ಮೀನುಗಾರಿಕೆ ಪನ್ಪುನವು ತುಳುನಾಡ್ ಭಾಗದ ಪ್ರಮುಖ ಜೀವನೋಪಾಯ ಬೇಲೆ ಪಂದ್ ಶಾಸಕೆರ್ ವೇದವ್ಯಾಸ್ ಕಾಮತ್ ಮೇರ್ ಪಂಡೆರ್.
ಆರ್ ಅಟಲ್ ಸೇವಾ ಕೇಂದ್ರಡ್ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿಯೆರ್. ಮೀನುಗಾರೆರ್ ತುಳುನಾಡ್ ಭಾಗದ ಶ್ರಮ ಜೀವಿ ಸಮುದಾಯ. ಕಡಲ್ ದ ಮೀನುಗಾರಿಕೆ ಅಪಾಯಕಾರಿ ಬೇಲೆ. ಅವೆನ್ ಸವಾಲಾದ್ ದೆತೊಂದು ಬದ್ ಕ್ ನಡಪಾವೊಂದು ಪೋಪಿನಕುಲೇ ಮೀನುಗಾರೆರ್. ಈ ಸಮುದಾಯದ ಸ್ವಾವಲಂಬಿ ಬದ್ ಕ್ ಗ್ ಭದ್ರತೆ, ಆರ್ಥಿಕ ಸಕಾಯ, ಸೇರಿನಂಚೆನೆ ಸುಮಾರ್ ಯೋಜನೆನ್ ಜಾರಿಗ್ ಕನಪುನೇ ಸರ್ಕಾರದ ಕರ್ತವ್ಯ. ಆ ಮುಖೇನ ಕಡಲ ಜೋಕುಲೆನ ಅಭಿವೃದ್ಧಿಗ್ ಮಾತ ಸರ್ಕಾರ ಬದ್ಧ ಆವೊಡು.
ಅಂಚಿನ ಮೀನುಗಾರೆರೆನ ಸುಭದ್ರ ಬದ್ ಕ್ ಗ್ ನಮ್ಮ ಬಿಜೆಪಿ ಸರ್ಕಾರದ ಅವಧಿದ 2023 ತ್ತ ಫೆಬ್ರವರಿ ಬಜೆಟ್ ಡ್ ಕೆಲವು ವಿಶೇಷ ಯೋಜನೆಲು ಘೋಷಣೆ ಆದಿತ್ತ್ಂಡ್. ಅವು ಜಾರಿ ಆಪಿನ ಹಂತಡ್ ಬದಲಾಯಿನ ರಾಜಕೀಯ ಪರಿಸ್ಥಿತಿಡ್ ಕಾಂಗ್ರೆಸ್ ಸರ್ಕಾರದ 2023ತ್ತ ಜುಲೈಡ್ ಪೊಸ ಬಜೆಟ್ ಘೋಷಣೆ ಆತ್ಂಡ್. ಆಂಡ ನಮ್ಮ ಸರ್ಕಾರಡ್ ಘೋಷಣೆ ಆಯಿನ ಮಾತ ವಿಶೇಷ ಯೋಜನೆಲೆನ್ ಕಡೆಗಣಿಸಾದ್ ಮೀನುಗಾರೆರೆನ ಬದ್ ಕ್ ಗ್ ಪೆಟ್ಟ್ ಕೊರ್ತಿನ ಅತ್ತಂದೆ, ಇಂಚಿಪ್ಪಗ್ ಕಾಂಗ್ರೆಸ್ಸಿಗೆರ್ ತನ್ನ ಸರ್ಕಾರ 100 ದಿನ ಪೂರೈಸಾಂಡ್. ಆಂಡ ಮೀನುಗಾರೆರೆನ ಮಾತ ಸಮಸ್ಯೆನ್ ಪರಿಹರಿಸಾವುನ ಬದಲ್ ಕಡೆಗಣಿಸಾದ್ಂಡ್. ಕಾಂಗ್ರೆಸ್ ಪಕ್ಷದ ರಾಷ್ಟ್ರೀಯ ನಾಯಕೆ ರಾಹುಲ್ ಗಾಂಧಿ ಮೇರ್ ವೋಟುದ ಪೊರ್ತುಡು ಉಚ್ಚಿಲ ಮಹಾಲಕ್ಷ್ಮೀ ದೇವಲ್ಯದ ಸಭಾಂಗಣಡ್ ಮೀನುಗಾರೆನೊಟ್ಟಿಗೆ ಸಂವಾದಡ್ ಕೊರ್ನ ಸುಳ್ಳುದ ಆಶ್ವಾಸನೆಡ್ ವಾ ಭರವಸೆ ಈಡೇರ್ ದ್ಂಡ್ ಪನ್ಪುನೆನ್ ಕಾಂಗ್ರೆಸ್ ದಕುಲು ತೆರಿಪಾವೊಡು ಪಂದ್ ಪಂಡೆರ್.
