ಮಣಿಪಾಲ: ರೇಡಿಯೋ ಮಣಿಪಾಲ್ 90.4 Mhz ಸಮುದಾಯ ಬಾನುಲಿ ಕೇಂದ್ರ ಕನ್ನಡ ಸಾಹಿತ್ಯ ಪರಿಷತ್ ಒಡಿಪು ಜಿಲ್ಲೆ, ಬೊಕ್ಕ ತಾಲೂಕ್ ಘಟಕದ ಒಟ್ಟುಸೇರಿಗೆಡ್ ಕಥೆ ಕೇಳೋಣ ಸರಣಿ ಲೇಸ್ ದ 65 ನೇ ಸಂಚಿಕೆ ಜುಲೈ 29 ಸನಿಯಾರ ಬಯ್ಯಗ್ 4.30 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಸಾಹಿತ್ಯಾಸಕ್ತೆರ್, ಕಲ್ಪಾರ್ಥಿ ವಸುಧಾ ಅಡಿಗ ನೀಲಾವರ ಪಾಲ್ ಪಡೆಯೆರೆ ಉಲ್ಲೆರ್. ಜುಲೈ 30 ಮಧ್ಯಾಹ್ನ 12.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಕುಡ್ಲ: ದ.ಕ ಜಿಲ್ಲೆಡ್ ಕೆಲವೊಂಜಿ ಕುಟುಂಬದ ಸದಸ್ಯೆರ್ ತೀರ್ಪೋದಿತ್ತ್ಂಡಲ ಅಕ್ಲೆನ ಪುದರ್ ಪಡಿತರ ಚೀಟಿರ್ದ್ ನನಲ ದೆತ್ತಿಜೆರ್. ಇಂಚ 13,133 ಫಲಾನುಭವಿನಕ್ಲೆನ ಪುದರ್ ಪಡಿತರ ಚೀಟಿಡ್ ಅಕ್ರಮವಾದ್ ಒರಿತೊಂದೆರ್ ಪಂದ್ ತೆರಿದ್ ಬೈದ್ಂಡ್.
ಅಂಚಿನ ಪಡಿತರ ಚೀಟಿ ಇತ್ತಿನಕುಲ್ ತೀರ್ಪೋಯಿನಕ್ಲೆನ ದಾಖಲಾತಿನ್ ತಾಲೂಕು ಕಚೇರಿಗ್ ಕೊರ್ದು ಪಡಿತರ ಚೀಟಿರ್ದ್ ಪುದರ್ ದೆಪ್ಪೊಡು. ಇಜಿಂಡ ಅಂಚಿನಕ್ಲೆನ ಕಾರ್ಡ್ ನಿಯಮದ ಪ್ರಕಾರ ಅನರ್ಹ ಮಲ್ಪ ಪಂದ್ ತೆರಿಪಾದೆರ್.
ದೆಲ್ಲಿ: ಬಿಜೆಪಿ ಪಕ್ಷ ರಾಷ್ಟ್ರೀಯ ನಾಯಕತ್ವಡ್ ಬದಲಾವಣೆ ಕನತ್ಂಡ್. ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸೇರಿನಂಚ ರಾಷ್ಟ್ರೀಯ ಮಟ್ಟಡ್ ಪ್ರಮುಖ ಹುದ್ದೆಲೆಡ್ ಬದಲಾವಣೆ ಮಲ್ತ್ಂಡ್.
3 ಉಪಾಧ್ಯಕ್ಷೆರ್, 9 ಪ್ರಧಾನ ಕಾರ್ಯದರ್ಶಿ, ಸಂಘಟನಾ ಕಾರ್ಯದರ್ಶಿ ಬಿ.ಎಲ್ ಸಂತೋಷ್ ಸೇರಿನಂಚ 13 ಕಾರ್ಯದರ್ಶಿನ ನೇಮಕ ಮಲ್ತ್ ದೆರ್. ಕೆಲವೆರೆನ್ ಈ ಹುದ್ದೆರ್ದ್ ದುಂಬರಿವುನಂಚ ಮಲ್ತ್ ದ್ ಮಸ್ತ್ ನಾಯೆಕೆರ್ನ ಕೈ ಬುಡ್ತೆರ್.
ಬಂಡಿ ಸಂಜಯ್, ಅನಿಲ್ ಆಂಟೋನಿ, ಬೊಕ್ಕ ಕಾಮಾಖ್ಯ ಪಿ ತಾಸಾ ಸೇರಿನಂಚ ಪೊಸ ಬೆರೆಗ್ ತಾನೊ ಕೊರ್ತೆರ್. ಸಿಟಿ ರವಿ, ದಿಲೀಪ್ ಘೋಷ್, ದಿಲೀಪ್ ಸೈಕಿಯಾ ಬೊಕ್ಕ ಸುನಿಲ್ ದಿಯೋಧರ್ ಮೊಕ್ಲೆನ್ ಕೈ ಬುಡ್ತೆರ್.
