ಉಡುಪಿದ ಸುದ್ದಿ | Udupi News

Bantwal: Youth electrocuted while plucking areca nuts using hook ಮೆಲ್ಕಾರ್: ಕರೆಂಟ್ ಶಾಕ್ ಹಾಕ್‌ದ್ ತೀರ್ ಪೋಯಿನ ಜವನ್ಯೆ

ಬಂಟ್ವಾಳ: ಬಜ್ಜಯ್ ದೆತೊಂದಿಪ್ಪುನಗ ಕರೆಂಟ್ ಶಾಕ್ ಹಾಕ್‌ದ್ ಜವನ್ಯೆ ಒರಿ ತೀರ್ ಪೋಯಿನ ಘಟನೆ ಮೆಲ್ಕಾರ್‌ದ ಅಲಂಪಾಡಿ ಕೈತಲ್ ನಡತ್ಂಡ್.

ಬೋಳಿಯಾರ್‌ದ ನಿವಾಸಿ ಇಬ್ರಾಹೀಂ ಅರೆನ ಮಗೆ ಶಾಫೀ (29) ತೀರ್ ಪೋಯಿನ ಜವನ್ಯೆ.

ಅಲಂಪಾಡಿ ಕೈತಲ್ ತೋಟದ ಬೇಲೆಗ್ ಪೋತಿನ ಶಾಫೀ ಬಜ್ಜಯಿ ದೆಪ್ಪರೆ ಪಂದ್ ಉದ್ದದ ಸಲಾಖೆನ್ ಕತ್ತಿ ಕಟ್ಟ್‌ದ್ ಮಿತ್ತ್ ದೆರ್ಪುನಗ ಕರೆಂಟ್ ಶಾಕ್ ಹಾಕ್‌ದ್ ಜಾಗೆಡೆ ತೀರ್ ಪೋತೆರ್.

Mangaluru: Biparjoy cyclone alert – Fishermen warned not to venture into sea ಕುಡ್ಲ: ಬಿಪರ್‌ಜಾಯ್ ಅಲರ್ಟ್- ತೆಡಿಲ್‌ದೊಟ್ಟುಗು ಭಾರೀ ಬರ್ಸ ಬರ್ಪಿನ ಸಾಧ್ಯತೆ, ಮೀನುಗಾರೆರೆಗ್ ಎಚ್ಚರ್ಗೆ

ಕುಡ್ಲ: ಬಿಪರ್‌ಜಾಯ್ ಚಂಡಮಾರುತ ಅರಬ್ಬೀ ಸಮುದ್ರಡ್ ಮಸ್ತ್ ಪ್ರಭಾವ ಬೂರ್ದಿತ್ತ್‌ದ್, ದುಂಬುದ ಕೆಲ ಗಂಟೆಲೆಡ್ ತುಳುನಾಡ್‌ಡ್ ಭಾರೀ ಬರ್ಸ ಬರ್ಪಿನ ಸಾಧ್ಯತೆ ಉಂಡು.

ಬಿಪರ್‌ಜಾಯ್ ಚಂಡಮಾರುತ ಈ ಸುರುಕ್ಕ್ ಊಹೆ ಮಲ್ತಿನೆರ್ದ್‌ಲ ತೀವ್ರ ಆದ್ ಉಂಡು. ಉಂಡು ಈ ಚಂಡಮಾರುತದ ಪರಿಣಾಮ ರಾಜ್ಯಡ್ ದುಂಬುದ 3-4 ದಿನಟ್ಟ್ ಕೆಲ ರಾಜ್ಯಲೆಡ್ ಬರ್ಸ ಬರ್ಪಿನ ಸಾಧ್ಯತೆನ್ ಹವಾಮಾನ ಇಲಾಖೆ ಕೊರ್ತ್ಂಡ್. ಜೂ.9-ಜೂ.12 ಮುಟ್ಟ ಮೀನುಗಾರೆರ್ ಕಡಲ್‌ಗ್ ಪೋವಂದಿಲೆಕ್ಕ ಎಚ್ಚರ್ಗೆ ಕೊರ್ತೆರ್.

