ಮಹಾರಾಷ್ಟ್ರ: ಬೊಂಬೈ- ನಾಗ್ಪುರ ಮಾರ್ಗಡ್ ಪೋವೊಂದಿತ್ತಿನ ರಡ್ಡ್ ಖಾಸಗಿ ಬಸ್ ಲು ಲಕ್ಷ್ಮೀ ನಗರ ಮಲ್ಕಾಪುರದಲ್ಪ ಫ್ಲೈಓವರ್ ದ ಮಿತ್ತ್ ಎದುರುಬದುರ್ ಗುದ್ದುದು ಜಾಗೆಡೇ 6 ಜನ ತೀರ್ ಪೋಯಿನ ಘಟನೆ ನಡತ್ಂಡ್.
ಈ ರಡ್ಡ್ ಬಸ್ ಟ್ಟ್ 20-40 ಜನ ಪ್ರಯಾಣಿಕೆರ್ ಇತ್ತೆರ್. ಗುದ್ದಿನ ಬಿರ್ಸ್ ಗ್ ರಡ್ಡ್ ಬಸ್ ಲು ನಕ್ಕಿ ಆತ್ಂಡ್. ಕೆಲವೆರೆನ ಸ್ಥಿತಿ ಗಂಭೀರ ಉಂಡು. ಇಂಚಾದ್ ಸಾವುನ ಸಂಖ್ಯೆಲ ಎಚ್ಚಾಪುನ ಸಾಧ್ಯತೆ ಉಂಡು ಪಂದ್ ತೆರಿದ್ ಬೈದ್ಂಡ್.
ಅಂಡಮಾನ್ ಬೊಕ್ಕ ನಿಕೋಬಾರ್ ದ್ವೀಪದ ಪೋರ್ಟ್ ಬ್ಲೇರ್ ದಲ್ಪ ಇನಿ ಬೊಲ್ಪುಗು 5.9 ಬಿರ್ಸ್ ದ ಭೂಕಂಪ ನಡತ್ಂಡ್.
ಭೂಕಂಪದ ಕೇಂದ್ರ ಬಿಂದು ಪೋರ್ಟ್ ಬ್ಲೇರ್ ದ ಅಗ್ನೇಯಗ್ 126 ಕಿಮೀ ದೂರಡ್ ಇತ್ತ್ಂಡ್ ಪಂದ್ ಭೂಕಂಪ ಶಾಸ್ತ್ರದ ರಾಷ್ಟ್ರೀಯ ಕೇಂದ್ರ ತೆರಿಪಾದ್ಂಡ್. ಈ ಭೂಕಂಪ ಭೂಮಿದ ಮಿತ್ತ್ ರ್ದ್ ಸುಮಾರ್ 69 ಕಿಮೀ ಅಡಿಟ್ಟ್ ನಡತ್ ದ್ಂಡ್.
ಕುಡ್ಲಡ್ ಐಡಿಯಲ್ ಐಸ್ಕ್ರೀಮ್ ಪನ್ಪಿನ ಬ್ರಾಂಡ್ ಬೊಕ್ಕ ಗಡ್ಬಡ್ ಐಸ್ ಕ್ರೀಮ್ ದ ರುಚಿ ಜೋಕ್ಲೆರ್ದ್ ಪರಬೆರ್ ಮುಟ್ಟಲ ಗೊತ್ತುಂಡು. ಸುಮಾರ್ 48 ವರ್ಷರ್ದ್ ಐಡಿಯಲ್ ತನ್ನ ಮಳಿಗೆನ್ ವಿಸ್ತಾರ ಮಲ್ತ್ ದ್ ಪಬ್ಬಾಸ್, ಐಡಿಯಲ್ ಕೆಫೆ ನೆಟ್ ಸ್ವಾದದ ರುಚಿನ್ ಕೊರೊದುಂಡು.
