ಕುಡ್ಲ: ಮೂಲತ್ವ ಫೌಂಡೇಶನ್ ಚಾರಿಟೆಬಲ್ ಟ್ರಸ್ಟ್ ವತಿರ್ದ್ ಆಟಿಡೊಂಜಿ ದಿನ ಲೇಸ್ ಜು. 30 ಕ್ಕ್ ಬೊಲ್ಪುಗು 11 ಗಂಟೆಗ್ ಕುಡ್ಲ ಪೇಂಟೆದ ತಾರೆತೋಟದ ಮೂಲತ್ವ ಸಿ 105 ಸುವರ್ಣ ರೆಸಿಡೆನ್ಸಿಡ್ ನಡಪರೆ ಉಂಡು.
ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಅಧ್ಯಕ್ಷೆರ್ ದಯಾನಂದ ಜಿ. ಕತ್ತಲ್ ಸಾರ್ ಈ ಲೇಸ್ ದ ಉದಿಪನ ಮಲ್ಪೆರೆ ಉಲ್ಲೆರ್.
ಸಾಮಾನ್ಯವಾದ್ ಬ್ಯಾಂಕ್ಗ್ ರಡ್ಡನೇ ಶನಿವಾರ ಬೊಕ್ಕ ನಾಲನೇ ಶನಿವಾರದ ಒಟ್ಟಿಗೆ ರಾಷ್ಟ್ರೀಯ ರಜಾದಿನ, ಕೆಲವ್ ಪರ್ಬದಾನಿ ಬ್ಯಾಂಕ್ ಬಂದ್ ಉಪ್ಪುಂಡು.
2023 ಆಗಸ್ಟ್ ತಿಂಗೊಲುಡ್ ಕರ್ನಾಟಕಡ್ ಜಾಸ್ತಿ ದಿನ ಬ್ಯಾಂಕ್ಗ್ ರಜೆ ಇಜ್ಜಿ. ಇಂಚಾದ್ ಬ್ಯಾಂಕ್ ಗ್ರಾಹಕೆರೆರ್ನ ಕೆಲಸ-ಕಾರ್ಯಗ್ ಈ ತಿಂಗೊಲು ತೊಂದರೆ ಇಜ್ಜಿ.
ಆ.12 ರಡ್ಡನೇ ಶನಿವಾರದ ರಜೆ. ಆ.15 ಸ್ವಾತಂತ್ರ್ಯ ದಿನಾಚರಣೆಗ್ ಬ್ಯಾಂಕ್ಗ್ ರಜೆ. ಆ.26 ನಾಲನೇ ಶನಿವಾರ ಬ್ಯಾಂಕ್ಗ್ ರಜೆ.
ಕುಡ್ಲ ಬಂಟರ ಯಾನೆ ನಾಡವರ ಮಾತೃ ಸಂಘ (ರಿ) ನಿರೆಲ್ಡ್ ಶ್ರೀ ಸಿದ್ದಿ ವಿನಾಯಕ ಬೊಕ್ಕ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿ ಲೆಕ್ಕಡ್ ಓಂಕಾರ ಬಂಟ್ಸ್ ಹಾಸ್ಟೆಲ್ ಕುಡ್ಲ ಮೂಲ್ ಸೆಪ್ಟೆಂಬರ್ 16 ದಾನಿ ಬಂಟ ಯುವ ಸಮ್ಮೇಳನ ನಡಪರೆ ಉಂಡು.
ಲೇಸ್ದ ಪೂರ್ವಭಾವಿ ಸಭೆ ಬಂಟ್ಸ್ ಹಾಸ್ಟೆಲ್ ಅಮೃತೋತ್ಸವ ಕಟ್ಟಡದ ಸಭಾಂಗಣಡ್ ನಡತ್ಂಡ್.
