January 2024

NIC ಡ್ ಖಾಲಿ ಇಪ್ಪುನ ಬೇಲೆಗ್ ಅರ್ಜಿ ಸಂದಾಯೆರೆ ಇನಿಯೇ ಅಕೇರಿದ ದಿನ

ರಾಷ್ಟ್ರೀಯ ವಿಮಾ ನಿಗಮಡ್ (NIC) ಖಾಲಿ ಇಪ್ಪುನ 274 ಬೇಲೆಗ್ ಅರ್ಜಿ ಸಂದಾಯೆರೆ ಇನಿಯೇ ಅಕೇರಿದ ದಿನ ಆತ್ಂಡ್.

ನೆಟ್ಟ್ ಕಾನೂನು, ಹಣಕಾಸು, IT, ಸಾಮಾನ್ಯ ಅಧಿಕಾರಿ ಬೇಲೆ ಉಂಡು. 2 ಹಂತದ ಪರೀಕ್ಷೆ ಸಂದರ್ಶನದ ಮಿತ್ತ್ ಅಭ್ಯರ್ಥಿಲೆಗ್ ಆಯ್ಕೆ ಮಲ್ಪೆರೆ ಆಪುಂಡು.

ಅಭ್ಯರ್ಥಿಲೆನ ಪ್ರಾಯ 21-30 ವರ್ಷದೊಲಯಿ ಇಪ್ಪೊಡು. ತಿಂಗೊಲ್ ಗ್ 85 ಸಾರ ರೂ. ಉಂಡು. ಎಚ್ಚದ ಪೊಲಬುಗಾದ್ https://nationalinsurance.nic.co.in ಗ್ ಭೇಟಿ ಕೊರೊಲಿ.

ಅಯೋಧ್ಯೆ ಪೊಸ ಮಂದಿರಡ್ ರಾಮಲಲ್ಲಾನ ಪ್ರಾಣ ಪ್ರತಿಷ್ಠಾಪನೆ: ಪ್ರಧಾನಿ ಮೋದಿ ಭಾಗಿ

ಅಯೋಧ್ಯೆಡ್ ಪೊಸತಾದ್ ನಿರ್ಮಾಣ ಆಯಿನ ಶ್ರೀರಾಮ ಮಂದಿರಡ್ ಶ್ರೀರಾಮ ಲಲ್ಲಾನ ಮೂರ್ತಿಗ್ ಪ್ರಾಣ ಪ್ರತಿಷ್ಠಾಪನೆ ಮಲ್ಪುನ ಮುಕೇನ ನರೇಂದ್ರ ಮೋದಿನ ಉಪಸ್ಥಿತಿಡ್ ಮಂದಿರನ್ ಉದಿಪನ ಮಲ್ತೆರ್.

ಮಧ್ಯಾಹ್ನ 12:29:03 ರ್ದ್ 12.30:35 ಮುಟ್ಟ ರಾಮಲಲ್ಲಾನ ವಿಗ್ರಹದ ಪ್ರಾಣ ಪ್ರತಿಷ್ಠಾನೆದ ವಿಧಿವಿಧಾನಲೆನ್ ಪ್ರಧಾನ ಅರ್ಚಕೆರ್ ಮಲ್ತೆರ್. ಪ್ರಧಾನಿ ನರೇಂದ್ರ ಮೋದಿ ಮೇರ್ ರಾಮಲಲ್ಲಾ ವಿಗ್ರಹದ ಪ್ರಾಣ ಪ್ರತಿಷ್ಠಾ ಲೇಸ್ ಡ್ ಪಾಲ್ ಪಡೆದಿತ್ತೆರ್. ಸೂರ್ಯೋದಯ ಬೊಕ್ಕ ಸೂರ್ಯಾಸ್ತದ ನಡುಟ್ಟ್ ಪ್ರತಿದಿನ ಒರ ನಡಪುನ 48 ನಿಮಿಷದ ‘ಅಭಿಜೀತ್ ಲಗ್ನ ಮೂರ್ತ’ಡ್ ಈ 84 ಸೆಕೆಂಡು ಮಸ್ತ್ ಪವಿತ್ರ ಪಂದ್ ನಂಬುವೆರ್.