ಸಂತೆಕಟ್ಟೆ: ಕರ್ನಾಟಕ ವಿಧಾನ ಸಭಾಧ್ಯಕ್ಷೆರ್ ಯು.ಟಿ ಖಾದರ್ ಮೆರೆಗ್ ಬೆಳ್ತಂಗಡಿ ಕಾಂಗ್ರೆಸ್ ಪಕ್ಷದ ವತಿರ್ದ್ ಸ್ವಾಗತ ಮಲ್ತೆರ್. ಧರ್ಮಸ್ಥಳದ ಕಾರ್ಯಕ್ರಮಗ್ ಪೋಪಿನ ಪೊರ್ತುಡು ಯು.ಟಿ ಖಾದರ್ ಸಂತೆಕಟ್ಟೆದ ಅಯ್ಯಪ್ಪ ಮಂದಿರದ ಕೈತಲ್ ಕಾಂಗ್ರೆಸ್ದ ಮುಖಂಡೆರ್ ಸ್ವಾಗತ್ ಮಲ್ತ್ ಅಭಿನಂದನೆ ಮಲ್ತೆರ್.
ಈ ಪೊರ್ತುಡು ಬೆಳ್ತಂಗಡಿ ಬ್ಲಾಕ್ ಕಾಂಗ್ರೆಸ್ ದ ನಗರಾಧ್ಯಕ್ಷೆರ್ ಸತೀಶ್ ಕಾಶಿಪಟ್ಣ, ಗ್ರಾಮೀಣ ಅಧ್ಯಕ್ಷೆರ್ ನಾಗೇಶ್ ಕುಮಾರ್ ಗೌಡ, ಕಾಂಗ್ರೆಸ್ದ ನಾಯಕೆರಾಯಿನ ಧರಣೇಂದ್ರ ಕುಮಾರ್, ಯು.ಕೆ ಹನೀಫ್, ಹಸನಬ್ಬ ಚಾರ್ಮಾಡಿ, ಪ್ರವೀಣ್ ಫೆರ್ನಾಂಡಿಸ್, ರಮಾನಂದ ಸಾಲಿಯಾನ್, ಧನಂಜಯ್ ರಾವ್, ತ್ರಿವಿಕ್ರಮ್, ಸಿರಾಜ್, ತನುಷ್ ಶೆಟ್ಟಿ, ತೇಜಸ್, ರಾಜೇಶ್ ಸವಣಾಲ್, ಯತೀಶ್ ಯಕ್ಷ, ನವೀನ್ ಗೌಡ, ಅಯಾಜ್, ರಜತ್, ಯಶೋಧರ ಚಾರ್ಮಾಡಿ , ಮನೋಹರ್ ಇಳಂತಿಲ ಇತ್ತೆರ್.
ಮಣಿಪುರಡ್ ಹಿಂಸಾಚಾರ ಎಚ್ಚಾವೊಂದೇ ಉಂಡು. ಮುಲ್ಪ ಭದ್ರತಾ ಪಡೆನ್ ಗುರಿ ಮಲ್ತ್ ದ್ ದಾಳಿ ಮಲ್ತೊಂದು ಉಲ್ಲೆರ್.
ಕರಿನ 24 ಗಂಟೆಡ್ ಬಿಷ್ಣುಪುರ ಬೊಕ್ಕ ಚುರಚಂದಪುರಡ್ ಭದ್ರತಾ ಸಿಬ್ಬಂದಿ ಮಿತ್ತ್ ದಾಳಿಕೋರೆರ್ 200 ರ್ದ್ ಎಚ್ಚಾ ಕಚ್ಚಾ ಬಾಂಬ್ ನ್ ದಕ್ಕ್ ದೆರ್. 4 ಬೇತೆ ಬೇತೆ ಕಡೆಟ್ಟ್ ನಡತಿನ ಎನ್ ಕೌಂಟರ್ ಡ್ 3 ಜನ ಜೂವ ಕಳೆವೊಂದೆರ್.
ಈ ಪೊರ್ತುಡು ಸೇನೆ ಬೊಕ್ಕ ಮಣಿಪುರ ಪೊಲೀಸ್ ಗ್ ಸೇರಿನ ರಡ್ಡ್ ಜನಕ್ಕ್ ಪೆಟ್ಟಾತ್ಂಡ್. ಮೈತೇಯಿ ಬೊಕ್ಕ ಕುಕಿ ಸಮುದಾಯದ ನಡುಟ್ಟ್ ಇತ್ತಿನ ಹಿಂಸಾಚಾರ ಇತ್ತೆ ಭದ್ರತಾ ಪಡೆತ್ತ ಕಡೆಕ್ಕ್ ತಿರ್ಗ್ ದ್ಂಡ್.
