ದೇವಾಡಿಗ ಸಮುದಾಯದ ಪ್ರತಿಭೆಲೆರ್ದ್ ಸಮಾಜ ಶ್ರೀಮಂತ : ವೀರಪ್ಪ ಮೊಯಿಲಿ
ಕರ್ನಾಟಕ ರಾಜ್ಯ ದೇವಾಡಿಗರ ಸಂಘದ ಶತಮಾನೋತ್ಸವ
ಕುಡ್ಲ : “ದೇವಾಡಿಗ ಸಮುದಾಯಡ್ ಪ್ರತಿಭೆಲೆಗ್ ಕೊರತೆ ಇಜ್ಜಿ. ಸ್ಯಾಕ್ಸೊಫೋನ್, ನಾದಸ್ವರ ಇಂಚಿನ ಬೇತೆ ಬೇತೆ ಕಲೆಟ್ಟ್ ನಮ್ಮ ಸಮುದಾಯದ ಅವೇತೋ ಜನ ಮಲ್ಲ ಮಲ್ಲ ಸಾಧನೆ ಮಲ್ದೆರ್. ಅಕ್ಲೆರ್ದ್ ನಮ್ಮ ಸಮುದಾಯ ಶ್ರೀಮಂತವಾದುಂಡು“ ಪಂದ್ ಮಾಜಿ ಮುಖ್ಯಮಂತ್ರಿಲಾಯಿನ ಡಾ| ಎಂ. ವೀರಪ್ಪ ಮೊಯಿಲಿ ಪಂಡೆರ್.
ಆರ್ ಕುಡ್ಲದ ಟಿಎಂಎ ಪೈ ಇಂಟರ್ ನ್ಯಾಶನಲ್ ಕನ್ವೆನ್ಷನ್ ಸೆಂಟರ್ಡ್ ಐತಾರ ನಡತಿನ ಕರ್ನಾಟಕ ರಾಜ್ಯ ದೇವಾಡಿಗರ ಸಂಘದ 100 ನೇ ವರ್ಷದ ಶತಮಾನೋತ್ಸವ ಲೇಸ್ ಉದಿಪನ ಮಲ್ತ್ ಪಾತೆರಿಯೆರ್.
ಲೇಸ್ದ ಅಧ್ಯಕ್ಷತೆ ವಹಿಸ್ದಿತ್ತಿನ ಕರ್ನಾಟಕ ರಾಜ್ಯ ದೇವಾಡಿಗರ ಸಂಘ ಮಂಗಳೂರು ಘಟಕದ ಅಧ್ಯಕ್ಷೆರ್ ಅಶೋಕ್ ಮೊಯಿಲಿ ಪಾತೆರ್ದ್, “ದೇವಾಡಿಗರ ಸಂಘ ಸಮುದಾಯದ ಆಶಾಕಿರಣವಾದ್ ಬುಲೆವೊಂದುಂಡು. ಬೇತೆ ಬೇತೆ ಜನಪರ-ಪ್ರಗತಿಪರ ಕಾರ್ಯಕ್ರಮ ಮಲ್ತ್ದ್ ಸಮಾಜ ಬಾಂಧವೆರೆಡ ಜಾತಿ ಪ್ರಜ್ಞೆ ,ಧಾರ್ಮಿಕ ಪ್ರಜ್ಞೆ, ಸಾಮಾಜಿಕ ಪ್ರಜ್ಞೆ ಪುಟ್ಟಾದ್ಂಡ್“ ಪಂದ್ ಪಂಡೆರ್.
