‘ಸತ್ಯಮಾಲೋಕಂದ ಸಿರಿ’ ತುಳು ಬೂಕು ಬುಡುಗಡೆ
ನಂದಳಿಕೆ: ಕೃತಿ ಬರೆಯೆರೆ ಇಚ್ಚಾಶಕ್ತಿ, ಶ್ರದ್ಧೆ ಪ್ರಮುಖವಾದ್ ಬೋಡು ಪಂದ್ ತುಳುಕೂಟ ಒಡಿಪುದ ಅಧ್ಯಕ್ಷೆರ್ ಇಂದ್ರಾಳಿ ಜಯಕರ ಶೆಟ್ಟಿ ಪಂಡೆರ್.
ಮೇರ್ ನಂದಳಿಕೆ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ಸಭಾಂಗಣಡ್ ಚಾವಡಿ ಅರಮನೆತ್ತ ಸರಳಾ ಎಸ್. ಎಸ್. ಹೆಗ್ಡೆ ಬರೆಯಿನ “ಸತ್ಯಮಾಲೋಕಂದ ಸಿರಿ” ಬೂಕು ಬುಡುಗಡೆ ಮಲ್ತ್ ದ್ ಪಾತೆರಿಯೆರ್.
ತುಳುನಾಡ ದೈವೊಲೆನ ನಾಡಾತ್ಂಡ್. ಮುಲ್ಪ ಸಿರಿಲೆನ ಕಾರ್ನಿಕದ ಮುಖೇನ ಸಂಸ್ಕೃತಿದ ಶ್ರೀಮಂತಿಕೆನ್ ತೂಪಾವೊಂಡು. ಅವ್ವತ್ತಂದೆ ಸಿರಿಕ್ಲೆನ ಜನಪದನ್ ಕೃತಿಯಾದ್ ಒರಿಪಾವುನ ಬೇಲೆ ಮಹತ್ವದ ಆತ್ಂಡ್ ಪಂದ್ ಪಂಡೆರ್.
ವಿಜಯಾ ಬ್ಯಾಂಕ್ ವಿಶ್ರಾಂತ ಪ್ರಬಂಧಕೆರ್ ಭುವನ ಪ್ರಸಾದ್ ಹೆಗ್ಡೆ ಪಾತೆರ್ದ್, ನಂದಳಿಕೆ ಸಿರಿ ಜಾತ್ರೆಗ್ ಪುಗರ್ತೆ ಆಯಿನವು. ಮುಲ್ಪದ ಸಿರಿಕ್ಲೆನ ಕಥೆನ್ ಬೂಕು ರೂಪಡ್ ಬರೆಯಿನವು ಎಡ್ಡೆ ಆತ್ಂಡ್. ನನದ ಜನಾಂಗಗ್ ಜಾಗೆದ ಮಹತ್ವ ಬೊಕ್ಕ ಇತಿಹಾಸನ್ ಗುರುತಿಸಾಯೆರೆ ಸಾಧ್ಯ ಆಪುಂಡು. ಕಬಿ ಮುದ್ದಣ ಸೇರಿನಂಚೆನೆ ಸುಮಾರ್ ಸಾಹಿತಿಲೆನ ಮೂಲ ನಂದಳಿಕೆನೇ ಆತ್ಂಡ್ ಪಂದ್ ಪಂಡೆರ್.
ಜನಪದ ವಿದ್ವಾಂಸೆರ್ ಭುವನೇಂದ್ರ ಕಾಲೇಜ್ ದ ಕನ್ನಡ ವಿಭಾಗದ ಮುಖ್ಯಸ್ಥೆರ್ ಡಾ. ಅರುಣ ಕುಮಾರ್ ಎಸ್. ಆರ್. ಪಾತೆರ್ದ್, ಸತ್ಯಮಾಲೋಕಂದ ಸಿರಿ ಈ ಬೂಕುಡು ಶ್ರೀಮಂತ ತುಳುನಾಡ್ ದ ಸಂಸ್ಕೃತಿ ಉಂಡು. ಕುಂದಾಪುರರ್ದ್ ಉಜಿರೆ ಮುಟ್ಟದ ಶ್ರೀಮಂತ ತುಳುನಾಡ್ ದ ಸಿರಿಲೆನ ಆರಾಧನೆದ ಕಥೆಲು ಯುವಜನಾಂಗಗ್ ತೆರಿಪಾದ್ ಕೊರ್ಪಿನ ಪ್ರಯತ್ನ ಮಲ್ದ್ಂಡ್. ಬೂಕು ಬುಡುಗಡೆ ಮಲ್ಪುನ ಮುಖೇನ ತುಳುನಾಡ್ ದ ಇತಿಹಾಸನ್ ಕುಡೊರ ತೆರಿಪಾವೊನ ಪ್ರಯತ್ನ ಮಲ್ದ್ಂಡ್ ಪಂದ್ ಪಂಡೆರ್.
ಲೇಖಕಿ ಸರಳಾ ಎಸ್. ಹೆಗ್ಡೆ, ಪಾತೆರ್ದ್, ಪಾರ್ದನಲು ಒರಿಯರ್ದ್ ನನೊರಿಯಗ್ ಭಿನ್ನ ಆದಿಪ್ಪುಂಡು. ಆಯಿನ್ ಸಂಗ್ರಹ ಮಲ್ತ್ ದ್ ಬೂಕು ಬರೆತೆ ಪಂದ್ ಪಂಡೆರ್.
ಕವತ್ತಾರ್ ವಿಷ್ಣುರಾಜ ಭಟ್, ದೇವಲ್ಯದ ತಂತ್ರಿ ಹರೀಶ್ ತಂತ್ರಿ ಪಾತೆರ್ದ್ ಎಡ್ಡೆಪ್ಪು ಬಯಕಿಯೆರ್.
ಸಭೆಟ್ಟ್ ನಂದಳಿಕೆ ಮಹಾಲಿಂಗೇಶ್ವರ ದೇವಲ್ಯದ ಅನುವಂಶಿಕ ಮೊಕ್ತೇಸರೆರ್ ಚಾವಡಿ ಅರಮನೆತ್ತ ಸುಂದರರಾಮ ಹೆಗ್ಡೆ ಇತ್ತೆರ್. ಜಯಂತಿ ಶೆಟ್ಟಿ ಪ್ರಾರ್ತನೆ ಮಲ್ತೆರ್. ನಂದಳಿಕೆ ಸುಹಾಸ್ ಹೆಗ್ಡೆ ಎದ್ಕೊನಿಯೆರ್. ಸೀತಾರಾಂ ಭಟ್ ಈ ಲೇಸ್ ದ ಸುಧಾರಿಕೆ ಮಲ್ತೆರ್. ಸುಧಾಕರ್ ಸೊಲ್ಮೆ ಸಂದಾಯೆರ್.
