ಕಡಲ್ ರ್ದ್ ಪ್ರಯಾಣಿಕೆರೆನ್ ಲೆತ್ತೊಂದು ಬರೊಂದು ಇತ್ತಿನ ಓಡವೊಂಜಿ ಮುರ್ಕುದು 30 ಜನ ತೀರ್ ಪೋಯಿನ ಘಟನೆ ಫಿಲಿಪ್ಪೀನ್ಸ್ ಡ್ ನಡತ್ಂಡ್.
40 ಜನನ್ ರಕ್ಷಣಾ ಸಿಬ್ಬಂದಿಲು ಬಚಾವ್ ಮಲ್ದೆರ್. ಬಿರುಗಾಳಿಗ್ ಓಡಾ ಅಲ್ಗ್ದ್ಂಡ್. ಪ್ರಮಾಣಿಕೆರ್ ಒಂಜೇ ಕಡೆ ಇತ್ತಿರ್ನೆದಾವೆರ ಈ ಘಟನೆ ನಡತ್ಂಡ್ ಪಂದ್ ಅಧಿಕಾರಿಲು ತೆರಿಪಾದೆರ್.
ಗೋವಾದ 12 ವರ್ಷದ ಪರ್ವತಾರೋಹಿ ಗುಂಜನ್ ಪಂಕಜ್ ಪ್ರಭು ನಾರ್ವೇಕರ್ ಕಾಲಿ 62.5 ಗಂಟೆಡ್ 3 ಶಿಖರನ್ ಬರ್ತುನ ಮುಖೇನ ವಿಶ್ವ ದಾಖಲೆ ಮಲ್ದೆರ್.
8 ನೇ ಕ್ಲಾಸ್ ದ ಕಲ್ಪಾರ್ಥಿ ಆಯಿನ ಗುಂಜನ್, ಲಡಾಖ್ ಪ್ರದೇಶದ ಮರ್ಖಾ ಕಣಿವೆಡ್ ಇಪ್ಪುನ ಮೌಂಟ್ ಕಾಂಗ್ ಯಾಟ್ಸೆ-|| (6250 ಮೀ), ಮೌಂಟ್ ರೆಪೋನಿ ಮಲ್ಲಾರಿ-| (6097 ಮೀ), ಬೊಕ್ಕ ಮೌಂಟ್ ರೆಪೋನಿ ಮಲ್ಲಾರಿ-|| (6113 ಮೀ) ನ್ ಬರ್ತ್ ದೆರ್. ಇತ್ತೆ ಎನ್ನ ಕನ ಮೌಂಟ್ ಎವರೆಸ್ಟ್ ನ್ ಬರ್ತುನವು ಪಂದ್ ಗುಂಜನ್ ಪಂತೆರ್.
ನಾಟೆಕಲ್ ರ್ದ್ ಮಂಜನಾಡಿಗ್ ಫ್ಲೈವುಡ್ ಸಾಗಾವೊಂದಿತ್ತಿನ ಲಾರಿ ಪಲ್ಟಿಯಾದ್ ಕಣಿಕ್ಕ್ ಬೂರ್ದಿನ ಘಟನೆ ಗುರುವಾರ ನಡದ್ಂಡ್.
ಈ ಘಟನೆಡ್ ಏರೆಗ್ಲ ದಾಲ ಮಲ್ಲ ಪೆಟ್ಟ್ ಆತಿಜಿ. ಲಾರಿಗ್ ಮಸ್ತ್ ಡ್ಯಾಮೇಜ್ ಆತ್ಂಡ್ ಪಂದ್ ತೆರಿದ್ ಬೈದ್ಂಡ್.
ಪೊಸತಾದ್ ಸುರು ಆಯಿನ ಅಸೋಸಿಯೇಶನ್ ಆಫ್ ಸಿವಿಲ್ ಇಂಜಿನಿಯರ್ಸ್ ಮುಲ್ಕಿ (ACEM) ನೆತ್ತ ಉದಿಪನ ಲೇಸ್ ಪದಾಧಿಕಾರಿಲೆನ ಪದಗ್ರಹಣ ಬೊಕ್ಕ ಇಂಜಿನಿಯರ್ಸ್ ಡೇ ಸೆಪ್ಟೆಂಬರ್ 16 ಬಯ್ಯಗ್ 5 ಗಂಟೆಗ್ ಮುಲ್ಕಿ ಸುಂದರ್ ರಾಮ್ ಶೆಟ್ಟಿ ಕನ್ವೆನ್ಷನ್ ಸೆಂಟರ್ ಡ್ ನಡಪರೆ ಉಂಡು.
