ಮುಲ್ಕಿ : ಪೆಜಮಾಡಿ ಟೋಲ್ ಗೇಟ್ ದಲ್ಪ ಉಲಯಿ ರಸ್ತೆಡ್ ಸಂಚಾರ ಮಲ್ಪುನ 32 ಷಟಲ್ ಬಸ್ ಕ್ಕ್ ಲೆನ ಸಂಚಾರೊನು ಮಾ.15 ತಾರೀಕ್ ರ್ದ್ ಬಂದ್ ಮಲ್ಪರೆ ಕೆನರಾ ಷಟಲ್ ಬಸ್ ಸರ್ವಿಸ್ , ಒಡಿಪು ಉಂದೆತ್ತ ಒಡಿಪು-ಕುಡ್ಲ ವಲಯ ಎಚ್ಚರಿಕೆ ಕೊರ್ತುಂಡು.ಮುಲ್ಕಿಡ್ ಬುಧಾರ ನಡತಿನ ಸುದ್ದಿಗೋಷ್ಠಿಡ್ ಈ ವಿಷಯೊನು ಕೆನರಾ ಬಸ್ ಮಾಲಿಕೆರ್ನ ಸಂಘದ ಉಪಾಧ್ಯಕ್ಷೆರ್, ಕಿನ್ನಿಗೋಳಿ ಬಸ್ ಮಾಲಕೆರ್ನ ಸಂಘದ ಅಧ್ಯಕ್ಷೆರ್ ದುರ್ಗಾ ಪ್ರಸಾದ್ ಹೆಗ್ಡೆ ತೆರಿಪಾಯೆರ್.ಪೆಜಮಾಡಿ ಟೋಲ್ ಗೇಟ್ ದಕುಲು ಉಲಯಿ ರಸ್ತೆಡ್ ಪೋಪಿನ ಷಟಲ್ ಬಸ್ ಕ್ಕ್ ಲೆಗ್ ಫಾಸ್ಟ್ಯಾಗ್ ಪಂಡ್ ದ್ ಪ್ರತಿ ಟ್ರಿಪ್ ಗ್ಲ ಶುಲ್ಕ ದೆತೊನುವೆರ್. ದಿನೊರ್ದು ದಿನ ಡೀಸೆಲ್ ರೇಟ್, ರೋಡ್ ಟ್ಯಾಕ್ಸ್ ಎಚ್ಚಾವೊಂದುಂಡು. ಕುಡ ಅಯಿತ ಮಿತ್ತ್ ಟೋಲ್ ಗ್ ದುಡ್ಡು ಕಟ್ಟ್ ದ್ ಎಂಕ್ಲೇಗ್ ಬಸ್ ನಡಪುಡ್ರೆ ಸಾಧ್ಯ ಇಜ್ಜಿ. ಈ ವಿಷಯೊನು ಫೆ.22 ಕ್ಕ್ ನಡತಿನ ಒಡಿಪು ಜಿಲ್ಲಾಧಿಕಾರಿಲೆನ ಸಭೆಟ್ಟ್ ಬಿನ್ನೈತ ಮಲ್ಪುನಗ ಡೀಸಿನ ಎದುರು ಟೋಲ್ ಅಧಿಕಾರಿಲು ಸಮಸ್ಯೆ ಪರಿಹಾರ ಮಲ್ಪುನ ಭರವಸೆ ಕೊರ್ತೆರ್. ಆಂಡ ಇನಿಮುಟ್ಟ ಸಮಸ್ಯೆಗ್ ಸ್ಪಂದನೆ ಮಲ್ದ್ ಜೆರ್. ಅಂಚಾದ್ ಮಾ.15 ಸೋಮಾರೊರ್ದು ಅನಿರ್ದಿಷ್ಟಾವಧಿ ಮುಟ್ಟ ಬಸ್ ಸಂಚಾರ ಬಂದ್ ಮಲ್ಪುವ ಪಂಡೆರ್.
ಒಡಿಪು-ಕುಡ್ಲ ವಲಯದ ರಾಷ್ಟ್ರೀಯ ಹೆದ್ದಾರಿ ಹೋರಾಟ ಸಮಿತಿದ ಸಂಚಾಲಕೆರ್ ಶೇಖರ್ ಹೆಜ್ಮಾಡಿ ಪಾತೆರ್ದ್, ಈ ಸಮಸ್ಯೆ ಪರಿಹಾರ ಮಲ್ತ್ ಜೆರ್ಡ ಸಾಸ್ತಾನೊರ್ದು ತೊಕ್ಕೊಟ್ಟು ಮುಟ್ಟದ ಸಂಘಟದಕಲ್ನ ಸಕಾಯೊಡು ಪೆಜಮಾಡಿ ಟೋಲ್ ಗೇಟ್ ಗ್ ಪೊಗ್ಗುದು ಪ್ರತಿಭಟನೆ ಮಲ್ಪುವ ಪಂಡೆರ್.ಮುಲ್ಕಿ ನಾಗರಿಕ ಹಿತರಕ್ಷಣೆ ಸಮಿತಿದ ಅಧ್ಯಕ್ಷೆರ್ ಹರೀಶ್ ಪುತ್ರನ್ ಪಾತೆರ್ದ್, ಬಸ್ ತಕಲ್ನ ಹೋರಾಟೊಗು ಬೆರಿಸಾಯ ಕೊರ್ಪ ಪಂಡೆರ್.ಕೆನರಾ ಬಸ್ ಮಾಲಿಕೆರ್ನ ಸಂಘದ ಕಾರ್ಯದರ್ಶಿ ರಾಜೇಶ್ ಶೆಟ್ಟಿ, ಪೆಜಮಾಡಿ ನಾಗರಿಕ ಕ್ರಿಯಾ ಸಮಿತಿದ ಅಧ್ಯಕ್ಷೆರ್ ಸುಧಾಕರ ಕರ್ಕೇರ, ಕಿಲ್ಪಾಡಿ ಗ್ರಾಮ ಪಂಚಾಯ್ತಿ ಉಪಾಧ್ಯಕ್ಷೆರ್ ಗೋಪಿನಾಥ್ ಪಡಂಗ, ಮುಲ್ಕಿ ನಾಗರಿಕ ಸಮಿತಿದ ಉಪಾಧ್ಯಕ್ಷೆರ್ ಸದಾಶಿವ ಹೊಸದುರ್ಗ, ಕೋಶಾಧಿಕಾರಿ ಸುರೇಶ್ ಶೆಟ್ಟಿ ಬೊಕ್ಕ ಬಸ್ ಮಾಲೀಕೆರ್ ಇತ್ತೆರ್.
pallavi shetty