ಕೇಂದ್ರದ ಅಧೀನಡ್ ಬರ್ಪುನ NLC ಲಿಮಿಟೆಡ್ ಡ್ 632 ಅಪ್ರೆಂಟಿಸ್ ಬೇಲೆ ಉಂಡು.
ಈ ಬೇಲೆಗ್ ಆನ್ ಲೈನ್ ಮುಕೇನ ಅರ್ಜಿ ಸಂದಾಯೆರೆ ಜ.31 ಮುಟ್ಟ ಅವಕಾಶ ಉಂಡು. ಆಸಕ್ತ ಅಭ್ಯರ್ಥಿಲು ಅಧಿಕೃತ ವೆಬ್ಸೈಟ್ www.nlcindia.in ಗ್ ಭೇಟಿ ಕೊರ್ಪುನ ಮುಕೇನ ಅರ್ಜಿ ಸಂದಾವೊಲಿ.
ಅರ್ಜಿದಾರೆರ್ ಪದವೀಧರೆರಾಪ್ಪೊಡು. ಅತ್ತ್ಂಡ ಸಂಬಂಧಪಟ್ಟಿನ ಕ್ಷೇತ್ರಡ್ ಡಿಪ್ಲೊಮಾ ಆದಿಪ್ಪೊಡು.
ಕುಂಪಲ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಲ್ಯಡ್ ಜ.22 ಸೋಮಾರ ಅಯೋಧ್ಯೆ ಶ್ರೀ ರಾಮಲಾಲ್ಲನ ಪ್ರತಿಷ್ಠಾಪನೆ ದಿನ ಇಸೇಸ ಪೂಜೆ ನಡತ್ಂಡ್.
ಈ ಲೇಸ್ ಶ್ರೀ ಬಾಲ ಯೋಗಿ ಅಮೃತಾನಂದ ಸ್ವಾಮೀಜಿ ಮೆರೆನ ಮುತಾಲಿಕೆಡ್ ನಡತ್ಂಡ್. ಈ ಲೇಸ್ ದೊಟ್ಟಿಗೆ ಭಜನೆಲ ನಡತ್ಂಡ್.
ಈ ಪೊರ್ತುಡು ರಾಜೇಶ್ ಪೂಜಾರಿ, ದಯಾನಂದ್ ಲಕ್ಷ್ಮೀಗುಡ್ಡೆ, ಸುಂದರ ಕುಂಪಲ, ಕೃಷ್ಣ ಕುಂಪಲ, ಸತೀಶ್ ಆಚಾರ್, ಸಂಜಯ್ ಕೃಷ್ಣನಗರ, ಪ್ರತಾಪ್ ಸೌಂದರ್ಯ ಕುಂಪಲ ಪಾಲ್ ಪಡೆದಿತ್ತೆರ್.
ಕೋಟೆ ಶ್ರೀ ಸನಿ ಮಹಾತ್ಮಾ ಪೂಜಾ ಸಮಿತಿದ 80ನೇ ವರ್ಷದ ಶ್ರೀ ಶನಿಮಹಾಪೂಜೆ ಬೊಕ್ಕ ವಾರ್ಷಿಕೋಚ್ಚಯ ಫೆ.3-5 ಮುಟ್ಟ ನಾಲಾಸೋಪಾರ ಶ್ರೀ ಶನೈಶ್ವರ ದೇವೆರೆನ ಸನ್ನಿಧಿಡ್ ನಡಪರೆ ಉಂಡು.
ಈ ಲೇಸ್ ಬ್ರಹ್ಮಶ್ರೀ ಕೊಯ್ಯೂರು ನಂದಕುಮಾರ ತಂತ್ರಿಲೆನ ಮುತಾಲಿಕೆಡ್ ನಡಪರೆ ಉಂಡು.
