ಉಲ್ಲಂಜೆ ಶ್ರೀ ಕ್ಷೇತ್ರ ಕೊರಗಜ್ಜ ಮಂತ್ರಾದೇವತಾ ಚಾಮುಂಡೇಶ್ವರಿ ಗುಳಿಗ ಭದ್ರಕಾಳಿ ಸನ್ನಿಧಿಡ್ ಲಲಿತಾ ಪಂಚೆಮಿ ಆಚರಣೆ ನಡತ್ಂಡ್.
ನವರಾತ್ರಿ ಲೆಕ್ಕೊಡು ಶ್ರೀ ಸನ್ನಿಧಿಡ್ ಲಲಿತಾ ಪಂಚೆಮಿದ ದಿನ ಬೊಲ್ಪುಗು ದೇವೆರೆಗ್ ಬೊಂಡದ ಅಭಿಷೇಕ ನಡತ್ಂಡ್. ಒಂಜಿ ಸಾರರ್ದ್ಲ ಎಚ್ಚ ಪೊಂಜೊವುಲು ಶ್ರೀ ದೇವೆರೆನ ಸೀರೆನ್ ಪ್ರಸಾದ ರೂಪಡ್ ಪಡೆಯೆರ್. ಈ ಪೊರ್ತುಡು ಧರ್ಮದರ್ಶಿಲು ಹರೀಶ್ ಪೂಜಾರಿ ಪಾಲ್ ಪಡೆದಿತ್ತೆರ್.
ದೆಲ್ಲಿ: ದೇಶದ ಸುರುತ ರ್ಯಾಪಿಡ್ ಎಕ್ಸ್ ರೈಲ್ ಸಂಚಾರ ಅ. 20 ದಾನಿ ಸುರು ಆವೆರೆ ಉಂಡು. ವಂದೇ ಭಾರತ್ ರೈಲ್ದ ವೇಗಗ್ ಸರಿಸಮನಾದ್ ಪೋಪುನ ನನೊಂಜಿ ಸೆಮಿ ಸ್ಪೀಡ್ ರೈಲ್ ಉಂದು ಆತ್ಂಡ್. ಪ್ರಧಾನಿ ನರೇಂದ್ರ ಮೋದಿ ಲೋಕಾರ್ಪಣೆ ಮಲ್ಪೆರೆ ಉಲ್ಲೆರ್.
ಈ ರೈಲ್ ಪ್ರತಿ ಗಂಟೆಗ್ ಸರಾಸರಿ 100 ಕಿ.ಮೀ. ಸ್ಪೀಡ್ ಸಂಚಾರ ಮಲ್ಪುಂಡ್. ರ್ಯಾಪಿಡ್ ಎಕ್ಸ್ ರೈಲ್ದ ಯೋಜನೆನ್ ರಾಷ್ಟ್ರೀಯ ರಾಜಧಾನಿ ಪ್ರಾದೇಶಿಕ ಸಾರಿಗೆ ಸಂಸ್ಥೆ (ಎನ್ಸಿಆರ್ಟಿಸಿ) ಜಾರಿ ಮಲ್ತ್ದ್ಂಡ್.
ಸ್ಟ್ಯಾಂಡರ್ಡ್ ಕೋಚ್ಲೆಗ್ ಕನಿಷ್ಠ ದರ 20 ರೂ. ಬೊಕ್ಕ ಗರಿಷ್ಠ 50 ರೂ. ಪ್ರೀಮಿಯಂ ಕೋಚ್ಲೆಗ್ ಕನಿಷ್ಠ ದರ 40 ರೂ. ಬೊಕ್ಕ ಗರಿಷ್ಠ 100 ರೂ. ಈ ರೈಲ್ ಕಾಂಡೆ 6 ರ್ದ್ ರಾತ್ರೆ 11 ಮುಟ್ಟ ಕಾರ್ಯಾಚರಣೆ ಮಲ್ಪುಂಡ್. ಪ್ರತಿ 15 ನಿಮಿಷಗ್ ಒಂಜಿ ರೈಲ್ ಸಂಚಾರ ಮಲ್ಪೆರೆ ಉಂಡು.
