ಒಡಿಪು: ಮಾರ್ಗಡ್ ಡೀಸೆಲ್ ತೋರ್ ದ್ 20 ಗಾಡಿ ಅಡಿಮೇಲ್ ಆಯಿನ ಘಟನೆ ಒಡಿಪು ಪೇಂಟೆದ ಸಿಟಿ ಬಸ್ ಸ್ಯಾಂಡ್ ದಲ್ಪ ಬುಧಾರ ರಾತ್ರೆ ನಡತ್ಂಡ್.
ಕಲ್ಸಂಕರ್ದ್ ಒಡಿಪುದಂಚಿ ಪೋವೊಂದು ಇತ್ತಿನ ಟ್ರಕ್ ರ್ದ್ ಡೀಸೆಲ್ ತೋರ್ ದ್ ಗಾಡಿಲು ಅಡಿಮೇಲ್ ಆತ್ಂಡ್. ಈ ಇಸಯ ತೆರಿದ್ ಕೂಡ್ಲೆ ಜಾಗೆಗ್ ಬತ್ತಿನ ಟ್ರಾಫಿಕ್ ಪೊಲೀಸೆರ್ ಸುಗಮ ಸಂಚಾರಗ್ ಅವಕಾಶ ಮಲ್ತ್ ಕೊರಿಯೆರ್. ಡೀಸೆಲ್ ತೋರಿನ ಜಾಗೆಡ್ ಎಚ್ಚರಿಕೆ ಪಟ್ಟಿ ಪಾಡಿಯೆರ್. ಒಡಿಪು ಜಿಲ್ಲಾ ಅಗ್ನಿಶಾಮಕ ದಳತ್ತ ಸಿಬ್ಬಂದಿಲೆನ ಸಹಕಾರಡ್ ಬ್ಲೀಚಿಂಗ್ ಪೌಡರ್ ಪಾಡ್ದ್ ನೀರ್ ಪಾಡ್ದ್ ಕ್ಲೀನ್ ಮಲ್ತ್ ದ್ ಗಾಡಿ ಪೋಯೆರೆ ಸಕಾಯ ಮಲ್ತೆರ್.
ಡೆಲ್ಲಿ: ಪಿದಯಿ ದೇಸದ ಬೇಲೆ ಬುಡ್ದು ಭಾರತಡ್ ಚಾ ತ್ತಂಗಡಿ ಪಾಡಿನ ಒಂಜಿ ಜನ ಕೋಟಿ ಕೋಟಿ.. ರೂ. ಕಾಸ್ ಮಲ್ದೆರ್.
ವ್ಯಾಪಾರ ಕುಟುಂಬರ್ದ್ ಬತ್ತಿನ ನಿತಿನ್ ಸಲೂಜಾ ಮೇರ್ ಐಐಟಿ ಬಾಂಬೆಡ್ ಮೆಕ್ಯಾನಿಕಲ್ ಎಂಜಿನಿಯರಿಂಗ್ ಮಲ್ದೆರ್. ಹರಿಯಾಣ ಮೂಲದ ಮೇರ್ ಪದವಿ ಮುಗಿತ್ ದ್ ಅಮೆರಿಕದ ಕಂಪನಿಯೊಂಜೇಟ್ ಮ್ಯಾನೇಜ್ಮೆಂಟ್ ಕನ್ಸಲ್ಟೆಂಟ್ ಆದ್ ಬೇಲೆ ಮಲ್ತೆರ್.
ಸುಮಾರ್ 5 ವರ್ಷೊ ಮುಟ್ಟ ಅಮೆರಿಕಡ್ ಬೇಲೆ ಮಲ್ತಿನ ಮೇರ್, ತನ್ನನೇ ಸ್ವಂತ ಉದ್ಯಮವೊಂಜೇನ್ ಸುರು ಮಲ್ಪೊಡು ಪಂದ್ ನಿರ್ಧಾರ ಮಲ್ತೆರ್. ಈ ಗುರಿ ದೀವೊಂದು ಮೇರ್ ಅಮೆರಿಕಾಗ್ ಗುಡ್ ಬೈ ಪಂದ್ ಭಾರತ್ ಗ್ ವಾಪಸ್ ಬತ್ತೆರ್.