ರಾಹುಲ್ ಗಾಂಧಿ ಕೊರ್ನ ಭರವಸೆಲು:
1. ಪ್ರತಿ ಮೀನುಗಾರೆರೆಗ್ 10 ಲಕ್ಷದ ಇನ್ಸೂರೆನ್ಸ್ .
2. ಪ್ರತಿ ಲೀಟರ್ ಡೀಸೆಲ್ ಗ್ 25 ರೂ ಸಬ್ಸಿಡಿದಲೆಕ್ಕ ಪ್ರತಿ ದಿನ 500 ಲೀಟರ್ ಡಿಸೇಲ್ ಕೊರ್ಪ.
3. ಎಂಕುಲು ಅಧಿಕಾರಗ್ ಬತ್ತಿನ ಕೂಡ್ಲೆ ಡ್ರಜ್ಜಿಂಗ್ ಸಮಸ್ಯೆ ಬಗೆಟ್ಟ್ ಮೀನುಗಾರೆರೆನೊಟ್ಟಿಗೆ ಚರ್ಚೆ ಮಲ್ತ್ ದ್ ಪರಿಹಾರ ನಾಡುವ, ಬೊಕ್ಕ ಯಾನ್ ವೈಯಕ್ತಿಕವಾದ್ ಮುಖ್ಯಮಂತ್ರಿಲೆಡ ಚರ್ಚೆ ಮಲ್ತ್ ದ್ ಪರಿಹಾರ .
4. ನಮ್ಮ ಸರ್ಕಾರ ಅಧಿಕಾರಗ್ ಬತ್ತ್ಂಡ MNC ಕಂಪೆನಿಲು ಮೀನುಗಾರಿಕಾ ಚಟುವಟಿಕೆಡ್ ಇಪ್ಪುನೆನ್ ಉಂತಾವ.
5. ರೈತರ್ ಭೂಮಿಡ್ ಕೃಷಿ ಮಲ್ಪುಲೆಕ್ಕ ಮೀನುಗಾರೆರ್ ಕಡಲ್ ಡ್ ಕೃಷಿ ಮಲ್ಪುವೆರ್. ರೈತೆರೆಗ್ ತಿಕುನ ಸೌಲಭ್ಯಲು ಮೀನುಗಾರೆರೆಗ್ ತಿಕುನ ವ್ಯವಸ್ಥೆ ಮಲ್ಪುವ.
6. ಕಡಲ್ ಡ್ ಬೋಟ್ ಮುರ್ಕುಂಡ, ಡಿಕ್ಕಿ, ಅತ್ತಂಡ ಪ್ರಕೃತಿ ವಿಕೋಪಡ್ ಅಪಘಾತ ಆಪಿನ ಪೊರ್ತುಡು ಧರ್ಮಾರ್ಥ ಸೀ ಅಂಬ್ಯುಲೆನ್ಸ್ ಸೌಲಭ್ಯ ಒದಗಿಸಾವ. ಉಂದು ಮಾತ ರಾಹುಲ್ ಗಾಂಧಿ ಮೆರೆನ ಸುಳ್ಳುದ ಭರವಸೆ ಆಂಡ ರಾಜ್ಯ ಕಾಂಗ್ರೆಸ್ ಸರ್ಕಾರ ತನ್ನ ಸುರುತ್ತ ಬಜೆಟ್ಡ್ ಮೀನುಗಾರ ಪೊಂಜೋವ್ ಲೆಗ್ 3 ಲಕ್ಷ ರೂ. ಮುಟ್ಟ ಬಡ್ಡಿ ಇಜ್ಜಂದೆ ಸಾಲ ಘೋಷಣೆ ಮಲ್ತ್ ದ್, ಇಡೇ ಮುಟ್ಟ ಅಯಿನ್ ಜಾರಿ ಮಲ್ದಿಜಿ. ಉಂದು