ಉದ್ಯಮಿ ಪ್ರಭಾಕರ ಕಾಮತ್ ಮೇರ್ ಶುರು ಮಲ್ತಿನ ಐಡಿಯಲ್ ಐಸ್ಕ್ರೀಂ ಇತ್ತೆ ಅರೆನ ಮಗೆ ಮುಕುಂದ ಕಾಮತ್ ಪೊಸತನ, ಪೊಸ ಐಡಿಯಾ, ಪೊಸ ಸ್ವಾದದ ಒಟ್ಟಿಗೆ ಈ ಐಸ್ಕ್ರೀಮ್ ಜಗತ್ತ್ ಡೇ ಪುಗರ್ತೆ ಪಡೆದ್ಂಡ್ . ಈ ಪೊರ್ತುಡೆ ಗಡ್ಬಡ್ ಗ್ ವಿಶ್ವದ ಮಾನಾದಿಗೆ ತಿಕ್ ದ್ಂಡ್. ಈ ಗಡ್ ಬಡ್ ಐಟಂ ಇತ್ತೆ ವಿಶ್ವದ ಟಾಪ್ 100 ಟ್ ಸ್ಥಾನ ಪಡೆತ್ಂಡ್.
ಕುಡ್ಲ: ಚಿಲಿಂಬಿಗುಡ್ಡೆ ಶ್ರೀ ರಾಮಾಂಜನೇಯ ಯುವಕ ಮಂಡಲ (ರಿ.) ನೆತ್ತ ಮುತಾಲಿಕೆಡ್ ಆಟಿಡೊಂಜಿ ಐತಾರ ಲೇಸ್ ಜುಲೈ 30 ಕ್ಕ್ ಐತಾರ ಬಯ್ಯಗ್ 4 ಗಂಟೆಗ್ ಶ್ರೀ ರಾಮಾಂಜನೇಯ ಸಭಾಭವನಡ್ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಉತ್ತರಾಖಂಡದ 5 ವರ್ಷದ ತೇಜಸ್ ತಿವಾರಿ ಚೆಸ್ ಡ್ ವಿಶ್ವದಾಖಲೆ ಮಲ್ದೆ.
ಎಲ್ಯ ಪ್ರಾಯಡೇ FIDE ರೇಟಿಂಗ್ (1149) ಪಡೆಯಿನ ಆಟಗಾರೆ ಆತೆ. 4ನೇ ವರ್ಷಡ್ ಜಿಲ್ಲಾ ಬೊಕ್ಕ ರಾಜ್ಯ ಮಟ್ಟದ ಚೆಸ್ ಗೊಬ್ಬೊಂದು ಇತ್ತಿನ ತೇಜಸ್, 13 ರಾಜ್ಯಡ್ ನಡತಿನ ಚೆಸ್ ಪಂತೊಡು ಪಾಲ್ ಪಡೆತೆ.
ಕರಿನ ವರ್ಷ 8 ವರ್ಷದೊಲಯಿದಕ್ಲೆನ ವಿಭಾಗಡ್ ಉತ್ತರಾಖಂಡಡ್ ನಡತಿನ ಪಂತೊಡು ಬೊಕ್ಕ ಭುವನೇಶ್ವರದ ರಾಷ್ಟ್ರೀಯ ಶಾಲೆದ ಚೆಸ್ ಡ್ ಟ್ರೋಫಿ ಗೆಂದ್ ದೆ.
24 ಕ್ಯಾರೆಟ್ 10 ಗ್ರಾಂ. ಬಂಗಾರ್ ದ ಬಿಲೆ ಇನಿ 380 ರೂ. ಕಮ್ಮಿ ಆತ್ಂಡ್.
ಕೋಡೆ 60490 ರೂ. ಇತ್ತಿನ ಬಂಗಾರ್ ದ ಬಿಲೆ ಇತ್ತೆ 60110 ರೂ. ಆತ್ಂಡ್. ಅಂಚೆನೆ 22 ಕ್ಯಾರೆಟ್ 10 ಗ್ರಾಂ ಬಂಗಾರ್ ದ ಬಿಲೆ 350 ರೂ. ಕಮ್ಮಿಯಾದ್ 55100 ರೂ. ಆತ್ಂಡ್. ಕೋಡೆ ನೆತ್ತ ಬಿಲೆ 55,450 ಇತ್ಂಡ್. ಆಂಡ ಬೊಳ್ಳಿ ಬಿಲೆಟ್ಟ್ ಒವ್ವೇ ಎಚ್ಚಿಕಮ್ಮಿ ಆತಿಜಿ. ಬೆಂಗ್ಲೂರ್ ಡ್ ಒಂಜಿ ಕೆಜಿ ಬೊಳ್ಳಿ ಬಿಲೆ 77250 ರೂ. ಆತ್ಂಡ್.