ಈ ಪೊರ್ತುಡು ಆರೆಸ್ಸೆಸ್ ಮುಖ್ಯಸ್ಥೆರ್ ಮೋಹನ್ ಭಾಗವತ್, ಸಿಎಂ ಆದಿತ್ಯನಾಥ್ ಯೋಗಿ,ರಾಜ್ಯಪಾಕೆರ್ ಪಾಲ್ ಪಡೆದಿತ್ತೆರ್.

ಕರಿಂಜೆ ದೈವೊಲ್ಯಗ್ ತೊಂದರೆ: ಅಕೇರಿದ ತೀರ್ಮಾನ ಮುಟ್ಟ ಊರುಡು ಕೋಲ, ನೇಮ, ಉಚ್ಚಯ ಇಜ್ಜಿ

ಬೆದ್ರ: ನಂಬಿಕೆ, ಪರಂಪರೆ, ಕಟ್ಟು ಕಟ್ಟಳೆ, ಪದ್ಧತಿ, ಆಚರಣೆ ಬೊಕ್ಕ ಧಾರ್ಮಿಕ ವಿಚಾರಧಾರೆನ್ ಕಾನೂನುದೊಟ್ಟಿಗೆ ಸೇರಾಯೆರೆ ಬಲ್ಲಿ. ಪಿರಾಕ್ ದ ದೈವೊಲ್ಯದ ಅಡಿ ಮುಟ್ಟ ಜೆಸಿಬಿ ಯಂತ್ರದ ಮುಕೇನ ಅಪಾಯಕಾರಿಯಾದ್ ಒಗ್ಗುದು ಧಾರ್ಮಿಕ ನಂಬಿಕೆಗ್ ಅಡ್ಡಿ ಮಲ್ತಿನೆಕ್ಕ್ ಖಂಡಿಸಾವೆ. ಅಪರಾಧಿಲೆನ ಬಗೆಟ್ಟ್ ಪೊಲೀಸೆರ್ ಮೃದು ಆದ್ ಇಪ್ಪುನೇ ಸರಿ ಅತ್ತ್, ಈ ಬಗೆಟ್ಟ್ ಪೊಲೀಸ್‌ ಕಮೀಷನ್ ನ್ ಸ್ವತಃ ಭೇಟಿಯಾದ್ ನಿಷ್ಪಕ್ಷ ತನಿಖೆಗ್ ಆಗ್ರಹ ಮಲ್ಪುವ ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಂಡೆರ್.

ಇಂಚಿಪ್ಪಗ್ ಕರಿಂಜೆ ದೈವಕುಮಾರ ಕೊಡಮಂದಾಯ ಬ್ರಹ್ಮಬೈದರ್ಕಳ ದೈವೊಲ್ಯ ಶ್ರೀ ಕ್ಷೇತ್ರ ಉಳ್ಳಾಲ್ದ ಕೋಟೆದ ದೈವೊಲ್ಯಗ್ ಉದ್ಯಮಿಯೊರಿ ತೊಂದರೆ ಮಲ್ತಿನ ಘಟನೆನ್ ಖಂಡಿಸಾದ್ ಐತಾರ ಕರಿಂಜೆಡ್ ನಡತಿನ ಸಾರ್ವಜನಿಕ ಸಭೆಟ್ಟ್ ಪಾತೆರಿಯೆರ್.

ಈ ಕೇಸ್ ಅಕೇರಿದ ತೀರ್ಮಾನಗ್ ಬರ್ಪುನ ಮುಟ್ಟ ಊರುದ ಜಾತ್ರೆ, ಗ್ರಾಮಡ್ ದೈವೊಗ್ ಸಂಬಂಧಪಟ್ಟಿನ ಕೋಲ, బలి ಉಚ್ಚಯನ್ ನಡಪಾವೊಜಿ ಪಂದ್ ಸರ್ವಾನುಮತರ್ದ್ ಸಭೆಟ್ಟ್ ತೀರ್ಮಾನ ಮಲ್ತೆರ್.