ಕೇವಲ ಬಜೆಟ್ ದ ಘೋಷಣೆಯಾದೇ ಉಂಡು. ಇಡೇ ಮುಟ್ಟ ತುಳುನಾಡ್ ದ ಒರಿಯೇ ಒರಿ ಮೀನುಗಾರೆ ಪೊಂಜೋವ್ ಗ್ ಈ ಯೋಜನೆನ್ ತಿಕಿಜಿ. ಉಂದು ಮತ ಭರವಸೆ ಈಡೇರ್ ದ್ಂಡ? ಕಾಂಗ್ರೆಸ್ ಸರ್ಕಾರ ತನ್ನ ಬಜೆಟ್ ಡ್ ಮೀನುಗಾರೆರೆನ ಬದುಕ್ ಗ್ ಉಪಯೋಗ ಆಪಿನ ವಾ ಪೊಸ ಯೋಜನೆನ್ ಘೋಷಣೆ ಮಲ್ದ್ಂಡ್? ನಮ್ಮ ಸರ್ಕಾರದ ಬಜೆಟ್ ಡ್ ಘೋಷಣೆ ಆಯಿನ ಯೋಜನೆಲೆನ್ ದುಂಬಾರಿಸಾದ್ಂಡ್ ಅತ್ತಂಡ ಮೀನುಗಾರೆರೆಗ್ ಅಗತ್ಯ ಆಯಿನ ನಮ್ಮ ಸರ್ಕಾರದ ಯೋಜನೆನ್ ಅನುದಾನ ಕೊರಂದೆ ಕಡೆಗಣಿಸಾದ್ಂಡ್. ಇತ್ ಮಾತ್ರ ಕಾಂಗ್ರೆಸ್ ಸರಕಾರ ಸಾಧನೆ ಆತ್ಂಡ್. ಅಂಚ ತೂಂಡ ಪ್ರಧಾನ ಮಂತ್ರಿ ಮತ್ಸ್ಯಸಂಪದ ಯೋಜನೆಡ್ ದಕ್ಷಿಣಕನ್ನಡ ಜಿಲ್ಲೆಗ್ ಮೂಜಿ ವರ್ಷದ ಅವಧಿಡ್ ಇಡೇ ಮುಟ್ಟ 16 ಕೋಟಿ 77 ಲಕ್ಷ ಸಬ್ಸಿಡಿ ತಿಕ್ ದ್ಂಡ್ ಪಂದ್ ಪಂಡೆರ್.
ಬಿಜೆಪಿ ಸರಕಾರದ ಬದ್ಧತೆ ಬೊಕ್ಕ ಕಾಂಗ್ರೆಸ್ ಸರ್ಕಾರದ ನಿರ್ಲಕ್ಷಗ್ ಸಾಕ್ಷಿ ಈ ಬಜೆಟ್.
ನಮ್ಮ ಬಜೆಟ್ ಡ್ ನಾಡದೋಣಿ ಮೀನುಗಾರೆರೆಗ್ ಪೆಟ್ರೋಲ್/ ಡೀಸೆಲ್ ಇಪ್ಪುನ ಇಂಜಿನ್ ದೆತೊನಿಯೆರೆ 50 ಸಾರ ಸಹಾಯಧನ ಕೊರ್ಪುನ ಲೇಸ್ ಗ್ 40 ಕೋಟಿ ಅನುದಾನ ನಿಗದಿ ಮಲ್ದ್ಂಡ್. ಆಂಡ ಕಾಂಗ್ರೆಸ್ ದ ಬಜೆಟ್ ಡ್ ನೆರ್ದ್ ದುಂಬುದ 40 ಕೋಟಿಡ್ 20 ಕೋಟಿ ಕಮ್ಮಿ ಮಲ್ತ್ ದ್ ಒರಿನ 20 ಕೋಟಿನ್ ಮಾತ್ರ ಕೊರ್ತುಂಡು.
