ಪುತ್ತೂರ್ : ತುಳುನಾಡ್ ಜಿಲ್ಲೆದ ಕಂಬಳ ಸಮಿತಿದ ಸೂಚನೆದಂಚನೆ ಬೊಕ್ಕ ಪುತ್ತೂರ್ ಕಂಬಳದ ಅಧ್ಯಕ್ಷೆರಾಯಿನ ಚಂದ್ರಹಾಸ ಶೆಟ್ರ್ ನ ಸಲಹೆದಂಚನೆ 30ನೇ ವರ್ಷದ ಪುತ್ತೂರ್ ‘ಕೋಟಿ ಚೆನ್ನಯ’ ಜೋಡುಕರೆ ಕಂಬಳ 2023 ಫೆ.4 ದಾನಿ ಪುತ್ತೂರ್ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ಕಂಡಡ್ ನಡಪುಂಡು ಪಂದ್ ಪ್ರಧಾನ ಕಾರ್ಯದರ್ಶಿ ದಿನೇಶ್ ಕುಲಾಲ್ ಪಿ.ವಿ ಪ್ರಕಟಣೆಡ್ ತೆರಿಪಾದೆರ್.
ಸುಬ್ರಹ್ಮಣ್ಯ: ಗೋಣಿ ಚೀಲಡ್ ಕಟ್ಟ್ ದ್ ಪೆತ್ತದ ತರೆ ತಿಕ್ಕಿನ ಘಟನೆ ಐನೆಕಿದು ಗ್ರಾಮದ ಕೊಪ್ಪಲಗದ್ದೆಡ್ ನಡತ್ಂಡ್.
ಯೇರಾ ಕಿಡಿಗೇಡಿಲು ಪೆತ್ತದ ತರೆನ್ ತುಂಡು ಮಲ್ತ್ ದ್ ಈ ಜಾಗೆಡ್ ದಕ್ ದ್ ಪೋತೆರ್.ನೆತ್ತ ಬಗೆಟ್ ಸುಬ್ರಹ್ಮಣ್ಯದ ಠಾಣಾಧಿಕಾರಿಲು ಜಾಗೆಗ್ ಬತ್ತ್ಂದ್ ಮಹಜರು ಮಲ್ತೆರ್. ಬೊಕ್ಕ ಸುಬ್ರಹ್ಮಣ್ಯದ ಪಶು ವೈದ್ಯಾಧಿಕಾರಿಲು ಪೆತ್ತದ ತರೆತ ಪೋಸ್ಟ್ ಮಾರ್ಟಂ ಮಲ್ತೆರ್.
ಪುತ್ತೂರ್: ‘ಪಿಲಿ ರಾಧಣ್ಣ’ ಬೊಕ್ಕ ಬಳಗರ್ದ್ ಊದು ಪೂಜೆ ಕಾರ್ಯಕ್ರಮ ಇನಿ ಬಯ್ಯಗ್ 7 ಗಂಟೆರ್ದ್ ಕೊಂಬೆಟ್ಟು ಆದಿದ್ರಾವಿಡ ಬ್ರಾಹ್ಮಣ ಸಭಾಂಗಣಡ್ ನಡಪರೆ ಉಂಡು.
‘ಪಿಲಿ ರಾಧಣ್ಣ’ ಬೊಕ್ಕ ಬಳಗರ್ದ್ 46ನೇ ವರ್ಷದ ಪಿಲಿ ನಲಿಕೆ ಕಾರ್ಯಕ್ರಮ ಅ.5 ದಾನಿ ಬೊಲ್ಪುಗ್ 10 ಗಂಟೆರ್ದ್, ಸುಮಾರ್ ಕಡೆಟ್ ನಡಪುಂಡು.
ಅಂಚನೆ ಸುಮಾರ್ 46 ವರ್ಸರ್ದ್ ಪಿಲಿ ವೇಷ ಪಾಡ್ದ್ ಜನಕುಲೆನ್ ಖುಷಿ ಪಡಿಸಾವೊಂದು ಇತ್ತಿನ ‘ಪಿಲಿ ರಾಧಣ್ಣ’ ಬೊಕ್ಕ ಬಳಗದಕುಲು ಪುತ್ತೂರ್ ಮಾತ್ರ ಅತ್ತ್ಂದೆ ಜಿಲ್ಲೆದ ಸುಮಾರ್ ಕಡೆಟ್ ಅಭಿಮಾನಿಲೆನ ಮನಸ್ ಗೆಂದ್ ದೆರ್.