Water scarcity in Mangalore – few colleges closed ಕುಡ್ಲಡ್ ನೀರ್‌ದ ಸಮಸ್ಯೆ; ಕೆಲ ಕಾಲೇಜ್ ಬಂದ್

ಜೂನ್ ಸುರುತ್ತ ವಾರ ಕರೀಂಡಲ ತುಳುನಾಡ್‌ಗ್ ನನಲ ಬರ್ಸ ಬೈದಿಜಿ. ಈ ನಿಲೆಟ್ಟ್ ಕುಡ್ಲಡ್ ನೀರ್‌ದ ಸಮಸ್ಯೆ ಎಚ್ಚಾವೊದುಂಡು. ಅಗತ್ಯ ಇಪ್ಪುನಾತ್ ನೀರ್ ತಿಕ್ಕಂದಿನ ಕಾರಣ ಬುಧವಾರರ್ದ್ ಕೆಲ ಸರ್ಕಾರಿ ಅಂಚನೆ ಖಾಸಗಿ ಶಿಕ್ಷಣ ಸಂಸ್ಥೆಲೆಡ್ ಕಲ್ಪಾರ್ಥಿಲೆಗ್ ರಜೆ ಕೊರ್ದು ಆನ್‌ಲೈನ್‌ದ ಮುಕೇನ ಕ್ಲಾಸ್ ಮಲ್ತೊಂದುಲ್ಲೆರ್.

ಕೆಲ ಕಡೆಟ್ಟ್ ಅರ್ಧ ದಿನ ಕ್ಲಾಸ್‌ನ್ ಮಲ್ತೊಂದುಲ್ಲೆರ್. ಶೈಕ್ಷಣಿಕ ಸಂಸ್ಥೆಲು ಮಾತ್ರ ಅತ್ತಂದೆ ಇಲ್ಲ್, ಆಸ್ಪತ್ರೆ, ಕಚೇರಿಗ್‌ಲ ನೀರ್‌ದ ಸಮಸ್ಯೆ ಉಂಡು.

Taranath Varkadi, Puttige Raghuram Holla given “Asranna” Prashasthi ತಾರಾನಾಥ ವರ್ಕಾಡಿ, ಪುತ್ತಿಗೆ ಹೊಳ್ಳ ಮೊಕಲೆಗ್ ಆಸ್ರಣ್ಣ ಪ್ರಶಸ್ತಿ ಪಟ್ಟುನ ಲೇಸ್

ಕಟೀಲ್ : ಜೋಕ್ಲೆಗ್, ಜವನೆರೆಗ್ ಯಕ್ಷಗಾನನ್ ಸಂಪೂರ್ಣವಾದ್ ಕಲ್ಪಾವುನ ತರಬೇತಿ ಒಡಿಪು, ಕಟೀಲ್ ಮಾತ್ರ ಅತ್ತಂದೆ ಮಾತ ಕಡೆಟ್ಟ್‌ಲ ನಡಪೊಡು. ಮಠ, ದೇವಲ್ಯದೊಟ್ಟುಗು ಮಾತೆರ್‍ಲಾ ಈ ಲೇಸ್‌ಗ್ ಕೈ ಸೇರ್ಸಾವೊಡು. ಯಕ್ಷಗಾನಗ್ ಭವಿಷ್ಯ ಇಜ್ಜಿ ಪನ್ಪಿನ ಪೋಡಿಗೆ ಇತ್ತೆ ದೂರ ಆತ್ಂಡ್. ಯುವ ಸಮುದಾಯದಕುಲು ಯಕ್ಷಗಾನಡ್ ಎಚ್ಚಾದ್ ಆಸಕ್ತಿ ತೋಜ್ಪಾವೊಂದು ಉಲ್ಲೆರ್. ಯಕ್ಷಗಾನ ಕಲ್ತಿನ ಜೋಕುಲು ಎಚ್ಚಾದ್ ಕ್ರಿಯಾಶೀಲರಾಪೆರ್, ಬುದ್ದಿವಂತೆರಾಪೆರ್ ಪಂದ್ ಯಕ್ಷ ಶಿಕ್ಷಣ ಟ್ರಸ್ಟ್‌ದ ಸಂಸ್ಥಾಪಕೆರ್ ಸ್ಥಾಪಕೆರ್ ಅಧ್ಯಕ್ಷೆರ್, ಮಾಜಿ ಶಾಸಕೆರ್ ರಘುಪತಿ ಭಟ್ ಪಂಡೆರ್.

