January 2024

ಹೈನುಗಾರಿಕೆರ್ದ್ ಗ್ರಾಮೀಣ ಪ್ರದೇಶದ ಸಂಸ್ಕೃತಿ, ಸಮೃದ್ಧ ಪ್ರಕೃತಿ ಒರಿಯೆರೆ ಸಾಧ್ಯ

ಮುಲ್ಕಿ: ಕಿನ್ನಿಗೋಳಿ ಕೈತಲ್ದ ಐಕಳ ಕಾಂತಾಬಾರೆ ಬುದಾಬಾರೆ ಜೋಡುಕರೆ ಕಂಬುಲ ಉಚ್ಚಯದ ಲೆಕ್ಕೊಡು ಬೇತೆ ಬೇತೆ ಸೇವಾ ಸಂಸ್ಥೆಲೆನ ಸಹಕಾರದೊಟ್ಟಿಗೆ ಬೃಹತ್ ಜಾನುವಾರು ಮೇಳ ಬೊಕ್ಕ ತುಳು ಜಾನಪದ ಕ್ರೀಡೋತ್ಸವ ಐಕಳ ಬಾವದ ಕಂಬುಲ ಮಂಜೊಟ್ಟಿ ಕಂಡಡ್ ನಡತ್ಂಡ್.

ಈ ಲೇಸ್ ನ್ ಕೆಪಿ ಸುಚರಿತ ಶೆಟ್ಟಿ ಉದಿಪನ ಮಲ್ತ್ ದ್ ಪಾತೆರ್ದ್, ಹೈನುಗಾರಿಕೆರ್ದ್ ಗ್ರಾಮೀಣ ಪ್ರದೇಶ ರಾಮ ರಾಜ್ಯ ಆಪುನೆತ್ತೊಟ್ಟಿಗೆ ಸಂಸ್ಕೃತಿ, ಸಮೃದ್ಧ ಪ್ರಕೃತಿ ಒರಿಯೆರೆ ಸಾಧ್ಯ. ಇಂಚಿನ ಲೇಸ್ ದ ಆಯೋಜನೆರ್ದ್ ಹಳ್ಳಿಡ್ ಕುಟುಂಬದ ಬಂಧುತ್ವ ಬೊಕ್ಕ ಗ್ರಾಮೀಣ ಪ್ರದೇಶದ ಅಭಿವೃದ್ಧಿ ಸಾಧ್ಯ ಪಂದ್ ಪಂಡೆರ್.

ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ನ ಕಂಬುಲ ಸಮಿತಿದ ಗುರ್ಕಾರೆ ಡಾ. ದೇವಿಪ್ರಸಾದ್ ಶೆಟ್ಟಿ ಪಾತೆರ್ದ್, ಗೋವು ಕಾಮಧೇನು ಆತ್ಂಡ್. ಹೈನುಗಾರಿಕೆಗ್ ಬೊಕ್ಕ ಜಾನಪದ ಕ್ರೀಡೋಚ್ಚಯಗ್ ಗ್ರಾಮಸ್ಥೆರೆನ ಮಲ್ಲ ಬೆಂಬಲನ್ ಮೆಚ್ಚುಡಾಯಿನವು ಪಂದ್ ಪಂಡೆರ್.

ಈ ಪೊರ್ತುಡು ಚಾವಡಿಡ್ ಮಲ್ಲ ಬಿನ್ನೆರಾದ್ ಏಳಿಂಜೆ ದೇವಲ್ಯದ ಅರ್ಚಕೆರ್ ವೈ ವಿ ಗಣೇಶ್ ಭಟ್ ಪಾಲ್ ಪಡೆದಿತ್ತೆರ್. ‌

ಲೇಸ್ ನ್ ನಿವೃತ್ತ ಉಪನ್ಯಾಸಕೆರ್ ಸಾಯಿನಾಥ ಶೆಟ್ಟಿ ಮುಂಡ್ಕೂರು ಸುಧಾರಿಕೆ ಮಲ್ತೆರ್. ಬೊಕ್ಕ ಮಲ್ಲ ಜಾನುವಾರ ಮೇಳ ಬೊಕ್ಕ ತುಳು ಜಾನಪದ ಕ್ರೀಡೋಚ್ಚಯ ನಡತ್ಂಡ್. 150 ರ್ದ್ ಎಚ್ಚ ಜಾನುವಾರುಲು ಈ ಲೇಸ್ ಡ್ ಪಾಲ್ ಪಡೆದಿನವು ಇಸೇಸ ಆದಿತ್ತ್ಂಡ್.