ಅಪರಾಧಿಲು ರಾಜಾರೋಷವಾದ್ ತಿರ್ಗೊಂದು ಇಪ್ಪುನವು ನಾಗರಿಕ ಸಮಾಜ ತರೆ ತಗ್ಗವುಲೆಕ್ಕ ಆತ್ಂಡ್. ವಿಕೃತಿ ಮೆರೆಯಿನಕ್ಲೆಗ್ ಸದ್ಭುದ್ಧಿ ಪ್ರಾಪ್ತಿ ಅವಡ್ ಪಂದ್ ಪ್ರಾರ್ತನೆ ಮಲ್ತೆರ್.

ಸಭೆತ್ತ ಗುರ್ಕಾರ್ಮೆನ್ ಕರಿಂಜೆಗುತ್ತು ಕೃಷ್ಣರಾಜ ಹೆಗ್ಡೆ ಒಯಿಸ್ ದಿತ್ತೆರ್. ಮಾರೂರು ಖಂಡಿಗ ರಾಮದಾಸ ಅಸ್ರಣ್ಣ ಮೇರ್ ಪ್ರಾಸ್ತಾವಿಕವಾದ್ ಪಾತೆರಿಯೆರ್.

ಈ ಪೊರ್ತುಡು ಕೈತಲ್ ದಕುಲು ಕೆ.ಶ್ರೀಪತಿ ಭಟ್, ರಾಜ್ಯ ರೈತ ಸಂಘಟನೆದ ಮನೋಹರ ಶೆಟ್ಟಿ ಕುಪ್ಪೆಪದವು, ಆಲಂಗಾರು ಗುತ್ತು ಶ್ರೀನಿವಾಸ ಆಳ್ವ ಬೊಕ್ಕ ಗ್ರಾಮದ ಗುತ್ತು ಬರ್ಕೆ ಇಲ್ಲದಕುಲು ಪಾಲ್ ಪಡೆದಿತ್ತೆರ್.

ಅಯೋಧ್ಯೆಗ್ 52 ಲಕ್ಷ ರೂ. ದೇಣಿಗೆ 14 ವರ್ಷದ ಪೊಣ್ಣು

ಗುಜರಾತ್: ಸೂರತ್ ದ 14 ವರ್ಷದ ಭಾವಿಕಾ ಮಹೇಶ್ವರಿ ಪನ್ಪುನ ಪೊಣ್ಣು ಅಯೋಧ್ಯೆ ರಾಮಮಂದಿರ ನಿರ್ಮಾಣಗಾದ್ 52 ಲಕ್ಷ ರೂ. ದೇಣಿಗೆ ಕೊರ್ತೆರ್.

ಜನಕುಲು ಮಂದಿರ ನಿರ್ಮಾಣಗ್ ದೇಣಿಗೆ ಕೊರ್ತೆರ್ ಪಂದ್ ತೆರಿನ ಭಾವಿಕಾ ಬಲರಾಮನ ಕಥೆನ್ ಓದಿಯೆರೆ ಸುರು ಮಲ್ತೆರ್. ಮೂಜಿ ವರ್ಷಡ್ 50 ಸಾರ ಕಿ.ಮೀ ಮೇರ್ ಪ್ರಯಾಣ ಮಲ್ತ್ ದ್ ಸಾರ್ವಜನಿಕ ಸಭೆಟ್ಟ್ 300 ರ್ದ್ ಎಚ್ಚ ಪ್ರದರ್ಶನನ್ ಕೊರಿಯೆರ್. ಆವೆರ್ದ್ ತಿಕಿನ ಕಾಸ್ ನ್ ಮಂದಿರ ನಿರ್ಮಾಣಗ್ ದೇಣಿಗೆಯಾದ್ ಕೊರಿಯೆರ್.

ಕುಡ್ಲಡ್ ಮೋದಿ ಬ್ರಿಗೇಡ್ ಉದಿಪನ

ಕುಡ್ಲ : ಮೋದಿ ಬ್ರಿಗೇಡ್ ಉದಿಪನ ಲೇಸ್ ಜ.21 ಐತಾರ ಕುಡ್ಲ ಟಿ.ವಿ ರಮಣ ಪೈ ಕನ್ವೆನ್ಷನ್ ಸೆಂಟರ್ ಡ್ ನಡತ್ಂಡ್.