ಕಟೀಲ್: ದುಂಬುದ ಕಾಲಡ್ ಆಟಿ ತಿಂಗೊಲ್ ಪಂಡ ಕಷ್ಟದ ದಿನಕುಲು. ಆಚರಣೆಡ್ ವೈಜ್ಞಾನಿಕ ಕಾರಣಲು ಇತ್ತ್ಂಡ್. ಆರೋಗ್ಯದಾಯಕ ತೆನಸ್ ಲ ಇತ್ತ್ಂಡ್. ಗಂಜಿ ವನಸ್ ಗ್ ಇಪ್ಪುನ ಮಹತ್ವ ನಮಕ್ ತೆರಿದ್ ಇಪ್ಪೊಡು. ತುಳು ನಾಡ್, ನುಡಿ, ಆಚರಣೆದ ಬಗ್ಗೆ ಅಭಿಮಾನ ಇಪ್ಪೊಡು ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಂಡೆರ್.
ಮೇರ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಶಿಕ್ಷಣ ಸಂಸ್ಥೆದ ಶ್ರೀ ವಿದ್ಯಾ ಚಾವಡಿಡ್ ನಡತಿನ ಆಟಿದ ನೆಂಪು ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.
ರಂಗನಟೆ ನವೀನ್ ಡಿ.ಪಡೀಲ್ ಪಾತೆರ್ದ್, ಕಲಿಕೆಡ್ ಸಾಧನೆ ಮಲ್ಪೊಡು. ಅಂಚ ಪಂದ್ ಬದಕ್ ಡ್ ಪಾಠನ್ ಓದುದ್ ಪರೀಕ್ಷೆಡ್ ಪಾಸಾಪುನೇ ಮಾತ್ರ ಸಾಧನೆ ಅತ್ತ್. ಬೇತೆ ಬೇತೆ ಕ್ಷೇತ್ರಡ್ಲಾ ಸಾಧನೆ ಮಲ್ಪೊಲಿ. ಪರೀಕ್ಷೆಡ್ ಸೋತೆ ಪಂದ್ ಆತ್ಮಹತ್ಯೆದಂಚಿನ ನಿರ್ಧಾರ ದೆತೊನಿಯೆರೆ ಬಲ್ಲಿ ಪಂದ್ ಪಂಡೆರ್.
ಪಿಯುಸಿ ಪರೀಕ್ಷೆಡ್ ಎಚ್ಚ ಮಾರ್ಕ್ ಪಡೆಯಿನ ಬೊಕ್ಕ ಕ್ರೀಡಾ ಕ್ಷೇತ್ರಡ್ ರಾಷ್ಟ್ರಮಟ್ಟಡ್ ಸಾಧನೆ ಮಲ್ತಿನ 100 ಕಲ್ಪಾರ್ಥಿಲೆನ್ ಬೊಕ್ಕ ನಿವೃತ್ತಿ ಆಯೆರೆ ಇಪ್ಪುನ ಪ್ರೌಢಶಾಲೆದ ಶಿಕ್ಷಕೆರ್ ಸಾಯಿನಾಥ ಶೆಟ್ಟಿ ಬೊಕ್ಕ ಉಪಪ್ರಾಚಾರ್ಯೆರ್ ಸೋಮಪ್ಪ ಅಲಂಗಾರ್ ಮೊಕ್ಲೆಗ್ ಮಾನಾದಿಗೆ ನಡತ್ಂಡ್.
ಕೆ.ಕೆ ಪೇಜಾವರ, ಕಲ್ಲಡ್ಕ ವಿಟ್ಠಲ ನಾಯಕ್ ಮೆರೆರ್ದ್ ಆಟಿದ ಸಂಪ್ರದಾಯ ಬೊಕ್ಕ ಜಿಲ್ಲೆದ ಪುಗರ್ತೆದ ಕಲಾವಿದೆರ್ದ್ ದೇವಪೂಂಜ ತುಳು ಆಟ ನಡತ್ಂಡ್.
ಚಾವಡಿಡ್ ದೈವಾರಾಧನೆದ ಕೊಡಿಯಡಿತ್ತ ಕಲ್ಪನೆನ್ ಮಡಲ್ ಡ್ ವಿಶಿಷ್ಟ ರೀತಿಡ್ ರಚನೆ ಮಲ್ತ್ ದ್ ಇತ್ತೆರ್. ಕಲ್ಪಾರ್ಥಿಲೆಗ್ ತುಳುನಾಡ್ ದ ತೆನಸ್ ವನಸ್ ದ ವ್ಯವಸ್ಥೆ ಇತ್ತ್ಂಡ್.
