April 2023

April 23-24: Muddadi Shri Maravandi Kodamanitaya Baidarkala Daivastana-Nema rituals and religious program ಎ.23-24: ಮುದ್ದಾಡಿ ಶ್ರೀ ಮಾರವಾಂಡಿ, ಕೊಡಮಣಿತ್ತಾಯ, ಬೈದರ್ಕಳ ದೈವೊಲ್ಯಡ್ ನೇಮ ಉಚ್ಚಯ, ಧಾರ್ಮಿಕ ಸಭೆ

ಬೊಲ್ತೇರ್: ಮುದ್ದಾಡಿ ಶ್ರೀ ಮಾರವಾಂಡಿ, ಕೊಡಮಣಿತ್ತಾಯ, ಬೈದರ್ಕಳ ದೈವೊಲ್ಯಡ್ ನೇಮ ಉಚ್ಚಯ ಬೊಕ್ಕ ಧಾರ್ಮಿಕ ಸಭೆ ಎ.23 ಬೊಕ್ಕ 24 ಕ್ಕ್ ನಡಪರೆ ಉಂಡು.

ಎ.23 ಐತಾರ ಬೊಲ್ಪುಗು ಶ್ರೀ ಲಕ್ಷ್ಮೀ ನಾರಾಯಣ ಅಸ್ರಣ್ಣ ಕುಂಞೋಡಿ ಮೆರೆನ ಪೌರೋಹಿತ್ಯಡ್, ಶುದ್ಧ ಕಲಶ, ಕುಂಭ ಪ್ರತಿಷ್ಠೆ, ಬಯ್ಯಗ್ ಗುತ್ತುಲೆರ್ದ್ ಭಂಡಾರ ಬರ್ಪುಂಡು. ಬೊಕ್ಕ ಕೊಡಿ ಏರುಂಡು. ಅವೆರ್ದ್ ಬಲಿ ಉಚ್ಚಯ ಆದ್ ರಾತ್ರೆ ಶ್ರೀ ಮಾರವಾಂಡಿ, ಕೊಡಮಣಿತ್ತಾಯ, ಮೈಸಂದಾಯ, ಕಲ್ಕುಡ ಕಲ್ಲುರ್ಟಿ ದೈವೊಲೆನ ನೇಮ ನಡಪರೆ ಉಂಡು.

ಎ.24 ಸೋಮಾರ ಬಯ್ಯಗ್ ಬಲಿ ಉಚ್ಚಯ, ಧಾರ್ಮಿಕ ಸಭೆ ನಡಪರೆ ಉಂಡು. ಈ ಲೇಸ್ ದ ಸಭಾಧ್ಯಕ್ಷತೆನ್ ಉಜಿರೆ ಎಸ್ ಡಿ ಯಂ ಎಜುಕೇಶನಲ್ ಟ್ರಸ್ಟ್ (ರಿ.) ದ ಕಾರ್ಯದರ್ಶಿ ಪ್ರೊ.ಸತೀಶ್ ಚಂದ್ರ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಕುಡ್ಲ ಕರಾವಳಿ ಅಭಿವೃದ್ಧಿ ಪ್ರಾಧಿಕಾರದ ನಿಕಟಪೂರ್ವ ಅಧ್ಯಕ್ಷೆರ್ ಮಟ್ಟಾರ್ ರತ್ನಾಕರ ಹೆಗ್ಡೆ ಬರಿಯೆರೆ ಉಲ್ಲೆರ್. ಗೌರವ ಉಪಸ್ಥಿತಿಡ್ ದೇಲಂಪುರಿ-ಕರಿಮಣೇಲು ಶ್ರೀ ಮಹಾದೇವ ಮಹಾಗಣಪತಿ ದೇವಲ್ಯದ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಬಾಲಕೃಷ್ಣ ಭಟ್, ವೇಣೂರು ವರ್ತಕರ ಸಂಘದ ಅಧ್ಯಕ್ಷೆರ್ ಕೆ. ಭಾಸ್ಕರ ಪೈ ಪಾಲ್ ಪಡೆಯೆರೆ ಉಲ್ಲೆರ್. ರಾತ್ರೆ ಶ್ರೀ ಬ್ರಹ್ಮ ಬೈದರ್ಕಳ ಬೊಕ್ಕ ಮಾಣಿಬಾಲೆ ನೇಮ ನಡಪರೆ ಉಂಡು.