ಲೇಸ್ ಡ್ ಸಮ್ಮೇಳನ ಸಮಿತಿದ ಉಸ್ತುವಾರಿ ಅಶ್ವತ್ಥಾಮ ಹೆಗ್ಡೆ ಪಾತೆರ್ದ್ ಸೆಪ್ಟೆಂಬರ್ 16 ದಾನಿ ಐತಾರ ಬೊಲ್ಪುಗು ದೀಪ ಉದಿಪನದ ಬೊಕ್ಕ ವಿಚಾರಗೋಷ್ಠಿ, ಸಾಧರ್ಕೆನ ಒಟ್ಟಿಗೆ ಸಂವಾದ, ಸಾಂಸ್ಕೃತಿಕ ಕಾರ್ಯಕ್ರಮ, ಹಾಸ್ಯ ದಿಗ್ಗಜೆರ್ನ ಒಟ್ಟಿಗೆ ಪಟ್ಟಾಂಗ ಕಾರ್ಯಕ್ರಮ ನಡಪೆರೆ ಉಂಡು ಪಂದ್ ತೆರಿಪಾದೆರ್.
ಸುಮಾರ್ 3000 ಜನ ಬಂಟ ಯುವಕ-ಯುವತಿಯೆರ್ ಈ ಲೇಸ್ಡ್ ಸೆರಿಯೆರೆ ಉಲ್ಲೆರ್. ಅವ್ವೆ ದಿನ ರೆಡ್ ಕ್ರಾಸ್ ಸಂಸ್ಥೆದ ಒಟ್ಟಿಗೆ ರಕ್ತದಾನ ಶಿಬಿರ ನಡಪರೆ ಉಂಡು.
ಸಮಿತಿದ ಪ್ರಮುಖೆರಾಯಿನ ವಸಂತ ಶೆಟ್ಟಿ, ದಿವಾಕರ ಸಾಮಾನಿ ಚೇಳಾರ್ ಗುತ್ತು, ಅಭಿಷೇಕ್ ಶೆಟ್ಟಿ, ಸಾಹಿಲ್ ರೈ, ಮೀನಾ ಶೆಟ್ಟಿ ಉಪಯುಕ್ತ ಮಾಹಿತಿ ಕೊರಿಯೆರ್. ಅಂಚೆನೆ ಉಲ್ಲಾಸ್ ಶೆಟ್ಟಿ ಪೆರ್ಮುದೆ, ಮನೀಷ್ ರೈ, ಸಾರಿಕಾ ಭಂಡಾರಿ ಈ ಲೇಸ್ಡ್ ಪಾಲ್ಪಡೆಯೆರ್.
ಒಡಿಪು: ಖಾಸಗಿ ನರ್ಸಿಂಗ್ ಕಾಲೇಜಿದ ಶೌಚಾಲಯಡ್ ವಿದ್ಯಾರ್ಥಿಲೆನ ವೀಡಿಯೋ ಚಿತ್ರೀಕರಣ ಮಲ್ತಿನ ಪ್ರಕರಣದ ವಿಚಾರಣೆ ಮಲ್ಪರೆ ರಾಷ್ಟ್ರೀಯ ಮಹಿಳಾ ಆಯೋಗದ ಸದಸ್ಯೆ, ಮಾಜಿ ಚಿತ್ರ ನಟಿ ಖುಷ್ಬೂ ಗುರುವಾರ ಆ ಕಾಲೇಜಿಗ್ ಭೇಟಿ ಕೊರ್ತೆರ್.
ಇನಿ ಬೊಲ್ಪುಗು ನೇತ್ರಜ್ಯೋತಿ ಪ್ಯಾರಾ ಮೆಡಿಕಲ್ ಕಾಲೇಜ್ಗ್ ಭೇಟಿ ಕೊರ್ತೆರ್. ಕಾಲೇಜ್ದ ಆಡಳಿತ ಮಂಡಳಿದ ಮುಖ್ಯಸ್ಥೆ ಲಕ್ಷ್ಮೀ ಕೃಷ್ಣ ಪ್ರಸಾದ್ ಮೇರ್ ಖುಷ್ಬೂ ಮೆರೆನ್ ಎದ್ಕೊಂಡೆರ್. ಕಾಲೇಜಿಡ್ ವೀಡಿಯೊ ಮಲ್ತಿನ ಜಾಗೆಗ್ ಖುಷ್ಬೂ ಪೋದು ಪರಿಶೀಲನೆ ಮಲ್ತೆರ್. ಆಡಳಿತ ಮಂಡಳಿದ ಒಟ್ಟಿಗೆ ಒಂಜಿ ಗಂಟೆ ಪಾತೆರ್ದ್ ಮಾಹಿತಿ ದೆತೊಂಡೆರ್.