ಕೋಲ್ಕತ: ರೀಲ್ಸ್ ದ ಮರ್ಲ್ ಇಂಚಿಪ್ಪ ದಿನರ್ದ್ ದಿನ ಎಚ್ಚಾವೊಂದೆ ಉಂಡು. ಪಶ್ಚಿಮ ಬಂಗಾಲದ ಒಂಜಿ ದಂಪತಿಲು, ಐಫೋನ್ 14 ದೆತೊನಿಯೆರೆ, ಆಯಿಟ್ಟ್ ರೀಲ್ಸ್ ಮಲ್ಪರೆ ತನ್ನ 8 ತಿಂಗೊಲ್ದ ಆನ್ ಬಾಲೆನ್ ಮಾರಿನ ಘಟನೆ ವರದಿ ಆತ್ಂಡ್.
ಪಶ್ಚಿಮ ಬಂಗಾಲದ ಉತ್ತರ 24 ಪರಗಣ ಜಿಲ್ಲೆದ ನಿವಾಸಿಲಾಯಿನ ಜಯದೇವ್ ಘೋಷ್ ಬೊಕ್ಕ ಸತಿ ದಂಪತಿಲು ತನ್ನ ಬಾಲೆನ್ ಖರ್ದಾಹ್ ನಿವಾಸಿ ಪ್ರಿಯಾಂಕ ಘೋಷ್ ಮೆರೆಗ್ 2 ಲಕ್ಷ ರೂ. ಗ್ ಮಾರ್ದೆರ್. ಆ ಕಾಸ್ ಡ್ ಐಫೋನ್ ದೆತೊಂದು, ಒರಿನ ಕಾಸ್ ಡ್ ಪ್ರವಾಸಿ ತಾಣಗ್ ಪೋತೆರ್. ಬಾಲೆ ಮಾರಿನ ಬಗೆಟ್ಟ್ ಪೊಲಬು ಪಡೆಯಿನ ಪೊಲೀಸೆರ್, ಸತಿ, ಬೊಕ್ಕ ಪ್ರಿಯಾಂಕ ಘೋಷ್ ನ್ ಅರೆಸ್ಟ್ ಮಲ್ದೆರ್. ಜಯದೇವ್ ದೆಂಗ್ ದ್ ಕುಲ್ಲುದೆರ್. ಆಯನ್ ಇತ್ತೆ ನಾಡೊಂದು ಉಲ್ಲೆರ್.
ಒಡಿಶಾದ ರಾಜ್ ಕನಿಕಾ ತಹಸಿಲ್ ದ ಸಿಯಾಲಿಯಾ ಪನ್ಪುನ ಹಳ್ಳಿಡ್ ಒಂಜೇ ಒಂಜಿ ಇಲ್ಲ್ ಗ್ ಬಾಕಿಲ್ ಇಜ್ಜಿ.
ಮುಲ್ಪದ ಜನಕ್ಕ್ ಅಕುಲು ನಂಬುನ ದೇವೆರ್ ಇಲ್ಲದ ರಕ್ಷಣೆ ಮಲ್ಪುವೆರ್ ಪನ್ಪುನ ನಂಬಿಕೆ ಉಂಡು. ಈ ಗ್ರಾಮಡ್ 40 ರ್ದ್ ಎಚ್ಚ ಇಲ್ಲ್ ಉಂಡು. ಅಂಚೆನೆ ಖರಖೈ ಅಮ್ಮನ ದೇವಲ್ಯ ಉಂಡು. ಈ ದೇವೆರ್ ಆಪತ್ಕಾಲಡ್ ಅಕ್ಲೆನ್ ರಕ್ಷಣೆ ಮಲ್ಪುವೆರ್ ಪನ್ಪುನವೇ ಈ ಗ್ರಾಮಸ್ಥೆರೆನ ನಂಬಿಕೆ ಆತ್ಂಡ್. ಈ ಗ್ರಾಮಗ್ ಕಲ್ವೆರ್ ಬರ್ಪುಜೆರ್ ಪಂದ್ ಪನ್ಪೆರ್. ಆತೆ ಅತ್ತ್ ಏತೇ ಮಲ್ಲ ಸಮಸ್ಯೆ ಬತ್ತ್ಂಡಲ ಹಳ್ಳಿಡೇ ಸರಿ ಮಲ್ಪುವೆರ್ ಗೆ ಮುಲ್ಪದ ಗ್ರಾಮಸ್ಥೆರ್.