ಭಕ್ತಾದಿಲು ಮಾತೆರ್ಲಾ ಬತ್ತ್ ದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಪೆರ್ಮಾಣುಗುತ್ತುದ ಸುರೇಶ್ ಕುಮಾರ್ ಅರಿಗ, ಮಾರಗುತ್ತುದ ವಿಜಯರಾಜ ಅಧಿಕಾರಿ ಬೊಕ್ಕ ಮುದ್ದಾಡಿ ಶ್ರೀ ಮಾರವಾಂಡಿ ಕೊಡಮಣಿತ್ತಾಯ ಬೈದರ್ಕಳ ದೈವೊಲ್ಯದ ಆಡಳಿತ ಮೊಕ್ತೇಸರೆರ್ ಲೆಪ್ಪೋಲೆಡ್ ತೆರಿಪಾದೆರ್.

Indian Railways earns income of 2.40 lakh crores ಭಾರತೀಯ ರೈಲ್ವೆಗ್ 2.40 ಲಕ್ಷ ಕೋಟಿ ಆದಾಯ

2022-23 ನೇ ಆರ್ಥಿಕ ವರ್ಷಡ್ ಭಾರತೀಯ ರೈಲ್ವೆ 2.40 ಲಕ್ಷ ಕೋಟಿ ಆದಾಯನ್ ಪಡೆತ್ಂಡ್.

ಉಂದು ದುಂಬುದ ವರ್ಷರ್ದ್ 49 ಸಾರ ಕೋಟಿ ಎಚ್ಚ ಪಂದ್ ರೈಲ್ವೆ ಸಚಿವಾಲಯ ತೆರಿಪಾದ್ಂಡ್. ಸರಕು ಸಾಗಣೆ ಆದಾಯ ಶೇ.15 ದಾತ್ ಎಚ್ಚಾತ್ಂಡ್. ಪ್ರಯಾಣಿಕೆರೆನ ರೈಲ್ ಲೆರ್ದ್ 63300 ಕೋಟಿ ಆದಾಯ ಪಡೆತ್ಂಡ್. ‌ಶೇ.61 ದಾತ್ ಸಾರ್ವಕಾಲಿಕ ಎಚ್ಚ ದಾಖಲ್ ಆತ್ಂಡ್.

Indian Railways earns income of 2.40 lakh crores

In the financial year ending 2022-23 Indian Railways earns income of 2.40 lakh crores. This is 49 thousand crore more than the previous year. Goods transport has increased by 15 percent said sources from the railway ministry.

Rains likely in the state in the next four days ರಾಜ್ಯಡ್ ನನ 4 ದಿನ ಬರ್ಸ ಬರ್ಪಿನ ಅಂದಾಜಿ

ಬೆಂಗ್ಲೂರ್: ರಾಜ್ಯಡ್ ನನದ 4 ದಿನ ಬರ್ಸ ಬರ್ಪಿನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆ ಸೂಚನೆ ಕೊರ್ತುಂಡು.‌

ಚಿಕ್ಕಮಗಳೂರು, ಕೊಡಗು, ಶಿವಮೊಗ್ಗ, ಬೆಳಗಾವಿ, ಬೀದರ್, ಕಲಬುರಗಿ, ರಾಯಚೂರು, ವಿಜಯಪುರ ಬೊಕ್ಕ ಯಾದಗಿರಿಟ್ಟ್ ಎ.19ರ್ದ್ ಎ.22 ಮುಟ್ಟ, ಒಡಿಪು, ದಕ್ಷಿಣ ಕನ್ನಡ, ಉತ್ತರ ಕನ್ನಡ, ಬೆಂಗ್ಲೂರ್, ಬೆಂ.ಗ್ರಾಮಾಂತರ, ಚಿತ್ರದುರ್ಗ, ಮೈಸೂರ್ ಬೊಕ್ಕ ತುಮಕೂರುಡ್ ಎ.21ರ್ದ್ ನನದ ರಡ್ಡ್ ದಿನ ತೆಡಿಲ್ ಮೆಂಚ್ ದ ಬರ್ಸ ಬರ್ಪುಂಡು ಪಂದ್ ಇಲಾಖೆ ಪೊಲಬು ಕೊರ್ತುಂಡು. ರಾಜ್ಯಡ್ ಉಷ್ಣಾಂಶ ಎಚ್ಚ ಕಮ್ಮಿ ಆವೊಂದು ಉಂಡು.