ಆರ್ ಕಟೀಲ್ ಶ್ರೀ ದುರ್ಗಾಮಕ್ಕಳ 14 ನೇ ವಾರ್ಷಿಕ ಕಲಾಪರ್ವದ ಮುಗಿತಲದ ಲೇಸ್‌ಡ್ ಪಾತೆರಿಯೆರ್. ಕಟೀಲ್ ಕೃಷ್ಣ ಆಸ್ರಣ್ಣ ಪ್ರಶಸ್ತಿನ್ ಪುತ್ತಿಗೆ ರಘುರಾಮ ಹೊಳ್ಳ ಅಂಚನೆ
ಕಟೀಲು ಸದಾನಂದ ಆಸ್ರಣ್ಣ ಪ್ರಶಸ್ತಿನ್ ತಾರಾನಾಥ ವರ್ಕಾಡಿ ಮೊಕಲೆಗ್ ಕೊರ್ದು ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ಕಟೀಲ್ ದೇವಲ್ಯದ ಆನುವಂಶಿಕ ಮೊಕ್ತೇಸರೆರ್ ವಾಸುದೇವ ಆಸ್ರಣ್ಣ, ಕರಾವಳಿ ಅಭಿವೃದ್ದಿ ಪ್ರಾಧಿಕಾರದ ಮಾಜಿ ಅಧ್ಯಕ್ಷೆರ್ ಮಟ್ಟಾರ್ ರತ್ನಾಕರ ಹೆಗ್ಡೆ, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್. ಅಜೆಕಾರು ಬಾಲಕೃಷ್ಣ ಶೆಟ್ಟಿ, ಉದ್ಯಮಿ ಕಟೀಲು ಗಿರೀಶ್ ಶೆಟ್ಟಿ, ಜಗದೀಪ ಸುವರ್ಣ ಇತ್ತೆರ್.

Taranath Varkadi, Puttige Raghuram Holla given “Asranna” Prashasthi

Kateel: “Yakshagana should be encouraged and taught not only in places like Udupi and Kateel, but also in other places and temples. Yakshagana has a bright future and youngsters are showing renewed interest in the art . The art from is rejuvenating to body and mind” said former MLA and founder of Yaksha Shikshana trust Raghupati Bhat .

He was speaking at a n awards ceremony organised at Kateel to present the ” Kateel Sadanand Asranna” awards. It was given to Raghuram Holla and Taranath Varkadi.

Lokaiah Shetty Munchoor is the new president of Bunts Sangha Surathkal ಸುರತ್ಕಲ್ ಬಂಟರ ಸಂಘಗ್ ಲೋಕಯ್ಯ ಶೆಟ್ಟಿ ಮುಂಚೂರು ಪೊಸ ಗುರ್ಕಾರ್ಲು

ಸುರತ್ಕಲ್ : ಬಂಟರ ಸಂಘ (ರಿ) ಸುರತ್ಕಲ್ ಉಂದೆತ್ತ 2023-25 ನೇ ಸಾಲ್‌ದ ಪೊಸ ಗುರ್ಕಾರೆಯಾದ್ ಮುಂಚೂರು ಲೋಕಯ್ಯ ಶೆಟ್ರ್ ಅವಿರೋಧವಾದ್ ಆಯ್ಕೆ ಆತೆರ್.