ಈ ಲೇಸ್ ಡ್ ಕನ್ಯಾಡಿ ಶ್ರೀರಾಮ ಕ್ಷೇತ್ರ ಮಹಾ ಸಂಸ್ಥಾನದ ಮಾಠಾಧೀಶೆರ್ ಶ್ರೀ ಬ್ರಹ್ಮಾನಂದ ಸರಸ್ವತಿ ಸ್ವಾಮೀಜಿ ಆಶೀರ್ವಚನ ಕೊರಿಯೆರ್. ಗೌರಿಗದ್ದೆ ಆಶ್ರಮದ ಶ್ರೀ ವಿನಯ್ ಗುರೂಜಿ ಉದಿಪನ ಮಲ್ತೆರ್. ನ್ಯಾಯವಾದಿ ಮೀರಾ ರಾಘವೇಂದ್ರ ಪ್ರಮುಖ ಭಾಷಣ ಮಲ್ತೆರ್.

ಅಂಚೆನೆ ತುಳುನಾಡ ಗಾನ ಗಂಧರ್ವ ಆರ್ಯಭಟ ಪ್ರಶಸ್ತಿ ಪುರಸ್ಕೃತೆರ್ ಪುತ್ತೂರು ಜಗದೀಶ್ ಆಚಾರ್ಯ ಮೆರೆರ್ದ್ ಸಂಗೀತ ಗಾನ ಸಂಭ್ರಮ ಸಾಂಸ್ಕೃತಿಕ ಲೇಸ್ ನಡತ್ಂಡ್.

ಫೆ.4: ಕಾರ್ಲ ಶ್ರೀ ಮಂಜುನಾಥೇಶ್ವರ ಭಜನಾ ಪರಿಷತ್ ದ ಪೊಸ ಪದುಕೆರೆನ ಪದಗ್ರಹಣ, ಭಜಕೆರೆನ ಕ್ರೀಡಾಕೂಟ

ಕಾರ್ಲ ಶ್ರೀ ಮಂಜುನಾಥೇಶ್ವರ ಭಜನಾ ಪರಿಷತ್ ದ ಮುತಾಲಿಕೆಡ್ ಭಜಕೆರೆ ಗೊಬ್ಬು, ಪೊಸ ಪದುಕೆರೆನ ಪದಗ್ರಹಣ ಫೆ.4 ಐತಾರ ಕಾರ್ಲ ಗಾಂಧಿ ಮೈದಾನಡ್ ನಡಪರೆ ಉಂಡು.

ಈ ಲೇಸ್ ಕಾರ್ಲ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬಿಸಿ ಟ್ರಸ್ಟ್ (ರಿ.) ಭಜನಾ ಮಂಡಳಿ ಒಕ್ಕೂಟ, ಶೌರ್ಯ ವಿಪತ್ತು ನಿರ್ವಹಣಾ ಘಟಕದ ಒಟ್ಟುಸೇರಿಗೆಡ್ ನಡಪರೆ ಉಂಡು ಪಂದ್ ಕಾರ್ಲ ಶ್ರೀ ಮಂಜುನಾಥೇಶ್ವರ ಭಜನಾ ಪರಿಷತ್ ಗುರ್ಕಾರೆ ಶ್ರೀನಿವಾಸ ಪೂಜಾರಿ ಎರ್ಲಪಾಡಿ, ಶೌರ್ಯ ವಿಪತ್ತು ನಿರ್ವಹಣಾ ಘಟಕದ ಸದಾನಂದ ಸಾಲಿಯಾನ್ ಕೆರ್ವಾಶೆ ಲೆಪ್ಪೋಲೆಡ್ ತೆರಿಪಾದೆರ್.

ಫೆ.1-3: ಭಟ್ಟಿಪಾಡ ಶ್ರೀ ಶನೀಶ್ವರ ಮಂದಿರಡ್ 40ನೇ ವರ್ಷದ ಮಹಾಪೂಜೆ

ಭಾಂಡುಪ್: ಭಟ್ಟಿಪಾಡ ಶ್ರೀ ಶನೀಶ್ವರ ಮಂದಿರ (ರಿ.)ದ 40ನೇ ವರ್ಷದ ಮಹಾಪೂಜೆ ಫೆ.1-3 ಮುಟ್ಟ ನಡಪರೆ ಉಂಡು.