ಬಳ್ಕುಂಜೆ ಕಂಬುಲದ ಅಟ್ಟಣೆದ ಸಮಾಲೋಚನಾ ಸಭೆ

ಮುಲ್ಕಿ: ಬಳ್ಕುಂಜೆಡ್ ಎಪ್ರಿಲ್ 6 ಕ್ಕ್ ನಡಪರೆ ಇಪ್ಪುನ ಕಂಬುಲದ ಬಗೆಟ್ಟ್ ಕಂಬುಲ ಸಮಿತಿದ ಮುತಾಲಿಕೆಡ್ ಅಟ್ಟಣೆದ ಸಮಾಲೋಚನಾ ಸಭೆ ಬಳ್ಕುಂಜೆ ಲೋಬೋ ಹಾಲ್ ದ ಸಭಾಂಗಣಡ್ ನಡತ್ಂಡ್.

ಈ ಲೇಸ್ ದ ಗುರ್ಕಾರ್ಮೆನ್ ಕಂಬುಲ ಸಮಿತಿದ ಗುರ್ಕಾರ್ದಿ ಮಲ್ಲಿಕಾ ಯಶವಂತ ಶೆಟ್ಟಿ ಬಳ್ಕುಂಜೆ ಗುತ್ತು ಒಯಿಸ್ ದಿತ್ತೆರ್.

ಮಲ್ಲ ಬಿನ್ನೆರಾದ್ ಸಮಿತಿದ ಗುತ್ತಿನಾರ್ ರವೀಂದ್ರ ಶೆಟ್ಟಿ ಪಾತೆರ್ದ್ ಮಸ್ತ್ ವರ್ಷದ ಬೊಕ್ಕ ಪುಗರ್ತೆದ ಕಂಬುಲ ಕ್ರೀಡೆ ಬಳ್ಕುಂಜೆದ ಗ್ರಾಮೀಣ ಪ್ರದೇಶಡ್ ನಡತೊಂದು ಉಂಡು. ನೆಕ್ಕ್ ಗ್ರಾಮಸ್ಥೆರೆನ ಪ್ರೋತ್ಸಾಹ ಅಗತ್ಯ ಉಂಡು. ಸುರುತ್ತ ಸರ್ತಿ ಪೊಂಜೋವ್ ಯೊರ್ತಿನ ಗುರ್ಕಾರ್ಮೆಡ್ ನಡಪುನ ಕಂಬುಲ ಯಶಸ್ವಿ ಆವೆರೆ ಪ್ರತಿಯೊರಿನ ಸಹಕಾರ ಬೋಡು ಪಂದ್ ಪಂಡೆರ್.

ಈ ಪೊರ್ತುಡು ಚಾವಡಿಡ್ ಸಮಿತಿದ ಮಾನಾದಿಗೆದ ಗುರ್ಕಾರೆ ಉದ್ಯಮಿ ವಿರಾ‌ರ್ ಶಂಕರ ಶೆಟ್ಟಿ ಬೊಂಬೈ, ಕಾರ್ಯಾಧ್ಯಕ್ಷೆರ್ ಕಿರಣ್ ಶೆಟ್ಟಿ ಕೊಳ್ನಾಡು ಗುತ್ತು, ಬಳ್ಕುಂಜೆ ಕೊಟ್ನಾಯಗುತ್ತು, ಬಾಲಕೃಷ್ಣ ಶೆಟ್ಟಿ ಕೊಟ್ನಾಯಗುತ್ತು, ಡಾ.ಕೃಷ್ಣ ಕುಮಾರ್ ಬಳ್ಕುಂಜೆ ಗುತ್ತು, ಗುತ್ತಿನಾರ್ ವಿರೇಂದ್ರ ಪೂಂಜ ಕೊಟ್ನಾಯ ಗುತ್ತು, ಪ್ರಭಾಕರ ಪೂಂಜ, ನೆಲ್ಸನ್ ಲೋಭೋ, ಮುಲ್ಕಿ ಠಾಣೆದ ಎ.ಎಸ್.ಐ ಸಂಜೀವ, ಬಿ.ಎಚ್ ಖಾಸಿಮ್ ಕೊಟ್ನಾಯಗುತ್ತು, ಹರಿದಾಸ ಶೆಟ್ಟಿ ಇನ್ನಾ ಮಡ್ಮಣ್ ಗುತ್ತು ಪಾಲ್ ಪಡೆದಿತ್ತೆರ್.

ಕಂಬುಲ ಆಯೋಜನೆ ಮಲ್ಪುನ ಬಗೆಟ್ಟ್ ರಾಜೇಶ್ ಶೆಟ್ಟಿ ಪೊಲ್ಲೋಡಿ ಬೂಡು, ದಿನೇಶ್ ಬಳ್ಕುಂಜೆ, ಶರತ್ ಶೆಟ್ಟಿ ಕಿನ್ನಿಗೋಳಿ ಪಾತೆರಿಯೆರ್. ದಿನಕರ ಶೆಟ್ಟಿ ಲೇಸ್ ನ್ ಸುಧಾರಿಕೆ ಮಲ್ತೆರ್. ಬೊಕ್ಕ ಪೊಸ ಕಂಬುಲ ಸಮಿತಿದ ರಚನೆ ನಡತ್ಂಡ್.

ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊನ್ನ ಅಳದಂಗಡಿದ ಪೊಂಜೋವ್

ಅಳದಂಗಡಿದ ಪುಗರ್ತೆದ ಪದ್ಮಾಂಭ ಕ್ಯಾಟರಿಂಗ್ ದ ಮಾಲಕೆರ್ ನಾಗಕುಮಾರ್ ಮೆರೆನ ಮರ್ಮಲ್, ಸುನೀಲ್ ಕುಮಾರ್ ಜೈನ್ ಕುಬಲಾಜೆ ಮೆರೆನ ಬೊಡೆದಿ ಕಾವ್ಯ ಮೇರ್ (32) ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊನ್ನ ಘಟನೆ (ಜ.18) ಕ್ಕ್ ನಡತ್ಂಡ್.

ಈ ಘಟನೆದ ಬಗೆಟ್ಟ್ ವೇಣೂರು ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ಮೇರ್ ವಾ ಕಾರಣಗ್ ಆತ್ಮಹತ್ಯೆ ಮಲ್ತೊಂದೆರ್ ಪಂದ್ ನನ ಪೊಲೀಸ್ ತನಿಖೆರ್ದ್ ತೆರಿದ್ ಬರೊಡಾತೆ. ಮೆರೆಗ್ ಕಂಡನಿ, ರಡ್ಡ್ ಎಲ್ಯ ಜೋಕುಲು ಉಲ್ಲೆರ್.

ರೇಡಿಯೊ ಮಣಿಪಾಲಡ್ ‘ಸಂಗೀತ ಪಾಠ’ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ನಡಪಾದ್ ಕೊರ್ಪುನ ‘ಕಾವ್ಯಗಾನ -ಸಂಗೀತ ಪಾಠ’ ಲೇಸ್ ದ 43ನೇ ಸಂಚಿಕೆ ಜ.19 ಸುಕ್ರಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ದ ಕಲ್ಪಾರ್ಥಿಯಾದ್ ಬೇಬಿ ಅನಘ ಪಾಲ್ ಪಡೆಯೆರೆ ಉಲ್ಲೆರ್. ಜ.20 ಸನಿಯಾರ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಫೆ.6: ಯಕ್ಷಧ್ರುವ ವಿದ್ಯಾರ್ಥಿ ಸಮ್ಮಿಲನ‌- 2023-24 ನೇ ರಾಜ್ಯಮಟ್ಟದ ಲೇಸ್

ಕುಡ್ಲ: ಬೆದ್ರ ಆಳ್ವಾಸ್ ವಿದ್ಯಾಗಿರಿಟ್ಟ್ ಜ.28 ಐತಾರ ನಡಪೊಡಾಯಿನ ಕುಡ್ಲ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ (ರಿ.) ದ ಯಕ್ಷಧ್ರುವ- ಯಕ್ಷಶಿಕ್ಷಣ ಯೋಜನೆದ ಯಕ್ಷಧ್ರುವ ವಿದ್ಯಾರ್ಥಿ ಸಮ್ಮಿಲನ- 2023-24 ನೇ ಸಾಲ್ ದ ರಾಜ್ಯಮಟ್ಟದ ಲೇಸ್ ಪರೀಕ್ಷೆದಾವೆರ ಫೆ.6 ಅಂಗಾರೆಕ್ಕ್ ದುಂಬು ಪೊಂಡು.

ಬೆದ್ರ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನ (ರಿ.) ದ ಒಟ್ಟುಸೇರಿಗೆಡ್ ಬೆದ್ರ ಆಳ್ವಾಸ್ ವಿದ್ಯಾಗಿರಿ ಕ್ಯಾಂಪಸ್ ಡ್ ನಡಪರೆ ಇಪ್ಪುನ ಈ ಲೇಸ್ ಪ್ರಾಥಮಿಕ ಬೊಕ್ಕ ಪ್ರೌಢಶಾಲಾ ವಿದ್ಯಾರ್ಥಿಲೆಗಾದ್ ಯಕ್ಷಗಾನ ಕಲೆಗ್ ಸಂಬಂಧಪಟ್ಟಿನ ರಾಜ್ಯಮಟ್ಟದ ಪಂತೊನ್ ಆಯೋಜನೆ ಮಲ್ದ್ಂಡ್.

ಇತ್ತೆದ ಪಂತೊಡು ರಾಜ್ಯದ ಒವ್ವೇ ಸರಕಾರಿ, ಅನುದಾನಿತ, ಖಾಸಗಿ ಶಾಲೆದ ಕಲ್ಪಾರ್ಥಿಲೆಗಾದ್ ಪಾಲ್ ಪಡೆಯೆರೆ ಮುಕ್ತ ಅವಕಾಶ ಉಂಡು. ಕಾಸ್ರೋಡು ಸೇರಿನಂಚೆನೆ ಬೇತೆ ಪಿದಯಿ ರಾಜ್ಯದ ಶಾಲಾ ವಿದ್ಯಾರ್ಥಿಗ್ ಈ ಪಂತೊಡು ಪಾಲ್ ಪಡೆಯೆರೆ ಅವಕಾಶ ಉಂಡು. ಪಂತೊಡು 6-10 ನೇ ಕ್ಲಾಸ್ ದೊಲಯಿದ ಕಲ್ಪಾರ್ಥಿಲು ಮಾತ್ರ ಪಾಲ್ ಪಡೆವೊಲಿ‌.