ಬಿಲ್ಲವ ಸಂಘ ಕುವೈಟ್ ಮೊಕ್ಲೆನ ಮುತಾಲಿಕೆಡ್ ಬಿಲ್ಲವ ಚಾವಡಿ – 2022, 10ನೇ ವರ್ಷದ ಲೇಸ್ ಸೆಪ್ಟೆಂಬರ್ 30 ತಾರೀಕ್ ಗ್ ಅಬ್ಬಸಿಯದ ಅಸ್ಪಾರ್ ಇಂಡಿಯನ್ ಇಂಟರ್ ನ್ಯಾಷನಲ್ ಶಾಲೆಡ್ ಭಾರೀ ಗೌಜಿಡ್ ನಡತ್ಂಡ್.
ಈ ಲೇಸ್ ಡ್ ತುಳುನಾಡ್ಡ್ 300ರ್ದ್ ಎಚ್ಚ ಯಶಸ್ವಿ ಪ್ರದರ್ಶನ ಕೊರಿನ ಪುಗರ್ತೆದ ಕೌಟುಂಬಿಕ ಹಾಸ್ಯ ನಾಟಕ ಬೈರಾಸ್ ಭಾಸ್ಕರೆ ನಾಟಕ ಪ್ರದರ್ಶನ ಆಂಡ್. ಅಂಚನೆ ಬಿಲ್ಲವ ಸಂಘ ಕುವೈಟ್ ಮೊಕುಲು ಕರಿನ 10 ವರ್ಷ ರ್ದ್ ನೆತ್ತೆರ್ ದಾನ, ಕಲ್ಪಾರ್ಥಿಲೆಗ್ ವಿದ್ಯಾರ್ಥಿ ವೇತನ ಕೊರ್ಪಿನವು ಅಂಚನೆ ಸೀಕ್ ಡ್ ಇತ್ತಿನಕ್ಲೆಗ್ ಪಣವುದ ಸಕಾಯನ್ ಮಲ್ತೊಂದು ಬೈದೆರ್. ಈ ಲೇಸ್ ಡ್ ಮಸ್ತ್ ಮಾಮಲ್ಲ ಬಿನ್ನೆರ್ ಸೇರಿನಂಚನೆ ಅಲ್ಪದ ಜನಕುಲು ಪಾಲ್ ಪಡೆದಿತ್ತೆರ್.
ಉತ್ತರಾಖಂಡದ ದೌಪದಿ ದಂಡ-2 ಪರ್ವತ ಶಿಖರಡ್ ಅಂಗಾರೆದಾನಿ ಹಿಮ ಜರಿದಿನೆಡ್ದಾವರ ನೆಹರು ಪರ್ವತಾರೋಹಣ ಸಂಸ್ಥೆದ 20 ಪರ್ವತಾರೋಹಿಲು ತಿಕ್ಕೊಂದೆರ್. ಜಿಲ್ಲಾಡಲಿತರ್ದ್ ಸರಿಯಾಯಿನ ಪರಿಹಾರ ಬೊಕ್ಕ ರಕ್ಷಣಾ ಕಾರ್ಯಾಚರಣೆ ನಡತೊಂದು ಉಂಡು. ಒರಿನ 21 ಜನನ್ ರಕ್ಷಿಸರೆ ಪ್ರಯತ್ನ ಮಲ್ತೊಂದುಲ್ಲೆರ್ ಪಂದ್ ಉತ್ತರಕಾಶಿದ ಜಿಲ್ಲಾ ವಿಪತ್ತು ನಿರ್ವಹಣಾ ಕೇಂದ್ರ ತೆರಿಪಾದೆರ್.
ಈ ಬಗೆಟ್ ಟ್ವೀಟ್ ಮಲ್ತಿನ ಉತ್ತರಾಖಂಡ ಮುಖ್ಯಮಂತ್ರಿ ಪುಷ್ಕರ್ ಸಿಂಗ್ ಧಾಮಿ, ಎನ್ಡಿ ಆರ್ಎಫ್, ಸೇನೆ ಬೊಕ್ಕ ಐಟಿಬಿಪಿ ಸಿಬ್ಬಂದಿಲು ರಕ್ಷಣಾ ಕಾರ್ಯಾಚರಣೆ ಮಲ್ತೊಂದುಲ್ಲೆರ್. ಯಾನ್ ರಕ್ಷಣಾ ಸಚಿವೆರ್ನ ಒಟ್ಟುಗು ಪಾತೆರ್ದ್, ಬೇಗಡೇ ರಕ್ಷಣಾ ಕಾರ್ಯಾಚರಣೆಗಾದ್ ಸೇನಾಪಡೆತ್ತ ಸಕಾಯ ಕೇಂದ ಪಂದ್ ತೆರಿಪಾದೆರ್.
