ಮಹಾರಾಷ್ಟ್ರದ ನಾಸಿಕ್ ಡ್ ಶ್ರೀ ರಾಮ ಭಕ್ತೆರೆನ ಮುತಾಲಿಕೆಡ್ ಅಯೋಧ್ಯೆ ಶ್ರೀ ಬಾಲ ರಾಮನ ಪ್ರಾಣ ಪ್ರತಿಷ್ಠಾನದ ದಿನ (ಜ.22) ಶ್ರೀ ರಾಮ ವೈಭವ ಪನ್ಪಿನ ಧಾರ್ಮಿಕ ಲೇಸ್ ಗೌಜಿಡ್ ನಡತ್ಂಡ್.
ಅಂಚೆನೆ ಶ್ರೀ ರಾಮ ದೇವೆರೆನ ಭಾಗವತ ಕಥೆ, ಭಕ್ತಿಸುಗಿಪು ಬೊಕ್ಕ ಭಜನೆ ನಡತ್ಂಡ್. ಈ ಲೇಸ್ ಡ್ ರಾಮಭಕ್ತೆರ್ ಭಾರೀ ಮಲ್ಲ ಸಂಖ್ಯೆಡ್ ಸೇರ್ದ್ ಶ್ರೀ ರಾಮದೇವೆರೆನ ಕೃಪೆಗ್ ಪಾತ್ರರಾಯೆರ್.
ಕುಡ್ಲ: ಪುಗರ್ತೆದ ಕುಡ್ಲದ ಕದ್ರಿ ಶ್ರೀ ಮಂಜುನಾಥ ದೇವಲ್ಯದ ವರ್ಷಾವಧಿ ಜಾತ್ರೋಚ್ಚಯ, ಮಲ್ಲ ತೇರ್ ಉಚ್ಚಯ ಜ.22 ಸೋಮಾರ ಗೌಜಿಡ್ ನಡತ್ಂಡ್.
ಈ ಉಚ್ಚಯಡ್ ಮಲ್ಲಿಕಾ ಕಲಾವೃಂದದ ದುಂಬಾತ್ತಿಗೆಡ್ ಸುದೇಶ್ ಜೈನ್ ಮಕ್ಕಿಮನೆ ಮುತಾಲಿಕೆದ ಮಕ್ಕಿಮನೆ ಕಲಾವೃಂದ ಕುಡ್ಲ ಕೂಟದಕ್ಲೆರ್ದ್ ಸಾಂಸ್ಕ್ರತಿಕ ಲೇಸ್ ನಡತ್ಂಡ್.
ಈ ಪೊರ್ತುಡು ಡಾ.ಎ. ಜನಾರ್ಧನ ಶೆಟ್ಟಿ, ಪ್ರದೀಪ್ ಕುಮಾರ್ ಕಲ್ಕೂರ, ಸುಧಾಕರ ರಾವ್ ಪೇಜಾವರ, ಸನತ್ ಕುಮಾರ್ ಜೈನ್, ನವನೀತ್ ಶೆಟ್ಟಿ ಕದ್ರಿ, ಪ್ರಭಾಕರ ರಾವ್ ಪೇಜಾವರ ಪಾಲ್ ಪಡೆದ್ ಕಲಾವಿದೆರೆಗ್ ಮಾನಾದಿಗೆ ಮಲ್ತೆರ್.
ರೇಖಾ ರಂಜಿತ್ ಕದ್ರಿ ಲೇಸ್ ಸುಧಾರಿಕೆ ಮಲ್ತೆರ್. ಶ್ರೀಕಾಂತ್ ಕೊಂಡಾಣ, ಶ್ರೇಯಾ ಭಟ್, ಭಾಗ್ಯಶ್ರೀ ಭಟ್ ಸಹಕಾರ ಕೊರಿಯೆರ್.
ಅಯೋಧ್ಯೆಡ್ ಶ್ರೀ ರಾಮಗ್ ಪ್ರಾಣ ಪ್ರತಿಷ್ಠಾಪನೆ ನಡತಿನ ದಿನ (ಜ.22) ಶ್ರೀ ರಾಮ ದೇವೆರೆನ ಮಂದಿರಗ್ ಕಟೀಲ್ ಡ್ ಕೆಸರ್ ಕಲ್ಲ್ ಪಾಡಿಯೆರ್.