ಫೆ.3 ಸನಿಯಾರ ಬೊಲ್ಪುಗು ದೇವೆರೆನ ಪ್ರಾರ್ತನೆ, ತೋರಣ ಮೂರ್ತ, ನವಕ ಪ್ರದಾನ, ಗಣಪತಿ ಹೋಮ, ಕೊಡಿ ಏರಿಯೆರೆ, ಶನೈಶ್ವರ ಮಂತ್ರ ಹೋಮ, ನಾಗದೇವೆರೆನ ಆಶ್ಲೇಷ ಪೂಜೆ, ಮಧ್ಯಾಹ್ನ ಮಹಾಪೂಜೆ, ತೀರ್ಥ ಪ್ರಸಾದ ಪಟ್ಟಿಯೆರೆ, ಶನಿಗ್ರಂಥ ಪಾರಾಯಣ, ಅನ್ನ ಪ್ರಸಾದ ಸೇವೆ, ದೇವೆರೆನ ಉಚ್ಚಯ, ರಾತ್ರೆ ಪೂಜೆ, ರಂಗಪೂಜೆ, ನಿತ್ಯಬಲಿ, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಫೆ.4 ಐತಾರ ಬೊಲ್ಪುಗು ತುಡರ್ ಬಲಿ, ದುರ್ಗಾ ಹೋಮ, ಮಹಾಪೂಜೆ, ತೀರ್ಥ ಪ್ರಸಾದ ಪಟ್ಟಿಯೆರೆ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಉಚ್ಚಯ, ರಾತ್ರೆ ಪೂಜೆ, ಶ್ರೀ ಭೂತ ಬಲಿ, ಶಯನೋಚ್ಚಯ, ಕವಾಟ ಬಂಧನ ನಡಪರೆ ಉಂಡು.
ಫೆ.5 ಸೋಮಾರ ಬೊಲ್ಪುಗು ಕವಾಟೋದ್ಘಾಟನೆ, ಅಭಿಷೇಕ, ಮಹಾಪೂಜೆ, ಚೂರ್ಣೋಚ್ಚಯ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಬಯ್ಯಗ್ ದೇವೆರೆನ ಅವಭೃತೋಚ್ಚಯ, ದೇವೆರೆನ ದರ್ಶನ, ಕೊಡಿ ಜಾವೆರೆ, ರಾತ್ರೆ ಪೂಜೆ ನಡಪರೆ ಉಂಡು.
ಫೆ.6 ಅಂಗಾರೆ ಬೊಲ್ಪುಗು ಸಂಪ್ರೋಕ್ಷಣೆ, ಮಂತ್ರಾಕ್ಷತೆ ನಡಪರೆ ಉಂಡು.
ಕ್ರೋಡಬೈಲೂರು ಶ್ರೀ ನಂದಿಚಿಕ್ಕು ಸಪರಿವಾರ ದೈವೊಲ್ಯಡ್ ಪೇರ್ ಪರ್ಬ, ಕೆಂಡ ಸೇವೆ ಬೊಕ್ಕ ಢಕ್ಕೆ ಬಲಿ ಸೇವೆ ಫೆ.4 ಐತಾರ ನಡಪರೆ ಉಂಡು.
ಆನಿ ಬಯ್ಯಗ್ ಶ್ರೀ ಮಹಾಗಣಪತಿ ಯಕ್ಷಗಾನ ಮಂಡಳಿ (ರಿ.) ನಡೂರು, ಮಂದಾರ್ತಿ ಮೊಕ್ಲೆರ್ದ್ ಶಿವದೂತ ಪಂಜುರ್ಲಿ ಆಟ ನಡಪರೆ ಉಂಡು. ರಾತ್ರೆ ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಗಂಧ ಪ್ರಸಾದ ದೆತೊಂದು ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಬೈಲೂರು ಮೂಜಿ ಇಲ್ಲದ ಕುಟುಂಬಸ್ಥೆರ್ ಬೊಕ್ಕ ಕ್ರೋಡಬೈಲೂರು ಶ್ರೀ ನಂದಿಚಿಕ್ಕು ಸಪರಿವಾರ ದೈವೊಲ್ಯದ ಆಡಳಿತ ಮೊಕ್ತೇಸರೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಒಟ್ಟುಸೇರಿಗೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 42ನೇ ಸಂಚಿಕೆ ಜ.23 ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಂಡ್.