ಬೊಕ್ಕ ಸಹೋದ್ಯೋಗಿ, ದೋಸ್ತಿ ರಾಘವ್ ವರ್ಮಾ ನೊಟ್ಟಿಗೆ ಗುರ್ಗಾಂವ್ನ ಸೈಬರ್ ಸಿಟಿಡ್ ಸುರುತ್ತ ಚಾಯೋಸ್ ಅಂಗಡಿನ್ ಓಪನ್ ಮಲ್ತೆರ್. ಅವೆರ್ದ್ ಬೊಕ್ಕ ಟೀ ಕೆಫೆತ್ತ ಶಾಖೆನ್ ಸುರು ಮಲ್ತೆರ್. ಬೆಂಗ್ಲೂರ್ ಡ್ಲಾ ಒಂಜಿ ಶಾಖೆ ಉಂಡು. ಇತ್ತೆ ಚಾಯೋಸ್ ದ ಶಾಖೆ ದೇಶ ಇಡೀ 200ರ್ದ್ ಎಚ್ಚ ಉಂಡು. ಸುಮಾರ್ 2051 ಕೋಟಿ ರೂ. ಆದಾಯ ಬರ್ಪುಂಡು.
ಒಡಿಪು: ಸಮುದಾಯದ ಅಭಿವೃದ್ಧಿಗಾದ್ ಕರ್ನಾಟಕದ ಬೇತೆ ಬೇತೆ ಜಿಲ್ಲೆಡ್ 2007ನೇ ಇಸವಿರ್ದ್ ಸುರು ಆದ್ ಬೇಲೆ ಮಲ್ತೊಂದು ಇಪ್ಪುನ ಸುಮಾರ್ 24 ಸಮುದಾಯ ಬಾನುಲಿದ ರಾಜ್ಯಮಟ್ಟದ ಸಂಘ ನಿರ್ಮಾಣ ಆದ್ ಪದಾಧಿಕಾರಿಲೆನ ಆಯ್ಕೆ ಇಂಚಿಪ್ಪ ಬೆಂಗ್ಲೂರ್ ಡ್ ನಡತ್ಂಡ್.
ಸಂಘದ ಸ್ಥಾಪಕಾಧ್ಯಕ್ಷೆರಾದ್ ಮಣಿಪಾಲದ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ಕ್ಯಾಂಪಸ್ ಇಪ್ಪುನ ‘ರೇಡಿಯೋ ಮಣಿಪಾಲ್’ ಸಮುದಾಯ ಬಾನುಲಿ ಕೇಂದ್ರದ ಮುಖ್ಯಸ್ಥೆರ್ ಡಾ.ರಶ್ಮಿ ಅಮ್ಮೆಂಬಳ ಅವಿರೋಧವಾದ್ ಆಯ್ಕೆ ಆಯೆರ್.
ಗೌರವಾಧ್ಯಕ್ಷೆರಾದ್ ಬೂದಿಕೋಟೆ ‘ನಮ್ಮಧ್ವನಿ’ ತ್ತ ಶಿವಶಂಕರಸ್ವಾಮಿ, ಉಪಾಧ್ಯಕ್ಷೆರಾದ್ ‘ಕಲಿಕೆ ‘ ದ ಸಾಯಿಬಾಬು, ಕಾರ್ಯದರ್ಶಿಯಾದ್ ಬಾಗಲಕೋಟೆ ಬಿ.ಇ.ಸಿ ಧ್ವನಿತ್ತ ಭರತ್ ಬಿ. ಬಡಿಗೇರ್, ಜತೆ ಕಾರ್ಯದರ್ಶಿಯಾದ್ ‘ಜನಧ್ವನಿ’ ತ್ತ ನಿಂಗರಾಜು, ಕೋಶಾಧಿಕಾರಿಯಾದ್ ‘ರೇಡಿಯೊ ಆಕ್ಟಿವ್’ ದ ರಮ್ಯಾ, ಕಾರ್ಯಕಾರಿ ಸಮಿತಿದ ಸದಸ್ಯೆರಾದ್ ‘ರೇಡಿಯೊ ಸಿದ್ದಾರ್ಥ’ ದ ಶಿವಾಜಿ ಗಣೇಶನ್, ‘ಅಂತರ್ವಾಣಿ’ ದ ಡಾ.