ತಮಿಳ್ ನಾಡ್ ದ ಕೃಷ್ಣಗಿರಿತ್ತ ಪಟಪೇಂಟೆದ ಗೋದಾಮುಡು ಪಟಾಕಿ ಪುಡಾದ್ 4 ಜನ ತೀರ್ ಪೋಯಿನ ಘಟನೆ ನಡತ್ಂಡ್.
20 ಜನಕ್ಕ್ ಮಸ್ತ್ ಪೆಟ್ಟಾತ್ಂಡ್. ನೆರ್ದ್ 5 ಇಲ್ಲ್ ನಾಶ ಆತ್ಂಡ್. ನನ ಮಣ್ಣ್ ದ ಅಡಿಟ್ಟ್ ಕೆಲವೆರ್ ತಿಕೊಂದೆರ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ಟ್ ಪೊಲಬು ಪಡೆಯಿನ ಅಗ್ನಿಶಾಮಕ ಸಿಬ್ಬಂದಿ ತೂ ತೆಕ್ಕಾವೊಂದು ಉಲ್ಲೆರ್.
ಸೆಕೆಂಡ್ ಪಿಯುಸಿಡ್ ಫೇಲ್ ಆಯಿನ ಕಲ್ಪಾರ್ಥಿಲೆಗ್ ಪ್ರತಿ ವರ್ಷ 2 ಪೂರಕ ಪರೀಕ್ಷೆನ್ ಮಲ್ಪೆರೆ ಸರ್ಕಾರ ನಿರ್ಧಾರ ಮಲ್ದ್ಂಡ್.
ನೆತ್ತ ಪೂರಕ ಪರೀಕ್ಷೆ-2 ತ್ತ ವೇಳಾಪಟ್ಟಿನ್ ಪ್ರಕಟ ಮಲ್ದ್ಂಡ್. ಆಯಿನಂಚೆನೆ ಆ.21 ರ್ದ್ ಸೆ.2 ಮುಟ್ಟ ಪೂರಕ ಪರೀಕ್ಷೆ-2 ನಡಪರೆ ಉಂಡು.
ಈ ಮಾತ ಪರೀಕ್ಷೆಲ ಮಧ್ಯಾಹ್ನ 2.15 ರ್ದ್ ಬಯ್ಯ 5.30 ಮುಟ್ಟ ಇಪ್ಪುಂಡು. ಉಂದುವೇ ಸುರುತ್ತ ಸರ್ತಿ ಶಿಕ್ಷಣ ಇಲಾಖೆ ಫೇಲ್ ಆಯಿನ ಕಲ್ಪಾರ್ಥಿಲೆಗ್ ಕುಡೊಂಜಿ ಅವಕಾಶ ಕೊರಿಯೆರೆ ಈ ರೀತಿ ರಡ್ಡನೇ ಸರ್ತಿ ಪೂರಕ ಪರೀಕ್ಷೆ ಮಲ್ತೊಂದು ಉಂಡು.
ನ್ಯೂ ಇಂಡಿಯಾ ಅಶ್ಯೂರೆನ್ಸ್ ಕಂಪೆನಿ ಲಿಮಿಟೆಡ್ (NIACL) ಡ್ ಖಾಲಿ ಇಪ್ಪುನ 450 ಅಡ್ಮಿನಿಸ್ಟ್ರೇಟಿವ್ ಆಫೀಸರ್ ಬೇಲೆಗ್ ನೇಮಕಾತಿ ಅಧಿಸೂಚನೆನ್ ಬುಡುಗಡೆ ಮಲ್ದ್ಂಡ್.
ಅಭ್ಯರ್ಥಿಲೆನ್ ಲಿಖಿತ ಪರೀಕ್ಷೆ, ಸಂದರ್ಶನ, ಪ್ರಮಾಣಪತ್ರ ಪರಿಶೀಲನೆ, ವೈದ್ಯಕೀಯ ಪರೀಕ್ಷೆದ ಆಧಾರದ ಮಿತ್ತ್ ಆಯ್ಕೆ ಮಲ್ಪೆರೆ ಆಪುಂಡು. ಆಸ್ತಕ ಬೊಕ್ಕ ಅರ್ಹ ಅಭ್ಯರ್ಥಿಲು ಆಗಸ್ಟ್ 1 ರ್ದ್ 21 ತ್ತೊಲಯಿ ಅರ್ಜಿ ಸಂದಾವೊಡು. ಎಚ್ಚದ ಪೊಲಬುಗಾದ್ ನೆತ್ತ ವೆಬ್ ಸೈಟ್: https://www.newindia.co.in/ ಗ್ ಭೇಟಿ ಕೊರೊಲಿ.
