆನ್ ಬೊಕ್ಕ ಬಾಲ ಸಂಗೀತ ಪ್ರತಿಭೆ ಅಚಿಂತ್ಯ ರೈ ಮೊಕ್ಲೆನ್ ಮಾನಾದಿಗೆ ಮಲ್ತೆರ್.

ಉಡುಪಿದ ಸುದ್ದಿ | Udupi News ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಸೆ.19 : ಬಸ್ರೂರು ಶ್ರೀ ತುಳುವೇಶ್ವರ ಲಿಂಗೊಗು 12 ಜ್ಯೋತಿರ್ಲಿಂಗ ಕ್ಷೇತ್ರದ ತೀರ್ಥಾಭಿಷೇಕ, ಪ್ರಶ್ನಾಚಿಂತನೆ

Sep 15, 2026

ಬಸ್ರೂರು: ಬಸ್ರೂರು ಶ್ರೀ ತುಳುವೇಶ್ವರ ದೇವಸ್ಥಾನದ ತುಳುವೇಶ್ವರಿ ಮೂಲದೇವಿನ ಅಷ್ಟಮಂಗಲ ಪ್ರಶ್ನೆ ಚಿಂತನೆದ ಅಂಗವಾದ್ ಸೆ. 19 ಬೊಕ್ಕ 20 ತಾರೀಕ್‌ಗ್ ವಿವಿಧ ಧಾರ್ಮಿಕ ಕಾರ್ಯಕ್ರಮ ನಡಪರೆ ಉಂಡು.
ಸೆ.19 ಶನಿವಾರ ಕಾಂಡೆ 9-10 ಗಂಟೆ ಮುಟ್ಟ ಶ್ರೀ ತುಳುವೇಶ್ವರ ದೇವೆರ್‌ನ ಲಿಂಗೊಗು 12 (ದ್ವಾದಶ) ಜ್ಯೋತಿರ್ಲಿಂಗದ ಪವಿತ್ರ ತೀರ್ಥ ಮೈತ್‌ದ್ ವಿಶೇಷ ತೀರ್ಥಾಭಿಷೇಕ ನಡಪರೆ ಉಂಡು.
ತುಳುವರ್ಲ್ಡ್ ಫೌಂಡೇಶನ್ ಸದಸ್ಯೆರಾಯಿನ ನಿತಿನ್ ಪೂಜಾರಿ, ಅಜಯ್ ದೇವಾಡಿಗ, ರಿತೇಶ್ ಬೊಕ್ಕ ಬಸಂತ್ ಮೊಕುಲು ಸುಮಾರ್ 48 ದಿನ ಅಕ್ಲೆನನೇ ಗಾಡಿಡ್ ದ್ವಾದಶ ಜ್ಯೋತಿರ್ಲಿಂಗ ಕ್ಷೇತ್ರದ ಯಾತ್ರೆ ಮಲ್ತ್‌ದ್, ಮಾತಾ ಜ್ಯೋತಿರ್ಲಿಂಗದ ದರ್ಶನ ಪಡೆದ್ ಪವಿತ್ರ ತೀರ್ಥ ಸಂಗ್ರಹ ಮಲ್ತ್‌ದ್ ಬಸ್ರೂರುಗು ಕನದೆರ್. ಈ ತೀರ್ಥನ್ ಶ್ರೀ ತುಳುವೇಶ್ವರ ದೇವೆರೆಗ್ ಅಭಿಷೇಕದ ಒರುಟ್ಟು ಸಮರ್ಪಣೆ ಮಲ್ಪರೆ ಉಂಡು.ಈ ವಿಶೇಷ ತೀರ್ಥಾಭಿಷೇಕನ್ ನೀಲೇಶ್ವರದ ತಂತ್ರಿಲಾಯಿನ ಅರವತ್ತ್ ಬ್ರಹ್ಮಶ್ರೀ ಪದ್ಮನಾಭ ತಂತ್ರಿಲು ಮಲ್ಪರೆ ಉಲ್ಲೆರ್. ತೀರ್ಥಾಭಿಷೇಕ ಆಯಿ ಬೊಕ್ಕ ತುಳುವೇಶ್ವರಿ ಮೂಲದೇವಿನ ಅಷ್ಟಮಂಗಲ ಪ್ರಶ್ನೆ ಚಿಂತನೆ ನಡಪರೆ ಉಂಡು.
ಉಂದುವೇ ಸಂದರ್ಭಡ್ ತುಳುನಾಡ್‌ದ ಭಾಷೆ, ಸಂಸ್ಕೃತಿ ಬೊಕ್ಕ ಧಾರ್ಮಿಕ ಪರಂಪರೆದ ಬೆಳವಣಿಗೆಲ ಮಹತ್ವ ಪಡೆತ್ಂಡ್. ಸೆ. 18ಗು ಕುಡ್ಲಡ್ ನಡಪುನ ಸಚಿವ ಸಂಪುಟ ಸಭೆ, ಅಂಜಾರು ರಾಮಣ್ಣ ಹೆಗ್ಡೆ ಬೊಕ್ಕ ಎಸ್.ಯು. ಪಣಿಯಾಡಿ ಮೊಕ್ಲೆನ ತುಳುವ ಚಳುವಳಿದ ಶತಮಾನೋತ್ಸವ, ಸೆ.23ರ್ದ್ ನಡಪುನ ತುಳುವ ಮಹಾಸಭೆತ್ತ 99ನೇ ವರ್ಷಾಚರಣೆ ಅಂಚೆನೆ 19 ದೇಶಗ್ ತುಳುವ ಮಹಾಸಭೆತ್ತ ಕಾರ್ಯವ್ಯಾಪ್ತಿ ವಿಸ್ತರಣೆ ಆಯಿನಿ ತುಳು ನುಡಿ ಬೊಕ್ಕ ಸಂಸ್ಕೃತಿದ ಪುನರ್‌ವೈಭವದ ವ್ಯಾಪ್ತಿನ್ ತೊಜಪಾವುಂಡು.
ಈ ಹಿನ್ನೆಲೆಡ್ ಸಮಸ್ತ ತುಳುನಾಡ್‌ದ ಜನಕುಲು ಶ್ರೀ ತುಳುವೇಶ್ವರ–ತುಳುವೇಶ್ವರಿ ಭಕ್ತೆರ್ ಸೆ. 19ಗು ಬಸ್ರೂರುಗು ಬತ್ತ್‌ದ್ ಈ ಧಾರ್ಮಿಕ ಲೇಸ್‌ಡ್ ಪಾಲ್ ಪಡೆವೊಡು ಪಂದ್ ತುಳುವರ್ಲ್ಡ್ ಫೌಂಡೇಶನ್ ನಿರ್ದೇಶಕೆರ್ ಡಾ. ರಾಜೇಶ್ ಕೃಷ್ಣ ಆಳ್ವ ಬಿನ್ನಾಪು ಮಲ್ದೆರ್.