ತೆಲಂಗಾಣ: ಪುಗರ್ತೆದ ಮುತ್ಯಾಲ ಧಾರಾ ಜಲಪಾತಡ್ ತಿಕೊಂದಿನ 80 ಜನ ಪ್ರವಾಸಿಗೆರೆನ್ ರಕ್ಷಣಾ ತಂಡ ಬಚಾವ್ ಮಲ್ದ್ಂಡ್.
ಬಚಾವ್ ಮಲ್ತಿನ ಘಟನೆ ಇನಿ ಬೊಲ್ಪುಗು ನಡತ್ಂಡ್. ನೆಟ್ಟ್ ಒರಿಯನ ಆರೋಗ್ಯಡ್ ತೊಂದರೆ ಆದ್ ಆಸ್ಪತ್ರೆಗ್ ದಾಖಲ್ ಮಲ್ತ್ ದ್ ಚಿಕಿತ್ಸೆ ಕೊರೊಂದು ಉಲ್ಲೆರ್. ಅವ್ವತ್ತಾಂದೆ ತೆಲಂಗಾಣದ ಕೆಲವು ಜಿಲ್ಲೆಡ್ ಭಾರೀ ಬರ್ಸ ಬರ್ಪಿನೆರ್ದಾವೆರ ಇನಿ ರೆಡ್ ಅಲರ್ಟ್ ಘೋಷಣೆ ಆತ್ಂಡ್.
ಪುತ್ತೂರು ಅಕ್ಷಯ್ ಎಜುಕೇಷನ್ ಬೊಕ್ಕ ಚಾರಿಟೇಬಲ್ ಟ್ರಸ್ಟ್ (ರಿ) ನಿರೆಲ್ಡ್ ಸಂಪ್ಯ ಅಕ್ಷಯ ಕಾಲೇಜ್ ಡ್ ರಾಷ್ಟೀಯ ಸೇವಾ ಯೋಜನೆ ಕಾರ್ಯಕ್ರಮದ ನಿಲೆಟ್ ಕಾರ್ಗಿಲ್ ವಿಜಯ ದಿನನ್ ಜು.26 ದಾನಿ ಆಚರಣೆ ಮಲ್ತೆರ್.
ಕಾರ್ಯಕ್ರಮದ ಉದಿಪನ ಮಲ್ತ್ ಭಾರತ ಮಾತೆಗ್ ಪುಷ್ಪಾರ್ಚನೆ ಮಲ್ತೆರ್ . ಈ ಪೊರ್ತುಡು ಪ್ರಿನಿಪಾಲ್ ಸಂಪತ್ ಕೆ ಪಕ್ಕಳ, ಆಡಳಿತಾಧಿಕಾರಿ ಅರ್ಪಿತ್ ಟಿ. ಎ, ಐಕ್ಯೂಎಸಿ ಸಂಯೋಜಕೆರ್, ಬೋಧಕ ಬೋಧಕೇತರ ಸಿಬ್ಬಂದಿಲು ಪಾಲ್ ಪಡೆಯೆರ್.
ತಿರುಪತಿ: ತುಳುನಾಡ್ ದ ಕಟ್ಟ್ ಪ್ರಕಾರ ಪನವು ಕಟ್ಟುನ ತಿರುಪತಿದ ತಿಮ್ಮಪ್ಪ ದೇವರೆಗ್ ಇಡೆ ಮುಟ್ಟ 11 ಟನ್ ಬಂಗಾರ್ ಬೊಕ್ಕ ಬೊಲ್ಲಿದ ಪದ್ದೆಯಿ ಅಂಚೆನೆ 17,000 ಕೋಟಿ ರೂ. ಪನವು ಭಕ್ತೆರೆರ್ದ್ ಕಾಣಿಕೆಯಾದ್ ಬೈದ್ಂಡ್.
ಈ ಪದ್ದೆಯಿ ಬೊಕ್ಕ ಪನವುನು ಬೇತೆ ಬೇತೆ ಬ್ಯಾಂಕ್ಡ್ ಠೇವಣಿ ದೀತ ಪಂದ್ ತಿರುಪತಿ ತಿರುಮಲ ದೇವಲ್ಯದ ಆಡಳಿತ ಮಂಡಳಿ (ಟಿಟಿಡಿ) ತೆರಿಪಾದ್ಂಡ್.