ಈ ಲೇಸ್ ನ್ ಕಟೀಲ್ ದೇವಲ್ಯದ ಅರ್ಚಕೆರ್ ಅನಂತ ಪದ್ಮನಾಭ ಅಸ್ರಣ್ಣ, ದೇವಿಕುಮಾರ ಅಸ್ರಣ್ಣ ಕಟೀಲ್ ಬೊಕ್ಕ ರಾಮ ಗೋಪಾಲ್ ಕೆ.ಕೊಂಡೇಲ, ಸುಧೆಂದ್ರ ಅಮ್ಮಣ್ಣಯ್ಯ ಮೊಕುಲು ತುಡರ್ ಅರ್ಲಾದ್ ಪೂಜೆ ಸಂದಾಯೆರ್.
ಈ ಪೊರ್ತುಡು ಊರುದ ಮಲ್ಲ ಬಿನ್ನೆರ್ ದೇವಿ ಪ್ರಸಾದ್ ಶೆಟ್ಟಿ, ವಿಜಯ್ ಶೆಟ್ಟಿ ಅಜಾರು, ತಿಮ್ಮಪ್ಪ ಕೋಟ್ಯಾನ್ ಕಟೀಲ್, ಶಶಿಧರ್ ಶೆಟ್ಟಿ ಮಿತ್ತಬೈಲ್, ಕಿರಣ್ ಶೆಟ್ಟಿ ಕೊಡೆತ್ತೂರು, ಸದಾಶಿವ ಮುಕ್ಕಾಲ್ದಿ, “ಗಿಡಿಗೆರೆ “, ರಾಮದಾಸ್ ಕಾಮತ್ ಕಟೀಲ್, ನಾರಾಯಣ ಕುಲಾಲ್ ಮಲ್ಲಿಗೆಯಂಗಡಿ, ಪ್ರಸಾದ್ ಶೆಟ್ಟಿ ಕಿನ್ನ ಚಿಲ್ , ಸದಾಶಿವ ಆಚಾರ್ಯ, ಹಿಂದೂ ಮುಖಂಡೆರ್ ಸೂರಜ್ ಕೊಂಡೇಲ, ಶ್ರೀ ರಾಮ ಮಂದಿರದ ಜೀರ್ಣೋದ್ಧಾರ ಸಮಿತಿದ ಗುರ್ಕಾರೆ ಗಣೇಶ್ ಆಚಾರ್ಯ ಮಲ್ಲಿಗೆಯಂಗಡಿ, ಪದುಕೆರ್ ಬೊಕ್ಕ ಭಕ್ತೆರ್ ಪಾಲ್ ಪಡೆದಿತ್ತೆರ್.
ಬಂಟ್ವಾಳ: ಪಂಜಿಕಲ್ಲ್ ಬಾಲೇಶ್ವರ ಶ್ರೀ ಕೊಡಮಣಿತ್ತಾಯ ಬ್ರಹ್ಮಬೈದರ್ಕಳ ಗರಡಿಡ್ ಜ.21 ಕ್ಕ್ ಸುರು ಆಯಿನ ಬ್ರಹ್ಮ ಬೈದರ್ಕಳ ಜಾತ್ರೆ (ಜ.24) ಇನಿ ಸಂಪನ್ನ ಆಪುಂಡು.
ಜ.21 ಐತಾರ ಬಯ್ಯಗ್ ಬಾಲೇಶ್ವರ ಗರಡಿಡ್ ಅಂಕ ಚೆಂಡ್, ನವಕ ಪ್ರಧಾನ ಕಲಶ, ಕೊಡಿ ಏರ್ಂಡ್. ರಾತ್ರೆ ಸಾಂಸ್ಕೃತಿಕ ಲೇಸ್, ಪಂಜಿಕಲ್ ಗುತ್ತುರ್ದ್ ಕೊಡಮಣಿತ್ತಾಯ ದೈವೊದ ಭಂಡಾರ ಬತ್ತ್ಂಡ್. ಅವ್ವೆ ಪೊರ್ತುಡು ಕೇಲ್ದೋಡಿಗುತ್ತು ಕೋಟಿ ಪೂಜಾರಿ ಮೆರೆನ ಇಲ್ಲಲ್ ರ್ದ್ ಬೈದರ್ಕಳ ಭಂಡಾರ ಬತ್ತ್ ದ್ ಪಂಜಿಕಲ್ ಗುತ್ತುದ ಕೈತಲ್ ಕೊಡಮಣಿತ್ತಾಯ ದೈವದೊಟ್ಟಿಗೆ ಸೇರ್ದ್ ಬಾಲೇಶ್ವರ ಗರಡಿಗ್ ಬತ್ತ್ಂಡ್. ಬೊಕ್ಕ ತೆಲಿಕೆದ ಕಲಾವಿದೆರ್ ಕೊಯಿಲ ಮೊಕ್ಲೆರ್ದ್ ಗೆಂದ ಗಿಡಿ ತುಳು ನಾಟಕ ನಡತ್ಂಡ್.
