ಅಪ್ಪೆನ ಜಕ್ಕೆಲ್ ರ್ದ್ ಧರ್ಮದ ಬೋಧನೆ ಸುರು ಆವೊಡು : ಡಾ.ವೈ.ಎನ್.ಶೆಟ್ಟಿ

ಅತ್ತೂರು ಅರಸು ಕುಂಜಿರಾಯ ದೈವಸ್ಥಾನದ ಬ್ರಹ್ಮಕಲಶ ಉಚ್ಚಯದ ರಡ್ಡನೇ ದಿನತ್ತ ಧರ್ಮ ಸಭೆ

ಕಿನ್ನಿಗೋಳಿ : ಹಿಂದೂ ಧರ್ಮ ಇತ್ತೆದ ಜೋಕುಲೆಗ್ ಸರಿಯಾದ್ ಮುಟ್ಟೊಂದಿಜ್ಜಿ. ಗುರುಕುಲ ಪದ್ದತಿ ಪೋಯಿ ಬೊಕ್ಕ ಅವು ನಮ್ಮ ಜೋಕುಲೆರ್ದ್ ದೂರ ಆವೊಂದುಂಡು.ಅಂಚಾದ್ ಅಪ್ಪೆನ ಜಕ್ಕೆಲ್ ರ್ದ್ ಧರ್ಮದ ಬೋಧನೆ ಸುರು ಆವೊಡು. ಧಾರ್ಮಿಕ ಆಚರಣೆ, ಧರ್ಮಸಭೆಕ್ಕ್ ಇಲ್ಲದಕುಲು ಜೋಕುಲೆನ್ ಲೆತೊಂದು ಪೋವೊಡು.ಇಜ್ಜಿಂಡ ಜೋಕುಲೆಗ್ ಧರ್ಮದ ಪೊಲಬು ಆಪುಜಿ ಪಂದ್ ಡಾ. ವೈ.ಎನ್. ಶೆಟ್ಟಿ ಮೇರ್ ಪಂಡೆರ್.

ಆರ್ ಅತ್ತೂರು ಶ್ರೀ ಅರಸು ಕುಂಜಿರಾಯ ದೈವಸ್ಥಾನದ ಬ್ರಹ್ಮಕಲಶ ಉಚ್ಚಯದ ರಡ್ಡನೇ ದಿನತ್ತ ಧರ್ಮ ಸಭೆಟ್ಟ್ “ಧಾರ್ಮಿಕ ಪರಂಪರೆ” ಪನ್ಪಿನ ಉಪನ್ಯಾಸ ಮಲ್ತ್ ಪಾತೆರಿಯೆರ್.

ಗುರುಪುರ ವಜ್ರದೇಹಿ ಮಠತ್ತ ಶ್ರೀ ರಾಜಶೇಖರಾನಂದ ಸ್ವಾಮೀಜಿ ಆಶೀರ್ವಚನ ಮಲ್ತ್‌ದ್, ದೈವದ ಕೊಡಿ ಅಡಿಟ್ಟ್ ದೈವೊನು ಮುಕ್ಕಾಲ್ ಮೂಜಿ ಗಳಿಗೆ ಉಂಡು ಮಲ್ಪೊಡ್ಡ ಆಕಾಶ ಬೊಕ್ಕ ಭೂಮಿನ್ ಸಂಪರ್ಕ ಮಲ್ಪೊಡಾಪುಂಡು. ಪದಿನಾಜಿ ಕಟ್ಲೆಡ್ ದೈವೊಲೆನ್ ಅನುಸಂಧಾನ ಮಲ್ಪೊಡು ಪನ್ಪಿನವು ಸಂಪ್ರದಾಯ.ಅಪಗಾಂಡ ಮುಕ್ಕಾಲ್ ಮೂಜಿ ಗಳಿಗೆ ಪಂಡ ಏತ್ ಪಂದ್ ನಮ ಲೆಕ್ಕ ಪಾಡುವ. ಮುಕ್ಕಾಲ್ ಮೂಜಿ ಗಳಿಗೆ ಪಂಡ ಸೂರ್ಯೆ ಉದಯ ಆದ್ ಕಂತ್ ದ್ ಬೊಕ್ಕ ಚಂದ್ರೆ ಉದಿಪುನ ಪೊರ್ತು ಪಂದ್ ಪಂಡೆರ್.

ಕಟೀಲು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ದ ಅನುವಂಶಿಕ ಮೊಕ್ತೇಸರೆರ್ ಹರಿನಾರಾಯಣ ಅಸ್ರಣ್ಣೆರ್ ಆಶೀರ್ವಚನ ಮಲ್ತ್ ದ್, ಭಕ್ತೆರ್ ದೇವೆರೆಗ್ ಸೇವೆ, ಪರಕೆ ಕೊರ್ಪಿನವು ಪಂಡ ಲಂಚ ಕೊರ್ಪಿನತ್ತ್. ಆಟ ಆವಡ್ ಕೋಲ ಪರಕೆ ಪಂಡ ಅವೆನ್ ಸಂದಾವರೆ ದಿನೋಲ ದೇವೆರೆನ್ ನಮ ನೆಂಪು ಮಲ್ಪುವ. ಅವು ನಮಡ ದೇವೆರ್ , ಧರ್ಮದ ಪಾಲನೆ ಆಚರಣೆ ಮಲ್ಪುವ ಪಂದ್ ಪಂಡೆರ್.

