ಕಾಸ್ರೋಡ್ : ಕುಂಬಳೆ ನಾರಾಯಣಮಂಗಲದ ವಿನೋದ್ ಮೇರೆನ ಇಲ್ಲಡೇ ಪಗೆಲ್ ಡ್ ಪೊಗ್ಗಿನ ಕಳ್ವೆರ್13 ಪವನ್ ಬಂಗಾರ್ ಕಂಡಿನ ಘಟನೆ ಬುಧಾರ ನಡತ್ಂಡ್.
ರಡ್ಡ್ ಜನ ಕೂಲಿ ಬೇಲೆಗ್ ಪೋಯಿನ ಅಕುಲು ಬಯ್ಯಗ್ ಬೇಲೆ ಬುಡ್ದು ಇಲ್ಲಡೇ ಬನ್ನಗ ಅಡ್ಪಿಲ್ಲ್ ದ ಬಾಕಿಲ್ ಪುಡದ್ ಇತ್ತ್ಂಡ್. ಉಲಯಿ ಪೋದು ತೂನಗ ಕಂಡಿನವು ಗೊತ್ತ್ಂಡ್. ಈ ಬಗೆಟ್ ಕುಂಬಳೆ ಪೊಲೀಸೆರೆಗ್ ಕೊರ್ನ ಕೇಸ್ ದಂಚನೆ ತನಿಖೆ ಮಲ್ತೊಂದು ಉಲ್ಲೆರ್.
ಲಕ್ನೋ: ಉತ್ತರ ಪ್ರದೇಶದ ಪ್ರಯಾಗ್‌ರಾಜ್‌ದ ಖಾಸಗಿ ಆಸ್ಪತ್ರೆಡ್ ನೆತ್ತೆರ್‌ದ ಪ್ಲೇಟ್‌ಲೆಟ್‌ದ ಬದಲ್‌ಗ್ ಮುಸುಂಬಿ ರಸನ್ ದಿಂಜಾದಿನ ಡ್ರಿಪ್ ಪಾಡ್ದಿನ ನಿಲೆಟ್ಟ್ ಡೆಂಗ್ಯೂ ಸೀಕ್‌ದಾರ್ ಒರಿ ತೀರ್ ಪೋಯಿನ ಘಟನೆ ನಡತ್ಂಡ್.
ಜಿಲ್ಲಾಡಳಿತದ ಸುರುತ್ತ ವಿಚಾರಣೆರ್ದ್ ಬೊಕ್ಕ ಆಸ್ಪತ್ರೆದ ಅಧಿಕಾರಿಲು ಮಲ್ತಿನ ಬೇಲೆನ್ ತೂದ್ ಸೀಲ್ ಮಲ್ತ್‌ದೆರ್. ಉಂದೆಕ್ಕ್ ಕಾರಣ ಆತಿನಕ್ಲೆನ ವಿರುದ್ಧ ಸರಿಯಾಯಿನ ಕ್ರಮ ದೆತೊನೊಡು ಪಂದ್ ಹುಷಾರ್‌ದಾಂತಿನರೆನ ಕುಟುಂಬ ರಾಜ್ಯ ಸರ್ಕಾರಗ್ ಬಿನ್ನಾಪು ಮಲ್ತ್‌ದ್ಂಡ್.
ಮೆಕ್ಸಿಕೋ: ಗೂಡ್ಸ್ ರೈಲ್‌ಯೊಂಜಿ ಇಂಧನ ಟ್ಯಾಂಕರ್‌ಗ್ ಗುದ್ದ್‌ದಿನ ಘಟನೆ ಗುರುವಾರ ರಾತ್ರೆ ಮೆಕ್ಸಿಕೋಡು ನಡತ್ಂಡ್. ಈ ಘಟನೆಡ್ ಮಲ್ಲ ಮಟ್ಟಡ್ ತೂ ಪೊತ್ತ್‌ದಿತ್ತ್‌ದ್, ಅಲ್ಪದ ಮಸ್ತ್ ಇಲ್ಲ್‌ಲೆಗ್ ತೂ ಪೊತ್ತ್‌ದ್ಂಡ್.