ಜ.22 ಸೋಮಾರ ಬಯ್ಯಗ್ ಸಂಕ್ರಾಂತಿ ಸೇವೆ, ಅಂಕ ಚೆಂಡ್, ರಾತ್ರೆ ಕೇಲ್ದೋಡಿಗುತ್ತುರ್ದ್ ಶ್ರೀ ದೈವೊದ ಭಂಡಾರ ಬತ್ತ್ ದ್ ನೇಮ, ಕೊಡಮಣಿತ್ತಾಯ ದೈವೊಗ್ ಸರ್ವಬಲಿ ನಡತ್ಂಡ್. ಬೊಕ್ಕ ಕಲ್ಲಡ್ಕ ವಿಠಲ್ ನಾಯ್ಕ್ ಮೆರೆರ್ದ್ ಗೀತಾ ಸಾಹಿತ್ಯ ಸಂಭ್ರಮ ನಡತ್ಂಡ್.
ಜ.23 ಅಂಗಾರೆ ಬಯ್ಯಗ್ ಅಂಕ ಚೆಂಡ್, ರಾತ್ರೆ ಕೊಡಮಣಿತ್ತಾಯ ಬ್ರಹ್ಮಬೈದೆರ್ಲೆಗ್ ಗ್ರಾಮ ಸಂಕ್ರಾಂತಿ ಸೇವೆ, ರಾತ್ರೆ ಶ್ರೀ ಆದಿನಾಥ ಸ್ವಾಮಿ ಬಸದಿಡ್ ಪಂಚಾಮೃತ ಅಭಿಷೇಕ, ಕೊಡಮಣಿತ್ತಾಯ ದೈವೊದ ನೇಮ, ಬ್ರಹ್ಮಬಲಿ, ಇರುಳು ದೈವೊಲೆಗ್ ನೇಮ ನಡತ್ಂಡ್.
ಜ.24 ಬುದಾರ (ಇನಿ) ಬಯ್ಯಗ್ ಬೈದರ್ಕಳ ಬಲಿ, ಬೈದರ್ಕಳ ಬಾಕಿಮಾರ್ ಕಂಡಗ್ ಜಪ್ಪೆರೆ, ಕೊಡಮಣಿತ್ತಾಯ ಬೈದರ್ಕಳ ಕಡಸಾಲೆ ಬಲಿ, ಬಾಕಿಮಾರ್ ಗ್ ಸುರ್ಯ ಕೊರಿಯೆರೆ, ಬ್ರಹ್ಮರ ಬಲಿ, ಬೈದರ್ಕಳ ಪಾತ್ರಿಲು ದರ್ಶನ ಆದ್ ಸುರ್ಯ ಪಾಡಿಯೆರೆ ಉಂಡು. ಮಾಯಾಂದಾಲ್ ದೇವಿನ ಉಚ್ಚಯ ಆದ್ ಕೊಡಿ ಜಾವೆರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಬಿ ಭರತ್ ಕುಮಾರ್ ರೈ ಪೀರ್ದಬೆಟ್ಟುಗುತ್ತು, ರಘಚಂದ್ರ ಚೌಟ ಬಾಲೇಶ್ವರಗುತ್ತು, ಕೋಟಿ ಪೂಜಾರಿ ಕೇಲ್ದೋಡಿಗುತ್ತು, ಸುರೇಖಾ ಸುರೇಂದ್ರ ಆರಿಗ ಪಂಜಿಕಲ್ಲುಗುತ್ತು ಮಾಗಣೆ, ಬೊಕ್ಕ ಶ್ರೀ ಕೊಡಮಣಿತ್ತಾಯ ಬ್ರಹ್ಮಬೈದರ್ಕಳ ಗರಡಿದ ಜೀರ್ಣೋದ್ಧಾರ ಸಮಿತಿ, ಬ್ರಹ್ಮಬೈದರ್ಕಳ ಗರಡಿ ಸೇವಾ ಸಮಿತಿ, ಗರಡಿ ಫ್ರೆಂಡ್ಸ್ ಕ್ಲಬ್ ಬೊಕ್ಕ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.