ಕುಡ್ಲ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ (ರಿ.) ದ ಇತ್ತೆದ ವರ್ಷರ್ದ್ ದ.ಕ ಜಿಲ್ಲೆದ ಒಟ್ಟು 38 ಶಾಲೆಡ್ ಧರ್ಮೊಗು ಯಕ್ಷಶಿಕ್ಷಣನ್ ಕೊರೊಂದು ಉಂಡು. ಸುಮಾರ್ 3,000 ವಿದ್ಯಾರ್ಥಿಲು ಯಕ್ಷಗಾನ ಶಿಕ್ಷಣನ್ ಪಡೆವೊಂದು ಉಲ್ಲೆರ್. ಆ ವಿದ್ಯಾರ್ಥಿಲೆಗ್ ಬೊಕ್ಕ ರಾಜ್ಯದ ಯಕ್ಷಗಾನಾಸಕ್ತ ವಿದ್ಯಾರ್ಥಿಲೆಗ್ ವೇದಿಕೆ ಕಲ್ಪಿಸಾವುನ ಉದ್ದೇಶದೊಟ್ಟಿಗೆ ಯಕ್ಷಗಾನ ಕಲೆ ಇಪ್ಪುನ ಪಂತೊ ಉಂದಾತ್ಂಡ್. ಮಾತ ಪಂತೊಲು ಕನ್ನಡ ಭಾಷಾ ಮಾಧ್ಯಮಡ್ ನಡಪುಂಡು.

“ಯಕ್ಷರೂಪಕ‌” ಪಂತೊಡು ಯಕ್ಷಧ್ರುವ- ಯಕ್ಷಶಿಕ್ಷಣ ಯೋಜನೆದಡಿಟ್ಟ್ ಬರ್ಪುನ ಶಾಲೆದ ಕೂಟಲೆಗ್ ಮಾತ್ರ ಪಾಲ್ ಪಡೆಯೆರೆ ಅವಕಾಶ ಉಂಡು. ಒರಿನ ಪಂತೊಡು ಬೇತೆ ಶಾಲೆದ ವಿದ್ಯಾರ್ಥಿಲೆಗ್ ಪಾಲ್ ಪಡೆಯೆರೆ ಅವಕಾಶ ಉಂಡು.

ಅತ್ತಂದೆ ಇತ್ತೆದ ಯಕ್ಷಗಾನ ಪಂತೊಡು *ಯಕ್ಷರೂಪಕ ಪಂತೊ* (ಯಕ್ಷಗಾನದ ಏಸ ಕುಂಟು ಪಾಡ್ದ್ ಯಕ್ಷಗಾನದ ನಾಟ್ಯದೊಟ್ಟಿಗೆ ಒವ್ವೇ ಆಖ್ಯಾನನ್ ತೂಪಾವುನ ಪಂತೊ), *ಯಕ್ಷ ರಸಪ್ರಶ್ನೆ* (ಯಕ್ಷಗಾನ ಕಲೆಕ್ಕ್ ಸಂಬಂಧಪಟ್ಟಿನ ರಸಪ್ರಶ್ನೆ ಪಂತೊ), *ಯಕ್ಷಜ್ಞಾನ ಪರೀಕ್ಷಾ ಪಂಥ* (ಪಂತೊದ ಜಾಗೆಡ್ ತೂಪಾವುನ ಯಕ್ಷಗಾನ ಕಲೆಕ್ಕ್ ಸಂಬಂಧಪಟ್ಟಿನ ಪರಿಕರನ್ ತೂದು ಆವೆರ್ದ್ ಬೊಕ್ಕ ನೆಂಪು ಮಲ್ತ್ ದ್ ಗುರುತಿಸಾವುನ ಪಂತೊ), *ಯಕ್ಷ ಸ್ವಗತ ಮಾತುಗಾರಿಕೆ ಪಂತೊ* (ಯಕ್ಷಗಾನಡ್ ಬರ್ಪುನ ಒವ್ವೇ ಪಾತ್ರದ ಪೀಠಿಕೆ ಅತ್ತಂಡ ಸ್ವಗತ ಪಾತೆರುನ ಪಂತೊ) *ಯಕ್ಷಲೇಖನ ಪಂತೊ* (ಯಕ್ಷಗಾನ ಕಲೆಕ್ಕ್ ಸಂಬಂಧಪಟ್ಟಿನ ಪ್ರಬಂಧ ಪಂತೊ), *ಶ್ಲೋಕ ಕಂಠಪಾಠ ಪಂತೊ* (ಪಂತೊದ ಜಾಗೆಡ್ ಕೊರ್ಪುನ ಶ್ಲೋಕನ್ ಕಂಠಪಾಠ ಮಲ್ತ್ ದ್ ಪನ್ಪುನ ಪಂತೊ), *ಯಕ್ಷರಂಗು ಮುಖವರ್ಣಿಕೆ ಪಂತೊ* (ಯಕ್ಷಗಾನ ಬಣ್ಣಗಾರಿಕೆ- ಮುಖವರ್ಣಿಕೆಗ್ ಸಂಬಂಧಪಟ್ಟಿನ ಪಂತೊ) ನಡಪರೆ ಉಂಡು.

