ಗರುಡ ಪಂಚೆಮಿ ತುಳು ನಾಟಕದ ಸುವರ್ಣ ಸಂಭ್ರಮ

ಪತ್ರಕರ್ತೆರ್ ಜಗನ್ನಾಥ ಶೆಟ್ಟಿ ಬಾಳ ಮೆರೆಗ್ “ರಂಗ ಕಲಾಬಂಧು” ಬಿರುದು ಪ್ರದಾನ

ಶ್ರೀ ಲಲಿತೆ ಕಲಾವಿದರು (ರಿ.) ಕುಡ್ಲ ಕೂಟದಕ್ಲೆರ್ದ್ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಪ್ರಾಯೋಜಕತ್ವಡ್ ತ್ರಿರಂಗ ಸಂಗಮ ಬೊಂಬಾಯಿ ಮುತಾಲಿಕೆಡ್ “ಗರುಡ ಪಂಚೆಮಿ” ಪನ್ಪಿನ ತುಳು ನಾಟಕದ ಯಶಸ್ವಿ 50ನೇ ಪ್ರದರ್ಶನದ ಲೆಕ್ಕೊಡು ಸುವರ್ಣ ಸಂಭ್ರಮ ಲೇಸ್ ಜ. 10 ಬುಧವಾರ ಬಯ್ಯ 5.30 ಗಂಟೆಗ್ ಕುಡ್ಲದ ಪುರಭವನಡ್ ನಡಪರೆ ಉಂಡು.

ಈ ಬಗೆಟ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿನ ನಾಟಕದ ಲೇಖಕೆರ್ ಅಂಚನೆ ಶ್ರೀ ಲಲಿತೆ ಕಲಾವಿದೆರ್ ತಂಡಗ್ ಬೆರಿತಾಂಗ್ ಆದ್ ಇಪ್ಪುನ ನವನೀತ್ ಶೆಟ್ಟಿ ಕದ್ರಿ ಪಾತೆರ್ದ್, ಶ್ರೀ ಲಲಿತೆ ಕೂಟದ ಗುರ್ಕಾರ್ಲು ಕಿಶೋರ್ ಡಿ. ಶೆಟ್ಟಿ ಮೇರ್ ಯಕ್ಷಗಾನದ ಹವ್ಯಾಸಿ ಕಲಾವಿದೆರ್ ಬೊಕ್ಕ ಕಿನ್ಯ ಪ್ರಾಯೊಡೇ ನಾಟಕಡ್ ಪಾತ್ರ ಮಲ್ತೊಂದಿತ್ತೆರ್. ನಾಟಕದ ಅಭಿರುಚಿನ್ ಯಕ್ಷಗಾನದ ಅಭಿರುಚಿತೊಟ್ಟಿಗೆ ಬುಳೆಪಾವೊಂದು ಪೋವೊಂದಿತ್ತೆರ್. ಒರಿಯೊರ್ದೊರಿ ಅಸಲ್ ನಾಟಕನ್ ಸೂರುತ್ತ ಸರ್ತಿ ದುಬಾಯಿಗ್ ಕೊನತ್ತ್‌ದ್ ಅಲ್ಪಲ ಪ್ರದರ್ಶನ ಕೊರ್ತಿನಾರ್ ಕಿಶೋರ್ ಡಿ. ಶೆಟ್ಟಿ.

ಚಾರಿತ್ರಿಕ ಬೊಕ್ಕ ಪೌರಾಣಿಕ ನಾಟಕಲು ಒರಿಯೊಡು ಅಯಿಕ್ಕ್ ವಿಶೇಷವಾಯಿನ ಆದ್ಯತೆನ್ ಕೊರೊಡು ಪನ್ಪಿನ ನಿಲೆಟ್ಟ್ ಸುಮಾರಾತ್ ಪೌರಾಣಿಕ ನಾಟಕನ್ ಮಲ್ತೆರ್. ಕಟೀಲ್‌ದಪ್ಪೆ ಉಳ್ಳಾಲ್ತಿ ಮೆರೆನ ಸುರೂತ್ತ ಪೌರಾಣಿಕ ನಾಟಕ. ಈ ನಾಟಕ 324 ಸರ್ತಿ ಪ್ರದರ್ಶನ ಆತ್ಂಡ್. ಅವೆಡ್ದ್ ಬೊಕ್ಕ ಮಣ್ಣ್‌ದ ಮಗಲ್ ಅಬ್ಬಕ್ಕ, ದೇವುಪೂಂಜ ಇಂಚ ಬೇತೆ ನಾಟಕಲೆನ್ ಮಲ್ತ್‌ದ್ ಅವೆನ್ ದೇಶ ವಿದೇಶಲೆಡ್ ಪ್ರದರ್ಶನ ಕೊರಿನ ಪೆರ್ಮೆ ಈ ನಾಟಕ ಕೂಟಗ್ ಉಂಡು. ಗರುಡ ಪಂಚೆಮಿ ನಾಟಕಲ ವಿಶೇಷವಾದಿತ್ತ್‌ದ್ ಜನಕ್ಲೆನ ಪ್ರೋತ್ಸಾಹರ್ದಾವರ ಇತ್ತೆ 50 ನೇ ಪ್ರದರ್ಶನ ಕೊರೊಂದುಂಡು ಪಂದ್ ಪಂಡೆರ್.

