ದೇಶದ ಗೌಪ್ಯತೆನ್ ಲೀಕ್ ಮಲ್ತಿನ ಕೇಸ್ ಡ್ ಪಾಕಿಸ್ತಾನದ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಗ್ ನ್ಯಾಯಾಲಯವೊಂಜಿ 10 ವರ್ಷ ಜೈಲ್ ಶಿಕ್ಷೆನ್ ಕೊರ್ತುಂಡು.
ಈ ಬಗೆಟ್ಟ್ ಪಾಕಿಸ್ತಾನದ ಇಸ್ಲಾಮಾಬಾದ್ ಡ್ ಇಪ್ಪುನ ಇಸೇಸ ನ್ಯಾಯಾಲಯ ವಿಚಾರಣೆ ನಡಪಾಯಿನ ಬೊಕ್ಕ ಮಾಜಿ ಪ್ರಧಾನಿ ಬೊಕ್ಕ ಆರೆನ ನಿಕಟವರ್ತಿ ಆಯಿನ ಮಾಜಿ ಸಚಿವೆರ್ ಮೆಹಮೂದ್ ಖುರೇಸಿಗ್ 10 ವರ್ಷ ಜೈಲ್ ಶಿಕ್ಷೆ ಕೊರಿಯೆರೆ ಆದೇಶ ಕೊರ್ತುಂಡು.
ಅಸ್ಸಾಂ ಮೂಲದ ಉದ್ಯಮಿ ನವೀನ್ ಚಂದ್ರ ಬೋರಾ ಪ್ರಧಾನಿ ಮೋದಿನ ಅಭಿಮಾನಿ ಆತೆರ್.
ಮೇರ್ ತನ್ನ ಅಭಿಮಾನನ್ ತೂಪಾಯೆರೆ ಮೋದಿನ 190 ಅಡಿ ಎತ್ತರದ ಪ್ರತಿಮೆನ್ ಸ್ಥಾಪನೆ ಮಲ್ಪೆರೆ ನಿರ್ಧಾರ ಮಲ್ದೆರ್. ಅಯಿಕ್ಕಾದ್ ಸುಮಾರ್ 200 ಕೋಟಿ ರೂ. ಕರ್ಚಿ ಆಪುಂಡು.
ಗುವಾಹಟಿ ಕೈತಲ್ದ ಮೆರೆನ ಸ್ವಂತ ಜಾಗೆಡ್ ಮೋದಿ ವಿಗ್ರಹ ನಿರ್ಮಾಣನ್ ಮಲ್ಪೆರೆ ಉಲ್ಲೆರ್. ನೆಕ್ಕಾದ್ ಮೂಜಿ ದಿನ ಭೂಮಿ ಪೂಜೆ ಮಲ್ಪೆರೆ ಉಂಡು ಪಂದ್ ಮೇರ್ ಪೊಲಬು ಕೊರ್ತೆರ್.
ಕೆಲವು ತಿಂಗೊಲ್ದ ಪಿರವು ಇತ್ತಿನ ನೀರುಳ್ಳಿ ಕಿರಯ ಇತ್ತೆ ಒರಾನೆ ಕಮ್ಮಿ ಆತ್ಂಡ್.
ನೀರುಳ್ಳಿ ಕಿರಯ ಇತ್ತೆ ಮಾರ್ಕೆಟ್ ಡ್ 1ಕೆಜಿ ಕಿರಯ 3-4 ರೂಪಾಯಿ ಉಂಡು. ಇಂಚಾದ್ ಬಿಲೆ ಎಚ್ಚದ ನಿರೀಕ್ಷೆಡ್ ಇಪ್ಪುನ ರೈತೆರ್ ಕರಿನ 2 ದಿರ್ನೊದಿಂಚ ಕಾತ್ ಕುಲ್ಲುದೆರ್. ಎಡ್ಡೆ ನೀರುಳ್ಳಿ ಕಿರಯ ಕ್ವಿಂಟಾಲ್ ಗ್ 1500 ರೂ. ಉಂಡು.