ಊರ್ದ ಸುದ್ದಿ Regional News ಕಾರ್ಲದ ಸುದ್ದಿ Karkala News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಕಾರ್ಲಡ್ ಸೆ. 13 ಕ್ ‘ತೌಳವ ಯಕ್ಷಾಯನ’

Sep 9, 2026

ಕಾರ್ಲ, ಸೆ. 09: ತುಳು ಭಾಷೆ, ಸಂಸ್ಕೃತಿ, ಸಾಹಿತ್ಯ ಇತಿಹಾಸೊದ ಒರಿಪು ಬುಲೆಪುಗು ಬೆನ್ಪುನ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ (ರಿ.) ದ ಕಡೆರ್ದ್ ಉಂದೇ ಬರ್ಪುನ ಐತಾರ ಸೆಪ್ಟೆಂಬರ್ 13 ಕ್ ಕಾರ್ಲದ ಶ್ರೀ ವೇಣುಗೋಪಾಲಕೃಷ್ಣ ಸಭಾಭವನೊಡು ಮದ್ಯಾನ 2 ಗಂಟೆರ್ದ್, ತುಳು ಯಕ್ಷಗಾನ ಬುಲೆದ್ ಬತ್ತಿನ ಸಾದಿದ ಪೊಲಬು ಮಲ್ತ್ ಕೊರ್ಪುನ ‘ತೌಳವ ಯಕ್ಷಾಯನ’ ಲೇಸ್ ನಡಪರೆಗುಂಡು.

