October 2023

ಮಣಿಪಾಲ ಅಕಾಡೆಮಿ ಹಿರಿಯ ಪ್ರಾಥಮಿಕ ಶಾಲೆಡ್ ತುಳು ಲಿಪಿ ಪುದರ್ ಪಲವೆ ಬುಡುಗಡೆ

ಜೈ ತುಲುನಾಡ್ (ರಿ.) ಒಡಿಪು ವಲಯದ ಮುತಾಲಿಕೆಡ್ ಮಣಿಪಾಲ ಅಕಾಡೆಮಿ ಹಿರಿಯ ಪ್ರಾಥಮಿಕ ಶಾಲೆಗ್ ಕೊರ್ಪಿನ ತುಳು ಲಿಪಿತ್ತ ಪುದರ್ ಪಲವೆನ್ ತುಳುಕೂಟ (ರಿ.) ಒಡಿಪುದ ಗುರ್ಕಾರೆ ಜಯಪ್ರಕಾಶ್ ಶೆಟ್ಟಿ ಇಂದ್ರಾಳಿ ಮೇರ್ ಬುಡುಗಡೆ ಮಲ್ತೆರ್.

ಬೊಕ್ಕ ಮೇರ್ ಮಲ್ಲ ಬಿನ್ನೆರಾದ್ ಪಾತೆರ್ದ್, ದಾಖಲೆ ಆಧಾರದ ಮಿತ್ತ್ ಕಂದಾಯ ಅಧಿಕಾರಿಲು ನಮಕ್ಕ್ ಮಾತೃ ಭಾಷೆ ತುಳು ಪಂದ್ ಸರ್ಟಿಫಿಕೆಟ್ ಕೊರ್ಂಡ ಆ ಸರ್ಟಿಫಿಕೆಟ್ ಮಿತ್ತ್ NEET, CET ಡ್ ತುಳು ಕೋಟಾಡ್ reservation ತಿಕ್ಕುಂಡು. ಅಂಚಾದ್ ಲಕ್ಷರ್ದ್ ಎಚ್ಚ ರೂ. donation ಕೊರ್ಪಿನ ತಪ್ಪುಂಡು. ಎಚ್ಚಿನ ಕಡೆಟ್ಟ್ ನೆತ್ತ ಪೊಲಬು ಕೊರ್ತುಂಡು. ನಮ್ಮ ತುಳುನಾಡ್ ದ ಜೋಕುಲೆಗ್ ಬೊಕ್ಕ ಪೋಷಕೆರೆಗ್ ಎಚ್ಚಿನಕ್ಲೆಗ್ ನೆತ್ತ ಪೊಲಬು ಇಜ್ಜಿ. ಶಾಲಾ ದಾಖಲಾತಿದ ಪೊರ್ತುಡು ಮಾತೃಭಾಷೆ ತುಳು ಪಂದ್ ನಮೂದಿಸಾಂಡ ನೆತ್ತ ಸದುಪಯೋಗ ಪಡೆವೊಡು. ಬೊಕ್ಕ ಜೈ ತುಲುನಾಡ್ (ರಿ.) ಸಂಘಟನೆದಕುಲು ತುಳು ಭಾಷೆ ಸಂಸ್ಕೃತಿ ಒರಿಪಾಯೆರೆ ಒವ್ವೇ ಫಲಾಪೇಕ್ಷೆ ಇಜ್ಜಂದೆ ಬೆನೊಂದುಲ್ಲರ್. ನೆಕ್ಕ್ ಯಾನ್ ಆಭಾರಿ ಆತೆ ಪಂದ್ ಪಂಡೆರ್.