ವಸಾಯಿ ಸಾರ್ವಜನಿಕ ಶ್ರೀ ಶನೀಶ್ವರ ಸೇವಾ ಸಮಿತಿದ 25 ವರ್ಷದ ಶ್ರೀ ಸತ್ಯನಾರಾಯಣ ಪೂಜೆ ಬೊಕ್ಕ ಶ್ರೀ ಶನೀಶ್ವರ ಮಹಾಪೂಜೆ ಫೆ.10 ಸನಿಯಾರ ವಸಾಯಿದ ದಿವಾನ್ ಮನ್ ತಲಾದ ಕೈತಲ್ದ ನವಯುಗ್ ನಗರಡ್ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಬತ್ತ್ ದ್ ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಸ್ಥಾಪಕ ಗುರ್ಕಾರೆ ಜಯ.ಎಮ್ ಶೆಟ್ಟಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಐಕಳಬಾವ ಕಾಂತಾ ಬಾರೆ-ಬೂದಾಬಾರೆ ಜೋಡುಕರೆ ಕಂಬಳೋಚ್ಚಯ ಫೆ. 3ಕ್ಕ್ ನಡಪರೆ ಉಂಡು. 400 ವರ್ಷ ಪರಪೋಕು ಇಪ್ಪುನ ಐಕಳ ಕಂಬಳನ್ ಜಾನಪದ ಕ್ರೀಡಾಮೇಳದೊಟ್ಟಿಗೆ “ಐಕಳೋಚ್ಚಯ” ರೀತಿಡ್ ಆಯೋಜನೆ ಮಲ್ತ್ದೆರ್. ಈ ಪೊರ್ತುಡು ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ಅಂಚನೆ ಕರ್ನಾಟಕ ರಾಜ್ಯ ಸಹಕಾರ ಮಾರಾಟ ಮಹಾಮಂಡಳದ ಅಧ್ಯಕ್ಷೆರ್ ಡಾ| ಎಂ.ಎನ್. ರಾಜೇಂದ್ರ ಕುಮಾರ್ ಮೆರೆಗ್ “ಕರಾವಳಿ ರತ್ನ” ಪ್ರಶಸ್ತಿ ಕೊರಿಯರೆ ಉಂಡು ಪಂದ್ ಕಂಬಳೋಚ್ಚಯ ಸಮಿತಿದ ಅಧ್ಯಕ್ಷೆರ್ ಐಕಳಬಾವ ದೇವಿಪ್ರಸಾದ್ ಶೆಟ್ಟಿ ಬೆಳಪು ತೆರಿಪಾದೆರ್.
30 ವರ್ಷರ್ದ್ ಎಸ್ಸಿಡಿಸಿಸಿ ಬ್ಯಾಂಕ್ ಅಧ್ಯಕ್ಷೆರ್ ಆದಿಪ್ಪುನ ಡಾ| ರಾಜೇಂದ್ರ ಕುಮಾರ್ ಸಹಕಾರಿ ಬ್ಯಾಂಕಿಂಗ್ ಕ್ಷೇತ್ರಡ್ ಬದಲಾವಣೆ ಕನತೆರ್. ಅಂಚಾದ್ ಅರೆನ ನಾಯಕತ್ವಡ್ ಎಸ್ಸಿಡಿಸಿಸಿ ಬ್ಯಾಂಕ್ ಇನಿ ಜನಸ್ನೇಹಿ ಬ್ಯಾಂಕ್ ಆದ್ ಪುಗರ್ತೆ ಪಡೆತ್ಂಡ್. ಸರಿಯಾಯಿನ ಗಾಡಿಡ್ ಮೊಬೈಲ್ ಬ್ಯಾಂಕ್ ಸೇವೆನ್ ರಾಜ್ಯದ ಸಹಕಾರಿ ರಂಗಡ್ ಸುರುತ್ತ ಸರ್ತಿ ಪರಿಚಯ ಮಲ್ತ್ ಕೊರ್ತಿನಾರ್. ಕಂಬುಲನ್ ಮಲ್ತ್ ಇಷ್ಟ ಪಡೆಯುನ ರಾಜೇಂದ್ರ ಕುಮಾರ್ ಕಂಬುಲಗ್ಲ ಉಂದೆತ್ತ ಕ್ರೀಡೆದ ಪ್ರೋತ್ಸಾಹಕೆರ್ಗ್ಲ ಮಾರ್ಗದರ್ಶಕೆರ್ ಆತೆರ್ ಪಂದ್ ದೇವಿಪ್ರಸಾದ್ ತೆರಿಪಾಯೆರ್.