ಇಂಧನ ದಿಂಜಾದಿನ ಟ್ಯಾಂಕರ್‌ಗ್ ರೈಲ್ ಗುದ್ದ್‌ದ್ಂಡ್. ಆಂಡ ಈ ತೂ ತ್ತ ನಡುಟ್ಟ್‌ಲ ರೈಲ್ ದುಂಬು ಪೋತುಂಡು. ರಕ್ಷಣಾ ಕಾರ್ಯಕರ್ತೆರ್ ಜಾಗೆಗ್ ಬತ್ತ್‌ದ್ ಕಾರ್ಯಾಚರಣೆ ಮಲ್ತೊಂದು ಉಲ್ಲೆರ್.
ಕುಡ್ಲ: ಇನ್ಸ್ಟಾಗ್ರಾಮ್ ಮುಖೇನ ಪರಿಚಯ ಆಯಿನ ಎಂಜಿನಿಯರ್ ಕಲ್ಪಾರ್ಥಿನ ಒಟ್ಟುಗು ಮೋಕೆನ್ ಬುಳೆಪಾಯರೆ ರಾಜಸ್ಥಾನ ಮೂಲದ ಪೊಣ್ಣು, ಇತ್ತೆ ಚೆನ್ನೈಡ್ ಎಂಬಿಬಿಎಸ್ ರಡ್ಡನೇ ವರ್ಷ ಕಲ್ತೊಂದಿಪ್ಪುನ ಕಲ್ಪಾರ್ಥಿ ಒರ್ತಿ ಪಾರ್ ಬತ್ತಿನ ಘಟನೆ ಪೇಂಟೆದ ಸುರತ್ಕಲ್‌ಡ್ ನಡತ್ಂಡ್.
ಈ ಬಗೆಟ್ ಸುರತ್ಕಲ್ ಪೊಲೀಸ್ ಠಾಣೆಡ್ ಪ್ರಕರಣ ದಾಖಲ್ ಆದಿತ್ತ್‌ದ್ ಪೊಣ್ಣನ್ ವಿಚಾರಣೆ ಮಲ್ಪುನಗ ಇನ್ಸ್ಟಾಗ್ರಾಮ್‌ಡ್ ಪರಿಚಯ ಆಯಿನ ಎಂಜಿನಿಯರಿಂಗ್ ಕಲ್ಪಾರ್ಥಿನ ಒಟ್ಟುಗು ಮೋಕೆ ಬುಳೆಪಾಯರೆ ಬತ್ತ್‌ದೆ ಪಂದ್ ಪೊಣ್ಣ್ ಪಂದಿತ್ತೆರ್. ಆಂಡ ಸ್ಥಳೀಯ ಸಂಸ್ಥೆದ ಎಂಜಿನಿಯರಿಂಗ್ ಆನಗ್ ಪೊಣ್ಣನ ಪರಿಚಯ ಇಜ್ಜಿ ಪಂದ್ ತೆರಿದ್ ಬತ್ತಿತ್ತ್‌ದ್ ಕೇಸ್‌ಗ್ ಟ್ವಿಸ್ಟ್ ತಿಕ್ ದ್ಂಡ್.
ಕೋಲಾರ: ಆಸ್ಟ್ರೇಲಿಯಾದ ವಿಕ್ಟೋರಿಯಾ ರಾಜ್ಯದ ಕೌನ್ಸಿಲ್ ವೋಟುಡು ಕರ್ನಾಟಕದ ಕೋಲಾರ ತಾಲೂಕ್‌ದ ಮದನಹಳ್ಳಿದ ಬೆನ್ನಿದಕ್ಲೆನ ಕುಟುಂಬದ ಮಂಜುನಾಥ್ ಹನುಮಂತ ರಾಯಪ್ಪ ಮೇರ್ ಕಲಕ್ಕ್ ಜತ್ತ್‌ದೆರ್.
39 ವರ್ಷದ ಮಂಜುನಾಥ್ 15 ವರ್ಷರ್ದ್‌ಲ ಆಸ್ಟ್ರೇಲಿಯಾದ ಮೆಲ್ಬೋರ್ನ್ ಪೇಂಟೆಡ್ ಇತ್ತ್‌ದ್, ಸೇವಾ ಕಾರ್ಯಕ್ರಮದ ಮುಖೇನ ಪುಗರ್ತೆ ಪಡೆತ್ತೆರ್.
