ಉಡುಪಿದ ಸುದ್ದಿ | Udupi News

ನಡುರಾತ್ರೆಡ್ ನಿದ್ರೆಕಣ್ಣ್ ಡ್ ನಡತೊಂದು ಪೋದು ಕೊರಗಜ್ಜನ ಕಟ್ಟೆದಲ್ಪ ಉಂತಿನ ಬಾಲೆ!

ತುಳುನಾಡ್ ಡ್ ಕೊರಗಜ್ಜ ದೈವದ ಕಾರ್ನಿಕ ಅಪಗಪಗ ತೋಜಿದ್ ಬರ್ಪುಂಡು. ಒವ್ವೆ ಒಂಜಿ ಕಷ್ಟ ಬನ್ನಗಲ ನಮ ಸುರುಕು ಕೊರಗಜ್ಜನ್ ಎನ್ನುವ. ಅಜ್ಜನ್ ಭಕ್ತಿಡ್ ಪ್ರಾರ್ಥನೆ ಮಲ್ತ್ಂಡ ಪರಿಹಾರ ಕೊರ್ಪೆರ್ ಪನ್ಪಿನ ನಂಬೊಲಿಗೆ ನಮ್ಮವು. ಅಂಚ ಕೊರಗಜ್ಜನ ಕಾರ್ನಿಕ ಕುಡೊರ ತೋಜಿದ್ ಬೈದ್ಂಡ್.

ನಿದ್ರೆಕಣ್ಣ್ ಡ್ ನಡತೊಂದು ಪೋಯಿನ ಬಾಲೆನ್ ಉಂತಾದ್ ಕೊರಗಜ್ಜ ಕಾಪುರಕ್ಷಣೆ ಮಲ್ದಿನ ಘಟನೆ ಕುಂದಾಪುರ ತಾಲೂಕುದ ಕೆದೂರು ಕೈತಲ್ದ ದಬ್ಬೆಕಟ್ಟೆಡ್ ನಡುರಾತ್ರೆ 3 ಗಂಟೆಗ್ ನಡತ್ ದ್ಂಡ್.

ಬಾಲೆ ನಿದ್ರೆಕಣ್ಣ್ ಡ್ ರೋಡ್‌ಡ್ ನಡತೊಂದು ಬತ್ತ್ ದ್ ಕೆದೂರ್‌ಡ್ ಇಪ್ಪುನ ಕೊರಗಜ್ಜ ದೈವಸ್ಥಾನದ ಎದುರು ಉಂತುದು ಇತ್ತ್ಂಡ್. ಆ ಪೊರ್ರುಗು ಉಂದುವೆ ರೋಡ್‌ಡ್ ಕೆಲಸ ಮುಗಿತ್ ಬರೊಂದಿತ್ತಿನ ವಿಶ್ವ ಪನ್ಪಿನಾರ್ ಬಾಲೆನ್ ತೂದು ಕೇನ್ನಗ ನಿದ್ರೆಕಣ್ಣ್ ಡ್ ನಡತೊಂದು ಬೈದಿನ ಸಂಗತಿ ತೆರಿದ್ ಬೈದ್ಂಡ್. ಬೊಕ್ಕ ಆರ್ ಬಾಲೆನ್ ಅಕ್ಲೆನ ಇಲ್ಲಗ್ ಬುಡ್ದು ಮಾನವೀಯತೆ ಮೆರೆತೆರ್. ಕೊರಗಜ್ಜನ ಪವಾಡಡೇ ಬಾಲೆ ಬಚಾವಾತ್ಂಡ್ ಪಂದ್ ಭಕ್ತೆರ್ ಪನೊಂದುಲ್ಲೆರ್.