ಶಿವರಾಜ್ ಶಾಸ್ತ್ರಿ, ‘ಸಾರಥಿ ಝಲಕ್’ ದ ಶಮಂತ ಡಿ.ಎಸ್, ‘ರೇಡಿಯೊ ಶಿವಮೊಗ್ಗ’ದ ಗುರುಪ್ರಸಾದ್, ‘ರೇಡಿಯೊ ನಿನಾದ’ದ ವಿ.ಕೆ ಕಡಬ, “ರೇಡಿಯೊ ಸಾರಂಗ್’ ದ ಅಭಿಷೇಕ್, ‘ರಮಣ ಧ್ವನಿ’ ತ್ತ ಅನಂತ್, ‘ಕೆ.ಎಲ್. ಇ ಧ್ವನಿ’ ತ್ತ ರವೀಂದ್ರ ಕಾವಟೇಕರ್, ‘ವೇಣುಧ್ವನಿ’ ತ್ತ ಮಂಜುನಾಥ್, ‘ಕೃಷಿ ರೇಡಿಯೊ’ ದ ಸುರೇಖಾ ಸಂಕನಗೌಡರ್, ಜ್ಞಾನಧ್ವನಿತ್ತ ಪಾಂಡುರಂಗ ವಿಠ್ಠಲ್, ‘ಜೆ.ಎಸ್.ಎಸ್ ರೇಡಿಯೊ” ದ ಶಿವಕುಮಾರ್, ‘ನಮ್ಮೂರ ಬಾನುಲಿ’ ದ ಕಿರಣ್ ಚೌಗಾಲ ‘ನಮ್ಮ ನಾಡಿ’ ದ ವರುಣ್ ಕಂಜರ್ಪಣೆ, ‘ರೇಡಿಯೊ ಪಾಂಚಜನ್ಯ’ದ ತೇಜಸ್ವಿನಿ, ‘ರೇಡಿಯೊ ಮಾನಸ’ ದ ದೇವೇಂದ್ರ, ‘ಸಹಕಾರ್ ರೇಡಿಯೊ’ ದ ನೂರ್ ಅಹ್ಮದ್ ಮಕಾನ್ದಾರ್ ‘ನೆಲದನಿ’ ದ ಡಾ.ಶಿವಲಿಂಗಯ್ಯ ಆಯ್ಕೆ ಆಯೆರ್.
ಮಣಿಪುರಗ್ ಇನಿ ಕಾಂಗ್ರೇಸ್ ನಾಯಕೆ ರಾಹುಲ್ ಗಾಂಧಿ ಭೇಟಿ ಕೊರಿಯೆರೆ ಉಲ್ಲೆರ್.
ಮೈತೇಯಿ, ನಾಗಾ ಬೊಕ್ಕ ಕುಕಿ ಸಮುದಾಯದ ನಡುಟ್ ಮೀಸಲಾತಿ ಇಚಾರಗ್ ನಡತೊಂದು ಇಪ್ಪುನ ಲಡಾಯಿರ್ದ್ ಇತ್ತೆನೇ ನೂದೆರ್ದ್ ಎಚ್ಚ ಜನ ಜೂವ ಕಳೆವೊಂದೆರ್.
ರಾಹುಲ್ ಗಾಂಧಿನೊಟ್ಟಿಗೆ ಕಾಂಗ್ರೆಸ್ ದ ಪೆರಿಯ ನಾಯಕೆರ್ ಮಣಿಪುರಗ್ ಬರಿಯೆರೆ ಉಲ್ಲೆರ್ ಪಂದ್ ವರದಿ ಆತ್ಂಡ್.