ಈ ಲೇಸ್ ಡ್ ಮಲ್ಲ ಬಿನ್ನೆರ್ ಬೊಕ್ಕ ಪಿಕ್ಚರ್ ದ ನಟೆರ್, ನಟಿಯೆರ್ ಪಾಲ್ ಪಡೆದ್, ಸಾಂಸ್ಕೃತಿಕ ಬೊಕ್ಕ ಮನೋರಂಜನೆ ಲೇಸ್ ಕೊರ್ಪುನೆತೊಟ್ಟಿಗೆ ಉದಿಪನ ಆಪುಂಡು. ಜುಲೈ 26 ಕ್ಕ್ (ಕೋಡೆ) ನಡತಿನ core committee ಸಭೆಟ್ಟ್ ತೀರ್ಮಾನ ಮಲ್ದ್ಂಡ್ ಪಂದ್ ಸಂಘದ ಅಧ್ಯಕ್ಷೆರಾಯಿನ ಮುಲ್ಕಿ ಜೀವನ್ ಕೆ. ಶೆಟ್ಟಿ ಬೊಕ್ಕ ಕಾರ್ಯದರ್ಶಿ ಸುಜಿತ್ ಸಾಲಿಯಾನ್ ಪ್ರತಿಕಾ ಪ್ರಕಟಣೆಡ್ ತೆರಿಪಾದೆರ್.
ಒಡಿಪು: ಕಾಪು ತಾಲೂಕ್ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಮುತಾಲಿಕೆಡ್ ಪ್ರತಿಕಾ ದಿನಾಚರಣೆ, ಪತ್ರಕರ್ತೆರ್ ದಿ.ಜಯಂತ್ ಪಡ್ಡೆದ್ರ ಮೆರೆನ ಸಂಸ್ಮರಣೆ, ದತ್ತಿನಿಧಿ ಪಟ್ಟುನ ಲೇಸ್ ಜು.28 (ಎಲ್ಲೆ) ಸುಕ್ರಾರ ಬೊಲ್ಪುಗು ಪಲಿಮಾರ್ ಸರಕಾರಿ ಪದವಿ ಪೂರ್ವ ಕಾಲೇಜ್ ಡ್ ನಡಪರೆ ಉಂಡು.
ಈ ಲೇಸ್ ದ ಗುರ್ಕಾರ್ಮೆನ್ ಕಾಪು ತಾಲೂಕ್ ಪತ್ರಕರ್ತೆರೆ ಸಂಘದ ಗುರ್ಕಾರ್ಲು ಹರೀಶ್ ಹೆಜ್ಮಾಡಿ ಒಯಿಸೊನ್ವೆರ್. ಜಾನಪದ ಚಿಂತಕೆರ್ ಡಾ.ವೈಎನ್ ಶೆಟ್ಟಿ ದತ್ತಿನಿಧಿನ್ ಪಟ್ಟುವೆರ್ ಬೊಕ್ಕ ನೆತ್ತ ಬಗೆಟ್ಟ್ ಉಪನ್ಯಾಸ ಕೊರಿಯೆರೆ ಉಲ್ಲೆರ್. ಹಿರಿಯ ಪತ್ರಕರ್ತೆರ್ ಪುಂಡಲೀಕ ಮರಾಠೆ ಮೇರ್ ಉಪನ್ಯಾಸ ಕೊರಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಒಡಪು ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರೆನ ಸಂಘದ ಗುರ್ಕಾರ್ಲು ರಾಜೇಶ್ ಶೆಟ್ಟಿ ಅಲೆವೂರು, ಪಾಲಿಮಾರ್ ಸ.ಪ.ಪೂ.ಕಾಲೇಜ್ ಪ್ರಾಂಶುಪಾಲೆರ್ ಗ್ರೆಟ್ಟಾ ಮೊರಾಸ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಕಾರ್ಯದರ್ಶಿ ಸಂತೋಷ್ ಕಾಪು, ಕೋಶಾಧಿಕಾರಿ ಹೇಮನಾಥ ಪಡ್ಡೆದ್ರ, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಪುತ್ತೂರು: ಕುರಿದಿನ ಸ್ಥಿತಿಟ್ಟ್ ಅಪರಿಚಿತ ಪುನ ಪತ್ತೆಯಾಯಿನ ಘಟನೆ ಪಾಂಗ್ಲಾಯಿಡ್ ನಡತ್ಂಡ್.