ಸೋಮಾರ ಕಲಬುರಗಿಡ್ 40.7, ರಾಯಚೂರುಡ್ 40, ಗದಗ 38.7, ವಿಜಯಪುರ 38, ಚಿತ್ರದುರ್ಗ ಬೊಕ್ಕ ಧಾರವಾಡಡ್ ತಲಾ 37 ಡಿಗ್ರಿ ಸೆಲ್ಸಿಯಸ್ ಉಷ್ಣಾಂಶ ದಾಖಲ್ ಆತ್ಂಡ್.

Rains likely in the state in the next four days

Bangalore: The weather report says that there could be rains in the state in the next four days.

The temperature all over the state is increasing with Gulbarga recording the highest at 40.7 celcius degrees.

JDS candidates list to be released today ಇನಿ ಜೆಡಿಎಸ್ ಅಭ್ಯರ್ಥಿಲೆನ ಪಟ್ಟಿ ಬುಡುಗಡೆ

ನಾಮಪತ್ರ ಸಂದಾಯೆರೆ ನನಲ ಕೇವಲ 2 ದಿನ ಬಾಕಿ ಇಪ್ಪುನ ಪೊರ್ತುಡು ಜೆಡಿಎಸ್ ಇನಿ 40-50 ಅಭ್ಯರ್ಥಿಲೆನ ಪುದರ್ ಘೋಷಣೆ ಮಲ್ಪುನ ಅಂದಾಜಿ ಉಂಡು.

ಒಟ್ಟು 224 ಕ್ಷೇತ್ರದ ಪೈಕಿ ಜೆಡಿಎಸ್ 148 ಕಡೆಟ್ಟ್ ಅಭ್ಯರ್ಥಿಲೆನ ಘೋಷಣೆ ಮಲ್ದ್ಂಡ್.

JDS candidates list to be released today

With just two days left for filing nomination the list of 40-50 candidates from the JDS is to be announced today. About 148 names have been already announced.

ಎ.23: ಪಾವಂಜೆ ದೇವಾಡಿಗ ಸಂಘದ ಮುತಾಲಿಕೆಡ್ ಶನೀಶ್ವರ ಪೂಜೆ, ಸತ್ಯನಾರಾಯಣ ಪೂಜೆ, ಪ್ರತಿಭಾ ಪುರಸ್ಕಾರ

ಹಳೆಯಂಗಡಿ: ಪಾವಂಜೆ ದೇವಾಡಿಗ ಸಮಾಜ ಸೇವಾ ಸಂಘ (ರಿ.), ದೇವಾಡಿಗ ಯುವ ವೇದಿಕೆ, ದೇವಾಡಿಗ ಮಹಿಳಾ ವೇದಿಕೆ ಬೊಕ್ಕ ದೇವಾಡಿಗ ಸೇವಾ ಟ್ರಸ್ಟ್ (ರಿ) ಒಟ್ಟುಸೇರಿಗೆಡ್ ವಿದ್ಯಾರ್ಥಿ ವೇತನ ಪಟ್ಟುನ, ಮಾನಾದಿಗೆ ಮಲ್ಪುನ ಲೇಸ್, ಸಾಮೂಹಿಕ ಶ್ರೀ ಶನೀಶ್ವರ ಪೂಜೆ ಬೊಕ್ಕ ಶ್ರೀ ಸತ್ಯನಾರಾಯಣ ಪೂಜೆ ಎ.23 ಐತಾರ ಬೊಲ್ಪುಗು ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಲ್ಯಡ್ ನಡಪರೆ ಉಂಡು.