ನಮ್ಮ ಬಜೆಟ್ ಡ್ ಮೀನುಗಾರೆರೆನ ಬೊಕ್ಕ ಅಕ್ಲೆನ ಬೋಟುದ ಸುರಕ್ಷತಾ ದೃಷ್ಟಿರ್ದ್ ಇಸ್ರೋ ನಿರ್ಮಾಣದ ಜಿಪಿಎಸ್ ಸಂವಹನ ವ್ಯವಸ್ಥೆನ್ ಮತ ಯಾಂತ್ರೀಕೃತ ಬೋಟುಲೆಡ್ ಪಾಡ್ದ್ ಆಳ ಕಡಲ್ ಡ್ ಸಂಕಷ್ಟಗ್ ತಿಕೊನ್ನಬೋಟುನ್ ಬೇಗಡ್ ಪತ್ತೆ ಮಲ್ಪುನ ಯೋಜನೆಗ್ 17 ಕೋಟಿ ರೂ. ದ ಅನುದಾನ ನಿಗದಿ ಮಲ್ದ್ಂಡ್. ಆಂಡ ಕಾಂಗ್ರೆಸ್ ಸರಕಾರದ ಬಜೆಟ್ ಡ್ ಈ ಯೋಜನೆಗ್ ಒವ್ವೇ ಅನುದಾನ ಒದಗಿಸಾವಂದೇ ಮೀನುಗಾರೆರೆನ ಸುರಕ್ಷತೆನ್ ಕಡೆಗಣಿಸಾದ್ಂಡ್.
ನಮ್ಮ ಬಜೆಟ್ ಡ್ ಮೀನುಗಾರೆರೆನ ಬೋಟುಲೆಗ್ ರಿಯಾಯಿತಿ ದರಡ್ ಕೊರೊಂದು ಇತ್ತಿನ ಡೀಸೆಲ್ ಮಿತಿನ್ ಒಂಜರೆ ಲಕ್ಷ ಕಿಲೋ ಲೀಟರ್ ರ್ದ್ 2 ಲಕ್ಷ ಕಿಲೋ ಲೀಟರ್ ಮುಟ್ಟ ಎಚ್ಚ ಮಲ್ತ್ ದ್ ಇತ್ತ್ಂಡ್. ಇತ್ತೆ ಕಾಂಗ್ರೆಸ್ ಸರಕಾರ ಅವ್ವೆ ಯೋಜನೆನ್ ದುಂಬಾರಿಸಾದ್ಂಡ್.
ಮತ್ಸ್ಯಾಶ್ರಯ ಯೋಜನೆಡ್ ವಸತಿ ಇಜ್ಜಂದಿನ ಮೀನುಗಾರೆರೆಗ್ ಇಲ್ಲ್ ಕಟ್ಟಿಯೆರೆ ಕ್ರಮ ದೆತೊಂದು ಇತ್ತ್ಂಡ್. ಕಾಂಗ್ರೆಸ್ ಸರಕಾರಡ್ ಈ ಬಗೆಟ್ಟ್ ಒವ್ವೇ ಪ್ರಸ್ತಾವನೆ ಇಜ್ಜಿ.
ನಮ್ಮ ಬಜೆಟ್ ಡ್ ಮೀನ್ ದ ಸಂತತಿ ಕಮ್ಮಿ ಆಪಿನೆರ್ದಾವೆರ ಬಿತ್ತನೆ ಮೀನ್ ದ ಕಿನ್ನಿನ್ ಕೆರೆ ಬೊಕ್ಕ ಹಿನ್ನೀರು ಪ್ರದೇಶಡ್ ಬಿತ್ತನೆ ಮಲ್ಪು ಯೋಜನೆಗ್ 20 ಕೋಟಿ ಅನುದಾನ ಕೊರ್ದಿತ್ತ್ಂಡ್. ಆಂಡ ಕಾಂಗ್ರೆಸ್ ಸರಕಾರದ ಬಜೆಟ್ ಡ್ ಈ ಯೋಜನೆಗ್ ಒವ್ವೇ ಅನುದಾನ ಇಜ್ಜಿ.
ನಮ್ಮ ಬಜೆಟ್ ಡ್ ಸಿಗಡಿ ಉತ್ಪನ್ನದ ರಫ್ತು ಪ್ರೋತ್ಸಾಹಿಸಾಯೆರೆ ಕೇಂದ್ರ ಆಯವ್ಯಯಡ್ ರಫ್ತು ಸುಂಕನ್ ಕಮ್ಮಿ ಮಲ್ತ್ ದ್, ಕಲ್ಯಾಣ ಕರ್ನಾಟಕ ಭಾಗದ ಯಾದಗಿರಿ, ರಾಯಚೂರು, ಬಳ್ಳಾರಿ ಜಿಲ್ಲೆಡ್ ಸಿಗಡಿ ಕೃಷಿ ಕ್ಲಸ್ಟರ್ ನ್ ಸ್ಥಾಪನೆ ಮಲ್ಪುನ ಬಗೆಟ್ಟ್ ಯೋಜನೆ ಮಲ್ದ್ಂಡ್. ಆಂಡ ಇತ್ತೆ ಕಾಂಗ್ರೆಸ್ ಸರ್ಕಾರದ ಬಜೆಟ್ ಡ್ ಈ ಅಂಶನ್ ಕಡೆಗಣಿಸಾದ್ಂಡ್.