ಈ ಲೇಸ್ ದ ವೈದಿಕ ವಿಧಿ ವಿಧಾನಲು ಘನ್ಸೋಲಿ ಶ್ರೀ ಮೂಕಾಂಬಿಕಾ ಮಂದಿರದ ಪ್ರಧಾನ ಅರ್ಚಕೆರ್ ಗುರುಪ್ರಸಾದ್ ಭಟ್ರೆನ ಮುತಾಲಿಕೆಡ್ ನಡಪರೆ ಉಂಡು.

ಫೆ.1 ಗುರುವಾರ ಬಯ್ಯಗ್ ಸಾಮೂಹಿಕ ಪ್ರಾರ್ತನೆ, ವಾಸ್ತುಹೋಮ, ಬಲಿ, ರಾಕ್ಷೋಘ್ನ ಹೋಮ ನಡಪರೆ ಉಂಡು.

ಫೆ.2 ಸುಕ್ರಾರ ಬೊಲ್ಪುಗು ನವಗ್ರಹ ಶಾಂತಿ, ಶನಿ ಶಾಂತಿ, ಬಯ್ಯಗ್ ಭಜನೆ, ದುರ್ಗಾ ನಮಸ್ಕಾರ ಪೂಜೆ ನಡಪರೆ ಉಂಡು.

ಫೆ.3 ಸನಿಯಾರ ಬೊಲ್ಪುಗು ಪ್ರಧಾನ ಹೋಮ, ಶ್ರೀ ಸತ್ಯನಾರಾಯಣ ಮಹಾಪೂಜೆ, ಪಲ್ಲಪೂಜೆ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ ಶನಿ ಗ್ರಂಥ ಪಾರಾಯಣ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ತೀರ್ಥ ಪ್ರಸಾದ ದೆತೊಂದು ಶ್ರೀ ಶನಿದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಮಂದಿರದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಇನಿ ಅಯೋಧ್ಯೆ ಶ್ರೀ ರಾಮ ಮಂದಿರ ಉದಿಪನ

ಅಯೋಧ್ಯೆಡ್ ಇನಿ ಬಾಲರಾಮನ ಮೂರ್ತಿಗ್ 84 ಸೆಕೆಂಡ್ ಡ್ ಪ್ರಾಣ ಪ್ರತಿಷ್ಠಾಪನೆ ಮಲ್ಪೆರೆ ಮೂರ್ತ ನಿಗಂಟ್ ಆತ್ಂಡ್.

12 ಗಂಟೆ 29 ನಿಮಿಷ 8 ಸೆಕೆಂಡ್ ರ್ದ್ 12 ಗಂಟೆ 30 ನಿಮಿಷ 32 ಸೆಕೆಂಡ್ ಮುಟ್ಟ ಬಾಲರಾಮಗ್ ಪ್ರಾಣ ಪ್ರತಿಷ್ಠಾಪನೆ ನಡಪುಂಡು. ಬೊಕ್ಕ ನೆಕ್ಕ್ ಸಂಬಂಧಪಟ್ಟಿನ ಬೇತೆ ಬೇತೆ ಲೇಸ್ 12:20-12:45 ಮುಟ್ಟ ನಡಪುಂಡು.

ಅಂಚೆನೆ ಮಹಾವಿಷ್ಣುನ ಪ್ರಾರ್ತನೆದೊಟ್ಟಿಗೆ ಸುರುವಾದ್ ಪುರೋಹಿತೆರೆನ ಮಂತ್ರದ ಮುಕೇನ ಶ್ರೀರಾಮನ್ ಅವಾಹನೆ ಮಲ್ಪೆರೆ ಉಂಡು.

‘KOPPA TROPHY’ ರಾಷ್ಟ್ರ ಮಟ್ಟದ ಕರಾಟೆ ಓಪನ್ ಚಾಂಪಿಯನ್ ಶಿಪ್ ಡ್ ವಿಟ್ಲ ಸೆನ್ಸಾಯಿ ಮಾಧವ ಅಳಿಕೆ ಕೂಟಗ್ ಪ್ರಶಸ್ತಿ

ಬುಡೋಕನ್ ಕರಾಟೆ ಬೊಕ್ಕ ಸ್ಪೋರ್ಟ್ಸ್ ಅಸೋಸಿಯನ್ ಕರ್ನಾಟಕದ ಮುತಾಲಿಕೆಡ್ ರಾಷ್ಟ್ರ ಮಟ್ಟದ ಕರಾಟೆ ಓಪನ್ ಪಂತೊ- “ಕೊಪ್ಪ ಟ್ರೋಫಿ” ಕೊಪ್ಪದ ಹರಿಹರಪುರಡ್ ಜ.21 ಕ್ಕ್ ನಡತ್ಂಡ್.