ಧರ್ಮಸ್ಥಳ: ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಶಿಕ್ಷಣ ಸಂಸ್ಥೆದ ಆಡಳಿತ ಮಂಡಳಿ ಅಧ್ಯಕ್ಷೆರ್ ಆಯಿನ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ಡಿ. ವೀರೇಂದ್ರ ಹೆಗ್ಗಡೆರ್ ಮೆರೆನ ಗೌರವ ಉಪಸ್ಥಿತಿಡ್ ಜ.30 ಅಂಗಾರೆ ಧರ್ಮಸ್ಥಳಡ್ ಹಾಸನದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಆಯುರ್ವೇದ ಮಹಾವಿದ್ಯಾಲಯ ಬೊಕ್ಕ ಆಸ್ಪತ್ರೆ ಅಂಚನೆ ಕೇಂದ್ರ ಸರ್ಕಾರದ ರಾಷ್ಟ್ರೀಯ ಭಾರತೀಯ ಆಯುರ್ವಿಜ್ಞಾನ ಸಂಪದ ಸಂಸ್ಥಾನ, ಹೈದರಾಬಾದ್ ನಡುಟ್ಟ್ ಹಸ್ತಪ್ರತಿತ್ತ ಸಂಶೋಧನೆ ಬಗೆಟ್ ಒಡಂಬಡಿಕೆ ಪತ್ರಗ್ ಸೈನ್ ಪಾಡ್ದ್ ಒಪ್ಪಿಗೆ ಸೂಚಿಸಾಯೆರ್.
ಆಯುರ್ವಿಜ್ಞಾನ ಸಂಪದ ಸಂಸ್ಥಾನದ ಹೈದರಾಬಾದ್ದ ಸಹಾಯಕ ನಿರ್ದೇಶಕೆರ್ ಡಾ. ಗೋಲಿ ಪೆಂಚಲ ಪ್ರಸಾದ ಬೊಕ್ಕ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಆಯುರ್ವೇದ ಮಹಾವಿದ್ಯಾಲಯ ಬೊಕ್ಕ ಆಸ್ಪತ್ರೆ ಹಾಸನದ ಪ್ರಾಂಶುಪಾಲೆರ್ ಡಾ. ಪ್ರಸನ್ನ ಎನ್. ರಾವ್, ಉಪಪ್ರಾಂಶುಪಾಲೆರ್ ಡಾ. ಶೈಲಜಾ, ಯು., ಸಂಹಿತಾ ಸಿದ್ಧಾಂತ ವಿಭಾಗದ ಮುಖ್ಯಸ್ಥೆರ್ ಡಾ. ಶ್ರೀನಾಥ ವೈದ್ಯ, ಪಂಚಕರ್ಮ ವಿಭಾಗದ ಮುಖ್ಯಸ್ಥ ಡಾ. ಅಶ್ವಿನಿಕುಮಾರ್ ಎಂ. ಬೊಕ್ಕ ಸಂಹಿತಾ ಸಿದ್ಧಾಂತ ವಿಭಾಗದ ಸ್ನಾತಕೋತ್ತರ ಕಲ್ಪಾರ್ಥಿಲು ಈ ಪೊರ್ತುಡು ಇತ್ತೆರ್.