ಈ ಲೇಸ್ ಡ್ ಶಿಕ್ಷಕೆರ್ ಬೊಕ್ಕ ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರ್. ಜ.24 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಅಯೋಧ್ಯೆದ ಶ್ರೀ ರಾಮನ ಮಂದಿರ ಭಾರಿ ಪೊರ್ಲು ತೋಜೊಂದು ಇತ್ತ್ಂಡ್. ಮಂದಿರದೊಲಯಿದ ಶ್ರೀ ರಾಮನ ಬಿಂಬದ ಪ್ರಾಣಪ್ರತಿಷ್ಠೆ ಶ್ರದ್ಧಾ ಭಕ್ತಿಡ್ ನಡತ್ಂಡ್ ಪಂದ್ ಈ ಲೇಸ್ ಡ್ ಪಾಲ್ ಪಡೆಯಿನ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ವೀರೇಂದ್ರ ಹೆಗ್ಗಡೆರ್ ತೆರಿಪಾದೆರ್.
ಈ ಲೇಸ್ ಡ್ ಪುಗರ್ತೆದ ಮಠಾಧಿಪತಿಲು ಬೊಕ್ಕ ಮಾತ ರಂಗದ ಪ್ರಮುಖೆರ್ ಪಾಲ್ ಪಡೆದಿತ್ತೆರ್. ಈ ಲೇಸ್ ಶಿಸ್ತುಡು ನಡತ್ಂಡ್. ಅಯೋಧ್ಯೆದ ಪೇಂಟೆನ್ ಬಣ್ಣ ನಣ್ಣದ ಪೂ ಪುರ್ಪಲೆರ್ದ್ ಶೃಂಗಾರ ಮಲ್ತ್ ದಿತ್ತೆರ್. ಅಲ್ಪಲ್ಪ ಸ್ವಾಗತ ನೃತ್ಯಲ ನಡತೊಂದು ಇತ್ತ್ಂಡ್. ಮಾತ ರೀತಿಡ್ಲಾ ಲೇಸ್ ಪೊರ್ಲುಡು ನಡತ್ಂಡ್.
ರಾಮಮಂದಿರದ ಎದುರುಡು ಕುಲ್ದಿನ ಮಾತ ಸಂತೆರೆಗ್ ಆಡೆಗೆ ತೆನಸ್, ಪಾನೀಯನ್ ಪಟ್ಟಿಯೆರ್. ಅಲ್ಪದ ಹವಾಮಾನಡ್ ಚಳಿ ಇತ್ತ್ಂಡ್, ಆಂಡಲ ಆತ್ಮೀಯವಾಯಿನ ಸ್ವಾಗತ ಬೊಕ್ಕ ವ್ಯವಸ್ಥಿತವಾಯಿನ ಲೇಸ್ ರ್ದ್ ಎಂಕ್ಲೆಗ್ ಮಾತ ಆತ್ ತೊಂದರೆ ಆಯಿಜಿ. ಪಿದಯಿ ಕುಲ್ದಿನಕ್ಲೆಗ್ ಟಿ.ವಿ. ಪರದೆದ ಮುಕೇನ ಉಲಯಿ ನಡಪುನ ಪೂಜೆದ ವಿಧಿ-ವಿಧಾನನ್ ತೂಪಾವೊಂದು ಇತ್ತೆರ್.