ಈ ಪೊರ್ತುಡು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ತಾರಾ ಉಮೇಶ್ ಆಚಾರ್ಯ, ತುಳುನಾಡ ಧ್ವನಿ ಸಂಪಾದಕೆರ್ ಯಶೋಧಾ ಕೇಶವ್, ಶಾಲಾ ಮುಖ್ಯೋಪಾಧ್ಯಾಯೆರ್ ಲಕ್ಷ್ಮಿ ನಾಯ್ಕ್, ಜೈ ತುಲುನಾಡ್ (ರಿ.) ದ ಉಪಾಧ್ಯಕ್ಷೆರ್ ಉದಯ್ ಪೂಂಜ, ಕೋಶಾಧಿಕಾರಿ ಸಂತೋಷ್.ಎನ್.ಎಸ್ ಬೊಕ್ಕ ಜೈ ತುಲುನಾಡ್ (ರಿ.) ಒಡಿಪು ವಲಯದ ಸದಸ್ಯೆರ್ ಸುಪ್ರೀತಾ ದೇವಾಡಿಗ, ಕಿರಣ್ ಭಂಡಾರಿ, ರಾಜೇಶ್ ತುಳುವ, ಸುರೇಶ್ ಹಾವಂಜೆ, ಸಾಗರ್ ಭಂಡಾರಿ ಬೊಕ್ಕ ಶಾಲೆದ ಶಿಕ್ಷಕೆರ್ ಪಾಲ್ ಪಡೆದಿತ್ತೆರ್. ಸಂಘದ ಸದಸ್ಯೆರ್ ಸ್ವಾತಿ ಸುವರ್ಣ ಕೊಡವೂರು ಎದ್ಕೊಂದು, ಲೇಸ್ ನ್ ಸುಧಾರಿಕೆ ಮಲ್ತೆರ್.

ತುಲು ಲಿಪಿ ಶಿಕ್ಷಣ ‌ಕ್ರಾಂತಿಗ್ ಕಾರ್ಲಡೊರ್ಮೆ ಶಾಲೆಗ್ ಲೆಪ್ಪು

ಜೈ ತುಲುನಾಡ್ ರಿ. ಕಾರ್ಲ ಎಗ್ಗೆದ ವತಿರ್ದ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯ ಮಲ್ಪೊಡು ಪಂದ್ ಕಾರ್ಲ ತಾಲೂಕುದ‌ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಅಯ್ಯಪ್ಪನಗರ, ಶ್ರೀ ದುರ್ಗಾದೇವಿ ಅನುದಾನಿತ ಹಿರಿಯ ಪ್ರಾಥಮಿಕ ಶಾಲೆ ಕುಕ್ಕುಂದೂರು ,ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಪತ್ತೊಂಜಿ ಕಟ್ಟೆ, ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಜಾರ್ಕಳ ಮುಂಡ್ಲಿ,ಸರಕಾರಿ ಕಿರಿಯ ಪ್ರಾಥಮಿಕ ಶಾಲೆ ಬಂಗ್ಲೆ ಗುಡ್ಡೆ ಕೆರ್ವಾಶೆ,ಸರಕಾರಿ ಪ್ರೌಢಶಾಲೆ ಬೈಲೂರು ಶಾಲೆಲೆಗ್ ಅರಿಕೆ ಮಲ್ತೆರ್.

ಈ ಪೊರ್ತುಗು ಜೈ ತುಲುನಾಡ್ ರಿ. ಕೇಂದ್ರ ಕಮಿಟಿದ ಗುರ್ಕಾರೆ ವಿಶು ಶ್ರೀಕೇರ,ಕಾರ್ಲ ವಲಯದ ಪದುಕೆರಾಯಿನ ಸುನಿಲ್ ಹಿರ್ಗಾನ, ಪವನ್ ಕರ್ಕೇರ ಹೊಸ್ಮಾರ್,ಪ್ರದೀಪ್ ಚಿನ್ನು ಬಂಗ್ಲೆಗುಡ್ಡೆ,ದೀಕ್ಷಾ ಬೈಲೂರು ಪಾಲ್‌ಪಡೆದಿತ್ತೆರ್.

ಅ.15-24: ಪದವು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಮಾರ್ನೆಮಿ ಉಚ್ಚಯ

ಬಂಟ್ವಾಳ: ವಾಮದಪದವು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಅ.15-24 ಮುಟ್ಟ ಕ್ಷೇತ್ರದ ತಂತ್ರಿಲಾಯಿನ ಶ್ರೀಪಾದ ಪಾಂಗಣ್ಣಾ ಮೆರೆನ ಮುತಾಲಿಕೆಡ್ ಮಾರ್ನೆಮಿ ಉಚ್ಚಯ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ದುರ್ಗಾಂಬಿಕೆನ ಕೃಪೆಗ್ ಪಾತ್ರರಾವೊಡು ಪಂದ್ ಪದವು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಗುರ್ಕಾರ್ಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.