ಪಂಜ ಕೊಯಿಕುಡೆ: ಶ್ರೀ ಚಾಮುಂಡೇಶ್ವರಿ ದೇವಿ ಸನ್ನಿಧಿಡ್ ಶರನ್ನವರಾತ್ರಿ ಉಚ್ಚಯದ ಲೆಕ್ಕೊಡು ಅ.19 ಗುರುವಾರ ಲಲಿತ ಪಂಚಮಿಗ್ ಚಂಡಿಕಾ ಹೋಮ ಬೊಕ್ಕ ಮಹಾಪೂಜೆ ನಡತ್ಂಡ್.
ವಿದ್ವಾನ್ ಪ್ರಸನ್ನ ತಂತ್ರಿಲೆನ ಮಾರ್ಗದರ್ಶನಡ್ ಪಂಜ ಮಹಾಗಣಪತಿ ಮಂದಿರದ ಅರ್ಚಕೆರ್ ಸುರೇಶ್ ಭಟ್ ಪಂಜ ಬೊಕ್ಕ ಕಾರ್ತಿಕೇಯ ಭಾರ್ಗವ ಮೊಕ್ಲೆನ ಮುತಾಲಿಕೆಡ್ ಪೂಜೆದ ವೈದಿಕ ವಿಧಿ ವಿಧಾನಲು ನಡತ್ಂಡ್. ಮಧ್ಯಾಹ್ನ ದೇವಿನ ದರ್ಶನ ಮಹಾಪೂಜೆ ಬೊಕ್ಕ ಅನ್ನ ಪ್ರಸಾದ ಸೇವೆ ಇತ್ತ್ಂಡ್.
ಈ ಪೊರ್ತುಡು ಚಾಮುಂಡೇಶ್ವರಿ ಸನ್ನಿಧಿದ ಮುಖ್ಯಸ್ಥೆರ್ ಸೀತಾರಾಮ ಆಮೀನ್ ಬೊಕ್ಕ ದೇವಿನ ಭಕ್ತ ವೃಂದದಕುಲು, ಗ್ರಾಮಸ್ಥೆರ್ ಪಾಲ್ ಪಡೆದಿತ್ತೆರ್.
ಸುಳ್ಯದ ಶ್ರೀ ಶಾರದಾಂಬ ದಸರಾ ಸೇವಾ ಟ್ರಸ್ಟ್ , ಸಾರ್ವಜನಿಕ ಶ್ರೀ ಶಾರದಾಂಬ ಸೇವಾ ಸಮಿತಿ (ರಿ.) ದಸರಾ ಉತ್ಸವ ಸಮಿತಿದ ಮುತಾಲಿಕೆಡ್ 52ನೇ ವರ್ಷದ ಶ್ರೀ ಶಾರದಾಂಬ ಉತ್ಸವ ಶ್ರೀ ಚೆನ್ನಕೇಶವ ದೇವಾಲಯದ ಎದುರು ಶ್ರೀ ಶಾರದಾಂಬ ಕಲಾ ವೇದಿಕೆಡ್ ಒರ್ಂಬ ದಿನ ಗೌಜಿಡ್ ನಡಪರೆ ಉಂಡು.
ಕಾಂಡೆ ಪೇಂಟೆದ ಜ್ಯೋತಿ ಸರ್ಕಲ್ರ್ದ್ ಶ್ರೀ ಶಾರದಾದೇವಿ ಮೂರ್ತಿದ ಪ್ರತಿಷ್ಠಾ ಮೆರವಣಿಗೆಗ್ ಶಾಸಕೆರ್ ಭಾಗೀರಥಿ ಮುರುಳ್ಯ ಚಾಲನೆ ಕೊರಿಯೆರೆ ಉಲ್ಲೆರ್. ಒರ್ಂಬ ದಿನ ಬೇತೆ ಬೇತೆ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮದೊಟ್ಟಿಗೆ ಶ್ರೀ ಶಾರದಾಂಬ ಕಲಾವೇದಿಕೆಡ್ ದಸರಾ ಮಹೋತ್ಸವ ನಡಪರೆ ಉಂಡು. ಅ.28ದಾನಿ ಮಧ್ಯಾಹ್ನ ಸುಳ್ಯ ಪೇಂಟೆದ ಪ್ರಮುಖ ಬೀದಿಡ್ ದಸರಾ ಉತ್ಸವದ ಶೋಭಾಯಾತ್ರೆ ನಡಪರೆ ಉಂಡು.