ಕುಡ್ಲ ಎ.ಜೆ. ಆಸ್ಪತ್ರೆದ ಕ್ಯಾನ್ಸರ್ ತಜ್ಞೆರ್ ಡಾ. ವಿಶ್ವನಾಥ ಶೇರಿಗಾರ್ ಲೇಸ್ ದ ಉದಿಪನ ಮಲ್ಪರೆ ಉಲ್ಲೆರ್. ಗುರ್ಕಾರ್ಮೆನ್ ಸಂಘದ ಅಧ್ಯಕ್ಷೆರ್ ರಾಮದಾಸ್ ಪಾವಂಜೆ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ದೇವಾಡಿಗ ಸಂಘ (ರಿ.) ಬೊಂಬೈ ನೆತ್ತ ಅಧ್ಯಕ್ಷೆರ್ ಪ್ರವೀಣ್ ನಾರಾಯಣ್ ಬೊಂಬೈ, ಬಾರ್ಕೂರು ಶ್ರೀ ಏಕನಾಥೇಶ್ವರಿ ದೇವಲ್ಯ ಟ್ರಸ್ಟ್ ದ ಅಧ್ಯಕ್ಷೆರ್ ಅಣ್ಣಯ್ಯ ಶೇರಿಗಾರ್, ಬೊಂಬೈದ ಉದ್ಯಮಿ ಸುಧಾಕರ ದೇವಾಡಿಗ ಕಾರ್ಲ, ಬೊಂಬೈ ಬಾಂದ್ರ ಶ್ರೀ ಧರ್ಮಶಾಸ್ತ ಭಕ್ತ ವೃಂದ ಮಂಡಳಿದ ಅಧ್ಯಕ್ಷೆರ್ ರಾಮಣ್ಣ ದೇವಾಡಿಗ, ಬೆಂಗ್ಲೂರ್ ನವೋದಯ ಸಂಘ ಮಹಿಳಾ ವೇದಿಕೆದ ಅಧ್ಯಕ್ಷೆರ್ ರಾಜೇಶ್ವರೀ ಹರಿ ದೇವಾಡಿಗ ಬರಿಯೆರೆ ಉಲ್ಲೆರ್.

ಈ ಲೇಸ್ ಡ್ ಪೆರಿಯ ನಿವೃತ್ತ ಶಿಕ್ಷಕಿ ಮೋಹಿನಿ ಕಾಮೆರೊಟ್ಟು, ಕೃಷಿ ಜನಪದ ಕಲಾವಿದೆ ರಮೇಶ್ ದೇವಾಡಿಗ ಪಾವಂಜೆ, ಪ್ರಗತಿಪರ ಕೃಷಿಕೆ ವಾಸು ದೇವಾಡಿಗ ಎಳತ್ತೂರು ಮೊಕ್ಲೆಗ್ ಮಾನಾದಿಗೆ ಮಲ್ಪರೆ ಉಂಡು. ಅತ್ತಂದೆ, ಕಿನ್ನಿಗೋಳಿ ದಿ. ಉಮ್ಮಕ್ಕ ಮೊಯಿಲ್ದಿ ನೆಂಪುಗಾದ್ ವಿದ್ಯಾರ್ಥಿ ವೇತನ, ಪ್ರತಿಭಾ ಪುರಸ್ಕಾರ ಲೇಸ್ ನಡಪರೆ ಉಂಡು.

ಈ ಲೇಸ್ ಡ್ ಸಮಾಜ ಬಾಂಧವೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಸಂಘದ ಅಧ್ಯಕ್ಷೆರ್ ರಾಮದಾಸ್ ಪಾವಂಜೆ ಬೊಕ್ಕ ಪ್ರಧಾನ ಕಾರ್ಯದರ್ಶಿ ಜಗದೀಶ್ ಪಲಿಮಾರ್ ಬಿನ್ನಾಪು ಮಲ್ದೆರ್.