ಈ ಪೊರ್ತುಡು ತುಳುನಾಡ್ ದ 16 ಜನ ಗಡಿ ಪತ್ತಿನಕುಲು, ಗುತ್ತಿನಾರ್ ನಕುಲು ,ಮುಕ್ಕಾಲ್ದಿನಕಲೆಗ್ ಮಾನಾದಿಗೆ ಮಲ್ತೆರ್. ಅಂಚೆನೆ ಜಾರಿಗೆಕಟ್ಟೆ ಶ್ರೀ ಕೊರಗಜ್ಜ ಕ್ಷೇತ್ರದ ಮೊಕ್ತೇಸರೆರ್ ದಿವಾಕರ ಪೂಜಾರಿ ಮೆರೆಗ್ಲಾ ಮಾನಾದಿಗೆ ನಡತ್ಂಡ್.

ಮಿತ್ತರ್ಮೆಡ್ ಮಲ್ಲ ಬಿನ್ನೆರಾದ್ ದ.ಕ ಜಿಲ್ಲಾ ಹಾಲು ಉತ್ಪಾದಕರ ಒಕ್ಕೂಟದ ಅಧ್ಯಕ್ಷೆರ್ ಕೆ. ಪಿ. ಸುಚರಿತ ಶೆಟ್ಟಿ, ಧಾರ್ಮಿಕ ಪರಿಷತ್ ಸದಸ್ಯೆರ್ ಭುವನಾಭಿರಾಮ ಉಡುಪ, ಕಟೀಲು ಶ್ರೀ ದುರ್ಗಾಪರಮೇಶ್ವರಿ ಯಕ್ಷಗಾನ 6 ಮೇಳದ ಸಂಚಾಲಕೆರ್ ಕಲ್ಲಾಡಿ ದೇವಿ ಪ್ರಸಾದ್ ಶೆಟ್ಟಿ, ಪುನರೂರು ಪ್ರತಿಷ್ಠಾನ ಅಧ್ಯಕ್ಷೆರ್ ದೇವಪ್ರಸಾದ್ ಪುನರೂರು, ಜಿಲ್ಲಾಪಂಚಾಯತ್ ಮಾಜಿ ಸದಸ್ಯೆರ್ ಈಶ್ವರ ಕಟೀಲ್, ಶ್ರೀ ಹರಿಪಾದ ಜಾರಂದಾಯ ದೈವಸ್ಥಾನದ ಅನುವಂಶೀಯ ಆಡಳಿತ ಮೊಕ್ತೇಸರೆರ್ ಪ್ರಕಾಶ್ ಶೆಟ್ಟಿ ನಲ್ಯಗುತ್ತು,
ಮಾನಂಪಾಡಿ ಶ್ರೀ ವೀರಭದ್ರ ದೇವಸ್ಥಾನದ ಪುರಂದರ ಡಿ. ಶೆಟ್ಟಿಗಾರ್, ಅರಸು ಕುಂಜಿರಾಯ ದೈವಸ್ಥಾನದ ಟ್ರಸ್ಟ್ ಅಧ್ಯಕ್ಷೆರ್ ದೇವಿ ಪ್ರಸಾದ್ ಶೆಟ್ಟಿ , ಬಂಟರ ಸಂಘ ಮುಲ್ಕಿ ಅಧ್ಯಕ್ಷೆರ್ ಪುರುಷೋತ್ತಮ ಶೆಟ್ಟಿ, ಕಿಲೆಂಜೂರು ಶ್ರಿ ಸರಳ ಜುಮಾದಿ ದೈವಸ್ಥಾನದ ಅನುವಂಶಿಕ ಆಡಳಿತ ಮೊಕ್ತೇಸರೆರ್ ಡಾ.ವಿಶ್ವನಾಥ ಶೆಟ್ಟಿ ಕುಡ್ತಿಮಾರ್ ಗುತ್ತು, ಉದ್ಯಮಿ ಜಿತೇಂದ್ರ ಕೊಟ್ಟಾರಿ ಮೊಕುಲು ಇತ್ತೆರ್.

ಪ್ರಸನ್ನ ಶೆಟ್ಟಿ ಅತ್ತೂರು ಗುತ್ತು ಬಿನ್ನೆರೆನ್ ಎದ್ಕೊಂಡೆರ್. ಅರಸು ಕುಂಜಿರಾಯ ದೈವಸ್ಥಾನದ ಆಡಳಿತ ಸಮಿತಿದ ಅಧ್ಯಕ್ಷೆರ್ ಚರಣ್ ಶೆಟ್ಟಿ ಕುಳಾಯಿಗುತ್ತು ಪ್ರಸ್ತಾವಿಕವಾದ್ ಪಾತೆರಿಯೆರ್.

ಅವೆರ್ದ್ ಬೊಕ್ಕ ಎಕ್ಕಾರ್ ವಿಜಯ ಸಂಗಮ ಮೊಕ್ಲೆರ್ದ್ “ನಮ ನಮ್ಮಾತಿಗೆ” ತುಳು ನಾಟಕ ನಡತ್ಂಡ್.