ಮುಲ್ಕಿ :ದೇವಸ್ಥಾನಲೆಡ್ ಪೂಜೆ, ಪುನಸ್ಕಾರ ಮಾತ್ರ ಉಂಡು ಆಂಡ ಓಲ್ಲಾ ಸಂಸ್ಕೃತಿ ಕಲ್ಪಾವುಜೆರ್. ದೇವಸ್ಥಾನೊಲೆಡ್ ಸಂಸ್ಕೃತಿ, ಸಂಸ್ಕಾರ, ನಾಗರಿಕತೆನ್ ಕಲ್ಪಾವೊಡು. ಕನ್ನಡ ಮೀಡಿಯಂದ ಶಾಲೆಲೆರ್ದ್ ಸಂಸ್ಕೃತಿ ಒರಿದ್ಂಡ್. ಜೋಕುಲೆಗ್ ವಿದ್ಯೆದ ಒಟ್ಟುಗು ಸಂಸ್ಕೃತಿ ಕಲ್ಪಾಲೆ. ಕೃಷಿ ಸಂಸ್ಕೃತಿ ಕೊರ್ಪಾಲೆ ಪಂದ್ ಕೇಮಾರು ಸಾಂದೀಪನಿ ಆಶ್ರಮದ ಶ್ರೀ ಶ್ರೀ ಈಶವಿಠಲದಾಸ ಸ್ವಾಮೀಜಿ ತೆರಿಪಾಯೆರ್.
ಆರ್ ಮುಲ್ಕಿ ಹಿಂದೂ ಯುವ ಸೇನೆ ಬೊಕ್ಕ ಮಹಿಳಾ ಮಂಡಳಿದ ನಿರೆಲ್ಡ್ ಮುಲ್ಕಿದ ಶಿವಾಜಿ ಮಂಟಪಡ್ ಗುರುವಾರದಾನಿ 25 ನೇ ವರ್ಷದ ಬೊಳ್ಳಿ ಪರ್ಬದ ಶಾರದಾ ಮಹೋತ್ಸವದ ರಡ್ಡನೇ ಧರ್ಮಸಭೆಟ್ಟ್ ಪಾತೆರಿಯೆರ್.
ಭಗವದ್ಗೀತೆನ್ ಜೋಕುಲೆಗ್ ಕಲ್ಪಾಲೆ. ಹಿಂದೂ ಸಮಾಜೊನು ಒರಿಪಾಲೆ. ಸಮಾಜದ ಕಟ್ಟಕಡೆತ್ತ ಬಡವೆರೆಗ್ ಸಹಾಯ ಮಲ್ಪುನ ಕೆಲಸ ಮಾತೆರ್ಲ ಮಲ್ಪೊಡು.
ಮದಿರೆಂಗಿ , ಮದಿಮೆ ಪಂದ್ ಕರ್ಚಿ ಮಲ್ಪುನ ಬದಲ್ ಅವೆನ್ ಬಡವೆರೆಗ್ ಕೊರೊಡು, ನೊಂದ ಜನಕ್ಲೆಗ್ ಸ್ಪಂದನೆ ಕೊರ್ಲೆ ಪಂದ್ ಪಂಡೆರ್.
ಲಯನ್ ಸದಾಶಿವ ಹೊಸದುರ್ಗ ಅಧ್ಯಕ್ಷತೆ ಒಯಿಸ್ ದಿತ್ತೆರ್.
ಮುಲ್ಕಿ ನಾಲ್ಕುಪಟ್ಣ ಮೊಗವೀರ ಸಭಾದ ಅಧ್ಯಕ್ಷೆರ್ ಸುಜಿತ್ ಸಾಲ್ಯಾನ್ ಪಾತೆರ್ದ್, ಶರನ್ನವರಾತ್ರಿ ಪಂಡ ದಾದ ಪಂದ್ ತೆರಿಪಾಯೆರ್.