ನಾಲಾಸೋಪಾರ ತುಳು ಕೂಟ ಫೌಂಡೇಷನ್ (ರಿ.) ಬೊಕ್ಕ ಶ್ರೀ ದೇವಿ ಯಕ್ಷಕಲಾ ನಿಲಯದ ಒಟ್ಟುಸೇರಿಗೆಡ್ 4ನೇ ವಾರ್ಷಿಕ ಉಚ್ಚಯ ಜ. 27 ಸನಿಯಾರ ನಾಲಾಸೋಪಾರ ಗ್ಯಾಲಕ್ಸಿ ಹೋಟೆಲ್ ಡ್ ನಡಪರೆ ಉಂಡು.
ಈ ಲೇಸ್ ದೊಟ್ಟಿಗೆ ಆಟ, ಸಾಂಸ್ಕೃತಿಕ ಲೇಸ್, ಸಭಾ ಲೇಸ್, ಸಾಧಕೆರೆಗ್ ಸನ್ಮಾನ ಬೊಕ್ಕ ಪ್ರಶಸ್ತಿ ಪ್ರಧಾನ ಲೇಸ್ ನಡಪರೆ ಉಂಡು.
ಈ ಲೇಸ್ ಡ್ ಸದಸ್ಯೆರ್ ಮಾತೆರ್ಲಾ ಪಾಲ್ ಪಡೆದ್ ಈ ಲೇಸ್ ದ ಮಾತ ವ್ಯವಹಾರಡ್ ಸಾಕ್ಷಿ ಅವೊಡು ಪಂದ್ ನಾಲಾಸೋಪಾರ ತುಳು ಕೂಟ ಫೌಂಡೇಷನ್ (ರಿ.)ದ ಕಾರ್ಯದರ್ಶಿ ತೆರಿಪಾದೆರ್.
ಕುಡ್ಲ: ಕರ್ನಿರೆ ಸುವರ್ಣ ಪ್ರತಿಷ್ಠಾನದಕುಲು ತನ್ನ 11ನೇ ವಾರ್ಷಿಕೋಚ್ಚಯದ ಲೆಕ್ಕೊಡು ಶೈಕ್ಷಣಿಕ ಸಕಾಯದೊಟ್ಟಿಗೆ ಯಕ್ಷ ಕಲಾರಾಧನೆ ಬೊಕ್ಕ ಹಿರಿಯ ಕಲಾವಿದೆರೆನ್ ಸನ್ಮಾನ ಲೇಸ್ ನ್ ಆಯೋಜನೆ ಮಲ್ದೆರ್.
ಕರ್ನಿರೆ ಜಾರಂದಾಯ ದೈವೊದ ಗಡುವಾಡು ಕೈತಲ್ದ ಕೊಪ್ಪಳ ತೋಟಡ್ ಫೆ.25 ಸನಿಯಾರ ಬಯ್ಯಗ್ 4:30 ರ್ದ್ ದುಬೈ ನಿವಾಸಿ, ಹವ್ಯಾಸಿ ಯಕ್ಷಗಾನ ವೇಷಧಾರಿ ಪ್ರಭಾಕರ ಡಿ. ಸುವರ್ಣ ಬೊಕ್ಕ ಕುಟುಂಬಸ್ಥೆರ್ ಈ ಲೇಸ್ ನ್ ಆಯೋಜನೆ ಮಲ್ದೆರ್ ಪಂದ್ ಸಂಯೋಜಕೆರ್ ಬಿ.ಜನಾರ್ದನ ಅಮ್ಮುಂಜೆ ತೆರಿಪಾದೆರ್.