ಪಾಂಗ್ಲಾಯಿ ಬರಿತ ಪುದೆಲ್ಡ್ ಕುರಿದಿನ ಸ್ಥಿತಿಟ್ಟ್ ಪುನ ಒಂಜಿ ಪತ್ತೆಯಾದ್ ಕೈತಲ್ದಕುಲು ಪೊಲೀಸೆರೆಗ್ ಮಾಹಿತಿ ಕೊರ್ತೆರ್.
ಆ ಜಾಗೆಗ್ ಬತ್ತಿನ ಪೋಲಿಸೆರ್ ಪರಿಶೀಲನೆ ಮಲ್ತ್ ದ್ ಸ್ಥಳೀಯೆರ್ ಬೊಕ್ಕ ಆದರ್ಶ ಆಸ್ಪತ್ರೆದ ಅಂಬುಲೆನ್ಸ್ ಚಾಲಕೆ ದಯಾನಂದೆರ್ನ ಸಹಕಾರಡ್ ಪುನನ್ ಸರಕಾರಿ ಆಸ್ಪತ್ರೆಗ್ ಕೊನೊತೆರ್.
ಕಾಪು ತಾಲೂಕ್ ದ ಎಲ್ಲೂರ್ ಸೀಮೆದ ಇತಿಹಾಸ ಪುಗರ್ತೆದ ಕುತ್ಯಾರು ಕೇಂಜ ಗರಡಿದ ದಿವ್ಯ ಸಾನಿಧ್ಯಡ್ ಪ್ರತಿ ವರ್ಷ ನಡಪುನ ಆಟಿ ತಿಂಗೊಲ್ದ ಅನ್ನ ನೈವೇದ್ಯದ ಅಗೇಲ್ ಸೇವೆ ಬುಧಾರ ಮುಗಿತಲ ಆಂಡ್.
ತುಳುನಾಡ್ ದ ಗರಡಿಡ್ ಎಲ್ಲೂರ್ ಸೀಮೆದ ಕೇಂಜ, ಎಲ್ಲೂರ್, ಪಣಿಯೂರ್, ಕಳತ್ತೂರ್, ಅಡ್ವೆ, ಕೊಳಚೂರ್ ಗರಡಿಡ್ ಆಟಿ ತಿಂಗೊಲ್ಡ್ ಅಗೇಲ್ ಸೇವೆ ನಡಪುಂಡು. ಸುರುತ್ತ ಅಗೇಲ್ ಸೇವೆ ಕೇಂಜ ಗರಡಿಡ್ ನಡತ್ಂಡ್. ಆಟಿ ತಿಂಗೊಲ್ ಡ್ ಶ್ರೀ ಬ್ರಹ್ಮ ಬೈದೆರ್ಲೆನ ಕೇಂಜದ ಪವಿತ್ರ ಸತ್ಯದ ಮಣ್ಣ್ ಡ್ ಕಲೆ ಕಾರ್ನಿಕ ಇಪ್ಪುನ ಈ ದೇವೆರೆನ ಪರ್ಬ ನಡತೊಂದು ಇಪ್ಪುನವು ಇಸೇಸ ಆತ್ಂಡ್.
ಈ ಲೇಸ್ ದ ಪೊರ್ತುಡು ಗರಡಿ ಮನೆ ಪ್ರಮುಖೆರ್, ಊರುದ ಪ್ರಮುಖೆರ್ ಬೊಕ್ಕ ಭಕ್ತಾದಿಲು ಇತ್ತೆರ್.