ಕುಲಶೇಖರ ಶ್ರೀ ವೀರನಾರಾಯಣ ದೇವಲ್ಯದ ಪುನರ್ ಪ್ರತಿಷ್ಠೆ ಬ್ರಹ್ಮಕಲಶದ ಲೆಪ್ಪೋಲೆ ಬುಡುಗಡೆ

ಬೊಂಬೈ: ಮಸ್ತ್ ಕಾಲರ್ದಿಂಚ ಇತಿಹಾಸ ಪಡೆಯಿನ ಕುಡ್ಲದ ಕುಲಶೇಖರ ಶ್ರೀ ವೀರನಾರಾಯಣ ದೇವಲ್ಯದ ಪುನರ್ ಪ್ರತಿಷ್ಠೆ ಬ್ರಹ್ಮಕಲಶ ಮೇ 14-25 ಮುಟ್ಟ ನಡಪರೆ ಉಂಡು.

ಈ ಲೇಸ್ ಗ್ ಬೊಂಬೈದಕ್ಲೆನ ಕೊಡುಗೆ ಅಪಾರ, ಉಂದು ಕುಲಾಲ ಸಮಾಜದ ಮಸ್ತ್ ಮಲ್ಲ ಲೇಸ್ ಆತ್ಂಡ್. ಮೇ ತಿಂಗೊಲ್ದ ರಜೆತ್ತ ಪೊರ್ತುಡು ನಡತೊಂದು ಇಪ್ಪುನ ಪತ್ತ್ ದಿನತ್ತ ಉಚ್ಚಯಗ್ ಬೊಂಬೈದ ಕುಲಾಲ ಬಾಂಧವೆರ್ ಬೊಕ್ಕ ಭಕ್ತಾಭಿಮಾನಿಲು ಎಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ಬ್ರಹ್ಮಕಲಶ ಸಮಿತಿದ ಅಧ್ಯಕ್ಷೆರ್ ಬಿ. ಪ್ರೇಮಾನಂದ ಕುಲಾಲ್ ಬಿನ್ನಾಪು ಮಲ್ತೆರ್.

ಎ.16 ಕ್ಕ್ ಬಯ್ಯಗ್ ಬೊಂಬೈದ ಸಂತಾಕ್ರೂಸ್ ಪೂರ್ವ ಪೇಜಾವರ ಮಠತ್ತ ಚಾವಡಿಡ್ ಇತ್ತಿನ ಮಾತ ಗಣ್ಯೆರೆನೊಟ್ಟಿಗೆ ಲೇಸ್ ದ ಲೆಪ್ಪೋಲೆನ್ ಬುಡುಗಡೆ ಮಲ್ತ್ ದ್ ಪ್ರಾಸ್ತಾವಿಕ ಪಾತೆರ್ದ್ ಮೇರ್, ದಕ್ಷಿಣ ಕನ್ನಡ ಬೊಕ್ಕ ಕೈತಲ್ ದ ಜಿಲ್ಲೆಲೆರ್ದ್ ಭಕ್ತಾಭಿಮಾನಿಲು ಬತ್ತ್ ದ್, 400 ಕ್ಕ್ ಎಚ್ಚ ಜನಕುಲು ಪ್ರತಿದಿನ ಕರಸೇವೆ ಮಲ್ತೊಂದು ಉಲ್ಲೆರ್. ಮೇ 14 ಕ್ಕ್ ಕದ್ರಿ ದೇವಲ್ಯರ್ದ್ ಪುದೆಕಾಣಿಕೆ ಪಿದಾಡಿಯೆರೆ ಉಂಡು. 5 ಸಾರರ್ದ್ ಎಚ್ಚ ಭಕ್ತೆರ್ ಪಾಲ್ ಪಡೆಯೆರೆ ಉಲ್ಲೆರ್. ಬೊಕ್ಕ ಈ ಲೇಸ್ ಡ್ ಪುಗರ್ತೆದ ಸ್ವಾಮಿಲು ಪಾಲ್ ಪಡೆಯೆರೆ ಉಲ್ಲೆರ್. ಒಟ್ಟು ಈ ಧಾರ್ಮಿಕ ಕಾರ್ಯಡ್ ಒಂಜರೆ ಲಕ್ಷರ್ದ್ ಎಚ್ಚ ಭಕ್ತೆರ್ ಸೇರುನ ಅಂದಾಜಿ ಉಂಡು. ಪತ್ತ್ ದಿನತ್ತ ಲೇಸ್ ಡ್ ದೇವಲ್ಯಗ್ ಬೊಡಾಯಿನ ಬೇತೆ ಬೇತೆ ಸಾಮಗ್ರಿಲೆನ ಬಗೆಟ್ ಬೊಂಬೈ ಸಮಿತಿದ ಅಧ್ಯಕ್ಷೆರೆಗ್ ಬಿನ್ನಾಪು ಸಂದಾದ್ಂಡ್. ಬೊಂಬೈದ ಭಕ್ತೆರ್ ಈ ಲೇಸ್ ಗ್ ಕೈಜೋಡಿಸಾವೊಡು. ಅಂಚೆನೆ ನೆತ್ತ ಲೆಪ್ಪೋಲೆ ಪ್ರತಿಯೊರಿಗ್ ಲ ತಿಕ್ಕುಲೆಕ್ಕ ಆವೊಡು ಪಂದ್ ಪಂಡೆರ್.