ಯಕ್ಷಗಾನ ಕ್ಷೇತ್ರಡ್ ತಾಳಮದ್ದಳೆ ಅರ್ಥಧಾರಿಯಾದ್, ವೇಷಧಾರಿಯಾದ್ ಬೊಕ್ಕ ಸಂಘಟಕೆರಾದ್ ಪುಗರ್ತೆ ಪಡೆಯಿನ 8 ಜನ ದಿಗ್ಗಜೆರೆನ್ ಈ ಪೊರ್ತುಡು ಸನ್ಮಾನ ಮಲ್ತೆರ್. ಯಕ್ಷಗಾನ ವಿದ್ವಾಂಸೆರ್ ಡಾ.ಎಂ. ಪ್ರಭಾಕರ ಜೋಶಿ ಬೊಕ್ಕ ಪ್ರೊ.ಭಾಸ್ಕರ ರೈ ಕುಕ್ಕುವಳ್ಳಿ, ಅರ್ಥಧಾರಿ, ಸಂಘಟಕೆರ್ ಉಜಿರೆ ಅಶೋಕ ಭಟ್, ಜಬ್ಬಾರ್ ಸಮೋ ಸಂಪಾಜೆ, ವೇಷಧಾರಿಲಾಯಿನ ಸರಪಾಡಿ ಅಶೋಕ ಶೆಟ್ಟಿ, ಡಿ. ಮನೋಹರ ಕುಮಾರ್, ಶಶಿಕಾಂತ ಶೆಟ್ಟಿ ಕಾರ್ಲ ಬೊಕ್ಕ ಯಕ್ಷಗಾನ, ನೃತ್ಯ ಕಲಾವಿದೆ ಸುಮಂಗಲಾ ರತ್ನಾಕರ್ ಮೊಕುಲು ಸನ್ಮಾನ ಸ್ವೀಕಾರ ಮಲ್ಪೆರೆ ಉಲ್ಲೆರ್.
ಲೇಸ್ ಡ್ ಪ್ರತಿಷ್ಠಾನದ ಮುತಾಲಿಕೆಡ್ ಬಡಪತ್ತ್ ದ ಪ್ರತಿಭಾವಂತ ಕಲ್ಪಾರ್ಥಿಲೆಗ್ ಶಿಕ್ಷಣ ಸಹಾಯ ನಿಧಿನ್ ಪಟ್ಟಿಯೆರೆ ಉಂಡು. ಬೊಕ್ಕ ತೆಂಕುತಿಟ್ಟುದ ಬೇತೆ ಬೇತೆ ಮೇಳದ ಪುಗರ್ತೆದ ಕಲಾವಿದೆರ್ದ್ ‘ಶ್ರೀಮತಿ ಪರಿಣಯ- ಸಮಗ್ರ ಭೀಷ್ಮ’ ಯಕ್ಷಗಾನ ಬಯಲಾಟ ನಡಪರೆ ಉಂಡು ಪಂದ್ ಕರ್ನಿರೆ ಸುವರ್ಣ ಪ್ರತಿಷ್ಠಾನದ ಗುರ್ಕಾರೆ ಪ್ರಭಾಕರ ಡಿ. ಸುವರ್ಣ ಪ್ರಕಟಣೆಡ್ ತೆರಿಪಾದೆರ್.
ಯಕ್ಷಗಾನದ ಕಲಾವಿದೆರ್ ಪೆರುವಾಯಿ ನಾರಾಯಣ ಶೆಟ್ರ್ ದೇವೆರೆ ಪಾದೊ ಸೇರಿಯೆರ್.
ತೆಂಕುತಿಟ್ಟುದ ಯಕ್ಷರಂಗಡ್ ಇತ್ತಿನ ಶೆಟ್ರ್ ಎಲ್ಯ ಪ್ರಾಯರ್ದೆ ಆಟಡ್ ಆಸಕ್ತೆರಾದಿತ್ತೆರ್. ಕಟೀಲ್ ಬೊಕ್ಕ ಬೇತೆ ಬೇತೆ ಯಕ್ಷಗಾನ ಮೇಳಡ್ 5 ದಶಕ ಸೇವೆ ಸಂದಾದೆರ್.