ಲಂಡನ್: ಬ್ರಿಟನ್ ದ ಪೊಸ ಪ್ರಧಾನಿ ಆಯಿನ ಲಿಜ್ ಟ್ರಸ್ ಆಜೇ ವಾರಡ್ ಅರೆನ ಸ್ಥಾನಗ್ ರಾಜೀನಾಮೆ ಸಂದಾದೆರ್.
ಮೇರ್ ಬ್ರಿಟನ್‌ದ ಆರ್ಥಿಕತೆನ್ ಸರಿಸಾದಿಗ್ ಕನಯೆರೆ ಆವಂದೆ ದಿಢೀರ್ ರಾಜೀನಾಮೆ ಕೊರ್ಯೆರೆ ಕಾರಣ ಪಂದ್ ತೆರಿದ್ ಬೈದ್ಂಡ್.
ಮೇರೆನ ರಾಜೀನಾಮೆರ್ದ್ ಇನ್ಫೋಸಿಸ್ ಸಂಸ್ಥಾಪಕೆರ್ ನಾರಾಯಣಮೂರ್ತಿ ಮೇರೆನ ಮರ್ಮಾಯೆ ರಿಷಿ ಸುನಕ್‌ಗ್ ಪ್ರಧಾನಿ ಆಪುನ ಕುಡೊಂಜಿ ಅವಕಾಶ ಬೈದ್ಂಡ್. ಆಜಿ ವಾರದ ಪಿರವು ಬೋರಿಸ್‌ ಜಾನ್ಸನ್‌ ಸರ್ಕಾರಡ್ ಹಣಕಾಸು ಸಚಿವೆರಾದಿತ್ತಿನ ಭಾರತ ಮೂಲದ ರಿಷಿ ಸುನಕ್ ನ್ ಸುಮಾರ್ 21 ಸಾವಿರ ವೋಟ್ ದ ಅಂತರರ್ದ್ ಸೋಪಾದ್ ಲಿಜ್ ಟ್ರಸ್, ಬ್ರಿಟನ್ ದ ಪ್ರಧಾನ ಮಂತ್ರಿ ಆದ್ ಇತ್ತೆರ್.
ಮಾರ್ಗರೇಟ್‌ ಥ್ಯಾಚರ್‌ ಬೊಕ್ಕ ಥೆರೆಸಾ ಮೇರೆರ್ದ್ ಬೊಕ್ಕ ದೇಶ ನಡಪಾವುನ ಮೂಜಿನೆ ಪೊಂಜೋವು ಪ್ರಧಾನಿ ಪನ್ಪುನ ಪುದರ್ 47 ವರ್ಷದ ಟ್ರಸ್ ಗ್ ಇತ್ಂಡ್. ಇತ್ತೆ ಮೇರ್ ಚುನಾವಣೆಡ್ ಕೊರ್ನ ಭರವಸೆಲೆನ್ ಈಡೇರಿಸಯೆರೆ ಆವೊಂದು ಇಜ್ಜಿ ಅಂಚಾದ್ ರಾಜೀನಾಮೆ ಸಂದಾವೊಂದು ಉಲ್ಲೆ ಪಂದ್ ಪಂಡೆರ್.
ಬಳ್ಪ ಶ್ರೀದುರ್ಗಾ ಧನ್ವಂತರಿ ಮಹಾವಿಷ್ಣು ದೇವಲ್ಯಡ್ ಧನ್ವಂತರಿ ಜಯಂತಿ ಅ.22ಕ್ ನಡಪರೆ ಉಂಡು.
ಈ ದೇವಲ್ಯಡ್ ಇಸೇಸವಾದ್ ಧನ್ವಂತರಿ ಪೂಜೆ, ಇಸೇಸ ಪೂಜೆ ನಡಪುಂಡು. ಅಯಿರ್ದ್ ಬೊಕ್ಕ ಆರೋಗ್ಯ ಭಾರತಿ ವತಿರ್ದ್ ಧನ್ವಂತರಿ ಆಚರಣೆದ ವಿಚಾರೊಡು ಡಾ.ರಾಘವೇಂದ್ರ ಪ್ರಸಾದ್ ಬಂಗಾರಡ್ಕ ಮೇರ್ ಮಾಹಿತಿ ಕೊರ್ಪೆರ್.