ಸುಳ್ಯ: ಸುಳ್ಯಡ್ ರಡ್ಡ್ ಬೈಕ್ ಲು ಎರ್ದುಬರ್ದು ಗುದ್ದುದ್ ಒರಿ ಅಲ್ಪನೇ ತೀರ್ ಪೋಯಿನ ಘಟನೆ ತುಳುನಾಡ್ ಜಿಲ್ಲೆದ ಬೆಳ್ಳಾರೆ ಗ್ರಾಮದ ತಂಬಿನಮಕ್ಕಿ ಡ್ ಅ.3 ದಾನಿ ರಾತ್ರೆ ನಡತ್ಂಡ್.
ಅಂಚನೆ ಈ ಘಟನೆಡ್ ನನೊರಿಯಗ್ ದಿಂಜ ಪೆಟ್ಟಾತ್ಂಡ್, ತೀರ್ ಪೋಯಿನ ಜನನ್ ನಾರಾಯಣ ಪಂದ್ ಗುರುತಿಸದೆರ್. ಅಂಚನೆ ಪೆಟ್ಟಾಯಿನ ನನೊರಿ ಸುಜಿತ್ ಪನ್ಪುನರೆನ್ ಸುಳ್ಯದ ಆಸ್ಪತ್ರೆಗ್ ದಾಖಲ್ ಮಲ್ದೆರ್. ನೆತ್ತ ಬಗೆಟ್ ಕೈತಲ್ ದ ಪೊಲೀಸೆರ್ ಕೇಸ್ ನ ದಾಖಲ್ ಮಲ್ದೆರ್.
ಬೆಂಗ್ಲೂರ್: ನಾಡಪರ್ಬ ದಸರಾ ರಾಜ್ಯಡ್ ಮಾತೆರೆಗ್ಲ ಸುಖ, ಶಾಂತಿ, ನೆಮ್ಮದಿ ಕೊರಡ್ ಪಂದ್ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ, ಸಮಸ್ತ ಜನಕುಲೆಗ್ ಶುಭ ಹಾರೈಕೆ ಮಲ್ದೆರ್.
ಅಂಚನೆ ಸುದ್ದಿಗಾರರೆಡ ಪಾತೆರ್ನ ಆರ್, ಇನಿ ಬೊಕ್ಕ ಎಲ್ಲೆ ದಸರಾ ಪರ್ಬ, ಜನಕುಲು ನೆಮ್ಮದಿಡ್ ಪರ್ಬನ್ ಆಚರಣೆ ಮಲ್ಪಡ್. ದುಷ್ಟರೆನ ನಿಗ್ರಹ ಅವಡ್. ಶಿಷ್ಟರೆನ ರಕ್ಷಣೆ ಅವಡ್. ನಾಡ್ ಡ್ ಶಾಂತಿ, ಸುಭಿಕ್ಷೆ ನೆಲೆಸಡ್ ಪಂದ್ ನಾಡ ದೇವತೆ ಶ್ರೀ ಚಾಮುಂಡೇಶ್ವರಿ ದೇವಿಡ ಪ್ರಾರ್ಥನೆ ಮಲ್ಪುವೆ. ಅಮ್ಮ ಚಾಮುಂಡೇಶ್ವರಿ ಮಾತೆರೆಗ್ಲ ಆಶೀರ್ವಾದ ಮಲ್ಪಡ್.
ಪರ್ಬ ಇಪ್ಪುನ ಕಾರಣ ಯಾನ್ ಒವೊವ್ವೆ ರಾಜಕೀಯ ವಿಷಯಲೆನ್ ಪಾತೆರುಜಿಜಿ. ಪ್ರತಿಪಕ್ಷಲು ದಾದನೆ ಆರೋಪ ಮಲ್ಪಡ್. ಮಾತೆಕ್ಲ ಗುರುವಾರ ಉತ್ತರ ಕೊರ್ಪೆ ಪಂಡೆರ್.