ಮೆರೆನ ದಕ್ಷ, ಭೀಷ್ಮ, ಕೌರವ, ಅರುಣಾಸುರ, ರಕ್ತಬೀಜ ಪಾತ್ರಲು ಪುಗರ್ತೆ ಪಡೆದಿತ್ತ್ಂಡ್.
ಉಜಿರೆ: ಧರ್ಮಸ್ಥಳಡ್ ಫೆ.2 ಕ್ಕ್ ರತ್ನಗಿರಿದ ಭಗವಾನ್ ಬಾಹುಬಲಿ ಮೂರ್ತಿಗ್ ಪಾದಾಭಿಷೇಕ ನಡಪರೆ ಇಪ್ಪುರ್ನೆದಾವೆರ ನೆತ್ತ ಅಟ್ಟಣೆಗಾದ್ ಅಂಗಾರೆ ಊರುದ ಶ್ರಾವಕೆರ್ ಬಾಹುಬಲಿ ಮೂರ್ತಿನ ಸ್ವಚ್ಛತಾ ಕಾರ್ಯ ನಡಪಾಯೆರ್.
ಈ ಲೇಸ್ ಧರ್ಮಸ್ಥಳದ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರೆನ, ಹೇಮಾವತಿ ಹೆಗ್ಗಡೆರೆನ ಬೊಕ್ಕ ಡಿ. ಹರ್ಷೇಂದ್ರ ಕುಮಾರ್ ನ ಮಾರ್ಗದರ್ಶನಡ್ ನಡತ್ಂಡ್.
ಈ ವರ್ಷ ಮಾ.22 ರ್ದ್ ಮೇ.26 ಮುಟ್ಟ ಐಪಿಎಲ್ ಆಯೋಜನೆ ಮಲ್ಪೆರೆ ಬಿಸಿಸಿಐ ನಿರ್ಧಾರ ಮಲ್ದ್ಂಡ್.
ವೋಟುದ ವೇಳಾಪಟ್ಟಿ ಬುಡುಗಡೆ ಆಯಿನ ಬೊಕ್ಕ ಐಪಿಎಲ್ ತಾರೀಕ್ ನ್ ಪ್ರಕಟ ಮಲ್ಪೆರೆ ಅಧಿಕಾರಿಲು ನಿರ್ಧಾರ ಮಲ್ದೆರ್. ಅತ್ತಂದೆ ಮಹಿಳಾ ಪ್ರೀಮಿಯರ್ ಲೀಗ್ ಫೆ.22 ರ್ದ್ ಮಾ.17 ಮುಟ್ಟ ನಡಪರೆ ಉಂಡು. ಐಪಿಎಲ್ ಫೈನಲ್ ಮೇ26 ಕ್ಕ್ ಮುಗಿಪುಂಡು. ಗೊಬ್ಬುಗಾರೆರ್ 9 ದಿನಟ್ಟ್ T20WC ಗ್ ತಯಾರಿ ಮಲ್ಪೆರೆ ಉಲ್ಲೆರ್.
ನೇಪಾಳದ ಜನಕ್ ಪುರಡ್ ಅಯೋಧ್ಯೆ ರಾಮಮಂದಿರಡ್ ರಾಮಲಲ್ಲಾ ಪ್ರಾಣ ಪ್ರತಿಷ್ಠೆದ ಪೊರ್ತುಡು ಗೌಜಿಡ್ ಲೇಸ್ ನಡತ್ಂಡ್.
ಸೀತೆನ ಜನ್ಮಸ್ಥಳವಾಯಿನ ಈ ಕ್ಷೇತ್ರಡ್ ಭಕ್ತೆರ್ 2.5 ಲಕ್ಷ ತುಡರ್ ನ್ ಅರ್ಲಾಯೆರ್. ಪ್ರಾಣ ಪ್ರತಿಷ್ಠೆ ಲೇಸ್ ಗ್ ಒಂಜಿ ವಾರ ದುಂಬೇ ಲೈಟಿಂಗ್ಸ್ ಪಾಡ್ದೆರ್. ಅತ್ತಂದೆ ರ್ಯಾಲಿ ಬೊಕ್ಕ ಭಕ್ತಿ ಲೇಸ್ ನ್ ಆಯೋಜನೆ ಮಲ್ತ್ ದಿತ್ತೆರ್.