ಕುಲಾಲ ಸಂಘ ಬೊಂಬೈದ ಅಧ್ಯಕ್ಷೆರ್ ರಘು ಮೂಲ್ಯ ಪಾದೆಬೆಟ್ಟು ಮೇರ್ ಪಾತೆರ್ದ್, ಬೊಂಬೈದ ಕುಲಾಲ ಸಮಾಜ ಬಾಂಧವೆರ್ ಬೊಕ್ಕ ಭಕ್ತೆರ್ ಪುದೆಕಾಣಿಕೆದ ಸಾಮಗ್ರಿಲೆಗ್ ಸಹಕರಿಸಾವೊಡು. ನಮ್ಮ ಕುಲದೇವೆರೆನ ಜಾತ್ರೆಗ್ ನಮ ಮಾತ ಅಡೆಗ್ ಪೋದು ಸ್ವಯಂ ಸೇವಕೆರಾದ್ ಬೇಲೆ ಮಲ್ಪೊಡು. ಈ ಅವಕಾಶ ತಿಕ್ಕುನೇ ನಮ್ಮ ಮಾತೆರ್ನಲ ಸೌಭ್ಯಾಗ್ಯ ಪಂದ್ ಪಂಡೆರ್.

ಶ್ರೀ ವೀರನಾರಾಯಣ ದೇವಲ್ಯದ ಪುನರ್ ಪ್ರತಿಷ್ಠೆ ಬ್ರಹ್ಮಕಲಶ ಬೊಂಬೈ ಸಮಿತಿದ ಅಧ್ಯಕ್ಷೆರ್ ಬಿ. ದಿನೇಶ್ ಕುಲಾಲ್, ಕುಲಾಲ ಸಂಘ ಬೊಂಬೈದ ನಿಕಟಪೂರ್ವ ಅಧ್ಯಕ್ಷೆರ್ ದೇವದಾಸ ಕುಲಾಲ್, ಶ್ರೀ ವೀರನಾರಾಯಣ ದೇವಲ್ಯದ ಬ್ರಹ್ಮಕಲಶ ಸಮಿತಿದ ಗೌರವಾಧ್ಯಕ್ಷೆರ್ ಸುನಿಲ್ ಆರ್. ಸಾಲ್ಯಾನ್, ಜ್ಯೋತಿ ಕ್ರೆಡಿಟ್ ಸೊಸೈಟಿದ ಕಾರ್ಯಾಧ್ಯಕ್ಷೆರ್ ಗಿರೀಶ್ ಬಿ. ಸಾಲ್ಯಾನ್, ದಾನಿ ಸುರೇಖಾ ಆರ್ ಕುಲಾಲ್, ತಾನದ ಪುನರ್ ಪ್ರತಿಷ್ಠೆ ಬ್ರಹ್ಮಕಲಶದ ಪ್ರಧಾನ ಕಾರ್ಯದರ್ಶಿ ಗಿರಿಧರ ಜೆ ಮೂಲ್ಯ, ಬೊಂಬೈ ಸಮಿತಿದ ಕಾರ್ಯದರ್ಶಿ ಆನಂದ ಬಿ. ಮೂಲ್ಯ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಕೋಶಾಧಿಕಾರಿ ಉಮೇಶ್ ಬಂಗೇರ ಅಬಾರ ಮನ್ನಿಸಾಯೆರ್. ಪುದೆಕಾಣಿಕೆ ಬಿನ್ನಾಪು ಪತ್ರನ್ ಕುಲಾಲ ಸಂಘ ಬೊಂಬೈದ ಅಧ್ಯಕ್ಷೆರೆಗ್ ಒಂಜಿ ದಿನತ್ತ ಲೇಸ್ ನ್ ಆಯೋಜನೆ ಮಲ್ತಿನ ಪ್ರಾಯೋಜನೆ ಮಲ್ಪುನ ಬಿನ್ನಾಪುನ್ ಜ್ಯೋತಿ ಕ್ರೆಡಿಟ್ ಸೊಸೈಟಿದ ಕಾರ್ಯಾಧ್ಯಕ್ಷೆರೆಗ್ ಕೊರಿಯೆರ್.

ಬೊಕ್ಕ ಕುಲಾಲ ಸಂಘದ ಉಪಾಧ್ಯಕ್ಷೆರ್ ಡಿಐ ಮೂಲ್ಯ, ಮಹಿಳಾ ವಿಭಾಗದ ಮಾಜಿ ಕಾರ್ಯದರ್ಶಿ ಮಾಲತಿ ಅಂಚನ್, ಜ್ಯೋತಿ ಕೋ ಆಪರೇಟಿವ್ ಕ್ರೆಡಿಟ್ ಸೊಸೈಟಿದ ಕಾರ್ಯದರ್ಶಿ ಪಿ ಶೇಖರ್ ಮೂಲ್ಯ, ಕುಲಾಲ ಸಂಘದ ಥಾನೆ- ಕರ್ಜತ್ ಕೈತಲ್ ದ ಸಮಿತಿದ ಕಾರ್ಯಾಧ್ಯಕ್ಷೆರ್ ಲಕ್ಷ್ಮಣ್ ಸಿ ಮೂಲ್ಯ, ಕುಲಾಲ ಸಂಘದ ಸಿ ಎಸ್ ಟಿ – ಮುಲುಂಡ್ ಕೈತಲ್ ದ ಸಮಿತಿ ಕಾರ್ಯಾಧ್ಯಕ್ಷೆರ್ ಸಂಜೀವ ಬಂಗೇರ, ನಾನಿಲ್ತಾರ್ ಅಭಿಮಾನಿ ಬಳಗ ಬೊಂಬೈ ಮುಂಡ್ಕೂರು ಅಧ್ಯಕ್ಷೆರ್ ಹರೀಶ್ ಮೂಲ್ಯ, ಸಂಚಾಲಕೆರ್ ಕೃಷ್ಣ ಮೂಲ್ಯ ತನ್ನ ಅಭಿಪ್ರಾಯ ತೆರಿಪಾಯೆರ್.