ಈ ಕಾರ್ಯಕ್ರಮೊಡು ಪೆರಿಯ ಯಕ್ಷಗಾನ ಕಲಾವಿದೆರ್ ಕೊಳ್ತಿಗೆ ನಾರಾಯಣ ಗೌಡೆರ್ ‘ತುಳು ಯಕ್ಷಗಾನ ಬುಲೆದ್ ಬತ್ತಿನ ಸಾದಿ’ ಪನ್ಪಿ ವಿಷಯೊದ ಬಗೆಟ್ ಪನ್ಯಾಸ ಕೊರ್ಯೆರ ಉಲ್ಲೆರ್.

ಕೇಮಾರ್ ಸಾಂದೀಪನಿ ಮಠೊತ ಶ್ರೀ ಈಶವಿಠ್ಠಲದಾಸ ಸ್ವಾಮಿಲು ಆಶೀರ್ವಚನ ಕೊರ್ಯೆರ ಉಲ್ಲೆರ್. ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ದ ಗುರ್ಕಾರ್ಲು ನಿಶ್ಚಿತ್ ಜಿ ರಾಮಕುಂಜ ಮೆರೆನ ಗುರ್ಕಾರ್ಮೆಡ್ ನಡಪುನ ಈ ಲೇಸ್‌ಡ್ ಮಲ್ಲಬಿನ್ನೆರಾದ್ ಕಾರ್ಲ ವಿಧಾನಸಭಾ ಕ್ಷೇತ್ರೊದ ಶಾಸಕೆರ್ ವಿ ಸುನಿಲ್ ಕುಮಾರ್, ಕಾಂಗ್ರೆಸ್ ಮುಖಂಡೆರ್ ಉದಯ ಕುಮಾರ್ ಶೆಟ್ಟಿ ಮುನಿಯಾಲ್, ಗಾಯತ್ರಿ ಎಕ್ಸ್‌ಪೋರ್ಟ್ಸ್‌ದ ಬೋಳ ಪ್ರಶಾಂತ್ ಕಾಮತ್, ತುಳುವ ಮಹಾಸಭೆದ ಕರ್ನಾಟಕ ರಾಜ್ಯಾಧ್ಯಕ್ಷೆರ್ ದೇವೇಂದ್ರ ಹೆಗ್ಡೆ ಕೊಕ್ರಾಡಿ, ಮಂದಾರ ಪ್ರತಿಷ್ಠಾನೊದ ಗುರ್ಕಾರ್ಲು ರಾಜೇಶ್ ಭಟ್ ಮಂದಾರ, ಬೊಟ್ಟಿಕೆರೆ ಅಂಬರುಹ ಯಕ್ಷಸದನ ಪ್ರತಿಷ್ಠಾನೊದ ಗುರ್ಕಾರ್ಲು ಶೋಭಾ ಪುರುಷೋತ್ತಮ ಪೂಂಜ, ಪೆರಿಯ ಯಕ್ಷಗಾನ ಕಲಾವಿದೆರ್ ತಾರಾನಾಥ್ ವರ್ಕಾಡಿ, ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ದ ಸ್ಥಾಪಕೆರ್ ಮಹಿ ಮುಲ್ಕಿ ಪಾಲ್‌ಪಡೆಪೆರ್.

ಈ ಲೇಸ್‌ಡ್ ಮಂದಾರ ಕೇಶವ ಭಟ್ರ್ ಬರೆತಿನ ‘ಭರತನ ಮೋಕೆ ಬೊಕ್ಕ ಮಾಯೆದ ಸೂರ್ಪನಕಿ’ ತುಳು ಯಕ್ಷಗಾನ ಪ್ರಸಂಗ ಬೊಕ್ಕ ಬೊಟ್ಟಿಕೆರೆ ಪುರುಷೋತ್ತಮ ಪೂಂಜೆರ್ ಬರೆತಿನ ‘ಕುಡಿಯನ ಕೊಂಬಿರೆಲ್’ ತುಳು ಯಕ್ಷಗಾನ ಪ್ರಸಂಗೊಲೆನ ಪುಸ್ತಕೊಲು ಬುಡುಗಡೆ ಆವೊಂದುಲ್ಲ.