ರಾಜ್ಯದ ಭಾರಿ ಕಷ್ಟದ ಚಾರಣದ ಜಾಗೆ ಪುಷ್ಪಗಿರಿ ವಲಯದ ಕುಮಾರ ಪರ್ವತಗ್ ಕರಿನ ವಾರಾಂತ್ಯ ಪ್ರವಾಸಿಗೆರ್ನ ದಟ್ಟಣೆ ವಿಡಿಯೋ ವೈರಲ್ ಆಯಿನ ಹಿನ್ನೆಲೆಡ್ ಚಾರಣದಕ್ಲೆಗ್ ಸರ್ಕಾರ ನಿರ್ಬಂಧ ಪಾಡ್ದೆರ್. ಚಾರಣಿಗೆರ್ನ ಸಂಖ್ಯೆಡ್ ಎಚ್ಚ ಆಯಿನ ಹಿನ್ನಲೆಡ್ ಉಂದುವೆ ಫೆ. 1 ರ್ದ್ ಪ್ರವೇಶಾವಕಾಶ ಬಂದ್ ಮಲ್ತ್ ದ್ ದುಂಬುದ ಅಕ್ಟೋಬರ್ ರ್ದ್ ಆನ್ ಲೈನ್ ಬುಕಿಂಗ್ ಸುರು ಮಲ್ಪೆರೆ ಅರಣ್ಯ ಇಲಾಖೆ ತೀರ್ಮಾನ ದೆತೊಂದುಂಡು.
ದಿನಾಲ ಸುಬ್ರಹ್ಮಣ್ಯ ಬೊಕ್ಕ ಪುಷ್ಪಗಿರಿ ವನ್ಯಜೀವಿ ವಲಯದ ಕಡೆರ್ದ್ ಪೋಪಿನ ತಲಾ 300 ಜನ ಚಾರಣಿಗರೆಗ್ ಮಾತ್ರ ಅವಕಾಶ ಕಲ್ಪಿಸಾವುನ ನಿರ್ಧಾರ ದೆತೊಂದೆರ್. ಕೆಲವು ರಜೆ ಇತ್ತಿನೆರ್ದಾತ್ರ ಕುಕ್ಕೆ ಸುಬ್ರಹ್ಮಣ್ಯ ವನ್ಯಜೀವಿ ಗೇಟ್ ಡ್ ಸುಮಾರ್ 1200ರ್ದ್ ಎಚ್ಚ ಚಾರಣಿಗೆರ್ ಟ್ರಕ್ಕಿಂಗ್ ಗ್ ಬತ್ತಿತ್ತೆರ್. ಅಂಚಾದ್ ಒಂತೆ ಪೊರ್ತು ನೂಕುನುಗ್ಗಲು ಆಯಿನ ಹಿನ್ನೆಲೆಡ್ ಚಾರಣಿಗೆರ್ ದೆತ್ತಿನ ವಿಡಿಯೋ ಬೊಕ್ಕ ಫೋಟೋಲು ಸಾಮಾಜಿಕ ಜಾಲತಾಣಡ್ ವೈರಲ್ ಆದ್ ಇತ್ತ್ಂಡ್. ಉಂದೆನ್ ಗಮನಿಸಾಯಿನ ಅರಣ್ಯ ಸಚಿವೆರ್ ಬೊಕ್ಕ ರಾಜ್ಯ ಸರ್ಕಾರ ಈ ನಿರ್ಧಾರನ್ ದೆತೊಂದೆರ್.