ಆಫ್ರಿಕಾಡ್ ಬಿಸು ಆಚರಣೆದ ಮುಖೇನ ತುಳುನಾಡ್ ದ ಸಂಸ್ಕೃತಿನ್ ತೂಪಾಯಿನ ಬಂಟರ ಸಂಘ ಮೂಡಾಯಿ

ಆಫ್ರಿಕಾ: ಬಂಟರ ಸಂಘ ಮೂಡಾಯಿ ಆಫ್ರಿಕಾದ ವತಿರ್ದ್ ಕೀನ್ಯಾ ಚೌಪಟಿ, ವೆಸ್ಟ್‌ಲ್ಯಾಂಡ್‌ ದ ನೈರೋಬಿಡ್ ಎ‌.16 ಕ್ಕ್ ಐತಾರ ತುಳುವೆರೆ ಪೊಸ ವರ್ಷ ಬಿಸು ಪರ್ಬದ ಅಚರಣೆ ಮಲ್ತೆರ್. ಬೊಕ್ಕ ಬಿಸುತ್ತ ಇಸೇಸ ತೆನಸ್ ಲೆನ್ ಮಲ್ತ್ ದ್ ಇತ್ತೆರ್.

ಈ ಪೊರ್ತುಡು ಸಂಘದ ಅಧ್ಯಕ್ಷೆರ್ ಶೈಲೇಶ್‌ ಶೆಟ್ಟಿ, ಉಪಾಧ್ಯಕ್ಷೆರ್ ಹರೀಶ್‌ ಶೆಟ್ಟಿ, ಖಜಾಂಚಿ ರವಿ ಶೆಟ್ಟಿ, ಕಾರ್ಯದರ್ಶಿ ಅಭಿಜಿತ್‌ ಸೂಡ, ಸಾಂಸ್ಕೃತಿಕ ಕಾರ್ಯದರ್ಶಿ ಸಂದೀಪ್‌ ಸಾಮಾನಿ ಬೊಕ್ಕ ಮಾತ ಸದಸ್ಯೆರ್ ಇತ್ತೆರ್.

ಅಭಿಮಾನಿಲೆನ ಒಟ್ಟುಗು ಬೆದ್ರಡ್ ನಾಮಿನೇಶನ್ ಪಾಡಿಯೆರ್ ಬಿಜೆಪಿ ಅಭ್ಯರ್ಥಿ ಉಮಾನಾಥ ಕೋಟ್ಯಾನ್

ಬೆದ್ರ: ಹಾಲಿ ಶಾಸಕೆರ್, ಬಿಜೆಪಿ ಅಭ್ಯರ್ಥಿ ಉಮಾನಾಥ ಕೋಟ್ಯಾನ್ ಮೇರ್ ಇನಿ ಆಡಳಿತ ಸೌಧಡ್ ನಾಮಪತ್ರ ಸಂದಾಯೆರ್.

ಬೊಲ್ಪುಗು ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಗ್ ಬೊಕ್ಕ ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯಡ್ ಪೂಜೆ ಮಲ್ತ್ ದ್, ಬೊಕ್ಕ ಬೆದ್ರ ವೆಂಕಟರಮಣ ದೇವಲ್ಯ, ಹನುಮಂತ ದೇವಲ್ಯದ ಕೈತಲ್ ರ್ದ್ ಮೆರವಣಿಗೆದ ಮುಖೇನ ಬತ್ತ್ ದ್ ನಾಮಪತ್ರ ಸಂದಾದೆರ್.

ಈ ಪೊರ್ತುಡು ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್, ಜಿಲ್ಲಾಧ್ಯಕ್ಷೆರ್ ಸುದರ್ಶನ್, ಮುಖಂಡೆರ್ ಈಶ್ವರ ಕಟೀಲ್, ಕಸ್ತೂರಿ ಪಂಜ, ಸುನಿಲ್ ಆಳ್ವ, ಮೇಘನಾಥ ಶೆಟ್ಟಿ ಇತ್ತೆರ್.

ಅಭಿಮಾನಿಲು ಬೊಕ್ಕ ಬಿಜೆಪಿ ಕಾರ್ತಕರ್ತೆರ್ ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆದಿತ್ತೆರ್. ಅಂಚೆನೆ ಬರ್ಪುನಕ್ಲೆಗ್ ಬಸ್ ತ್ತ ವ್ಯವಸ್ಥೆಲ ಇತ್ಂಡ್. ಬೊಲ್ಪುರ್ದೇ ಪೇಂಟೆ ಇಡೀ ಜನ ಸೇರ್ದಿತ್ತೆರ್.