ಈ ಪೊರ್ತುಡು ದೇವಲ್ಯದ ಆಡಳಿತ ಮಂಡಳಿ ಅಧ್ಯಕ್ಷೆರ್ ಸನತ್ ಕುಮಾರ್ ಶೆಟ್ಟಿ ಕೊಡೆತ್ತೂರುಗುತ್ತು, ಅರ್ಚಕೆರ್ ಲಕ್ಷ್ಮೀ ನಾರಾಯಣ ಅಸ್ರಣ್ಣ, ವೆಂಕಟರಮಣ ಅಸ್ರಣ್ಣ, ಅನಂತಪದ್ಮನಾಭ ಅಸ್ರಣ್ಣ, ಕಮಲಾದೇವಿಪ್ರಸಾದ ಅಸ್ರಣ್ಣ, ಪ್ರದ್ಯುಮ್ನ ರಾವ್ ತಿಬರೂರ್, ಸಂತೋಷ್ ಕುಮಾರ್ ಹೆಗ್ಡೆ ಎಳೆತ್ತೂರ್, ಕೆ.ಎಂ ಶೆಟ್ಟಿ ಮಧ್ಯಗುತ್ತು, ರತ್ನಾಕರ ಶೆಟ್ಟಿ ಮುಂಡ್ಕೂರ್, ಬಿಪಿನಿಚಂದ್ರ ಶೆಟ್ಟಿ ಕೊಡೆತ್ತೂರುಗುತ್ತು, ದೇವಲ್ಯದ ಇಸೇಸ ಅಧಿಕಾರಿ ಮೋಹನ್ ರಾವ್, ತ್ಯಾಗರಾಯ ಆಚಾರ್ಯ, ಹಳೆವಿದ್ಯಾರ್ಥಿ ಸಂಘದ ಲೋಕಯ್ಯ ಸಾಲಿಯಾನ್ ಇತ್ತೆರ್.
ಸೋಮಪ್ಪ ಅಲಂಗಾರ್ ಪ್ರಸ್ತಾವನೆ ಮಲ್ತೆರ್. ವಾದಿರಾಜ ರಾವ್ ತಮ್ಮನ ಇಪ್ಪುನ ಕಲ್ಪಾರ್ಥಿಲೆನ್ ಪಟ್ಟಿ ಓದಿಯೆರ್. ಸಾಯಿನಾಥ ಶೆಟ್ಟಿ ಎದ್ಕೊನಿಯೆರ್. ಶಿಕ್ಷಕಿ ರೋಹಿಣಿ ಶೆಟ್ಟಿ ಬೊಕ್ಕ ಪ್ರದೀಪ್ ಮೇರ್ ಲೇಸ್ ಸುಧಾರಿಕೆ ಮಲ್ತೆರ್. ಸುಷ್ಮಾ ಸೊಲ್ಮೆ ಸಂದಾಯೆರ್.
ಆಂದ್ರಪ್ರದೇಶ: ಶ್ರೀಕಾಕುಳಂ ಜಿಲ್ಲೆದ ಕಡಲ್ದ ಬರಿಕ್ಕ್ ಸೈತ್ತಿನ ನೀಲಿ ತಿಮಿಂಗಿಲ ಬೈದುಂಡ್. ಈ ವಿಡಿಯೋ ಸಾಮಾಜಿಕ ಜಾಲತಾಣಡ್ ವೈರಲ್ ಆತ್ಂಡ್.
ಸುಮಾರ್ 25 ಅಡಿ ಉದ್ದದ ನೀಲಿ ತಿಮಿಂಗಿಲ 5 ಟನ್ ತೂಕ ಉಂಡ್ ಪಂದ್ ಅಂದಾಜಿ ಮಲ್ತ್ ದೆರ್.
ಬಂಗಾಳಕೊಲ್ಲಿಡ್ ಇಂಚಿನ ಮೀನ್ ಬಜಿ ಅಪರೂಪ. ಆಂದ್ರಪ್ರದೇಶಡ್ ಬಾರಿ ಬರ್ಸ ಇಪ್ಪುನೆದಾರ್ತ ಕೆಲವ್ ಕಡೆಟ್ ಪ್ರವಾಹ ಬೈದುಂಡ್. ಈ ಪೊರ್ತುಡ್ ಸೈತಿನ ಮೀನ್ ಕಡಲ್ದ ಬರಿಕ್ಕ್ ಬೈದುಂಡ್.