ನಿಡ್ಲೆ : ಬೂಡುಜಾಲು ಊರುದ ಪತ್ತ್ ಸಮಸ್ತೆರ್ ಬೊಕ್ಕ ಯುವ ಸಮೂಹ ಬೂಡುಜಾಲು ನೆತ್ತ ಮುತಾಲಿಕೆಡ್ ನಿಡ್ಲೆ ಗ್ರಾಮದ ಮೋಹನ್ ಪೂಜಾರಿ ಸೂರ್ಲ ಮನೆ ಮೊಕ್ಲೆನ ಬೂಡುಜಾಲು ಕಂಡೊಡು 2ನೇ ವರ್ಷದ ಕೆಸರ್ ಡೊಂಜಿ ದಿನ ಆಗಸ್ಟ್ 6 ಐತಾರ ನಡಪರೆ ಉಂಡು.
ಬೊಲ್ಪುಗು ಮಠಂತ್ತಿಮಾರ್ ಉಳ್ತಾಲ್ತಿ ದ್ವಾರದ ಕೈತಲ್ ರ್ದ್ ಜೋಡಿ ಎರ್ಲುಲೆನ ಬೊಕ್ಕ ತಾಸೆ ವಾದ್ಯದೊಟ್ಟಿಗೆ ಈ ಲೇಸ್ ನಡಪುನ ಕಂಡೊಗು ಮೆರವಣಿಗೆಡ್ ಬರ್ಪುಂಡು.
ಬೊಕ್ಕ ಅಂಗನವಾಡಿ ಜೋಕುಲೆಗ್ ಬಲಿಪುನ, 1-3 ನೇ ಕ್ಲಾಸ್ ದ ಜೋಕುಲೆಗ್ ಬಲಿಪುನ, ನಿಂಬೆ ಚಮಚ, ಪಾಲೆ ಒಯಿಪುನ, 4-6 ನೇ ಕ್ಲಾಸ್ ದ ಜೋಕುಲೆಗ್ ಬಲಿಪುನ, ಪಾಲೆ ಒಯಿಪುನ, ಲಿಂಬೆ ಚಮಚ, ರಿಲೆ, 1-7 ನೇ ಕ್ಲಾಸ್ ದ ಜೋಕುಲೆಗ್ ಕಾಸ್ ದ ಗಂಟ್ ನಾಡುನ, 7-10 ನೇ ಕ್ಲಾಸ್ ದ ಜೋಕುಲೆಗ್ ಬಲಿಪುನ, ಪಾಲೆ ಒಯಿಪುನ, ಬಲ್ಲ್ ಒಯಿಪೆರೆ, ಗೋಣಿಚೀಲಡ್ ಬಲಿಪುನ, ಲಿಂಬೆ ಚಮಚ, ರಿಲೆ ಗೊಬ್ಬುಲು ನಡಪರೆ ಉಂಡು.
ಅಂಚೆನೆ ಪೊಂಜೋವ್ ಲೆಗ್ ಬಲಿಪೆರೆ, ಲಿಂಬೆ ಚಮಚ, ಗೋಣಿಚೀಲ ಬಲಿಪೆರೆ, ಬಲ್ಲ್ ಒಯಿಪೆರೆ (7 ಜನ ಮಾತ್ರ), ರಿಲೆ, ಸಂಗೀತ ಕುರ್ಚಿ, ಅಂಜೋವ್ ನಕ್ಲೆಗ್ ಬಲಿಪೆರೆ, ಬಲ್ಲ್ ಒಯಿಪೆರೆ (7 ಜನ ಮಾತ್ರ), ರಿಲೆ, ಬೊಕ್ಕ 50 ವರ್ಷ ಮಿತ್ತ್ ದ ಆಂಜೋವ್ ಲೆಗ್ 100 ಮೀ. ಬಲಿಪೆರೆ ಬೊಕ್ಕ ಗೋಣಿಚೀಲ ಬಲಿಪೆರೆ, ಕಂಡನಿ-ಬೊಡೆದಿಗ್ ಉಪ್ಪುದ ಗೋಣಿ ಬೊಕ್ಕ ಪಾಲೆ ಒಯಿಪುನ ಗೊಬ್ಬು ನಡಪರೆ ಉಂಡು. ಮಧ್ಯಾಹ್ನ ವನಸ್ ದ ವ್ಯವಸ್ಥೆ ಮಲ್ದೆರ್.