ಈ ಲೇಸ್‌ದ ಅಕೇರಿಡ್ ತುಳುನಾಡ ಪುಗಾರ್ತೆದ ಯಕ್ಷಗಾನ ಕಲಾವಿದೆರೆನ ಗೋಡ್ಯಾವೊಂದು ‘ಸಿರಿಕಿಷ್ಣ ಚಂದಪಾಲಿ’ ಪನ್ಪಿನ ಯಕ್ಷಗಾನ ಪ್ರಸಂಗ ಗೊಬ್ಬುದ್ ತೋಜಾವರೆ ಉಲ್ಲೆರ್. ಆಯಿನಾತ್ ಎಚ್ಚಿಗೆ ಸಂಖ್ಯೆಡ್ ತುಳುವೆರ್, ಯಕ್ಷಾಭಿಮಾನಿಲು ಬತ್ತ್‌ದ್ ಈ ಲೇಸ್‌ನ್ ಗೆಂದಾದ್ ಕೊರೊಡೂ ಪನ್ದ್ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ದ ಒತ್ತು ಗುರ್ಕಾರ್ಲು ಅಂಚೆನೇ ತೌಳವ ಯಕ್ಷಾಯನ ಲೇಸ್‌ದ ಸಂಯೋಜಕೆರ್ ಅಭಿಷೇಕ್ ಕುಂದರನ್ನಾಯ ತುಳು ಸಮಾಚಾರಗ್ ತೆರಿಪಾಯೆರ್.

ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಬೆದ್ರದ ಸುದ್ದಿ | Moodbidri News ರಪಕ್ಕ ಸುದ್ದಿ Flash News

ಸೆ.8 : ಕಂಬುಲ ಸಮಾಲೋಚನೆ ಸಭೆ

Sep 3, 2026

ಬೆದ್ರ : ರಾಜ್ಯ ಕಂಬುಲ ಅಸೋಸಿಯೇಷನ್ ಬೊಕ್ಕ ಜಿಲ್ಲಾ ಕಂಬುಲ ಸಮಿತಿದ ಜಂಟಿ ಸಮಾಲೋಚನೆ ಸಭೆ ಸೆ.8 ಅಂಗಾರೆ ಬೆದ್ರದ ಸೃಷ್ಟಿ ಗಾರ್ಡನ್‌ಡ್ ನಡಪರೆ ಉಂಡು.
ಅಸೋಸಿಯೇಷನ್ ‌ದ ಅಧ್ಯಕ್ಷೆರ್ ಬೆಳಪು ದೇವಿ ಪ್ರಸಾದ್ ಶೆಟ್ಟಿ ಬೊಕ್ಕ ಜಿಲ್ಲಾ ಕಂಬುಲ ಸಮಿತಿದ ಅಧ್ಯಕ್ಷೆರ್ ಚಂದ್ರಹಾಸ ಸನಿಲ್ ಮೊಕ್ಲೆನ ಉಪಸ್ಥಿತಿಟ್ಟ್ ಸೆ.8 ಮದ್ಯಾನ 3 ಗಂಟೆಗ್ ಸಭೆ ಲೆತ್ತ್‌ದೆರ್. ಈ ಸಭೆಟ್ಟ್ ಪೊಸ ಸೀಸನ್‌ದ ಕಂಬುಲ ವಿಚಾರೊಡು ಸಮಾಲೋಚನೆ ನಡಪರೆ ಉಂಡು.
ಕಂಬುಲದ ಆಯೋಜಕೆರ್, ಎರ್ಲೆನ ಯಜಮಾನೆರ್,ತೀರ್ಪುಗಾರೆರ್, ಕಂಬುಲ, ಸಮಿತಿದ ಪದುಕೆರ್, ಎರು ಬುಡ್ಪಿನಕುಲು, ಎರು ಗಿಡಪುನಕುಲು ಬೊಕ್ಕ ಪರಿಚಾರಕ ವರ್ಗದಕುಲು ಈ ಸಭೆಟ್ಟ್ ಪಾಲ್ ಪಡೆದ್ ಸಲಹೆ ಸೂಚನೆನ್ ಪಟ್ಟೊನೊಡು ಪಂದ್ ಕಂಬುಲ ಅಸೋಸಿಯೇಷನ್ ಪ್ರಧಾನ ಕಾರ್ಯದರ್ಶಿ ವಿಜಯಕುಮಾರ್ ಕಂಗಿನಮನೆ ಬೊಕ್ಕ ಕೋಶಾಧಿಕಾರಿ ಲೋಕೇಶ್ ಶೆಟ್ಟಿ ಮುಚ್ಚೂರು ಕಲ್ಕುಡೆ ಪತ್ರಿಕಾ ಹೇಳಿಕೆಡ್ ಬಿನ್ನಾಪು ಮಲ್ದೆರ್.

ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ಫ್ಲ್ಯಾಶ್ ನ್ಯೂಸ್ / ರಪಕ್ಕ ಸುದ್ದಿ | Flash News

ಸೆ.19 : ಬೀರಿ ಕೋಟೆಕಾರ್‌ಡ್ 18 ನೇ ವರ್ಷದ ಶ್ರೀ ಬಾಲ ಗಣೇಶೋತ್ಸವ

Sep 2, 2026

ಕುಡ್ಲ : ಕೋಟೆಕಾರ್ ಬೀರಿ ಕೆ.ಸುಬ್ಬಣ್ಣಯ್ಯೆರ್ನ ಇಲ್ಲಡ್ ಸೆ.19 ತಾರೀಕ್‌ಗ್ 18ನೇ ವರ್ಷದ ಶ್ರೀ ಬಾಲ ಗಣೇಶೋತ್ಸವ ನಡಪರೆ ಉಂಡು.
ಆನಿ ಕಾಂಡೆ 8.30 ಕ್ಕ್ ಗಣ ಹೋಮ ಬೊಕ್ಕ ಬಾಲ ಗಣಪತಿ ಮೂರ್ತಿ ಪ್ರತಿಷ್ಠೆ, ಮದ್ಯಾನ ಅನ್ನಸಂತರ್ಪಣೆ, ರಾತ್ರೆ 8.30 ಕ್ಕ್ ಮಹಾ ಪೂಜೆ ಆದ್ ಮೂರ್ತಿ ಜಲಸ್ತಂಭನ ನಡಪರೆ ಉಂಡು.
ಈ ಲೇಸ್‌ಡ್ ಭಕ್ತಾದಿಲು ಎಚ್ವಿನ ಸಂಖ್ಯೆಡ್ ಪಾಲ್ ಪಡೆದ್ ಗಣಪತಿ ದೇವೆರ್‌ನ ಅನುಗ್ರಹೊಗು ಪಾತ್ರರಾವೊಡು ಪಂದ್ ಕೆ. ಸುಬ್ಬಯ್ಯಣ್ಣೆರ್‌ನ ಇಲ್ಲದಕುಲು ಬಿನ್ನಾಪು ಮಲ್ದೆರ್.

Kateel ಊರ್ದ ಸುದ್ದಿ Regional News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ ರಪಕ್ಕ ಸುದ್ದಿ Flash News