ಇತ್ತೆ ಕೇಂದ್ರ ಬಿಜೆಪಿ ಸರ್ಕಾರದ ಪೊಸ ಯೋಜನೆ “ಪಿ.ಎಂ ವಿಶ್ವಕರ್ಮ” ದ ಮುಖೇನ ಮೀನುಗಾರೆರೆಗ್ boat building ಬೊಕ್ಕ ಮೀನುಗಾರಿಕಾ ಬಲೆಗ್ ಸಬ್ಸಿಡಿ ದರಟ್ಟ್ ಸಾಲ ಸೌಲಭ್ಯ ಘೋಷಣೆ ಆತ್ಂಡ್.
ರಾಜ್ಯದ 8 ಮೀನುಗಾರಿಕೆ ಬಂದರ್ ದ ನ್ಯಾವಿಗೇಶನ್ ಚಾನೆಲ್ ಡ್ ಮೀನುಗಾರಿಕೆ ಬೋಟುದ ಸುಗಮ ಬೊಕ್ಕ ಸುರಕ್ಷಿತ ಸಂಚಾರಗ್ ಅನುಕೂಲ ಆಪುಲೆಕ್ಕ ಹೂಳು ದೆಪ್ಪುನ ಬೇಲೆಗ್ 20 ಕೋಟಿ, ಅಯಿಟ್ಟ್ ಕುಡ್ಲಗ್ 3.9 ಕೋಟಿನ್ ಬಿಜೆಪಿ ಸರ್ಕಾರದ ಅವಧಿಡ್ ಮಂಜೂರು ಮಲ್ತ್ ದ್ ಆಡಳಿತಾತ್ಮಕ ಅನುಮೋದನೆನ್ ಪಡೆದಿತ್ತ್ಂಡ್. ನ್ಯಾಯಾಲಯದ ದಾವೆಗ್ ಸಂಬಂಧ ಪಟ್ಟಿನಂಚೆನೆ ಕಾಮಗಾರಿ ತಡವಾದ್, ಬೊಕ್ಕ ಜೂನ್ ಡ್ ಕಾರ್ಯಾದೇಶ ಆದಿತ್ತ್ಂಡ್. ಆಪಗ ಬರ್ಸ ಇತ್ತಿನೆರ್ದಾವೆರ ಸೆಪ್ಟೆಂಬರ್ ರ್ದ್ ಬೊಕ್ಕ ಕಾಮಗಾರಿ ಸುರು ಆಯೆರೆ ಇತ್ಂಡ್. ಆಂಡ ಇತ್ತೆ ಕಾಂಗ್ರೆಸ್ ಸರ್ಕಾರ ಬಜೆಟ್ ಡ್ ಈ ಬಗೆಟ್ಟ್ ಒವ್ವೇ ಪ್ರಸ್ತಾಪ ಮಲ್ಪಂದೆ ಕಡೆಗಣಿಸಾದ್ಂಡ್ ಪಂದ್ ಶಾಸಕೆರ್ ಕಾಮತ್ ತೆರಿಪಾಯೆರ್.
ಯೂಟ್ಯೂಬ್, ಎಕ್ಸ್ ಸೇರಿನಂಚ ಮಾತಾ ಸಾಮಾಜಿಕ ಜಾಲತಾಣಡ್ ಜೋಕ್ಲೆನ ಮಿತ್ತ್ದ ಲೈಂಗಿಕ ದೌರ್ಜನ್ಯದ ವೀಡಿಯೊಲೆನ್ ದೆತ್ತ್ ಪಾಡರೆ ಮಾಹಿತಿ ತಂತ್ರಜ್ಞಾನ ಸಚಿವಾಲಯ ಸೂಚನೆ ಕೊರ್ತುಂಡು.