ಈ ಬಗೆಟ್ಟ್ ಟಿಟಿಡಿ ಕಾರ್ಯನಿರ್ವಾಹಕ ಅಧಿಕಾರಿ ಎ.ವಿ.ಧರ್ಮ ರೆಡ್ಡಿ ಪೊಲಬು ಕೊರ್ತೆರ್.
ತಿರುಪತಿದ ಪ್ರಧಾನ ದೇವಲ್ಯಡ್ 1.2 ಟನ್ ಬಂಗಾರ್ ದ ಪದ್ದೆಯಿ ಬೊಕ್ಕ 10 ಟನ್ ಬೊಳ್ಳಿದ ಪದ್ದೆಯಿ ಉಂಡು. ಎಚ್ಚಾಯಿನ 11 ಟನ್ ಬಂಗಾರ್ ನ್ ಬ್ಯಾಂಕ್ಡ್ ಠೇವಣಿ ಮಲ್ದ್ಂಡ್.
2009-10 ಟ್ಟ್ 50,000 ಇತ್ತಿನ ಭಕ್ತೆರೆನ ಸಂಖ್ಯೆ ಇತ್ತೆ 1 ಲಕ್ಷಗ್ ಎಚ್ಚಾತ್ಂಡ್. ಟಿಟಿಡಿಗ್ ಆದಾಯಲ ಅವ್ವೇ ರೀತಿ ಎಚ್ಚಾವೊಂದು ಉಂಡು.
ಹುಂಡಿ ಕಾಣಿಕೆ, ಭಕ್ತೆರ್ ಕೊರ್ಪಿನ ಮುಡಿ ಬೊಕ್ಕ ಬೇತೆ ಬೇತೆ ಸೇವೆ, ದರ್ಶನದ ಟಿಕೆಟ್ರ್ದ್ ಆದಾಯ ಎಚ್ಚಾತ್ಂಡ್. ಟಿಟಿಡಿದ ವರ್ಷದ ಬಜೆಟ್ ಪ್ರತಿ ವರ್ಷ 100 ಕೋಟಿ ರೂ.ದಾತ್ ಎಚ್ಚಾವೊಂದು ಪಂದ್ ತೆರಿಪಾದೆರ್.
ಒಡಿಪು- ತೀರ್ತಳ್ಳಿ ರಾಷ್ಟ್ರೀಯ ಹೆದ್ದಾರಿ 169ಎ ಆಗುಂಬೆ ಘಾಟಿದ 6,7 ಬೊಕ್ಕ 11 ನೇ ತಿರ್ಗೋಸುಡು ಭಾರಿ ಬರ್ಸದಾತ್ರ ಮಾರ್ಗ ಅದ್ ರ್ ಬುಡ್ತಿನ ನಿಲೆಟ್ಟ್ ಅಂಚೆನೆ ಅಲ್ಪಲ್ಪ ಮಾರ್ಗ ಜರಿದಿನತೋಜಿದ್ ಬೈದ್ಂಡ್.
ಅವ್ವತ್ತಾಂದೆಅಲ್ಪಲ್ಪ ತಡೆಪು ಗೋಡೆ ಬೂರ್ದಿನೆರ್ದಾವರ ಈ ಮಾರ್ಗಡ್ ಮಲ್ಲ ಮಲ್ಲ ಗಾಡಿದ ಸಂಚಾರ ಸೂಕ್ತ ಅತ್ತ್ ಪಂದ್ ತೆರಿದ್ ಬೈದ್ಂಡ್. ಅಂಚಾದ್ ಈ ಮಾರ್ಗ ನನಾತ್ ಈ ಮಾರ್ಗೊಡು ತಾತ್ಕಾಲಿಕವಾದ್ ಜುಲೈ 27 ರ್ದ್ ಸೆಪ್ಟೆಂಬರ್ 15 ಮುಟ್ಟ ಈ ಮಾರ್ಗಡ್ ಮಲ್ಲ ಗಾಡಿದ ಸಂಚಾರ ನಿಷೇಧ ಮಲ್ತ್ ದ್ ಆದೇಶ ಕೊರ್ತೆರ್.