ಯಕ್ಷ ಶಿಕ್ಷಣ ಯೋಜನೆದ ಒಟ್ಟು 38 ಶಾಲೆದ ಸುಮಾರ್ 42 ಕೂಟದ ನಡುಟ್ಟ್ ರಡ್ಡ್ ವೇದಿಕೆಲೆಡ್ ಯಕ್ಷರೂಪಕ ಪಂತೊ ನಡಪರೆ ಉಂಡು. ರಡ್ಡ್ ಪ್ರತ್ಯೇಕ ವೇದಿಕೆದ ಗೆಂದಿನ ಕೂಟಗ್ ಸುರುತ್ತ ಕೂಟ ಪ್ರಶಸ್ತಿ (30,000/-) ರಡ್ಡನೇ ಕೂಟ ಪ್ರಶಸ್ತಿ (20,000/-) ಮೂಜಿನೇ ಕೂಟ ಪ್ರಶಸ್ತಿ (15,000/-) ನ್ ಕೊರ್ದು ಮಾನಾದಿಗೆ ಮಲ್ಪೆರೆ ಉಂಡು. ಯಕ್ಷ ರೂಪಕದ ಶಿಸ್ತುದ ಕೂಟಗ್ ಶಿಸ್ತುದ ಕೂಟ ಪ್ರಶಸ್ತಿ (10,000/-)ನ್ ಕೊರಿಯೆರೆ ಉಂಡು. ಬೇತೆ ವೈಯಕ್ತಿಕ ಬೊಕ್ಕ ಕೂಟ ಪಂತೊಡು ಗೆಂದಿನ ವಿದ್ಯಾರ್ಥಿಲೆಗ್, ಸುರುತ್ತ- 5,000/-, ರಡ್ಡನೇ- 3,000/-, ಮೂಜಿನೇ 2,000/- ರೂ. ದೊಟ್ಟಿಗೆ ಪ್ರಮಾಣ ಪತ್ರ ಕೊರ್ದು ಮಾನಾದಿಗೆ ಮಲ್ಪೆರೆ ಉಂಡು.

ಅಂಚೆನೆ ಪಾಲ್ ಪಡೆಪುನ ಸ್ಪರ್ಧಾಳುಲು ಸಂಬಂಧಪಟ್ಟಿನ ಶಾಲೆದ ಮುಖ್ಯೋಪಾಧ್ಯಾಯೆರ್ದ್ ಪ್ರವೇಶ ಪತ್ರ ಬೊಕ್ಕ ದೃಢೀಕರಣ ಪತ್ರ ಸಂದಾದ್ ಪಂತೊಡು ಪಾಲ್ ಪಡೆವೊಡು. ಪಂತೊಡು ಪುದರ್ ನೋಂದಣಿ ಮಲ್ಪೆರೆ ಜ.25 ಅಕೇರಿದ ತಾರೀಕ್ ಆತ್ಂಡ್. ಎಚ್ಚದ ಪೊಲಬುಗಾದ್ ಕದ್ರಿ ನವನೀತ ಶೆಟ್ಟಿ (9448123061) ದೀವಿತ್ ಎಸ್ ಕೆ ಪೆರಾಡಿ (9845109989) ಮೊಕ್ಲೆಗ್ ಸಂಪರ್ಕ ಮಲ್ಪೆರೆ ಪ್ರಕಟಣೆ ತೆರಿಪಾದ್ಂಡ್.

ಜ.21: ಸುರತ್ಕಲ್ ಡ್ ಬಂಟರ ಕ್ರೀಡೋಚ್ಚಯ: ಐಕಳ ಹರೀಶ್ ಶೆಟ್ರೆರ್ದ್ ಉದಿಪನ

Lಸುರತ್ಕಲ್: ಬಂಟರ ಸಂಘ (ರಿ.) ಸುರತ್ಕಲ್ ದ ಮುತಾಲಿಕೆಡ್ ಬಂಟರ ಯಾನೆ ನಾಡವರ ಮಾತೃ ಸಂಘ ಬೊಕ್ಕ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಒಟ್ಟುಸೇರಿಗೆಡ್ ಜ.21 ಐತಾರ ಗೋವಿಂದದಾಸ ಕಾಲೇಜ್ ಕ್ರೀಡಾಂಗಣಡ್ ಬಂಟರ ಕ್ರೀಡೋಚ್ಚಯ ನಡಪರೆ ಉಂಡು.