ಸಳ್ಯ: ಗ್ರಾಮಸ್ಥರ ಸಹಕಾರ ಇತ್ತ್ಂಡ ಗ್ರಾಮದ ಅಭಿವೃದ್ಧಿ ಸಾಧ್ಯ.ಹರಿಹರ ಕೊಲ್ಲಮೊಗ್ರ ಭಾಗಡ್ ನೆರೆರ್ದ್ ಹಾನಿ, ಕೃಷಿಗ್ ರೋಗರ್ದ್ ಹಾನಿ ಆತ್ಂಡ್. ಗ್ರಾಮ ವಾಸ್ತವ್ಯಡ್ ನೆಕ್ಕ್ ಮಾತ ಪರಿಹಾರ ಆದ್ ಗ್ರಾಮ ಅಭಿವೃದ್ಧಿ ಆವಡ್.ಗ್ರಾಮದ ಅಭಿವೃದ್ಧಿ ದೃಷ್ಟಿರ್ದ್ ಕೈಜೋಡಿಸಾದ್, ಅಭಿವೃದ್ಧಿ ಆವೆರೆ ಆರೋಗ್ಯಕರ ಚರ್ಚೆಲು ನಡಪಡ್ ಪಂದ್ ಸುಳ್ಯ ಶಾಸಕಿ ಭಾಗೀರಥಿ ಮುರುಳ್ಯ ಪಂಡೆರ್. ಕೊಲ್ಲಮೊಗ್ರದ ಮಯೂರ ಸಭಾಂಗಣಡ್ ಜ.29 ತಾನಿ ನಡತ್ತಿನ ದಕ್ಷಿಣ ಕನ್ನಡ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘ, ಸುಳ್ಯ ತಾಲೂಕು ಕಾರ್ಯನಿರತ ಪತ್ರಕರ್ತರ ಸಂಘ, ಸುಬ್ರಹ್ಮಣ್ಯ ಪ್ರೆಸ್ ಕ್ಲಬ್, ಜಿಲ್ಲಾಡಳಿತ, ತಾಲೂಕು ಆಡಳಿತ, ಹರಿಹರ, ಕೊಲ್ಲಮೊಗ್ರ ಗ್ರಾಮ ಪಂಚಾಯತ್ ಒಟ್ಟು ಸೇರಿಗೆಡ್ ಊರುದಕ್ಲೆನ ಸಹಕಾರಡ್ ಫೆ.10 ತಾನಿ ಕೊಲ್ಲಮೊಗ್ರಡ್ ನಡಪುನ ಪತ್ರಕರ್ತರ ಗ್ರಾಮ ವಾಸ್ತವ್ಯ ಕಾರ್ಯಕ್ರಮದ ಪೂರ್ವಭಾವಿ ಸಭೆಟ್ಟ್ ಆರ್ ಪಾತೆರಿಯೆರ್.
ಗ್ರಾಮ ವಾಸ್ತವ್ಯ ಕಾರ್ಯಕ್ರಮದ ಮಾಹಿತಿ ಕರಪತ್ರನ್ ಶಾಸಕೆರ್ ಬಿಡುಗಡೆ ಮಲ್ತೆರ್.
ದ.ಕ.ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಜಿಲ್ಲಾಧ್ಯಕ್ಷೆರ್ ಶ್ರೀನಿವಾಸ ನಾಯಕ್ ಇಂದಾಜೆ ಗುರ್ಕಾರ್ಮೆನ್ ವಹಿಸಾದ್ ಗ್ರಾಮ ವಾಸ್ತವ್ಯ ಕಾರ್ಯಕ್ರಮದ ರೂಪುರೇಷೆದ ಬಗ್ಗೆ ವಿವರಣೆ ಕೊರಿಯೆರ್.
ಕೊಲ್ಲಮೊಗ್ರು ಗ್ರಾ.ಪಂ. ಅಧ್ಯಕ್ಷೆ ಜಯಶ್ರೀ ಚಾಂತಾಳ, ಹರಿಹರ ಪಲ್ಲತ್ತಡ್ಕ ಗ್ರಾ.ಪಂ. ಉಪಾಧ್ಯಕ್ಷೆರ್ ಜಯಂತ ಬಾಳುಗೋಡು, ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಉಪಾಧ್ಯಕ್ಷೆರ್ ಭಾಸ್ಕರ ರೈ ಕಟ್ಟ, ಕಾರ್ಯದರ್ಶಿ ಗಂಗಾಧರ ಕಲ್ಲಪಳ್ಳಿ, ಸುಳ್ಯ ತಾಲೂಕು ಪತ್ರಕರ್ತರ ಸಂಘದ ಗುರ್ಕಾರ್ಲು ದಯಾನಂದ ಕಲ್ನಾರ್, ಮಾಜಿ ಗುರ್ಕಾರ್ಲು ಗಿರೀಶ್ ಅಡ್ಪಂಗಾಯ, ಪತ್ರಕರ್ತೆರ್ ಬಾಲಕೃಷ್ಣ ಭೀಮಗುಳಿ, ಬಿ.ಎನ್.