ಈ ಪ್ರಾಣಪ್ರತಿಷ್ಠೆ ಲೇಸ್ ರ್ದ್ ಮಹಾತ್ಮೆರ್ ಮಾತೆರ್ಲಾ ಪ್ರಸನ್ನರಾದ್ ಪೋತೆರ್. ಈ ಲೇಸ್ ರ್ದ್ ಅಲ್ಪಲ್ಪ ಪ್ರಯಾಣಗ್ ತೊಂದರೆ ಆದಿತ್ತ್ಂಡ್. ಜ.23 ರ್ದ್ ರಾಮ ಮಂದಿರಗ್ ಮುಕ್ತ ದರ್ಶನ ಪಂದ್ ಘೋಷಣೆ ಮಲ್ದೆರ್. ಮಾನಾದಿಗೆದ ಪ್ರಧಾನಮಂತ್ರಿ ನರೇಂದ್ರ ಮೋದಿಜೀ ಮೇರ್ ಮಾತೆರೆನ್ಲಾ ಉದ್ಧೇಶಿಸಾದ್ ಪಾತೆರಿಯೆರ್. ಬೊಕ್ಕ ಮಾತ ಸಂತೆರೆನ ಕೈತಡೆ ಬತ್ತ್ ದ್ ಮಾತೆರೆನ್ಲಾ ಗೌರವರ್ದ್ ಪಾತೆರಿಯೆರ್ ಪಂದ್ ಡಾ| ಡಿ. ವೀರೇಂದ್ರ ಹೆಗ್ಗಡೆರ್ ಪಂಡೆರ್.
ಕುಡ್ಲ: ತೆಂಕು ಬಡಗು ಕಲಾ ಸವ್ಯಸಾಚಿ ನಾಟ್ಯ ಮಯೂರ ರಕ್ಷಿತ್ ಶೆಟ್ಟಿ ಪಡ್ರೆ ಮೇರ್ ಪುಗರ್ತೆದ ಕುಂದೇಶ್ವರ ಸಮ್ಮಾನ್ ಪ್ರಶಸ್ತಿಗ್ ಆಯ್ಕೆ ಆತೆರ್.
ಕಾರ್ಲದ ಹಿರ್ಗಾನ ಶ್ರೀ ಕುಂದೇಶ್ವರ ದೇವಲ್ಯಡ್ ಜ.21 ಕ್ಕ್ ನಡಪುನ ವರ್ಷಾವಧಿ ಜಾತ್ರೋಚ್ಚಯದ ಪೊರ್ತುಡು ರಾತ್ರೆ ಪ್ರಶಸ್ತಿ ಪ್ರದಾನ ಮಲ್ತೆರ್. ಶಾಸಕೆರ್ ವಿ. ಸುನಿಲ್ ಕುಮಾರ್ ಬೊಕ್ಕ ಚಲನಚಿತ್ರ ನಟೆ ವಿಘ್ನೇಶ್ ಎಂ. ಪಾಲ್ ಪಡೆದಿತ್ತೆರ್.
ಈ ಪೊರ್ತುಡು ರಕ್ಷಿತ್ ಪಡ್ರೆ ಮೇರ್ ಅಭಿನಯ ಮಲ್ತಿನ ಶ್ವೇತಕುಮಾರ ಚರಿತ್ರೆ ಯಕ್ಷನಾಟಕ ಪ್ರದರ್ಶನ ಅವೆರೆ ಉಂಡು ಪಂದ್ ಕಾರ್ಯಕ್ರಮ ಸಂಯೋಜಕೆರ್ ಜಿತೇಂದ್ರ ಕುಂದೇಶ್ವರ ತೆರಿಪಾದೆರ್.
ಬಪ್ಪನಾಡ್, ಸಸಿಹಿತ್ಲು, ಹೊಸನಗರ, ಎಡನೀರು ಮೇಳಡ್ ಕಲಾಸೇವೆ ಮಲ್ತ್ ದ್ ಇತ್ತೆ ಹನುಮಗಿರಿ ಮೇಳಡ್ ತಿರುಗಾಟ ಮಲ್ತೊಂದು ಇಪ್ಪುನ ನಾಟ್ಯ ಮಯೂರ, ಯಕ್ಷ ಚೈತನ್ಯ ಬಿರುದಾಂಕಿತ ಪಡ್ರೆ ಮೇರ್, 20 ಕಡೆಟ್ಟ್ ಜೋಕುಲೆಗಾದ್ ಯಕ್ಷಗಾನ ಕ್ಲಾಸ್ ನಡಪುನ ಮುಕೇನ ಯಕ್ಷಗಾನ ಒರಿಪಾದ್, ಬುಲೆಪಾವೊನ ಬೇಲೆ ಮಲ್ತೊಂದು ಉಲ್ಲೆರ್.