P

ಕ್ರೀಡಾಕೂಟನ್ ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಗುರ್ಕಾರೆ ಐಕಳ ಹರೀಶ್ ಶೆಟ್ರ್ ಉದಿಪನ ಮಲ್ಪೆರೆ ಉಲ್ಲೆರ್. ಸುರತ್ಕಲ್ ಬಂಟರ ಸಂಘದ ಗುರ್ಕಾರೆ ಲೋಕಯ್ಯ ಶೆಟ್ಟಿ ಮುಂಚೂರು ಗುರ್ಕಾರ್ಮೆನ್ ಒಯಿಸೊನ್ವೆರ್.

ಮಲ್ಲ ಬಿನ್ನೆರಾದ್ ಶಾಸಕೆರ್ ಡಾ ವೈ ಭರತ್ ಶೆಟ್ಟಿ, ಮನಪಾ ಮೇಯರ್ ಸುಧೀರ್ ಶೆಟ್ಟಿ ಕಣ್ಣೂರು, ಕರ್ನಾಟಕ ಪ್ರದೇಶ ಕಾಂಗ್ರೆಸ್ ದ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ, ಬಿಜೆಪಿ ರಾಜ್ಯ ಕಾರ್ಯದರ್ಶಿ ಕ್ಯಾ ಬ್ರಿಜೇಶ್ ಚೌಟ, ಬಂಟರ ಮಾತೃ ಸಂಘದ ಪ್ರಧಾನ ಕಾರ್ಯದರ್ಶಿ ಕೆ ಎಂ ಶೆಟ್ಟಿ, ಜಾಗತಿಕ ಬಂಟರ ಸಂಘಲೆನ ಒಕ್ಕೂಟದ ಒತ್ತು ಗುರ್ಕಾರೆ ಕರ್ನಿರೆ ವಿಶ್ವನಾಥ ಶೆಟ್ಟಿ, ತೆರಿಗೆ ಹಣಕಾಸು ನಿರ್ಧರಣೆ ಸ್ಥಾಯಿ ಸಮಿತಿದ ಗುರ್ಕಾರೆ ವರುಣ್ ಚೌಟ, ಯತಾರ್ಥ್ ಸೋಶಿಯಲ್ ದ ಸ್ಥಾಪಕಾಧ್ಯಕ್ಷೆರ್ ಈಶ್ವರ್ ಪ್ರಸಾದ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.

ಅಂಚೆನೆ ಬಯ್ಯಗ್ ನಡಪುನ ಸಮಾರೋಪ ಸಮಾರಂಭಡ್ ಬಿನ್ನೆರಾದ್ ಬಂಟರ ಮಾತೃ ಸಂಘದ ಗುರ್ಕಾರೆ ಅಜಿತ್ ಕುಮಾರ್ ರೈ ಮಾಲಾಡಿ, ಬಂಟರ ಮಾತೃ ಸಂಘದ ತಾಲೂಕ್ ಸಮಿತಿ ಸಂಚಾಲಕೆರ್ ವಸಂತ ಶೆಟ್ಟಿ, ಬಂಟವಾಳ ಬಂಟರ ಸಂಘದ ಗುರ್ಕಾರೆ ಚಂದ್ರಹಾಸ ಶೆಟ್ಟಿ, ಬಂಟರ ಮಾತೃ ಸಂಘದ ಕೋಶಾಧಿಕಾರಿ ಸಿಎ ರಾಮ್ ಮೋಹನ್ ರೈ, ಇಂಟರ್ ನ್ಯಾಷನಲ್ ಬಂಟ್ಸ್ ವೆಲ್ ಫೇರ್ ಟ್ರಸ್ಟ್ ದ ಕಾರ್ಯಾಧ್ಯಕ್ಷೆರ್ ದೇವಿಚರಣ್ ಶೆಟ್ಟಿ, ಸುರತ್ಕಲ್ ಪಿಎಸ್ ಐ ಶಶಿಧರ ಶೆಟ್ಟಿ, ಬಂಟರ ಮಾತೃ ಸಂಘದ ಕಾರ್ಯಕಾರಿ ಸಮಿತಿ ಸದಸ್ಯೆರ್ ನಿಟ್ಟೆಗುತ್ತು ರವಿರಾಜ ಶೆಟ್ಟಿ, ರೋಹಿತಾಕ್ಷ ರೈ ಕುಳಾಯಿಗುತ್ತು, ಎಂ ದೇವಾನಂದ ಶೆಟ್ಟಿ, ಉಲ್ಲಾಸ್ ಆರ್ ಶೆಟ್ಟಿ, ಸುಧಾಕರ ಎಸ್ ಪೂಂಜ, ಗಿರೀಶ್ ಎಂ ಶೆಟ್ಟಿ ಕಟೀಲ್, ಸಂತೋಷ್ ಕುಮಾರ್ ಶೆಟ್ಟಿ ಪಾಲ್ ಪಡೆಯೆರೆ ಉಲ್ಲೆರ್.