ಕಿನ್ನಿಗೋಳಿ ರಾಘವೇಂದ್ರ ಸ್ವಾಮಿಲೆನ ಆರಾಧನಾ ಮಹೋತ್ಸವ, ಧಾರ್ಮಿಕ ಸಭೆ

Aug 31, 2026

ಕಿನ್ನಿಗೋಳಿ , ಆ. 30 : ಶ್ರೀ ರಾಘವೇಂದ್ರ ಸ್ವಾಮೀಜಿಲು ಒರ್ವ ಯುಗಪುರುಷೆ ಆರ್ ಧಾರ್ಮಿಕತತ ಒಟ್ಟುಗು ಸಮಾಜದ ಅಭಿವೃದ್ಧಿಗ್ ಪುನೆತಿನಾರ್. ಆರೆನ ನೆಂಪು ಮಲ್ಪುನ ಆರಾಧನೆ ಮಲ್ಪುನವುಲಾ ಒಂಜಿ ಯಜ್ಞದಲೆಕ್ಕ ಅವೆತ ಫಲ ಸಮಾಜಗ್ ತಿಕ್ಕೊಡು ಪಂದ್ ಉಳೆಪಾಡಿ ಶ್ರೀ ದುರ್ಗಾಪರಮೇಶ್ವರೀ ಮಹಮ್ಮಾಯಿ ದೇವಸ್ಥಾನದ ಧರ್ಮದರ್ಶಿ ಮೋಹನ್‌ದಾಸ್‌ ಸುರತ್ಕಲ್‌ ಪಂಡೆರ್ .
ಆರ್ ಆ.30 ತಾನಿ ಕಿನ್ನಿಗೋಳಿ ಯುಗಪುರುಷ ವಲಯದ ಶ್ರೀ ಮದ್ಗುರು ರಾಘವೇಂದ್ರ ಸ್ವಾಮಿ ಮಂದಿರಡ್ ಸ್ವಾಮಿಲೆನ ಆರಾಧನಾ ಮಹೋತ್ಸವದ ಪೊರ್ತುಡು ನಡತಿನ ಧಾರ್ಮಿಕ ಸಭೆಟ್ ಉಪನ್ಯಾಸ ಕೊರ್ದು ಪಾತೆರಿಯೆರ್.
ಕಸಾಪದ ಮಾಜಿ ರಾಜ್ಯಧ್ಯಕ್ಷೆರ್ ಧರ್ಮದರ್ಶಿ ಡಾ| ಹರಿಕೃಷ್ಣ ಪುನರೂರು ಗುರ್ಕಾರ್ಮೆ ವಹಿಸೊಂದು ಪಾತೆರ್ದ್ ಮಂತ್ರಾಲಯದ ಗುರುಲೆನ ಕಾರಣಿಕ ಪುರುಷೆರ್ ಸಮಾಜಗ್ ಮಲ್ಲ ಸೇವೆ ಆರೆರ್ದ್ ಅತುಂಡ್. ಪ್ರತಿನಿತ್ಯ ಆರೆನ ಅರಾಧನೆ ಮಲ್ಪೊಡು ಪಂದ್ ಪಂಡೆರ್.
ಈ ಪೊರ್ತುಡು ಡಾ| ನಯನಾಭಿರಾಮ ಉಡುಪ , ನಿವೃತ್ತ ಶಿಕ್ಷಕ ಬಾಲಕೃಷ್ಣ ಉಡುಪ , ಆಳ್ವಾಸ್‌ ಕಾಲೇಜಿದ ಉಪನ್ಯಾಸಕ ಪು. ಗುರುಪ್ರಸಾದ್‌ ಭಟ್‌ ಬೊಕ್ಕ ಕೆಲವೆರ್ ಉಪಿಸ್ಥಿತರಿತ್ತೆರ್.
ಯುಗಪುರುಷದ ಭುವನಾಭಿರಾಮ ಉಡುಪ ಎದ್ಕೊಂಡೆರ್ . ಬೊಕ್ಕ ರಾಘವೇಂದ್ರ ಸ್ವಾಮಿಲೆನ ಆರಾಧನೆ ಮಹೋತ್ಸವದ ಅಂಗವಾದ್ ಪಲ್ಲಂಕಿ ಉತ್ಸವ , ರಥೋತ್ಸವ ನಡತ್ಂಡ್.

ಊರ್ದ ಸುದ್ದಿ Regional News ಕುಡ್ಲದ ಸುದ್ದಿ | Mangalore News ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News ತುಳು ಸುದ್ದಿ