ಸುದರ್ಶನ, ಅಭಿಮನ್ಯು, ಮೇನಕೆ, ಭ್ರಮರ ಕುಂತಳೆ, ಸುಭದ್ರೆ, ಪ್ರಭಾವತಿ, ಕೃಷ್ಣ, ಶ್ರೀದೇವಿ, ಅಶ್ವತ್ಥಾಮ, ಸೀತೆ, ಮೋಹಿನಿ, ಮೀನಾಕ್ಷಿ ಮೆರೆಗ್ ಪುಗರ್ತೆ ಕನತ್ ದ್ ಕೊರಿನ ಪಾತ್ರಲು. ಎಂ ಎಸ್ಸಿ ಕಂಪ್ಯೂಟರ್ ಸೈನ್ಸ್ ಪದವೀಧರೆ ಆಯಿನ ಮೇರ್ ಭರತನಾಟ್ಯಡ್ ಪ್ರವೀಣೆರ್. ಗ್ಲಾಸ್ ಪೇಂಟಿಂಗ್, ರಂಗೋಲಿಡ್ಲಾ ಸಾಧನೆ ಮಲ್ದೆರ್.
ಜ.21-23 ಮುಟ್ಟ ಕುಂದೇಶ್ವರ ಜಾತ್ರೆ:
ಜ.21 ಕ್ಕ್ ಬೊಲ್ಪುಗು ಪ್ರಾರ್ತನೆ, ತೋರಣ ಮೂರ್ತ ಗಣಯಾಗ, ಮಹಾಪೂಜೆ, ಬಯ್ಯಗ್ ಆರಾಧನ ಪೂಜೆ, ರಾತ್ರೆ ಸಾಯಿಶಕ್ತಿ ಕಲಾ ಬಳಗ ಕುಡ್ಲ ಕೂಟದಕ್ಲೆರ್ದ್ ಶ್ವೇತ ಕುಮಾರ ಚರಿತ್ರೆ ಪನ್ಪುನ ವಿಶಿಷ್ಟ ಯಕ್ಷನಾಟಕ ಪ್ರದರ್ಶನ ಆಂಡ್.
ಜ.22 ಕ್ಕ್ ಬೊಲ್ಪುಗು ಪಂಚವಿಂಶತಿ ಕಲಾಧಿವಾಸ, ಅಧಿವಾಸ ಹೋಮ, ಕಲಶಾಭಿಷೇಕ, ಮಹಾಪೂಜೆ, ಕೊಡಿ ಏರ್ಂಡ್, ಬೊಕ್ಕ ಅವಸ್ತುತ ಬಲಿ, ಪಲ್ಲಪೂಜೆ, ಬಯ್ಯಗ್ ಮಹೋಚ್ಚಯ, ಉಚ್ಚಯ ಬಲಿ, ಅವಭೃತ ಕಟ್ಟೆಪೂಜೆ, ದೈವ ಭೇಟಿ, ಅಗ್ನಿಕೇಳಿ, ರಂಗಪೂಜೆಯಾದ್ ಕೊಡಿ ಜಾಯೆರ್.