ಅಂಚಾದ್ ಜು.27 ರ್ದ್ ತೀರ್ತಳ್ಳಿ-ಒಡಿಪುಗ್ ಬದಲೀ ಮಾರ್ಗವಾದ್ ತೀರ್ತಳ್ಳಿ-ಆಗುಂಬೆ-ಶೃಂಗೇರಿ-ಮಾಳಾ ಘಾಟ್-ಕಾರ್ಲ- ಒಡಿಪು, ತೀರ್ತಳ್ಳಿ, ಮಾಸ್ತಿಕಟ್ಟೆ, ಸಿದ್ದಾಪುರ-ಕುಂದಾಪುರ-ಒಡಿಪು ಮಾರ್ಗೊಡು ಮಲ್ಲ ಗಾಡಿಲು ಪೋವೊಡು ಪಂದ್ ಒಡಿಪು ಜಿಲ್ಲಾಡಳಿತ ಇಲಾಖೆ ತೆರಿಪಾದ್ಂಡ್.
ಐಲೇಸಾ ತನ್ನ ಪುಟ್ಟು ದಿನತ ನೆಂಪುಗು ವರ್ಷಲಾ ಕೊರ್ಪಿನ ”ವಯೋ ಸಮ್ಮಾನ” ಈ ಸರ್ತಿ ಬೊಂಬಾಯಿದ ತುಳುವೆ ”ಶಿಮುಂಜೆ ಪರಾರಿ” ಪಂಡ್ ದೇ ಪುದರಾಯಿನ ಮುಲ್ಕಿದ ಕಕ್ವಗ್ರಾಮದ ಅತಿಕಾರಿ ಬೆಟ್ಟು ಮುಲ್ಪದ ಸೀತಾರಾಮ ಮುದ್ದಣ್ಣ ಶೆಟ್ಟಿ ಮೆರೆಗ್ ಸಂದಾಯ್ತ ಆವೊಂದುಂಡು .
ಮುಂಬೈದ ಅಂಧೇರಿ ಪಡ್ಡಾಯಿ ಕಂಟ್ರಿ ಕ್ಲಬ್ ಮುಲ್ಪ ಜುಲೈ ತಿಂಗೊಲು ಅಕೇರಿದ 29 ತಾರೀಖ್ ದಾನಿ ನಡಪುನ ಈ ವಯೋಸಮ್ಮಾನ ಮಾನಾದಿಗೆ ಕೊರ್ಯೆರೆಗಾದ್ ಅರೆನ ಅಪಗದ ಸಾಹಿತ್ಯದ ದೋಸ್ತಿ ಸುಬ್ರಾಯ ಚೊಕ್ಕಾಡಿ ಊರುಡ್ಡು ಬೊಂಬಾಯಿಗ್ ಬರೊಂದುಲ್ಲೆರ್ . ಮುಖ್ಯ ಬಿನ್ನೆರಾದ್ ಅಬುಧಾಭಿ ಸರ್ವೋತ್ತಮ ಶೆಟ್ರು , ಮೂಡಂಬೈಲ್ ರವಿ ಶೆಟ್ಟಿ ಕತಾರ್ , ಅಕ್ಷತರಾಜ್ ಪೆರ್ಲ ಪಾಲ್ ಪಡೆವೆರ್.