ಸಸಿಹಿತ್ಲು-ಬಪ್ಪನಾಡು ಟೂರಿಸಂ ಕಾರಿಡಾರ್ ಮಲ್ಪರೆ ಕುಡೊರ ಬಿನ್ನಾಪು

ಮುಲ್ಕಿ : ಸಸಿಹಿತ್ಲು ಬೀಚ್, ಸಸಿಹಿತ್ಲು ಶ್ರೀ ಭಗವತಿ ದೇವಸ್ಥಾನ,ಪೊಯ್ಯೆದಗುಡ್ಡೆ ಶ್ರೀ ಉಮಾಮಹೇಶ್ವರಿ ದೇವಸ್ಥಾನ,ಚಿತ್ರಾಪು, ಕಲ್ಲಸಂಕ, ಪಡುಬೈಲ್ ಕೋರ್ದಬ್ಬು ದೈವಸ್ಥಾನ, ಮಂತ್ರ ಸರ್ಫಿಂಗ್ ಕೊಳಚಿಕಂಬಳ ಬೊಕ್ಕ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ಮುಟ್ಟ ಟೂರಿಸಂ ಕಾರಿಡಾರ್ ಮಲ್ಪರೆ ಸಮಾಜಸೇವಕೆರ್, ಆರ್ಕಿಟೆಕ್ಟ್ ಜೀವನ್ ಕೆ.ಶೆಟ್ಟಿ ಸರ್ಕಾರೊಗು ಕುಡೊರ ಬಿನ್ನಾಪು ಮಲ್ದೆರ್.

ಈ ವಿಚಾರೊಡು ಇಂಚೊಗು ವಿಧಾನಸಭೆ ಅಧಿವೇಶನೊಡು ಮುಲ್ಕಿ ತಾಲೂಕುದ ಪ್ರವಾಸೋದ್ಯಮ ಅಭಿವೃದ್ಧಿ ದ ಬಗೆಟ್ಟ್ ಪ್ರಶ್ನೆ ಮಲ್ತ್ ದಿನ ಮುಲ್ಕಿ ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್ ಅಂಚೆನೆ ಆ ಪ್ರಶ್ನೆಗ್ ಸೂಕ್ತ ಸ್ಪಂದನೆ ಕೊರ್ದು ಬಜೆಟ್ ಡ್ ಅನುದಾನ ಬುಡುಗಡೆ ಮಲ್ತಿನ ಸಿಎಂ ಸಿದ್ದರಾಮಯ್ಯೆರ್ ಅಂಚೆನೆ ಪ್ರಿಯಾಂಕ್ ಖರ್ಗೆ, ಪ್ರವಾಸೋದ್ಯಮ ಸಚಿವೆರ್ ಎಚ್. ಕೆ.ಪಾಟೀಲ್ ರೆಗ್ ಜೀವನ್ ಕೆ. ಶೆಟ್ಟಿ ಮೇರ್ ಅಭಿನಂದನೆ ಸಂದಾದೆರ್.

ಸಸಿಹಿತ್ಲು-ಬಪ್ಪನಾಡು ಪ್ರವಾಸಿ ಕಾರಿಡಾರ್ ಯೋಜನೆ ಮಲ್ಪೊಡು ಪಂದ್ ನೆರ್ದ್ ದುಂಬುಲ ಪ್ರವಾಸೋದ್ಯಮ ಸಚಿವೆರ್ನ ಮುಕೇನ ಇಲಾಖೆ ಗ್ ಬಿನ್ನಾಪು ಮಲ್ದಿತ್ತೆರ್.

ಕುಡ 5 ದಿನ ಭಾರೀ ಬರ್ಸ; ಯಲ್ಲೋ ಅಲರ್ಟ್

ಕುಡ್ಲ: ನನದ 5 ದಿನ (ಜು.15 ಮುಟ್ಟ) ತುಳುನಾಡ್‌ದ ಕೆಲವು ಜಾಗೆಡ್ ಭಾರೀ ಬರ್ಸ ಬರ್ಪಿನ ಸಾಧ್ಯತೆ ಉಂಡು ಪಂದ್ ಭಾರತೀಯ ಹವಾಮಾನ ಇಲಾಖೆ ಎಚ್ಚೆರ್ಗೆ ಕೊರ್ತ್ಂಡ್.

ವಿಶೇಷವಾದ್ ದಕ್ಷಿಣಕನ್ನಡ, ಒಡಿಪು ಬೊಕ್ಕ ಉತ್ತರ ಕನ್ನಡ ಜಿಲ್ಲೆಡ್‌ ಭಾರೀ ಬರ್ಸ ಬರ್ಪಿನ ಮುನ್ಸೂಚನೆ ಇತ್ತ್‌ದ್, ಯಲ್ಲೋ ಅಲರ್ಟ್‌ ಘೋಷಣೆ ಮಲ್ತ್‌ದೆರ್.