ಜ.23 ಕ್ಕ್ ನವಕಪ್ರಧಾನ ಹೋಮ, ಸಂಪ್ರೋಕ್ಷಣೆ ಬೊಕ್ಕ ಪ್ರಸಾದ ಪಟ್ಟಿಯೆರೆ ಉಂಡು. ಈ ಧಾರ್ಮಿಕ ಲೇಸ್ ಲು ಕೌಡೂರು ವೇ.ಮೂ. ಭಗೀರಥ ಭಟ್, ಕುಂದೇಶ್ವರ ಕೃಷ್ಣರಾಜೇಂದ್ರ ಭಟ್, ರವೀಂದ್ರ ಭಟ್ ಮುತಾಲಿಕೆಡ್ ನಡಪುಂಡು.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 43ನೇ ಸಂಚಿಕೆ ಜ. 22 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನದ ಯೋಗ ಶಿಕ್ಷಕೆರ್ ಆರ್ ಶಿವಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್. ಜ.23 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಅಡ್ವೆ-ನಂದಿಕೂರು “ಕೋಟಿ- ಚೆನ್ನಯ” ಜೋಡುಕರೆ ಕಂಬುಲ ಜ.20 ಸನಿಯಾರ ನಡತ್ಂಡ್.
ಈ ಕಂಬುಲ ಕೂಟಡ್ ಗೆಂದಿನಕ್ಲೆನ ಪೊಲಬು ಇಂಚ ಉಂಡು:
ಕನೆಪಲಯಿ: 9 ಜತೆ
ಅಡ್ಡ ಪಲಯಿ: 3 ಜತೆ
ಬಲ್ಲ್ ದ ಮಲ್ಲ: 17 ಜತೆ
ನಾಯೆರ್ ದ ಮಲ್ಲ: 30 ಜತೆ
ಬಲ್ಲ್ ದ ಎಲ್ಯ: 21 ಜತೆ
ನಾಯೆರ್ ದ ಎಲ್ಯ: 84 ಜತೆ
ಒಟ್ಟು 164 ಜತೆ ಇತ್ತ್ಂಡ್.
ಕನೆಪಲಯಿ:
ಸುರುತ್ತ ಇನಾಮು: ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಬೈಂದೂರು ಮಹೇಶ್ ಪೂಜಾರಿ,
ಸೂಡ ಹಳೆಮನೆ ಅಜಿತ್ ಕುಮಾರ್ ಶೆಟ್ಟಿ
ಪಲಯಿ ಮುಟ್ಟಿನಾರ್: ತೆಕ್ಕಟ್ಟೆ ಸುಧೀರ್ ದೇವಾಡಿಗ
ಅಡ್ಡ ಪಲಯಿ:
ಸುರುತ್ತ ಇನಾಮು: ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಸಾವ್ಯ ಗಂಗಯ್ಯ ಪೂಜಾರಿ
ರಡ್ಡನೇ ಇನಾಮು: ನಾರಾವಿ ಯುವರಾಜ್ ಜೈನ್
ಪಲಯಿ ಮುಟ್ಟಿನಾರ್: ಭಟ್ಕಳ ಹರೀಶ್
ಬಲ್ಲ್ ದ ಮಲ್ಲ:
ಸುರುತ್ತ ಇನಾಮು: ನಂದಳಿಕೆ ಶ್ರೀಕಾಂತ್ ಭಟ್ “ಎ”