ಸಂಘದ ಗುರ್ಕಾರೆ ಲೋಕಯ್ಯ ಶೆಟ್ಟಿ ಗುರ್ಕಾರ್ಮೆನ್ ಒಯಿಸೊನ್ವೆರ್. ಸುರತ್ಕಲ್ ಬಂಟರ ಸಂಘದ ವ್ಯಾಪ್ತಿಡ್ ಈ ಕ್ರೀಡಾಕೂಟ ನಡಪರೆ ಉಂಡು. ವಾಲಿಬಾಲ್, ತ್ರೋಬಾಲ್, ಬಲ್ಲ್ ಒಯಿಪುನ ಪಂತೊದೊಟ್ಟಿಗೆ ಬೇತೆ ಬೇತೆ ಕ್ರೀಡೆನ್ ಆಯೋಜನೆ ಮಲ್ದೆರ್. ಬೊಲ್ಪುಗು ಗ್ರಾಮವಾರು ಪಥ ಸಂಚಲನ ನಡಪರೆ ಉಂಡು. ಅತ್ತಂದೆ ಪಂತೊಡು ಎಚ್ಚ ಮಾರ್ಕ್ ಪಡೆಯಿನ ಗ್ರಾಮಗ್ ಚಾಂಪಿಯನ್ ಟ್ರೋಫಿ ಕೊರಿಯೆರೆ ಉಂಡು ಪಂದ್ ಕ್ರೀಡಾ ಕಾರ್ಯದರ್ಶಿ ಶಿಶೀರ್ ಶೆಟ್ಟಿ ಬೊಕ್ಕ ಬಬಿತಾ ಶೆಟ್ಟಿ ತೆರಿಪಾದೆರ್.

ಎಕ್ಸೆಲ್ ಕಾಲೇಜ್ ದ ಸುಮಂತ್ ಕುಮಾರ್ ಜೈನ್ ಮೇರೆಗ್ “ಬೆಹರಿನ್ ಇಂಡಿಯಾ ಇಂಟರ್‌ನ್ಯಾಷನಲ್ ಅವಾರ್ಡ್ಸ್-2024”

ಬೊಲ್ತೇರ್: ನಾಡ್ ದ ಶ್ರೇಷ್ಠ ಸಾಧಕೆರೆಗ್ ಕೊರ್ಪುನ “ಬೆಹರಿನ್ ಇಂಡಿಯಾ ಇಂಟರ್‌ನ್ಯಾಷನಲ್ ಅವಾರ್ಡ್ಸ್-2024” ಪ್ರಶಸ್ತಿಗ್ ಗುರುವಾಯನಕೆರೆ ಎಕ್ಸೆಲ್ ಸಂಸ್ಥೆದ ಗುರ್ಕಾರೆ ಸುಮಂತ್ ಕುಮಾರ್ ಜೈನ್.ಬಿ ಆಯ್ಕೆ ಆತೆರ್.

ಕರ್ನಾಟಕದ ಪುಗರ್ತೆದ ದಿನಪತ್ರಿಕೆ ಕನ್ನಡಪ್ರಭ ಬೊಕ್ಕ ಸುದ್ದಿವಾಹಿನಿ ಏಷ್ಯಾನೆಟ್ ಸುವರ್ಣನ್ಯೂಸ್ ಸಂಸ್ಥೆದ ಪ್ರಾಯೋಜಕತ್ವಡ್, ಸಾಧನೆನ್ ಗುರುತಿಸಾದ್ “ಬೆಹರಿನ್ ಇಂಡಿಯಾ ಇಂಟರ್ ನ್ಯಾಷನಲ್ ಅವಾರ್ಡ್ಸ್ 2024” ಪುರಸ್ಕಾರ ಕೊರ್ದು ಮಾನಾದಿಗೆ ಮಲ್ಪೆರೆ ಉಂಡು. ಈ ಪ್ರಶಸ್ತಿ ಪ್ರದಾನ ಲೇಸ್ ಜ.19 ಕ್ಕ್ ಬೆಹರಿನ್ ದೇಶಡ್ ನಡಪರೆ ಉಂಡು.

ಜ.21-26: ಅತ್ತೂರು ಸಂತ ಲಾರೆನ್ಸ್‌ ಬಸಿಲಿಕಾದ ವಾರ್ಷಿಕ ಉಚ್ಚಯ

ಕಾರ್ಲ: ಕ್ರೈಸ್ತ ಶ್ರದ್ಧಾ ಕೇಂದ್ರ ಅತ್ತೂರು ಸಂತ ಲಾರೆನ್ಸ್‌ ಬಸಿಲಿಕಾದ ವಾರ್ಷಿಕ ಉಚ್ಚಯ ಜ.21-26 ಮುಟ್ಟ ನಡಪರೆ ಉಂಡು.