ಮಾನಾದಿಗೆದ ಬಿನ್ನೆರಾದ್ ಮುಂಬೈ ಬಂಟ್ ಸಂಘದ ಮಾಜಿ ಅಧ್ಯಕ್ಷೆ ಶ್ಯಾಮ್ ಎನ್ ಶೆಟ್ಟಿ ,ದಿವಾಕರ್ ಎನ್ ಶೆಟ್ಟಿ ಮುದ್ರಾಡಿ ,ಡಿ ಕೆ ಶೆಟ್ಟಿ ಪೊವೈ ಪುಗರ್ತೆದ ವಕೀಲೆರಾಯಿನ ಪ್ರಕಾಶ್ ಎಲ್ ಶೆಟ್ಟಿ ಬೊಕ್ಕ ಗುಣಕರ ಶೆಟ್ಟಿ , ಕರ್ನಾಟಕ ಮಲ್ಲ ದಿನ ಪತ್ರಿಕೆದ ಸಂಪಾದಕೆರಾಯಿನ ಚಂದ್ರಶೇಖರ ಪಾಲೆತ್ತಾಡಿ , ಮುಂಬೈ ವಿಶ್ವ ವಿದ್ಯಾಲಯದ ಕನ್ನಡ ವಿಭಾಗ ದ ಡಾ, ಜಿ ಎನ್ ಉಪಾಧ್ಯ , ಮಾತೃಭೂಮಿ ಕೋ ಆಪರೇಟಿವ್ ಸೊಸೈಟಿ ಕಾರ್ಯಂತೆರ್ ಪ್ರವೀಣ್ ಶೆಟ್ಟಿ,, ಶ್ರೀನಿವಾಸ ಸಾಫಲ್ಯ ,ಬೊಕ್ಕ ಶಿಮುಂಜೆ ಪರಾರಿ ಮೆರೆನ ಅಭಿಮಾನಿಲು ಪಾಲ್ ಪಡೆದ್ ಅರೆನೊಟ್ಟುಗು ಖುಷಿ ಪಟ್ಟೊನೆರೆ ಒಟ್ಟಾವೊಂದುಲ್ಲೆರ್ .
ಶಿಮುಂಜೆ ಪರಾರಿ ಮರಾಠಿ ಹಿಂದಿ ಮೂಲದ ನಾಟಕೊಲೆನ್ , ಪದೊಕುಲೆನ್ ತುಳು ಭಾಷೆಗ್ ಅನುವಾದ ಮಲ್ತುದು ಪುದರಾಯಿನಾರ್ . ಯಾನ್ ಪಿನಯೆ , ಔಲೊರ್ತಿ ಮೂಲೊರ್ತಿ , ಜೋಕುಲು ಬಾಲೆಲು ಪನ್ಪಿನ ನಾಟಕೊಲೆನ್ ಮರಾಠಿ ಭಾಷೆಡ್ದ್ ತುಳುಕು ಕನತ್ ಅಭಿನಯ ಮಲ್ತು ಪುಗಾರ್ತೆ ಪಡೆಯಿನಾರ್ . ಜೋಕುಲು ಬಾಲೆಲು ನಾಟಕೊಗು ತುಳು ಅಕಾಡಮಿದ ಪುಸ್ತಕ ಮಾನಾದಿಗೆ ದೆತೊಂದಿನ ಶಿಮುಂಜೆ ಯಾನ್ ಪನ್ಪಿನಿ ಇಂಚ ಪನ್ಪಿನ ತುಳು ಚುಟುಕು ಬರೆದ್ ಮುಪ್ಪಸಾವಿರ ಪ್ರತಿ ಪ್ರತಿ ತುಳುವನ ಇಲ್ಲ ಬಾಕಿಲ್ಗ್ ಮುಟ್ಟಾಯಿನಾರ್ . ನಿತ್ಯಾನಂದ ಸ್ವಾಮಿಲೆನ ಪುದರ್ಡ್ ನಿತ್ಯ ಅನಂದ ವಚನ ಮುಕ್ತಕ ಬರೆದ್ ಅವೆನ್ ಗುರುಕುಲೆಗ್ ಸಂದಾಯ್ತ ಮಲ್ತಿನಾರ್ . ಮೆರೆನ ಸಾಹಿತ್ಯ ಬೇಲೆನ್ ಗುರ್ತ ಮಲ್ತಿನ ಮುಂಬೈ ವಿಶ್ವ ವಿದ್ಯಾಲಯದ ಡಾ. ಪೂರ್ಣಿಮಾ ಶೆಟ್ಟಿ ಶಿಮುಂಜೆ ಬದ್ ಕ್ ಬರವುದ ಅಧ್ಯಯನ ಬೊಕ್ಕ ಡಾ. ಜಿ ಎನ್ ಉಪಾಧ್ಯ ಮೇರ್ ಪ್ರಧಾನ ಸಂಪಾದಕೆರಾದ್ ಸಂಪೊಲಿಗೆ ಮಲ್ದಿನ ಸಂಪ್ರೀತಿ ಪನ್ಪಿನ ಗ್ರಂಥ ಗೌರವ ಅರೆಗ್ ಅರ್ಪಣೆ ಮಲ್ದೆರ್ .