ಕಾಸ್ರೋಡ್ : ಕೊರಕ್ಕೋಡು ಶ್ರೀ ದೂಮಾವತಿ ದೇವಲ್ಯಡ್ ಊರುದ ಬೊಕ್ಕ ಕುಟುಂಬದಕುಲು ಸೇರ್ದ್ ಪುದ್ದಾರ್ ಪರ್ಬ ಮಲ್ತೆರ್. ಬೊಕ್ಕ ಈ ಪೊಸ ಅರಿನ್ ವನಸ್ ಗ್ ಕೊರ್ಯೆರ್. ಅಂಚನೆ ಹರೀಶ್ ಕೆ.ಆರ್, ವಸಂತ ಪೂಜಾರಿ, ಚಿದಾನಂದ ಪೂಜಾರಿ, ಸೋಮಪ್ಪ ಪೂಜಾರಿ, ಹರಿಕಾಂತ ಕಾಸ್ರೋಡ್, ರಘು ಸುವರ್ಣ ಕುಂಬ್ಲೆ, ಜಯಶೀಲ, ಉಪೇಂದ್ರ, ಬಾಬು ಸುವರ್ಣ,ಬೊಕ್ಕ ಸುಮಾರ್ ಜನ ಈ ಲೇಸ್ ಡ್ ಇತ್ತೆರ್.
ಪುದ್ದಾರ್ ಪರ್ಬ ಪಂಡ ಈ ವರ್ಷದ ಪೊಸ ಬಿಳೆನ್ ಕೊಯ್ದು ಪೊಸ ಅರಿನ್ ಇಲ್ಲ್ ದಿಂಜವೊನ ಒಂಜಿ ಪದ್ದತಿ. ಈ ಪರ್ಬದ ದುಂಬುನಾನಿ ಬತ್ತದ ತೆನೆನ್ ಕೊಯ್ದು ಅಯಿತ ಉಲಯಿಡ್ ನೇರೋಳುದ ತಪ್ಪು, ಕುಕ್ಕುದ ತಪ್ಪು, ಪೆಲಕಾಯಿದ ತಪ್ಪು, ಬೆದುರುದ ಇರೆ, ನೆಲ್ಲಿಕಾಯಿದ ಇರೆ, ಅರ್ಥಿದ ಇರೆ, ಅಂಚನೆ ಸುಮಾರ್ ತಪ್ಪು ಲೆನ್ ಸೇರ್ಸಾದ್ ತೊಳಸಿ ಕಟ್ಟೆದ ಕೈತಲ್ ದೀಪೆರ್.
ಬೊಕ್ಕ ಇಲ್ಲ್ ದಿಂಜವುನಾನಿ ನೆನ್ ಇಲ್ಲದ ಹಿರಿಯೆರೆಡ ಇಜ್ಜಿನ್ಂಡ ದೈವಸ್ಧಾನದ ಹಿರಿಯೆರ್ ಡ ಅಯಿಕ್, ಆರತಿ ಮಲ್ತ್ ದ್, ತರೆಟ್ ದೀದ್ ಪ್ರದಕ್ಷಿಣೆ ಬರ್ಪೆರ್. ಬೊಕ್ಕ ಇಲ್ಲ ದಿಂಜವೆರ್. ಅಯಿರ್ದ್ ಬೊಕ್ಕ ಬಲ್ಲಿ ದೈತ ಬಲ್ಲ್ ಡ್ ಸುಮಾರ್ ಕಟ್ಟುಲೆನ್ ಕಟ್ಟ್ ದ್ ಬೇತೆ ಕುಟುಂಬದ ಸದಸ್ಯೆರೆನ ಇಲ್ಲ್ ದಿಂಜಯೆರೆ ಕೊರ್ಪೆರ್. ಈ ಸಂಪ್ರದಾಯನ್ ಸಾಮಾನ್ಯವಾದ್ ಚೌತಿ ಪರ್ಬದ ದಿನ ಇಜ್ಜಿನ್ಂಡ ಮಹಾ ನವಮಿದ ದಿನಟ್, ಅವು ತೆನೆ ಬೊಳೆದ್ ಬರಿಯೆರೆ ಸಮಯ ದೆತ್ತೊಂಡ ಅಕೆರಿಗ್ ಕಾವೇರಿ ಸಂಕ್ರಾಂತಿ ದಿನತಾನಿ ಆಚರಣೆ ಮಲ್ಪುವೆರ್.