ಒಡಿಪು: ಏಣಗುಡ್ಡೆದ ಕಟಪಾಡಿ ಯುವಜನ ಸೇವಾ ಸಂಘ ಬೊಕ್ಕ ಒಡಿಪು ಜಿಲ್ಲೆದ ತೋಟಗಾರಿಕೆ ಬೊಕ್ಕ ಕೃಷಿ ಇಲಾಖೆದ ಒಟ್ಟು ಸೇರಿಗೆಡ್ (ಹಲಸುಮೇಳ) ಪೆಲಕಾಯಿ ಮೇಳ-2023 ಜುಲೈ 29 ಬೊಕ್ಕ 30 ಕ್ಕ್ ಒಡಿಪುದ ಕಟಪಾಡಿ ಎಸ್.ವಿ.ಎಸ್ ಹೈಸ್ಕೂಲ್ ಡ್ ಬೊಲ್ಪುಗು 9 ಗಂಟೆರ್ದ್ ಬಯ್ಯ 7 ಮುಟ್ಟ ನಡಪರೆ ಉಂಡು.
ಈ ಲೇಸ್ ಡ್ ಬೇತೆ ಬೇತೆ ಬಗೆತ್ತ ಪೆಲಯಿ ಪ್ರದರ್ಶನ, ಮಾರಾಟ, ಬೊಕ್ಕ ಬೇತೆ ಬೇತೆ ತಳಿತ್ತ ಪೆಲಕಾಯಿ ದೈತ್ತ ಮಾರಾಟ, ಸಾವಯವ ಉತ್ಪನ್ನಲು, ಕೆರೆಂಗ್, ಬೇತೆ ಬೇತೆ ತರಕಾರಿ ದೈ, ದೇಸಿ ತರಕಾರಿ ಬಿತ್ತ್ ದ ಮಾರಾಟ, ಬೇತೆ ಬೇತೆ ಬಗೆತ್ತ ಪೆಲಕಾಯಿ ತೆನಸ್ ಲು, ಪೆಲಕಾಯಿ ಹೋಳಿಗೆ, ಐಸ್ ಕ್ರೀಮ್, ಕಲ್ಪ ರಸದ ಪ್ರದರ್ಶನ ಬೊಕ್ಕ ಮಾರಾಟ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಒಡಿಪು: ಪ್ಯಾರ ಮೆಡಿಕಲ್ ಕಾಲೇಜಿದ ಪಾಯಿಕಾನೆಡ್ ಕಲ್ಪಾರ್ಥಿಲೆನ ವಿಡಿಯೋ ಮಲ್ತಿನ ಆರೋಪ ಕೆಂದ್ ಬರೊಂದುಂಡ್. ಮೂಜಿ ಕಲ್ಪಾರ್ಥಿನಕ್ಲೆಗ್ ಒಡಿಪು ಒಂಜನೇ ಹೆಚ್ಚುವರಿ ಸಿವಿಲ್ ಬೊಕ್ಕ ಜೆಎಂಎಫ್ಸಿ ನ್ಯಾಯಾಲಯ ಸುಕ್ರಾರ ಷರತ್ತ್ ಬದ್ದ ಜಾಮೀನ್ ಮಂಜೂರು ಮಲ್ತ್ ಆದೇಶ ಕೊರ್ತೆರ್.
ವಿಡಿಯೋ ಮಲ್ತಿನ ಆರೋಪಿಲಾಯಿನ ಶಬನಾಜ್, ಆಲ್ಫಿಯಾ, ಆಲಿಮಾತುಲ್ ಶಾಫಿಯಾ ಮೊಕ್ಲೆನ ವಿರುದ್ದ ಮಲ್ಪೆ ಪೊಲೀಸ್ ಠಾಣೆಡ್ ಕಲಂ;509,204,175,34 ಐ.ಪಿ.ಸಿ ಬೊಕ್ಕ 66(ಇ) ಐಟಿ ಕಾಯಿದೆಡ್ ಪ್ರಕರಣ ದಾಖಲಾತ್ಂಡ್.