ಊರುಡ್ಡು ಬೊಂಬಾಯಿಗ್ ಬತ್ತಿನ ಜೋಕುಲೆಗ್ ಫ್ರೀ ನೈಟ್ ಸ್ಕೂಲ್ ಮುಲ್ಪ ಪದಿಮೂಜಿ ವರ್ಷ ದರ್ಮಾರ್ಥ ಪಾಠ ಕಲ್ಪಾಯಿನ ಮಾಸ್ಟ್ರ್ ಶಿಮುಂಜೆ ಪರಾರಿ ಮೆರೆಗ್ ಇತ್ತೆ 84 ವರ್ಷ ಪ್ರಾಯ . ಬುಡೆದಿ ಚಂದ್ರಿಕಾ ಬೊಕ್ಕ ಅರ್ಚನಾ ಅಪರ್ಣ ಪನ್ಪಿನ ರಡ್ಡ್ ಪೊಣ್ಣು ಜೋಕುಲೆನೊಟ್ಟುಗು ಬೊಂಬಾಯಿದ ಅಂಧೇರಿಡ್ ಉಪ್ಪುನ ಪರಾರಿ ಮೆರೆನ ಇಲ್ಲ ಬಾಕಿಲ್ಗ್ ಪೋದು ಅರೆನ ಪ್ರಾಯದಾತ್ 84000 ರೂ. ಗುರುದಕ್ಷಿಣೆ ಕೊರ್ದು , ಅರೆನ ಸಾಹಿತ್ಯ ಕತೆ ಕವನ , ನಾಟಕ ವಾಚನ ಮಲ್ತ್ ಅರೆನ ಇಷ್ಟದ ಪದ ಪಂಡ್ ದ್ , ಇಷ್ಟದ ತೆನಸ್ ಅರೆಗ್ ತಿನ್ಪಾದ್ ಅರೆನೊಟ್ಟುಗು ಒಂತೆ ಪೊರ್ತು ನಲಿತ್ ತೆಲಿತ್ ಈ ವಯೋಸಮ್ಮಾನ ಕೊರ್ದು ಬರ್ರೆಗ್ ಐಲೇಸಾದ ಕೂಟದಕುಲು ಅಟ್ಟನೆ ಮಲ್ತ್ ದ್ ಈ ಶನಿವಾರ ಬೊಂಬಾಯಿಗ್ ಬರೊಂದುಪ್ಪುನ ಪೊರ್ತುಗು ಅರೆನ ಅಭಿಮಾನಿ ಬಂದುಲು ಒಟ್ಟುಗು ಸೇರೊನೊಡು ಪಂಡ್ ದ್ ಐಲೇಸಾದ ಸಾರಥಿ ರಮೇಶ್ಚಂದ್ರ ಬಿನ್ನಾಪು ಮಲ್ದೆರ್.
(ವರದಿ: ಶಾಂತಾರಾಮ್ ಶೆಟ್ಟಿ ಬೆಂಗ್ಲೂರು)
ಮಣಿಪಾಲ: ಸಮುದಾಯ ಬಾನುಲಿ ರೇಡಿಯೊ ಮಣಿಪಾಲ್ ಬೊಕ್ಕ ವಾಯ್ಸ್ ಆಫ್ ಆರಾಧನಾ ಸಂಸ್ಥೆದ ಮುತಾಲಿಕೆಡ್ ‘ಚಿಣ್ಣರ ದನಿ ಲೇಸ್ ಜುಲೈ26 ಕ್ಕ್ ಬುಧಾರ ಬಯ್ಯಗ್ 5.30 ಕ್ಕ್ ಪ್ರಸಾರ ಆಂಡ್.
ಜುಲೈ27 ಕ್ಕ್ ಗುರುವಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಇನಿ ಪ್ರಸಾರ ಆಪುನ ಲೇಸ್ ದ 19ನೇ ಸಂಚಿಕೆಡ್ ಬಾಲ ಪ್ರತಿಭೆ ಬನ್ನಂಜೆ ಮಹಾಲಕ್ಷ್ಮಿ ಪಾಲ್ ಪಡೆಯೆರ್.