ನೆತ್ತ ಉದಿಪನ ಲೇಸ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಧರ್ಮಾಧಿಕಾರಿ ವೀರೇಂದ್ರ ಹೆಗ್ಗಡೆ ಮೆರೆನ ಆಶೀರ್ವಾದದೊಟ್ಟಿಗೆ, ಬೊಲ್ತೇರ್ ಶಾಸಕೆರ್ ಹರೀಶ್ ಪೂಂಜ ಮೆರೆನ ಎಡ್ಡೆಪ್ಪುದೊಟ್ಟಿಗೆ ನಡಪರೆ ಉಂಡು.
ಬಯ್ಯಡ್ ಮುಗಿತಲದ ಲೇಸ್ ಗ್ ಮಲ್ಲ ಬಿನ್ನೆರಾದ್ ನಿಡ್ಲೆ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಪ್ರವೀಣ್ ಹೆಬ್ಬಾರ್, ಉಪಾಧ್ಯಕ್ಷೆರ್ ಶ್ಯಾಮಲ, ಸದಸ್ಯೆರ್ ಜಗದೀಶ್ ಶೆಟ್ಟಿ, ಹೇಮಾವತಿ ಹಾಲ್ತಿಮಾರ್, ಮೋಹನ್ ಪೂಜಾರಿ ಸೂರ್ಲ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಬೂಡುಜಾಲು ಊರುದ ಪತ್ತ್ ಸಮಸ್ತೆರ್ ಬೊಕ್ಕ ಯುವ ಸಮೂಹ ಬೂಡುಜಾಲು ಲೆಪ್ಪೋಲೆಡ್ ತೆರಿಪಾದೆರ್.
ಪುತ್ತೂರು : ಅನುಮತಿ ಇಜ್ಜಂದೆ ವಿಜಯೋತ್ಸವ ಬೊಕ್ಕ ಡಿ.ಜೆ ಸೌಂಡ್ ಬಳಕೆ ಮಲ್ತಿನೆಕ್ಕ್ ಪುತ್ತಿಲ ಪರಿವಾರ ಸಂಘಟನೆದ ವಿರುದ್ಧ ಪ್ರಕರಣ ದಾಖಲಾತ್ತ್ಂಡ್.
ಆರ್ಯಾಪು ಗ್ರಾ.ಪಂ ಉಪ ಚುನಾವಣೆಡ್ ಪುತ್ತಿಲ ಪರಿವಾರದ ಅಭ್ಯರ್ಥಿ ಗೆಂದಿನ ಲೆಕ್ಕಡ್ ತಾಲೂಕು ಆಡಳಿತ ಸೌಧರ್ದ್ ಮುಕ್ರಂಪಾಡಿ ಮುಟ ಅನುಮತಿ ಇಜ್ಜಂದೆ ವಿಜಯೋತ್ಸವ, ಡಿ.ಜೆ ಬಳಕೆ ಮಲ್ತಿನ ವಿಚಾರಗ್ ಪುತ್ತಿಲ ಪರಿವಾರದ ವಿರುದ್ದ ಪುತ್ತೂರು ನಗರ ಪೊಲೀಸ್ ಠಾಣೆಡ್ ಶಾಂತಿಭಂಗದ ಪ್ರಕರಣ ದಾಖಲಾತ್ಂಡ್.