ಈ ಪೊರ್ತುಡು ದೇವಾಡಿಗ ಚಾರಿಟೆಬಲ್ ಟ್ರಸ್ಟ್ ಅಧ್ಯಕ್ಷೆರ್, ನ್ಯೂರೋ ಸರ್ಜನ್ ಡಾ| ಕೆ.ವಿ. ದೇವಾಡಿಗ ಬೊಕ್ಕ ಮಾಜಿ ಮುಖ್ಯಮಂತ್ರಿ ವೀರಪ್ಪ ಮೊಯಿಲಿಯೆರೆಗ್ ಸಂಘದ ವತಿರ್ದ್ ಮಾನಾದಿಗೆ ಮಲ್ತೆರ್.
“ವಿಶನ್ ಮಂಗಳ”ದ ಗೌರವಾಧ್ಯಕ್ಷೆರ್ ಡಾ। ದೇವದಾಸ್ ಕೆ., ಹರೀಶ್ ಶೇರಿಗಾರ್, ಡಾ| ಕೆ. ದೇವರಾಜ್, ಕರುಣಾಕರ ಎಂ.ಎಚ್., ಧರ್ಮಪಾಲ ಯು. ದೇವಾಡಿಗ, ಡಾ| ಬಿ.ಎಸ್. ಶೇರಿಗಾರ್, ಮೋಹನ್ ದಾಸ್, ರವಿ ಸುಬ್ಬಯ್ಯ ದೇವಾಡಿಗ, ಕೆ.ಜೆ. ದೇವಾಡಿಗ, ನಾರಾಯಣ ದೇವಾಡಿಗ, ದಿನೇಶ್ ದೇವಾಡಿಗ, ಬಾಬು ದೇವಾಡಿಗ, ಭಾಸ್ಕರ್ ಶೇರಿಗಾರ್, ಆಲೂರು ರಘುರಾಮ್ ದೇವಾಡಿಗ, ನಾಗರಾಜ್ ದೇವಾಡಿಗ, ಸುರೇಶ್ ಚಂದಪ್ಪ ದೇವಾಡಿಗ, ಶೇಖರ್ ದೇವಾಡಿಗ ಮೊಕುಲು ಮಾತ ಬಿನ್ನೆರಾದ್ ಬತ್ತಿತ್ತೆರ್.
ಅಂಚೆನೆ ಬೇತೆ ಬೇತೆ ಕ್ಷೇತ್ರಡ್ ಸಾಧನೆ ಮಲ್ದಿನ ವಿದ್ವಾನ್ ಅಣ್ಣು ದೇವಾಡಿಗ ಧರ್ಮಸ್ಥಳ, ಗೋಪಾಲ್ ಶೇರಿಗಾರ್- ಲಲಿತಾ ದಂಪತಿ, ಡಾ| ಪ್ರವೀಣ್ ಕುಮಾರ್ ಹೊಸಬೆಟ್ಟು, ಜಯಾನಂದ ದೇವಾಡಿಗ ಮೆರೆನ ಪರವಾದ್ ಸರೋಜಿನಿ, ಸನ್ಮಾನ ದೆತೊಂಡೆರ್. ದಿ। ವಾಮನ್ ಮರೋಳಿ ಮರಣೋತ್ತರ ಗೌರವ ಸಂದಾಯೆರ್. ಅವ್ವತ್ತಾಂದೆ ವೇಣಿ, ಭಾಸ್ಕರ್ ಕೆ., ವಿಜಯಲಕ್ಷ್ಮೀ ಶಿಬರೂರು, ವಿಶ್ವನಾಥ ಶೇರಿಗಾರ್, ಪ್ರವೀಣ್ ದೇವಾಡಿಗ ಮೊಕ್ಲೆನ್ ಸನ್ಮಾನ ಮಲ್ತೆರ್.
ಪ್ರಧಾನ ಕಾರ್ಯದರ್ಶಿ ವೀಣಾ ಗಣೇಶ್ ಸ್ವಾಗತ ಮಲ್ತೆರ್. ಖಜಾಂಚಿ ಗೀತಾ ವಿ. ಕಲ್ಯಾಣಪುರ ಸೊಲ್ಮೆ ಸಂದಾಯೆರ್.