ಕುಡ್ಲ: ಪೇಂಟೆದ ಲೇಡಿಹಿಲ್ ಕೈತಲ್ಡ್ ಕುಡ್ಲ ನಗರಾಭಿವೃದ್ಧಿ ಪ್ರಾಧಿಕಾರರ್ದ್ ನಿರ್ಮಾಣ ಮಲ್ತಿನ ಬ್ರಹ್ಮಶ್ರೀ ನಾರಾಯಣ ಗುರು ವೃತ್ತನ್ ಜಿಲ್ಲಾ ಉಸ್ತುವಾರಿ ಸಚಿವೆರ್ ವಿ. ಸುನೀಲ್ ಕುಮಾರ್ ಅಂಚನೆ ಸಂಸದೆರ್ ಆಯಿನ ನಳಿನ್ ಕುಮಾರ್ ಕಟೀಲ್ ಉದಿಪನ ಮಲ್ತೆರ್.
ಈ ಪೊರ್ತುಡು ಶಾಸಕೆರಾಯಿನ ವೇದವ್ಯಾಸ ಕಾಮತ್, ಡಾ. ಭರತ್ ಶೆಟ್ಟಿ, ಉಮಾನಾಥ ಕೋಟ್ಯಾನ್, ಮೇಯರ್ ಜಯಾನಂದ ಅಂಚನ್, ಮಹಾನಗರ ಪಾಲಿಕೆ ಸದಸ್ಯೆರ್, ಮೂಡಾ ಕಾರ್ಯದರ್ಶಿ ಭಾಸ್ಕರ್ ಅಂಚನೆ ಬೇತೆ ಜನ ಪ್ರತಿನಿಧಿಲು ಬೊಕ್ಕ ಅಧಿಕಾರಿಲು ಇತ್ತೆರ್.
ಪಾಲ್ಘರ್: ಗರ್ಬಾ ಡ್ಯಾನ್ಸ್ ಮಲ್ತೊಂದುಪ್ಪುನಗ ತಿರ್ತ್ ಬೂರಿನ 35 ವರ್ಷದ ಮಗನ್ ಆಸ್ಪತ್ರೆಗ್ ಲೆತೊಂದು ಪೋನಗನೆ ಮಗೆ ತೀರ್ ಪೋಯಿನ ವಿಷಯ ತೆರಿದ್ ಆಯನ ಪೊಪ್ಪಲ ತಿಗಲೆ ಬೇನೆ ಆದ್ ತೀರ್ ಪೋತಿನ ಘಟನೆ ಮಹಾರಾಷ್ಟ್ರದ ಪಾಲ್ಘರ್ ಜಿಲ್ಲೆದ ವಿರಾರ್ ಡ್ ನಡತ್ಂಡ್.
ಪೊಲೀಸೆರ್ನ ಪ್ರಕಾರ, ಐತಾರ ನಡುರಾತ್ರೆ ವಿರಾರ್ ದ ಗ್ಲೋಬಲ್ ಸಿಟಿ ಕಾಂಪ್ಲೆಕ್ಸ್ಡ್ ಗರ್ಬಾ ನಲಿತೊಂದು ಇಪ್ಪುನಗ ಮನೀಶ್ ನಾರಾಪ್ಜಿ ಸೋನಿಗ್ರಾ ಆರ್ ತಿಗಕೆ ಬೇನೆಡ್ ತಿರ್ತ್ ಬೂರ್ದಿತ್ತೆರ್. ಸೋನಿಗ್ರಾ ಅರೆನ್ ಕೂಡ್ಲೆ ಅರೆನ ಪೊಪ್ಪ ನಾರಾಪ್ಜಿ ಸೋನಿಗ್ರಾ (66) ಆರ್ ಆಸ್ಪತ್ರೆಗ್ ಲೆತೊಂದು ಪೋತೆರ್. ಅಪಗ ಮಗೆ ತೀರ್ ಪೋತಿನ ಸಂಗತಿನ್ ಅರೆಡ ಪನ್ನಗ ಆರ್ ಲ ತಿಗಲೆ ಬೇನೆ ಬತ್ತ್ ದ್ ತೀರ್ ಪೋತೆರ್.