ಈ ಪಂತೊಡು ಕರಾಟೆ ಶಿಕ್ಷಕೆರ್ ಸೆನ್ಸಾಯಿ ಮಾಧವ ವಿಟ್ಲ ಮೆರೆನ ಕೂಟ ಪಾಲ್ ಪಡೆದ್ ಸುಮಾರ್ ಪ್ರಶಸ್ತಿನ್ ಪಡೆತ್ಂಡ್.

ಕುಮಿಟೆ ವಿಭಾಗಡ್: ಓಜಾಲು ಸರಕಾರಿ ಶಾಲೆದ ಹಂಸಿಕ ಪಿ ಸುರುತ್ತ ತಾನ, ವಿಠಲ ಪದವಿ ಪೂರ್ವ ಕಾಲೇಜ್ ದ ಭವಿಶ್ ಸುರುತ್ತ ತಾನ, ಪುತ್ತೂರು ಬೆಥನಿ ಆಂಗ್ಲ ಮಾದ್ಯಮ ಶಾಲೆದ ರಿಯೋನ್ ಲಸ್ರಾದೊ ರಡ್ಡನೇ ತಾನ, ವಿಟ್ಲ ಜೇಸಿಸ್ ಶಾಲೆದ ದ್ರುವ ರಡ್ಡನೇ ತಾನ,
ಸಂತ ವಿಕ್ಟರ್ಸ್ ಪುತ್ತೂರು ಶಾಲೆದ ಸಾನಿಧ್ಯ ರಡ್ಡನೇ ತಾನ, ವಿಟ್ಲ ಮಾದರಿ ಶಾಲೆದ ಸಾರ್ಥಕ್ ರಡ್ಡನೇ ತಾನ, ವಿಟ್ಲ ಜೇಸಿಸ್ ಶಾಲೆದ ಸಾನ್ವಿ ಮೂಜಿನೇ ತಾನ ಪಡೆತೆರ್.

ಅಂಚೆನೆ ಕಟಾ ವಿಭಾಗಡ್:
ಓಜಾಲು ಸರಕಾರಿ ಶಾಲೆದ ಹಂಸಿಕ ಪಿ ಸುರುತ್ತ ತಾನ, ವಿಠಲ ಪದವಿ ಪೂರ್ವ ಕಾಲೇಜ್ ದ ಭವಿಶ್ ಸುರುತ್ತ ತಾನ, ಸಂತ ವಿಕ್ಟರ್ಸ್ ಪುತ್ತೂರು ಶಾಲೆದ ಸಾನಿಧ್ಯ ಸುರುತ್ತ ತಾನ, ವಿಟ್ಲ ಮಾದರಿ ಶಾಲೆದ ಸಾರ್ಥಕ್ ಸುರುತ್ತ ತಾನ, ವಿಟ್ಲ ಜೇಸಿಸ್ ಶಾಲೆದ ದ್ರುವ ರಡ್ಡನೇ ತಾನ, ಪುತ್ತೂರು ಬೆಥನಿ ಆಂಗ್ಲ ಮಾದ್ಯಮ ಶಾಲೆದ ರಿಯೋನ್ ಲಸ್ರಾದೊ ಮೂಜಿನೇ ತಾನ, ವಿಟ್ಲ ಜೇಸಿಸ್ ಶಾಲೆದ ಸಾನ್ವಿ ಮೂಜಿನೇ ತಾನನ್ ಪಡೆತೆರ್.

ಜೋಕ್ಲೆಗ್ ದಿಲೀಪ್, ರೋಹಿತ್ S N, ನಿಖಿಲ್ K T ತರಬೇತಿ ಕೊರ್ತೆರ್.