ಗಿಡತಿನಾರ್: ಬಂಬ್ರಾಣಬೈಲು ವಂದಿತ್ ಶೆಟ್ಟಿ
ರಡ್ಡನೇ ಇನಾಮು: ನಂದಳಿಕೆ ಶ್ರೀಕಾಂತ್ ಭಟ್ “ಬಿ”
ಗಿಡತಿನಾರ್: ಕಾವೂರು ದೋಟ ಸುದರ್ಶನ್
ಬಲ್ಲ್ ದ ಎಲ್ಯ:
ಸುರುತ್ತ ಇನಾಮು: ಕಲ್ಯ ಮಿತ್ತಬೆಟ್ಟು ಶ್ರೀಧರ ಪೂಜಾರಿ
ಗಿಡತಿನಾರ್: ಮಿಜಾರು ಅಶ್ವಥಪುರ ಶ್ರೀನಿವಾಸ ಗೌಡ
ರಡ್ಡನೇ ಇನಾಮು: ಸುರತ್ಕಲ್ ಪಾಂಚಜನ್ಯ ಯೋಗಿಶ್ ಪೂಜಾರಿ
ಗಿಡತಿನಾರ್: ಮಾಸ್ತಿಕಟ್ಟೆ ಸ್ವರೂಪ್
ನಾಯೆರ್ ದ ಮಲ್ಲ:
ಸುರುತ್ತ ಇನಾಮು: ಬೋಳದಗುತ್ತು ಸತೀಶ್ ಶೆಟ್ಟಿ “ಎ”
ಗಿಡತಿನಾರ್: ನತೀಶ್ ಬಾರಾಡಿ
ರಡ್ಡನೇ ಇನಾಮು: ಕಕ್ಕೆಪದವು ಪೆಂರ್ಗಾಲು ಕೃತಿಕ್ ಬಾಬು ವೆಂಕಪ್ಪ ಗೌಡ
ಗಿಡತಿನಾರ್: ಪೆಂರ್ಗಾಲು ಕೃತಿಕ್ ಗೌಡ
ನಾಯೆರ್ ದ ಎಲ್ಯ:
ಸುರುತ್ತ ಇನಾಮು: ಎರ್ಮಾಳ್ ಪುಚ್ಚೊಟ್ಟುಬೂಡು ಬಾಲಚಂದ್ರ ಲೋಕಯ್ಯ ಶೆಟ್ಟಿ
ಗಿಡತಿನಾರ್: ನಕ್ರೆ ಪವನ್ ಮಡಿವಾಳ
ರಡ್ಡನೇ ಇನಾಮು: ತೊಡಾರು ಪಂಚಶಕ್ತಿ ಬಾರ್ದಿಲ ಶ್ಲೋಕ್ ರಂಜಿತ್ ಪೂಜಾರಿ
ಗಿಡತಿನಾರ್: ಪೆಂರ್ಗಾಲು ಕೃತಿಕ್ ಗೌಡ
ಕುಡ್ಲ: ಬಜ್ಜೆಯಿ ತೋಟದ ನಷ್ಟಗ್ ಬೇಜಾರಾದ್ ಗೃಹಪ್ರವೇಶ ಧಾರಾವಾಹಿ ನಟಿ ದಿವ್ಯಶ್ರೀ ನಾಯಕ್ ಸುಳ್ಯ ಮೆರೆನ ಪೊಪ್ಪ ಆತ್ಮಹತ್ಯೆ ಮಲ್ತೊಂದೆರ್.
ಯಕ್ಷಗಾನದ ಹಿಮ್ಮೇಳಡ್ ಚೆಂಡೆ ಮದ್ದಳೆ ವಾದಕೆರಾಯಿನ ನಾರಾಯಣ ನಾಯಕ್ ಮೆರೆಗ್ ಬೊಡೆದಿ, ರಡ್ಡ್ ಪೊಣ್ಣು ಜೋಕುಲು ಉಲ್ಲೆರ್.
ಎಡ್ಡೆ ಕೃಷಿಕೆರಾಯಿನ ನಾರಾಯಣ ನಾಯಕ್ ಮೆರೆನ ಬಜ್ಜೆಯಿ ತೋಟಗ್ ಮಂಜಲ್ ರೋಗ ಬತ್ತ್ ದ್ ಸರ್ವನಾಶ ಆತ್ಂಡ್. ಅತ್ತಂದೆ ಮೆರೆನ ರಬ್ಬರ್ ತೋಟದ ಇಳುವರಿಲ ಕಮ್ಮಿ ಆದ್ ಜೀವನ ಮಲ್ಪೆರೆ ಕಷ್ಟ ಆದಿತ್ತ್ಂಡ್. ಅಂಚಾದ್ ಮೇರ್ ಆತ್ಮಹತ್ಯೆ ಮಲ್ತೊಂದೆರ್ ಪಂದ್ ಡೆತ್ ನೋಟ್ ಬರೆತೆರ್.