ಸುಳ್ಯ: ಬೆಳ್ಳಾರೆದ ಬಿಜೆಪಿ ಮುಖಂಡೆ ಪ್ರವೀಣ್ ನೆಟ್ಟಾರ್ ನ್ ಕೆರ್ತಿನ ಕೇಸ್ ದ ಆರೋಪಿಲು ಜೂ.30 ದುಲಯಿ ಹಾಜರ್ ಆಯಿಜಿಡ ಅಕ್ಲೆನ ಇಲ್ಲ್ ಜಪ್ತಿ ಮಲ್ಪುವ ಪಂದ್ ಎನ್ಐಎ ಅಧಿಕಾರಿಲು ನಿರ್ಧಾರ ಮಲ್ದೆರ್ ಪಂದ್ ವರದಿ ಆತ್ಂಡ್.
ಎನ್ಐಎ ಅಧಿಕಾರಿಲು ಈ ಇಸಯನ್ ಇನಿ ಸುಳ್ಯ ದ ಪೇಂಟೆಡ್ ಸಾರ್ವಜನಿಕವಾದ್ ಮೈಕೊಡು ಲೆತ್ತ್ ಪನೊಂದು ಪೋತೆರ್ . ಅಂಚೆನೆ ಆರೋಪಿಲೆನ್ ಪತ್ತೆ ಮಲ್ತ್ ಕೊರ್ಂಡ ಪನವುದ ಇನಾಮು ಕೊರ್ಪ ಪಂದ್ ಸಾರ್ವಜನಿಕೆರೆಡ ಬಿನ್ನಾಪು ಮಲ್ತೆರ್.
ಸುಳ್ಯದ ಕಲ್ಲುಮುಟ್ಲುಡ್ ವಾಸ ಇತ್ತಿನ ಆರೋಪಿ ಉಮ್ಮರ್ ಫಾರೂಕ್ ಬೊಕ್ಕ ಬೆಳ್ಳಾರೆದ ಮುಸ್ತಫನ ಇಲ್ಲಗ್ ಎನ್ಐಎ ಅಧಿಕಾರಿಲು ನೋಟಿಸ್ ಅಂಟಾದ್ ಬೈದೆರ್ ಪಂದ್ ತೆರಿದ್ ಬೈದ್ಂಡ್.
ಸಾಗರ: ಇನಿ ಮದಿಮೆ ಆವೊಡಿತ್ತಿನ ರಡ್ಡ್ ಪೊಣ್ಣು ಜೋಕುಲೆನ ಪೊಪ್ಪ ಆಕ್ಸಿಡೆಂಟ್ ಡ್ ತೀರ್ ಪೋಯಿನ ಘಟನೆ ಸಾಗರ ತಾಲೂಕ್ ದ ಆನಂದಪುರ ಕೈತಲ್ ದ ಚೆನ್ನಕೊಪ್ಪಡ್ ಕೋಡೆ ನಡತ್ಂಡ್.
ಈ ಘಟನೆಡ್ ತೀರ್ ಪೋಯಿನಾರ್ ಬನವಾಸಿ ನಿವಾಸಿ ಆಯಿನ ಮಂಜುನಾಥ ಗೌಡ ಪಂದ್ ತೆರಿದ್ ಬೈದ್ಂಡ್.
ಮಂಜುನಾಥ್ ಮೇರ್ ಒವ್ವ ಬೇಲೆಗ್ ಪೇಂಟೆಗ್ ಬತ್ತ್ ದ್ ಇತ್ತೆರ್. ಅಲ್ಪ ಗಾಡಿಯೊಂಜಿ ಮೆರೆಗ್ ಗುದ್ದುದು ಪೋತ್ಂಡ್. ಮೇರ್ ಅಲ್ಪನೇ ತೀರ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್.
ಈ ಬಗ್ಗೆ ಆನಂದಪುರ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ಪೊಲೀಸೆರ್ ಮೆರೆಗ್ ಗುದ್ದಿನ ಗಾಡಿನ್ ನಾಡೊಂದು ಉಲ್ಲೆರ್.
ಶಿವಮೊಗ್ಗ: ಮಾರ್ಗಗ್ ಅಡ್ಡ ಆದಿತ್ತಿನ ಮರನ್ ಕಡ್ಪುನಗ ಕರೆಂಟ್ ಶಾಕ್ ಹಾಕ್ ದ್ 2 ಜನ ತೀರ್ ಪೋಯಿನ ಘಟನೆ ಶಿವಮೊಗ್ಗ ಪೇಂಟೆದ ಊರುಗಡೂರ್ ಕೈತಲ್ ನಡತ್ಂಡ್.