ಕುಡ್ಲ: ಮಂಗಳೂರು ವಿಶ್ವವಿದ್ಯಾಲಯ, ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳುಪೀಠ, ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗ ವಿಶ್ವವಿದ್ಯಾನಿಲಯ ಸಂಧ್ಯಾ ಕಾಲೇಜ್, ಕುಡ್ಲ ಶ್ರೀ ಸಂಸ್ಥಾನ ಒಡಿಯೂರು ತುಳು ಅಧ್ಯಯನ ಕೇಂದ್ರ ಮೊಕ್ಲೆನ ಒಟ್ಟು ಸೇರಿಗೆಡ್ ಆಟಿದ ಕೂಟ ತುಳುವೆರೆ ತೆನಸ್ ಅಟಿಲ್ ಅರಗಣೆ ಪಂತೊ ಲೇಸ್ ಸುಕ್ರಾರ ಬಯ್ಯಗ್ 5.30 ಗಂಟೆಗ್ ಹಂಪನಕಟ್ಟೆದ ರವೀಂದ್ರ ಕಲಾಭವನಡ್ ನಡಪೆರೆ ಉಂಡು.
ಲೇಸ್ ದ ಗುರ್ಕಾರ್ಲಾದ್ ಕುಡ್ಲ ವಿ.ವಿ ಸಂಧ್ಯಾ ಕಾಲೇಜ್ದ ಪ್ರಾಂಶುಪಾಲೆರ್ ಡಾ.ಲಕ್ಷ್ಮೀದೇವಿ ಎಲ್ ಪಾಲ್ಪಡೆಯೆರೆ ಉಲ್ಲೆರ್. ಸಂಪನ್ಮೂಲ ವ್ಯಕ್ತಿಲಾದ್ ಹಿರಿಯ ಪತ್ರಕರ್ತೆರ್ ಬೊಕ್ಕ ಅಧ್ಯಕ್ಷೆರ್ ಕುಡ್ಲ ಪ್ರೆಸ್ ಕ್ಲಬ್ ಶ್ರೀ ಪಿ.ಬಿ ಹರೀಶ್ ರೈ, ಸಾಹಿತಿಲು ಶ್ರೀ ರೂಪಕಲಾ ಆಳ್ವ, ಬರವುಗಾರೆರ್, ತುಳು ಲಿಪಿ ಶಿಕ್ಷಕೆರ್ ಶ್ರೀ ಗೀತಾ ಲಕ್ಷ್ಮೀಶ್ ಪಾಲ್ಪಡೆಯೆರೆ ಉಲ್ಲೆರ್.
ಗೌರವ ಉಪಸ್ಥಿತಿಟ್ ಸಂಯೋಜೆಕೆರ್, ತುಳು ಸ್ನಾತಕೋತ್ತರ ಅಧ್ಯಯನ ವಿಭಾಗ ಡಾ. ಮಾಧವ ಎಂ.ಕೆ, ಸಂಯೋಜೆಕೆರ್, ಎಂ.ಕಾಂ ಎಂ.ಬಿ.ಎ ವಿಭಾಗ ಡಾ. ಜಗದೀಶ್ ಎಂ.ಬಿ., ಕಾರ್ಯಕ್ರಮದ ಸಂಯೋಜೆಕೆರಾದ್ ತುಳು ಎಂ.ಎ ವಿಭಾಗದ ಶ್ರೀ ಪ್ರಶಾಂತಿ ಶೆಟ್ಟಿ ಇರುವೈಲು, ಕೊಂಕಣಿ ಎಂ.ಎ ವಿಭಾಗದ ಡಾ.ಬಿ. ದೇವದಾಸ್ ಪೈ, ಎಂ.ಕಾಂ ವಿಭಾಗದ ಶ್ರೀ ವೆಂಕಟೇಶ್ ನಾಯಕ್, ಎಂ.ಬಿ.ಎ(ಐಬಿ) ವಿಭಾಗದ ಶ್ರೀ ರಾಜೇಶ್ ಕುಮಾರ್ ಪಾಲ್ ಪಡೆಯೆರುಲ್ಲೆರ್.
ಕುಡ್ಲ ವಿ.ವಿ ಸಂಧ್ಯಾ ಕಾಲೇಜ್ದ ಉಪನ್ಯಾಸಕೆರ್, ಸಿಬ್ಬಂದಿ ವರ್ಗಲು, ಬೊಕ್ಕ ವಿದ್ಯಾರ್ಥಿಲು ಕಾರ್ಯಕ್ರಮಗ್ ಮೋಕೆಡ್ ಎದ್ಕೊಂದೆರ್.