ಪುಗರ್ತೆದ ಕ್ರೀಡಾ ಬರವುಗಾರೆ ಜಗದೀಶ್ಚಂದ್ರ ಅಂಚನ್‌‌ರೆಗ್ ‘ಬಸವಶ್ರೀ’ ರಾಜ್ಯ ಪ್ರಶಸ್ತಿ

Aug 26, 2026

ಕುಡ್ಲ : ಸೂಟರ್‌ಪೇಟೆ ನಿವಾಸಿ, ಪುಗರ್ತೆದ ಕ್ರೀಡಾ ಅಂಕಣ ಬರವುಗಾರೆ ಎಸ್. ಜಗದೀಶ್ಚಂದ್ರ ಅಂಚನ್ ಮೇರ್ ಪ್ರತಿಷ್ಠಿತ ‘ಬಸವಶ್ರೀ’ ರಾಜ್ಯ ಪ್ರಶಸ್ತಿಗ್ ಆಯ್ಕೆ ಆತೆರ್.
ಬೆಂಗಳೂರುದ ಶ್ರೀ ಜ್ಞಾನ ಮಂದಾರ ಎಜುಕೇಶನಲ್ ಮತ್ತು ಸಾಂಸ್ಕೃತಿಕ ಟ್ರಸ್ಟ್ (ರಿ) ತನ್ನ ಬೊಳ್ಳಿ ಪರ್ಬದ ಸಂಭ್ರಮದ ಅಂಗವಾದ್ ಈ ಪ್ರಶಸ್ತಿನ್ ಪ್ರಕಟ ನಲ್ತ್‌ದ್, ಕನ್ನಡ ನಾಡ್‌ಗ್ ಮೇರ್ ಕೊರ್ತಿನ ಅನುಪಮ ಕ್ರೀಡಾ ಸಾಹಿತ್ಯ ಸೇವೆನ್ ಗುರುತಿಸಾದ್ ಈ ಗೌರವಗ್ ಆಯ್ಕೆ ಮಲ್ದೆರ್.
ಕರಿನ 32 ವರ್ಷರ್ದ್ ಮಾಧ್ಯಮ ಕ್ಷೇತ್ರಡ್ ಸಕ್ರಿಯೆರಾದುಪ್ಪುನ ಮೇರ್, ಜಿಲ್ಲೆ, ರಾಜ್ಯ ಬೊಕ್ಕ ಅಂತರರಾಷ್ಟ್ರೀಯ ಮಟ್ಟದ ದಿನಪತ್ರಿಕೆ, ವಾರಪತ್ರಿಕೆ ಅಙಚಡನೆ ಮಾಸಪತ್ರಿಕೆಲೆಡ್ 4,500ರ್ದ್‌ಲ ಎಚ್ಚ ಕ್ರೀಡಾ ಲೇಖನ ಬೊಕ್ಕ ಅಂಕಣಲೆನ್ ಬರೆತೆರ್. ಇಂಚೊಗು ಮೇರ್ ‘ತ್ಯಾಗಮಯಿ ಮೋಹಳ್ಳಿ’ ಪನ್ಪಿನ ಪುಸ್ತಕ ಬರೆದ್ ಲೋಕಾರ್ಪಣೆ ಮಲ್ದೆರ್.
ಪ್ರಶಸ್ತಿ ಪ್ರದಾನ ಸಮಾರಂಭ ಆಗಸ್ಟ್ 29 ಬೆಂಗಳೂರುದ ಜೆಎಸ್‌ಎಸ್ ಸಭಾಂಗಣಡ್ ನಡಪರೆ ಉಂಡು. ಶ್ರೀ ಜ್ಞಾನ ಮಂದಾರ ಎಜುಕೇಶನಲ್ , ಸಾಂಸ್ಕೃತಿಕ ಟ್ರಸ್ಟ್‌ ಬೊಳ್ಳಿ ಪರ್ಬದ ಮುಗಿತಲದ ಲೇಸ್‌ದ ವೇದಿಕೆಡ್ ಜಗದೀಶ್ಚಂದ್ರ ಅಂಚನ್ ಮೆರೆಗ ‘ಬಸವಶ್ರೀ’ ರಾಜ್ಯ ಪ್ರಶಸ್ತಿ ಕೊರ್ದು ಗೌರವ ಮಲ್ಪರೆ ಉಂಡು ಪಂದ್ ಟ್ರಸ್ಟ್‌ದ ಕಾರ್ಯದರ್ಶಿ ಎಲ್. ಸೋಮಶೇಖರ್ ತೆರಿಪಾದೆರ್.