ಈ ಘಟನೆಡ್ ತೀರ್ ಪೋಯಿನಕ್ಲೆನೆಟ್ಟ್ ಒರಿ ಗುಂಟೂರು ಮೂಲದ ಚಲ್ಲಾ ಸೋಮಶೇಖರ್ ಪಂದ್ ತೆರಿದ್ ಬೈದ್ಂಡ್. ಕುಡೊರಿ ಏರ್ ಪಂದ್ ನನ ಗೊತ್ತಾವೊಡಾತೆ.
ಕರೆಂಟ್ ಶಾಕ್ ಹಾಕಿನ ಕೂಡ್ಲೆ ಕೈತಲ್ ದಕುಲು 108 ಗ್ ಫೋನ್ ಮಲ್ತ್ ದ್ ಆ್ಯಂಬುಲೆನ್ಸ್ ಡ್, ಮೆಗ್ಗಾನ್ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಆಂಡ ಅಲ್ಪದ ವೈದ್ಯೆರ್ ಮೊಕುಲು ರಡ್ಡ್ ಜನ ತೀರ್ ಪೋತೆರ್ ಪಂದ್ ತೆರಿಪಾದೆರ್. ತುಂಗಾ ನಗರ ಪೊಲೀಸ್ ಸ್ಟೇಷನ್ಡ್ ಕೇಸ್ ದಾಖಲ್ ಆತ್ಂಡ್.
ಕೇಂದ್ರ ಸರ್ಕಾರ ಅರಿ ಕೊರ್ಪಿನ ಇಚಾರಡ್ ರಾಜಕೀಯ ಮಲ್ದ್ಂಡ್ ಪಂದ್ ಆರೋಪ ಮಲ್ತಿನ ರಾಜ್ಯ ಸರ್ಕಾರ ಅನ್ನ ಭಾಗ್ಯ ಯೋಜನೆದ ಅನುಷ್ಠಾನದ ಬಗೆಟ್ ಇನಿ ಮಹತ್ವದ ಘೋಷಣೆ ಮಲ್ದ್ಂಡ್ .
ಇನಿ ಸಚಿವ ಸಂಪುಟ ಸಭೆ ನಡಪಾಯಿನ ಬೊಕ್ಕ ಸುದ್ದಿಗೋಷ್ಠಿಡ್ ಸಚಿವೆರ್ ಕೆ ಹೆಚ್ ಮುನಿಯಪ್ಪ ಪಾತೆರ್ದ್, ಪಡಿತರದಾರೆರೆಗ್ ಅರಿತ್ತ ಬದಲ್ ಕಾಸ್ ಕೊರ್ಪ ಪಂದ್ ಪಂಡೆರ್. ಜುಲೈ 1 ರ್ದ್ 10 ಕೆಜಿ ಅರಿ ಕೊರ್ಪ ಪಂದ್ ಭರವಸೆ ಕೊರ್ದ್ ಇತ್ತ. ಜನಕ್ಲೆಗ್ ಎಂಕುಲು ಕೊರಿನ ಭರವಸೆದಲೆಕನೇ ಕಾಸ್ ಕೊರಿಯೆರೆ ನಿರ್ಧಾರ ಮಲ್ದ ಪಂದ್ ಸಿದ್ದರಾಮಯ್ಯ ಪಂತೆರ್.
ರಾಜ್ಯಡ್ ಜನಕ್ಲೆಗ್ ಅರಿನ್ ಕೊರಿಯೆರೆ ಅರಿತ್ತ ಕೊರತೆ ಉಂಡು. ಇಂಚಾದ್ ಪ್ರತಿ ಕೆಜಿಗ್ 34 ರೂಪಾಯಿದಂಚ ಇಲ್ಲದ ಪ್ರತಿಯೊರಿ ಸದಸ್ಯಗ್ ರಾಜ್ಯ ಸರ್ಕಾರ 170 ರೂಪಾಯಿನ್ ಕೊರ್ಪುಂಡು. ಅನ್ನಭಾಗ್ಯ ಯೋಜನೆದ ಬದಲಾದ್ ಈ ಪರ್ಯಾಯ ವ್ಯವಸ್ಥೆನ್ ಮಲ್ತೊಂದು ಉಲ್ಲ. ಕಾರ್ಡ್ ಹೋಲ್ಡರ್ ಎಕೌಂಟ್ ಗ್ ಈ ಕಾಸ್ ಬೂರುಂಡು ಪಂದ್ ವಿಧಾನಸೌಧಡ್ ಸಚಿವೆರ್ ಮುನಿಯಪ್ಪ ಪಂಡೆರ್.