ವಿನಯ ತೆಂಗು ಬೆಳೆಗಾರರ ಸಂಘದ ಅಧ್ಯಕ್ಷೆರ್ ವಿಜಯ ಶೆಟ್ಟಿ, ನನ ದುಂಬಗ್ ಆಹಾರಗ್ ತತ್ತರ ಬರ್ಪಿನ ಸಾಧ್ಯತೆ ಉಂಡು.ಅಂಚಾದ್ ನನದ ಜನಕ್ಲೆನ್ ಕೃಷಿ ಕಾಲೇಜಿಗ್ ಸೇರ್ಸಾಲೆ ಪಂಡೆರ್.
ಆರ್ ಎಸ್ಸೆಸ್ಸೆಸ್ ಕಾರ್ಯಕರ್ತೆರ್ ವಿಶ್ವನಾಥ್ ಬಪ್ಪನಾಡು ಪಾತೆರ್ದ್ ಜೋಕುಲೆಗ್ ಇಲ್ಲಡೇ ಸಂಸ್ಕಾರ ಕಲ್ಪಾವೊಡು ಪಂಡೆರ್.
ಬಿರುವೆರ್ ಕುಡ್ಲ ಮುಲ್ಕಿ ಘಟಕದ ಅಧ್ಯಕ್ಷೆರ್ ಕಿಶೋರ್ ಸಾಲ್ಯಾನ್, ನಮ್ಮ ಜೋಕುಲೆಗ್ ಶಿಕ್ಷಣದ ಒಟ್ಟುಗೆ ಧರ್ಮ ಸಂಸ್ಕೃತಿನ್ ಕಲ್ಪಾಲೆ ಪಂದ್ ಪಂಡೆರ್.
ಉದ್ಯಮಿ ಶಶಿಧರ ಕೋಟ್ಯಾನ್ , ಅಶೋಕ್ ಟೈಲರ್ ಮೇರ್ ಪಾತೆರ್ದ್, ಬೊಳ್ಳಿ ಪರ್ಬದ ಉತ್ಸವೊಗು ಎಡ್ಡೆಪ್ಪು ಬಯಕಿಯೆರ್.
ಹಿಂದೂ ಯುವ ಸೇನೆ ಮುಲ್ಕಿ ಘಟಕದ ಅಧ್ಯಕ್ಷೆರ್ ದಿನೇಶ್ ಕೊಲ್ನಾಡ್, ಕಾರ್ಯದರ್ಶಿ ಸತೀಶ್ ಬಂಗೇರ ಚಿತ್ರಾಪು, ಮಹಿಳಾ ಮಂಡಳಿದ ಅಧ್ಯಕ್ಷೆರ್ ಲತಾ ಶೇಖರ್ ಮಿತ್ತರ್ಮೆಡ್ ಇತ್ತೆರ್.
ಲತಾಶೇಖರ್ ಬೊಕ್ಕ ರೇಷ್ಮಾ ದೇವೆರೆನ್ ಸುಗಿತೆರ್. ದಿನೇಶ್ ಕೊಲ್ನಾಡಿ ಬಿನ್ನೆರೆನ್ ಎದ್ಕೊಂಡೆರ್.
ಉಪಾಧ್ಯಕ್ಷೆರ್ ಶಂಕರ್ ಪಡಂಗ ಸೊಲ್ಮೆ ಸಂದಾಯೆರ್.ಮೋಹನ್ ಸುವರ್ಣ ನಿರೂಪಣೆ ಮಲ್ತೆರ್. ಅವೆರ್ದ್ ಬೊಕ್ಕ ಪುದರ್ ದೀದಾತ್ಂಡ್ ತುಳು ನಾಟಕ ನಡತ್ಂಡ್.