ಲೋಕೇಶ್ ಸುಬ್ರಹ್ಮಣ್ಯ, ಡಾ.ಸೋಮಶೇಖರ ಕಟ್ಟೆಮನೆ ಬಾಳುಗೋಡು, ವಿನೂಪ್ ಮಲ್ಲಾರ, ಮಾಧವ ಚಾಂತಾಳ, ಶೇಖರ ಅಂಬೆಕಲ್ಲು, ಉದಯ ಶಿವಾಲ, ಅಶ್ವತ್ ಎಲದಾಳ, ಪುಷ್ಪರಾಜ್ ಪಡ್ಪು, ಸತೀಶ್ ಟಿ.ಎನ್, ಡ್ಯಾನಿ ಎಲದಾಳು, ಚಂದ್ರಶೇಖರ ಕೊಂದಾಳ, ರಾದಾಕೃಷ್ಣ ಕಟ್ಟೆಮನೆ, ಬಿಂದು, ಶಿಲ್ಪಾ ಕೊತ್ನಡ್ಕ, ಚಂದ್ರಶೇಖರ ಕೋನಡ್ಕ, ಮಹಾಲಿಂಗೇಶ್ವರ ಶರ್ಮ, ಚೆನ್ನಕೇಶವ ಕೋನಡ್ಕ, ಯತಿನ್ ಅಂಬೆಕಲ್ಲು ಪಾಲ್ ಪಡೆದಿತ್ತೆರ್.
ಪತ್ರಕರ್ತ ಬಾಲಕೃಷ್ಣ ಭೀಮಗುಳಿ ಬತ್ತಿ ಬಿನ್ನೆರೆನ್ ಎದ್ಕೊಂದು ಸೊಲ್ಮೆ ಸಂದಾಯ ಮಲ್ತೆರ್.
ಕೊಲ್ಲಮೊಗ್ರ ಬಂಗ್ಲೆಗುಡ್ಡೆ ಸರಕಾರಿ ಪ್ರಾಥಮಿಕ ಶಾಲೆಡ್ ಫೆ.10 ತಾನಿ ಗ್ರಾಮ ವಾಸ್ತವ್ಯ ನಡಪೆರೆ ಉಂಡು ಪಂದ್ ತೆರಿಪಾಯೆರ್.
ತಿರುವನಂತಪುರಂ: ರಾಷ್ಟ್ರೀಯ ಸ್ವಯಂ ಸೇವಕ (ಆರ್ ಎಸ್ ಎಸ್) ಸಂಘದ ಕಾರ್ಯಕರ್ತೆ ರಂಜಿತ್ ಶ್ರೀನಿವಾಸನ್ ಕೆರಿನ ಕೇಸ್ ಡ್ ಆರೋಪಿ ಆಯಿನ ಎಸ್ ಡಿಪಿಐ ಬೊಕ್ಕ ಪಿಎಫ್ ಐದ 15 ಜನ ಕಾರ್ಯಕರ್ತೆರೆಗ್ ಕೇರಳದ ಆಲಪುಳ ಕೋರ್ಟ್ ಮರಣದಂಡನೆ ಶಿಕ್ಷೆ ವಿಧಿಸಾದ್ ಜ.30 ಅಂಗಾರೆ ತೀರ್ಪು ಪ್ರಕಟ ಮಲ್ದ್ಂಡ್.
2021 ತ್ತ ಡಿಸೆಂಬರ್ 19 ಕ್ಕ್ ಬಿಜೆಪಿದ ಒಬಿಸಿ ಮೋರ್ಚಾದ ರಾಜ್ಯ ಕಾರ್ಯದರ್ಶಿ, ಆರ್ ಎಸ್ ಎಸ್ ಕಾರ್ಯಕರ್ತೆ ಶ್ರೀನಿವಾಸನ್ ಮೆರೆನ್ ಇಲ್ಲಲೇ ಕುಟುಂಬ ಸದಸ್ಯೆರೆನ ಸಮ್ಮುಖಡ್ ಪಿಎಫ್ ಐ ಬೊಕ್ಕ ಎಸ್ ಡಿಪಿಐ ಕಾರ್ಯಕರ್ತೆರ್ ದಾಳಿ ನಡಪಾದ್ ಕೊಲೆ ಮಲ್ತ್ ಇತ್ತೆರ್.