ಬಿಪಿಎಲ್ ಕಾರ್ಡ್ ಇಪ್ಪುನಕ್ಲೆಗ್ ಮಾತ್ರ ಈ ಯೋಜನೆದ ಲಾಭ ತಿಕ್ಕುಂಡು. ಕಾರ್ಡ್ದ ಅನುಸಾರವಾದ್ಇಲ್ಲದ ಯಜಮಾನನ ಎಕೌಂಟ್ ಗ್ ಬೇತೆ ಕುಟುಂಬಸ್ಥೆರೆಗ್ ಕೊರೊಡಾಯಿನ ಕಾಸ್ ಲ ಪೋಪುಂಡು. ಆಯಿನಾತ್ ಬೇಗಡೇ ಈ ಯೋಜನೆ ಬರಿಯೆರೆ ಉಂಡು ಪಂದ್ ತೆರಿಪಾಯೆರ್.
ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬೊಲ್ತೇರ್ ತಾಲೂಕ್ ದ ವತಿರ್ದ್ ಈ ತಾಲೂಕ್ ಡ್ ಮುಂಗಾರುದ ಸುರುತ್ತ ನೇಜಿದ ನಟ್ಟಿಗ್ ಫ್ರಾನ್ಸಿಸ್ ಮಿರಾoದ ಲಾಯಿಲ ಮೆರೆನ ಕಂಡಡ್ ಕೃಷಿ ಇಲಾಖೆದ ಬೊಲ್ತೇರ್ ದ ಸಹಾಯಕ ಕೃಷಿ ನಿರ್ದೇಶಕೆರಾಯಿನ ರಂಜಿತ್ ಕುಮಾರ್ ಟಿ.ಎಂ ಮೇರ್ ಚಾಲನೆ ಕೊರಿಯೆರ್.
ಈ ಲೇಸ್ ನ್ ಉದಿಪನ ಮಲ್ತಿನ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ದಕ್ಷಿಣ ಕನ್ನಡ ಜಿಲ್ಲೆದ ನಿರ್ದೇಶಕೆರ್ ಮಹಾಬಲ ಕುಲಾಲ್ ಮೇರ್ ಸಾಮಾನ್ಯ ಪದ್ಧತಿ ಬೊಕ್ಕ ಯಾಂತ್ರಿಕೃತ ಪದ್ಧತಿಗ್ ಇಪ್ಪುನ ವ್ಯತ್ಯಾಸ, ಯಂತ್ರದ ಮುಖೇನ ನೇಜಿದ ನಡ್ಪುನ ನಟ್ಟಿ, ಕರ್ಚಿ ಬೊಕ್ಕ ಆದಾಯ, ಬೊಲ್ತೇರ್ ತಾಲೂಕ್ ಡ್ ಇಪ್ಪುನಂಚಿನ ನೇಜಿದ ಕಂಡನ್ ಒರಿಪಾದ್ ನೇಜಿ ಕೃಷಿನ್ ಮೆಷಿನ್ ದ ಮುಖೇನ ಪ್ರತಿಯೊರಿಲ ಮಲ್ಪೊಡು ಪಂದ್ ಪಂಡೆರ್.
ಸಹಾಯಕ ಕೃಷಿ ನಿರ್ದೇಶಕೆರಾಯಿನ ರಂಜಿತ್ ಕುಮಾರ್ ಟಿ ಎಂ ಮೇರ್ ಕೃಷಿ ಇಲಾಖೆಡ್ ಜಯ, ಜ್ಯೋತಿ MO4 ನೇಜಿದ ಬಿತ್ತ್ ಸಬ್ಸಿಡಿಡ್ ತಿಕ್ಕುಂಡು. ನೆತ್ತ ಪ್ರಯೋಜನನ್ ಕೃಷಿಕೆರ್ ಪಡೆವೊಡು ಪಂದ್ ಪಂಡೆರ್.