ವಿಟ್ಲ: ಮೇಗಿನ ಪೇಟೆ ಶ್ರೀ ಮಹಮ್ಮಾಯಿ ಅಮ್ಮನ ದೇವಸ್ಥಾನಡ್ ಅ. 23 ಮುಟ್ಟ ನವರಾತ್ರಿ ಉಚ್ಚಯ ರಾತ್ರೆ 8 ಗಂಟೆಗ್ ನಡಪೆರೆ ಉಂಡು. ಅ.20 ಶುಕ್ರವಾರ ದಾನಿ ಕಾಂಡೆ 8 ಗಂಟೆಗ್ ಗಣಪತಿ ಹೋಮ ಬೊಕ್ಕ ಬಯ್ಯಗ್ 5 ಗಂಟೆರ್ದ್ ವಿಶೇಷ ದುರ್ಗಾ ನಮಸ್ಕಾರ ಪೂಜೆ ನಡಪರೆ ಉಂಡು. ರಾತ್ರೆ ಪೂಜೆರ್ದ್ ಬೊಕ್ಕ ಪ್ರಸಾದ ಭೋಜನದ ವ್ಯವಸ್ಥೆ ಉಂಡು ಪಂದ್ ಪ್ರಕಟಣೆಡ್ ತೆರಿಪಾದೆರ್.
ಕುಡ್ಲ: ಜಿಲ್ಲಾ ವೆನ್ಲಾಕ್ ಆಸ್ಪತ್ರೆನ್ ರಿಪೇರಿ ಮಲ್ಪರೆ ಆರೋಗ್ಯ ಇಲಾಖೆ ದುಂಬು ಬೈದ್ಂಡ್. ಈ ದಿಸೆಟ್ 11 ಕೋಟಿ ಕರ್ಚಿ ಮಲ್ತ್ ಆಸ್ಪತ್ರೆಗ್ ಮೂಲಸೌಕರ್ಯದ ಬೇಲೆ ನಡಪುಂಡ್ ಪಂದ್ ಆರೋಗ್ಯ ಸಚಿವೆರ್ ಅಂಚೆನೆ ಕುಡ್ಲ ಜಿಲ್ಲಾ ಉಸ್ತುವಾರಿ ಸಚಿವೆರ್ ದಿನೇಶ್ ಗುಂಡೂರಾವ್ ತೆರಿಪಾದೆರ್.
ವೆನ್ಲಾಕ್ಡ್ ಗುರುವಾರ ನಡತಿನ ಪ್ರಗತಿ ಪರಿಶೀಲನಾ ಸಭೆಟ್ ಪಂಡೆರ್. 5 ಕೋಟಿಡ್ ಮರ್ದ್ ಉಗ್ರಾಣ, ವೈದ್ಯಕೀಯ ದಾಖಲೆ ವಿಭಾಗ, ಎಂ.ಡಿ.ಆರ್.ಟಿ.ಬಿ ವಾರ್ಡ್, ಜೀವ ವೈದ್ಯಕೀಯ ತ್ಯಾಜ್ಯ ಕೊಠಡಿಗ್ ಪೊಸ ಕಟ್ವಾನ ಕಟ್ಟೆರೆ ಉಂಡು. 2 ಕೋಟಿಡ್ 30 ಬೆಡ್ ಉಪ್ಪುನ ಪೊಸ ಡಯಾಲಿಸಿಸ್ ಘಟಕ, ಫೈರ್ ಸೇಫ್ಟಿದ ಬೇಲೆಲೆಗ್ 1.75 ಕೋಟಿ, ಪಿದಯಿರ್ದ್ ಮರ್ದ್ ಕೊನೊಪಿನಕಲೆನ ಅಂಚೆನೆ ಆಡಳಿತ ವಿಭಾಗದ ಕಟ್ವಾನ ಪರತ್ತ್ ಆದ್, ಈ ಕಟ್ವಾನದ ರಿಪೇರಿ ಬೊಕ್ಕ ನವೀಕರಣಗ್ ರಡ್ಡ್ ಕೋಟಿ, ಅಟಿಲ್ದ ಕಟ್ವಾನ ಮಲ್ಪರೆ 1.5 ಕೋಟಿ ಇಂಚಿನ ಕೆಲವಾತ್ ಅಭಿವೃದ್ದಿ ಬೇಲೆಲು ನಡಪರೆ ಉಲ್ಲ ಪಂದ್ ಪಂಡೆರ್.