ಈ ಲೇಸ್‌ನ್ ಶ್ರೀ ಕ್ಷೇತ್ರ ಕಟೀಲ್ ಮುಲ್ಪದ ಅನುವಂಶಿಕ ಅರ್ಚಕೆರ್ ಅನಂತ ಪದ್ಮನಾಭ ಅಸ್ರಣ್ಣೆರ್ ತುಡರ್ ಅರ್ಲಾದ್ ಉದಿಪನ ಮಲ್ಪರೆ ಉಲ್ಲೆರ್. ಕುಡ್ಲ ಮಹಾನಗರ ಪಾಲಿಕೆದ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು ಲೇಸ್‌ದ ಗುರ್ಕಾಮೆ ವಹಿಸೊನರೆ ಉಲ್ಲೆರ್. ಕರ್ನಾಟಕ ರಾಜ್ಯ ಕಾರ್ಯನಿರತ ಪತ್ರಕರ್ತರ ಸಂಘದ ಕಾರ್ಯಕಾರಿ ಸಮಿತಿದ ಸದಸ್ಯೆರ್ ಆಯಿನ ಜಗನ್ನಾಥ ಶೆಟ್ಟಿ ಬಾಳ ಮೆರೆಗ್ “ರಂಗ ಕಲಾಬಂಧು” ಬಿರುದು ತಿಕ್ಕರೆ ಉಂಡು. ಅಂಚನೆ ತ್ರಿರಂಗ ಸಂಗಮ ಬೊಂಬಾಯಿದ ಸಂಚಾಲಕೆರ್ ಆಯಿನ ಕರ್ನೂರು ಮೋಹನ್ ರೈ, ಅಶೋಕ್ ಪಕ್ಕಳ, ನವೀನ್ ಶೆಟ್ಟಿ ಇನ್ನ ಬಾಳಿಕೆ ಮೊಕುಲೆಗ್ ಮಾನಾದಿಗೆ ನಡಪರೆ ಉಂಡು.

ಮಲ್ಲ ಬಿನ್ನೆರಾದ್ ತುಳು ಕನ್ನಡ ಪಿಚ್ಚರ್‌ದ ನಿರ್ಮಾಪಕೆರ್ ಬೊಕ್ಕ ನಿರ್ದೇಶಕೆರ್ ಪ್ರಕಾಶ್ ಪಾಂಡೇಶ್ವರ, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಹಾಯಕ ನಿರ್ದೇಶಕೆರ್ ರಾಜೇಶ್ ಜಿ., ಯಕ್ಷಧ್ರುವ ಪಟ್ಲ ಫೌಂಡೇಶನ್‌ದ ಕಾರ್ಯದರ್ಶಿ ಪುರುಷೋತ್ತಮ್ ಭಂಡಾರಿ ಸೇರ್ದ್ ಮಸ್ತ್ ಜನ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್ ಪಂದ್ ಪಂಡೆರ್.

ಪತ್ರಿಕಾಗೋಷ್ಠಿಡ್ ಶ್ರೀ ಲಲಿತೆ ಕೂಟದ ಗುರ್ಕಾರ್ಲು ಕಿಶೋರ್ ಡಿ. ಶೆಟ್ಟಿ, ನಿರ್ದೇಶಕೆರ್ ಜೀವನ್ ಉಳ್ಳಾಲ್, ಸಮಗ್ರ ತಂಡದ ನಿರ್ವಹಣೆಗಾರೆರ್ ಮೋಹನ್ ಕೊಪ್ಪಲ್, ಪ್ರದೀಪ್ ಆಳ್ವ ಕದ್ರಿ, ಸಲಹೆಗಾರೆರ್ ಗೋಕುಲ್ ಕದ್ರಿ ಪಾಲ್ ಪಡೆದ್ ಇತ್ತೆರ್.