ಜ.21 ಕ್ಕ್ ಬಯ್ಯಗ್ ಕುಡ್ಲದ ನಿವೃತ್ತ ಧರ್ಮಾಧ್ಯಕ್ಷೆರ್ ಅಲೋಶಿಯಸ್ ಪ್ಲಾವ್ ಡಿಸೋಜಾ ಮೇರ್ ಪವಿತ್ರ ಗ್ರಂಥ ಅರ್ಥ ಮಲ್ಪುಲೆಕ್ಕ ಆರೆನ ಬುದ್ಧಿನ್ ವಿಕಾಸ ಮಲ್ತೆರ್ (ಕೊಂಕಣಿ) ಪನ್ಪುನ ಇಸಯದ ಬಗೆಟ್ಟ್ ಸಂದೇಶ ಕೊರಿಯೆರೆ ಉಲ್ಲೆರ್.

ಜ.22 ಕ್ಕ್ ಬಯ್ಯಗ್ ಶಿವಮೊಗ್ಗದ ಧರ್ಮಾಧ್ಯಕ್ಷೆರ್ ಫ್ರಾನ್ಸಿಸ್ ಸೆರಾವೋ ಮೇರ್ ಒರಲ ಬಿಡುವು ಇಜ್ಜಂದ ಪ್ರಾರ್ಥನೆ ಮಲ್ಪುಗ ಇಸಯದ (ಕನ್ನಡ) ಬಗೆಟ್ಟ್ ಸಂದೇಶ ಕೊರಿಯೆರೆ ಉಲ್ಲೆರ್.

ಜ.23 ಕ್ಕ್ ಬಯ್ಯಗ್ ಪುತ್ತೂರು ಧರ್ಮಾಧ್ಯಕ್ಷೆರ್ ಜೀವರ್ಗಿಸ್ ಮಾರ್ ಮಕಾರಿಯೊಸ್ ಮೇರ್ ಪ್ರಚೋಧನೆಗ್ ಸೇರಂದೆ ಪ್ರಾರ್ತನೆ ಮಲ್ಪುಗ (ಕನ್ನಡ) ಇಸಯದ ಬಗೆಟ್ಟ್ ಸಂದೇಶ ಕೊರಿಯೆರೆ ಉಲ್ಲೆರ್.

ಜ.24 ಕ್ಕ್ ಬೊಲ್ಪುಗು ಒಡಿಪು ಧರ್ಮಾಧ್ಯಕ್ಷೆರ್ ಜೆರಾಲ್ಡ್ ಐಸಾಕ್ ಲೋಬೋ ಮೇರ್ ಕೇನುನ ಪ್ರತಿಯೊರಿಗ್ಲಾ ತಿಕ್ಕುಂಡು (ಕೊಂಕಣಿ) ಇಸಯದ ಬಗೆಟ್ಟ್ ಸಂದೇಶ ಕೊರಿಯೆರೆ ಉಲ್ಲೆರ್.

ಜ.25 ಕ್ಕ್ ಬೊಲ್ಪುಗು ಕುಡ್ಲ ಧರ್ಮಾಧ್ಯಕ್ಷೆರ್ ಪೀಟರ್ ಪಾವ್ಲ್ ಸಲ್ಡಾನ್ಹಾ ಮೇರ್ ವಿನಮ್ರರಾದ್ ಪ್ರಾರ್ತನೆ ಮಲ್ಪುಗ (ಕೊಂಕಣಿ) ಇಸಯದ ಬಗೆಟ್ಟ್ ಸಂದೇಶ ಕೊರಿಯೆರೆ ಉಲ್ಲೆರ್.

ಜ.26 ಕ್ಕ್ ಬೊಲ್ಪುಗು ಬೊಲ್ತೇರ್ ಧರ್ಮಾಧ್ಯಕ್ಷೆರ್ ಲೊರೆನ್ಸ್ ಮಕ್ಕುಝಿ ಮೇರ್ ವಿಶ್ವಾಸ ಇಪ್ಪುನ ಪ್ರಾರ್ಥನೆ ರೋಗಿನ್ ಗುಣ ಮಲ್ಪುಂಡು (ಕನ್ನಡ) ಪನ್ಪುನ ಇಸಯದ ಬಗೆಟ್ಟ್ ಸಂದೇಶ ಕೊರಿಯೆರೆ ಉಲ್ಲೆರ್ ಪಂದ್ ಸಂತ ಲಾರೆನ್ಸ್ ಬಸಿಲಿಕದ ಆಡಳಿತ ಸಮಿತಿ ಪ್ರಕಟಣೆಡ್ ತೆರಿಪಾದ್ಂಡ್.