ಎಸ್ ಡಿಪಿಐ ಮುಖಂಡೆ ಕೆಎಸ್ ಶಾನ್ ಡಿಸೆಂಬರ್ 18 ತ್ತ ರಾತ್ರೆ ಆಲಪುಳದ ಇಲ್ಲಗ್ ಪೋನಗ ಗುಂಪೊಂಜಿ ದಾಳಿ ನಡಪಾದ್ ಕೊಲೆ ಮಲ್ತಿನ ಕೆಲವೇ ಗಂಟೆದ ಬೊಕ್ಕ ಆರ್ ಎಸ್ ಎಸ್ ಕಾರ್ಯಕರ್ತೆ ಶ್ರೀನಿವಾಸನ್ ಮೆರೆನ ಕೊಲೆ ಘಟನೆ ನಡತ್ ಇತ್ತ್ಂಡ್.
ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ದಕುಲು 37ನೇ ತಿಂಗೊಲ್ದ ಸೇವಾ ಯೋಜನೆ ಮುಕೇನ ಒಂಜಿ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯನ್ ಮಲ್ತೆರ್.
ಕುಡ್ಲ ತಾಲೂಕ್ ದ ಪಂಜಿಮೊಗರು ವಿದ್ಯಾನಗರ ನಿವಾಸಿ ಕಿರಣ್ ಶೆಟ್ಟಿ ಮೇರ್ 28/04/2022 ಕ್ಕ್ ಉರ್ವ ಮಾರಿಗುಡಿತ್ತ ಕೈತಲ್ದ ಕಟ್ವಾನದ ಕೆಲಸ ಮಲ್ಪುನಗ ರಡ್ಡನೇ ಮಾಳಿಗೆರ್ದ್ ಬೂರ್ದು ಇತ್ತೆಲ ಜೆತ್ತಿನಲ್ಪನೇ ಉಲ್ಲೆರ್.
ಅವೆತೋ ಲಕ್ಷ ಕಾಸ್ ಕರ್ಚಿ ಮಲ್ತ್ಂಡಲ ಸರಿಯಾದ್ ಗುಣ ಅವಂದೆ ಇತ್ತೆಲ ಆಸ್ಪತ್ರೆಡ್ ಚಿಕಿತ್ಸೆ ಪಡೆವೊಂದು ಉಲ್ಲೆರ್. ಅಂಚಾದ್ ಆರೆನ ಆಸ್ಪತ್ರೆದ ಚಿಕಿತ್ಸೆಗ್ ಬೊಕ್ಕ ಜೀವನ ನಿರ್ವಹಣೆಗ್ ಮಸ್ತ್ ಕಾಸ್ ದ ಅವಶ್ಯಕತೆ ಉಂಡು ಪಂದ್ ಮಿಜಾರ್ ತುಳುನಾಡ ಪೊರ್ಲು ಚಾರಿಟೇಬಲ್ ಕೂಟಗ್ ಬಿನ್ನಾಪು ಸಂದಾದೆರ್. ಮೆರೆನ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ 20,000/-ರೂ.ದ ಚೆಕ್ಕ್ ನ್ ರೇಣುಕಾ ಪ್ರಕಾಶ್ ಶೆಟ್ಟಿ ಮೆರೆನ ಸಮ್ಮುಖಡ್ ರಾಮ ಮಂದಿರ ಎಡಪದವುಡ್ ಕೊರಿಯೆರ್.
ಈ ಪೊರ್ತುಡು ಕೂಟದ ಗುರ್ಕಾರೆ ಸಂದೀಪ್ ಮಿಜಾರ್ ಪಾಲ್ ಪಡೆದಿತ್ತೆರ್.