ಹಿಮಾಚಲ ಪ್ರದೇಶ ವಿಧಾನಸಭೆ ವೋಟುಡು 4 ಸರ್ತಿ ಶಿಮ್ಲಾ ನಗರ ಕ್ಷೇತ್ರಡ್ ಶಾಸಕೆರಾದ್ ಆಯ್ಕೆ ಆದ್ ಇತ್ತಿನ ಹಾಲಿ ಸಚಿವೆರ್ ಸುರೇಶ್ ಭಾರದ್ವಾಜ್ ಮೇರೆಗ್ ಬಿಜೆಪಿ ಶಾಕ್ ಕೊರ್ತುಂಡು.
ಈ ಸರ್ತಿ ಹಾಲಿ ಸಚಿವೆರೆಗ್ ಕೊರೊಡಿತ್ತಿನ ಟಿಕೆಟ್ ನ್ ಚಾ ಅಂಗಡಿ ನಡಪಾವೊಂದು ಇಪ್ಪುನ ಸಂಜಯ್ ಸೂದ್ ಮೇರೆಗ್ ಕೊರ್ತುಂಡು.
“ಬಿಜೆಪಿ ಎನನ್ ಅಭ್ಯರ್ಥಿ ಮಲ್ತಿನೆಕ್ ಎನ್ ಮಸ್ತ್ ಋಣಿ ಆದ್ ಇಪ್ಪುವೆ” ಪಂದ್ ಸಂಜಯ್ ಸೂದ್ ಪನ್ತೆರ್.
ಪಿಯು ಪರೀಕ್ಷೆಡ್ ಪಾಸ್ ಆಯಿನ 36,000 ಕಲ್ಪಾರ್ಥಿಲೆಗ್ ಅಸ್ಸಾಂ ಸರ್ಕಾರ ಧರ್ಮಾಥವಾದ್ ಸ್ಕೂಟರ್‌ನ್ ಕೊರ್ತ್ಂಡು.
ಈ ಬಗೆಟ್ ಮಾಹಿತಿ ಕೊರಿನ ಅಲ್ಪದ ಶಿಕ್ಷಣ ಸಚಿವೆರ್ ರನೋಜ್ ಪೆಗು, ಸುರುತ್ತ ಶ್ರೇಣಿಡ್ ಪಾಸ್ ಆಯಿನ ಪೊಣ್ಣ್ ಜೋಕುಲು ಅಂಚನೆ ಶೇ. 75ರ್ದ್ ಎಚ್ಚದ ಅಂಕ ಪಡೆಯಿನ ಆನ್‌ಲು ಸ್ಕೂಟರ್ ಪಡೆಯೊನ್ಯರೆ ಉಲ್ಲೆರ್ ಪಂದ್ ಮಾಹಿತಿ ಕೊರ್ತೆರ್.
ಕುಡ್ಲ: ಬಂಟ್ವಾಳ ತಾಲೂಕ್‌ದ ಬರಿಮಾರು ಗಾಣದಪಾಲು ಪದ್ಮನಾಭ ಮೆರೆನ ಬೊಡೆದಿ ಪೇಂಟೆದ ಲೇಡಿಗೋಷನ್ ಆಸ್ಪತ್ರೆಡ್ ಮೂಜಿ ಜೋಕುಲೆನ್ ಪೆದ್ದ್‌ದೆರ್.
ಆರ್ ಒಂಜಿ ಆನ್ ಬೊಕ್ಕ ರಡ್ಡ್ ಪೊಣ್ಣ್ ಜೋಕುಲೆನ್ ಪೆದ್ದ್ ದೆರ್. ಸದ್ಯೊಗು ಬಾಲೆಲೆಗ್ ಮಿಲ್ಕ್ ಬ್ಯಾಂಕ್‌ದ ಪೇರ್ ಕೊರೊಂದುಲ್ಲೆರ್ ಪಂದ್ ವೈದ್ಯೆರ್ ತೆರಿಪಾದೆರ್.