ನೇಜಿದ ಕೃಷಿ ಒರಿಪಾಯೆರೆಗಾದ್ ಪ್ರತಿ ಹಂತಡ್ಲಾ ಮೆಷಿನ್ ಗಲಸ್ ದ್, ಪೊರ್ತುಗು ಸರಿಯಾದ್ ಕಮ್ಮಿ ಕರ್ಚಿಡ್ ಎಚ್ಚದ ಆದಾಯ ಪಡೆಯೆರೆ ವೈಜ್ಞಾನಿಕವಾದ್ ನೇಜಿದ ಕೃಷಿನ್ ಮೆಷಿನ್ ದ ಮುಖೇನ ಮಲ್ತ್ಂಡ ಎಚ್ಚದ ಲಾಭ ಪಡೆವೊಲಿ. ಜವನೆರ್ ಪಡಿಲ್ ಭೂಮಿನ್ ಅಭಿವೃದ್ಧಿ ಮಲ್ತ್ ದ್ ನೇಜಿದ ಕೃಷಿನ್ ಒರಿಪಾವುನ ಅನಿವಾರ್ಯ ಆತ್ಂಡ್ ಪಂದ್ ಪಂಡೆರ್.
ಈ ಪೊರ್ತುಡು ತಾಲೂಕ್ ದ ಯೋಜನಾಧಿಕಾರಿ ಸುರೇಂದ್ರ ಕುಮಾರ್, ಕೃಷಿಕೆರ್ ಫ್ರಾನ್ಸಿಸ್ ಮಿರಾoದ, ಸಿ ಎಚ್ ಎಸ್ ಸಿ ಪ್ರಬಂಧಕೆರ್ ಸಚಿನ್ ಕುಮಾರ್, ವಲಯ ಮೇಲ್ವಿಚಾರಕೆರ್ ಶಶಿಕಲಾ, ಸೇವಾ-ಪ್ರತಿನಿಧಿಲು ಬೊಕ್ಕ ಕೈತಲ್ದ ಕೃಷಿಕೆರ್ ಇತ್ತೆರ್.
ತಾಲೂಕ್ ದ ಕೃಷಿ ಮೇಲ್ವಿಚಾರಕೆರಾಯಿನ ರಾಮಕುಮಾರ್ ಮೇರ್ ಎದ್ಕೊಂದು, ಸೊಲ್ಮೆ ಸಂದಾಯೆರ್. ಬೊಕ್ಕ ಫ್ರಾನ್ಸಿಸ್ ಮಿರಾoದ ಮೆರೆನ 2 ಎಕ್ರೆ ನೆಜಿದ ಕಂಡಡ್ ಯಂತ್ರದ ಮುಖೇನ ನಟ್ಟಿ ಮಲ್ತೆರ್.
ಬಂಟ್ವಾಳ: ಲಾರಿ ಸ್ಕೂಟರ್ ಗ್ ಗುದ್ದುದು ಸ್ಕೂಟರ್ ದರೆಗ್ ಮಸ್ತ್ ಪೆಟ್ಟಾದ್ ಆಸ್ಪತ್ರೆಗ್ ದಾಖಲ್ ಆಯಿನ ಘಟನೆ ಅಂಗಾರೆ ಬಯ್ಯಗ್ ಪುಂಚಮೆಡ್ ನಡತ್ಂಡ್.
ಕಳಸಗುರಿ ನಿವಾಸಿ ಬಾಲಕೃಷ್ಣ ಶೆಟ್ಟಿ ಕೊಡಿಬೆಟ್ಟು ಪೆಟ್ಟಾಯಿನಾರ್. ಮೆರೆನ್ ಕುಡ್ಲದ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ಮೇರ್ ಐಸಿಯು ಘಟಕಡ್ ಚಿಕಿತ್ಸೆ ಪಡೆವೊಂದು ಉಲ್ಲೆರ್.