ಪುತ್ತೂರು: ಪುತ್ತೂರು ಶಾಸಕೆರಾಯಿನ ಅಶೋಕ್ ಕುಮಾರ್ ರೈ ನವರಾತ್ರಿ ಉಚ್ಚಯದ ಪ್ರಯುಕ್ತ ಕೋಡಿಂಬಾಡಿ ಶ್ರೀ ಮಹಿಷ ಮರ್ಧಿನಿ ದೇವಸ್ಥಾನಡ್ ಚಂಡಿಕಾ ಹೋಮ ಬೊಕ್ಕ ತುಲಾಭಾರ ಸೇವೆ ಸಲ್ಲಿಸಾದ್ ದೇವೆರೆಗ್ ವಜ್ರದ ಸರ ಸಮರ್ಪಣೆ ಮಲ್ತೆರ್. ಕಾಂಡೆ ದೇವಸ್ಥಾನಡ್ ಚಂಡಿಕಾಹೋಮ, ವಿಶೇಷ ಪೂಜೆ ಬೊಕ್ಕ ತುಲಾಭಾರ ಸೇವೆನ್ ನಡಪಾದ್ ಕೊರಿಯೆರ್.
ಕಾರ್ಯಕ್ರಮಡ್ ಗ್ರಾಮದ ಭಕ್ತಾದಿಲು ಶಾಸಕೆರ್ನ ಕುಟುಂಬಸ್ಥೆರ್ ಪಾಲ್ ಪಡೆದಿತ್ತೆರ್. ಸೇವಾ ರೂಪಡ್ ತನ್ನ ಪುಟ್ಟುದಿನ ಊರುದ ಆರಾಧ್ಯ ದೇವೆರಾಯಿನ ಮಹಿಷಮರ್ಧಿನಿಗ್ ವಜ್ರದ ಸರನ್ ಸೇವಾರೂಪಡ್ ಸಮರ್ಪಣೆ ಮಲ್ತೆರ್. ಪೂಜೆದ ಬೊಕ್ಕ ಅನ್ನದಾನ ನಡತ್ಂಡ್.
ಬೊಂಬೈ: ಮೀರಾ ಭಾಯಂದರ್ ದ ಪಲಿಮಾರ್ ಮಠ ಶ್ರೀ ಬಾಲಾಜಿ ಸನ್ನಿಧಿಡ್ ಅ.15-24 ಮುಟ್ಟ ಮಾರ್ನೆಮಿ ಉಚ್ಚಯ ನಡಪರೆ ಉಂಡು.
ಈ 10 ದಿನ ನಡಪುನ ಮಾರ್ನೆಮಿ ಉಚ್ಚಯಡ್ ಶ್ರೀರಾಮ ದೇವೆರೆನ ಪೂಜೆದ ವಿಧಿ ವಿಧಾನಲು ನಡಪುಂಡು ಪಂದ್ ಬೊಂಬೈ ಶ್ರೀ ಪಲಿಮಾರು ಮಠತ್ತ ವ್ಯವಸ್ಥಾಪಕೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 ಮೆಗಾ ಹರ್ಟ್ಸ್ ಡ್ ಡೆಂಗ್ಯೂ ಜ್ವರತ್ತ ಬಗೆಟ್ಟ್ ಇಸೇಸ ಲೇಸ್ ಅ.19 ಗುರುವಾರ ಬಯ್ಯಗ್ 6 ಗಂಟೆಗ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಮಣಿಪಾಲ ಕೆ.ಎಂ.ಸಿದ ಸಮುದಾಯ ವೈದ್ಯಕೀಯ ವಿಭಾಗಡ್ ಸಹಾಯಕ ಪ್ರಾಧ್ಯಾಪಕೆರಾಯಿನ ಡಾ.ಸಂಜಯ್ ಕಿಣಿ ಪಾಲ್ ಪಡೆಯೆರೆ ಉಲ್ಲೆರ್. ಅ.20 ಕ್ಕ್ ಮಧ್ಯಾಹ್ನ 2 ಗಂಟೆಗ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