ಒತ್ತು ಗುರ್ಕಾರೆರಾದ್ ಪುಷ್ಪರಾಜ ಶೆಟ್ಟಿ ಕುಡುಂಬೂರು, ಪ್ರಧಾನ ಕಾರ್ಯದರ್ಶಿಯಾದ್ ಲೀಲಾಧರ ಶೆಟ್ಟಿ ಕಟ್ಲ, ಕೋಶಾಧಿಕಾರಿಯಾದ್ ಅವಿನಾಶ್ ಶೆಟ್ಟಿ, ಜೊತೆ ಕಾರ್ಯದಶಿಯಾದ್ ಸುಧೀರ್ ಶೆಟ್ಟಿ ಸೂರಿಂಜೆ, ಸಂಘಟನಾ ಕಾರ್ಯದರ್ಶಿಯಾದ್ ಪುಷ್ಪರಾಜ ಶೆಟ್ಟಿ ಮದ್ಯ, ಸಾಂಸ್ಕೃತಿಕ ಕಾರ್ಯದರ್ಶಿಯಾದ್ ಜಯರಾಮ ಶೆಟ್ಟಿ ತಡಂಬೈಲ್, ಕ್ರೀಡಾ ಕಾರ್ಯದರ್ಶಿಯಾದ್ ಶಿಶಿರ್ ಶೆಟ್ಟಿ ಪೆರ್ಮುದೆ ಆಯ್ಕೆ ಆತೆರ್.

ಕಾರ್ಯಕಾರಿ ಸಮಿತಿ ಸದಸ್ಯೆರಾದ್ ಬಾಳ ಜಗನ್ನಾಥ ಶೆಟ್ಟಿ, ಸುಧಾಕರ ಶೆಟ್ಟಿ ಚೇಳಾರ್, ಶ್ರೀಕಾಂತ್ ಶೆಟ್ಟಿ ಕಾಟಿಪಳ್ಳ, ಮಾಧವ ಶೆಟ್ಟಿ ತಡಂಬೈಲ್, ಶ್ರೀಕೃಷ್ಣ ಶೆಟ್ಟಿ ಕುತ್ತೆತ್ತೂರು, ಯೋಗೀಶ್ ಶೆಟ್ಟಿ ಕುಳಾಯಿ, ಹರೀಶ್ ಶೆಟ್ಟಿ ಇಡ್ಯಾ, ಸುಜಾತ ಶೆಟ್ಟಿ ಹೊಸಬೆಟ್ಟು, ವೇದಾವತಿ ಎನ್ ಶೆಟ್ಟಿ ಇಡ್ಯಾ, ಮೀರಾವಾಣಿ ಎಂ ಶೆಟ್ಟಿ ಕಾಟಿಪಳ್ಳ ಆಯ್ಕೆ ಆತೆರ್.

ಬಂಟರ ಭವನಡ್ ನಡತಿನ ವೋಟುಡು ಚುನಾವಣಾಧಿಕಾರಿಯಾದ್ ಬಂಟರ ಯಾನೆ ನಾಡವರ ಮಾತೃಸಂಘದ ಕಾರ್ಯಕಾರಿ ಸಮಿತಿ ಸದಸ್ಯೆರ್ ಉಲ್ಲಾಸ್ ಆರ್ ಶೆಟ್ಟಿ ಪೆರ್ಮುದೆ ಇತ್ತೆರ್. ಯಶ್ ರಾಜ್ ಶೆಟ್ಟಿ, ಶ್ರೀಜಿತ್ ಶೆಟ್ಟಿ, ಸುಶಾನ್ ಶೆಟ್ಟಿ ಸಕಾಯ ಮಲ್ತೆರ್.

Rains and thunderstorms likely in the next three days in coastal areas ಮೂಜಿ ದಿನ ತೆಡಿಲ್ ಬರ್ಸ ಬರ್ಪಿನ ಸಾಧ್ಯತೆ

ಕುಡ್ಲ: ತುಳುನಾಡ್‌ಡ್ ಮೂಜಿ ದಿನ ಭಾರೀ ಬರ್ಸ ಬರ್ಪಿನ ಸಾಧ್ಯತೆ ಉಂಡು.

ಇನಿ ಪುಲ್ಯಕಾಂಡೆರ್ದೆ ಮುಗಲ್ ಪಾಡ್ದಿನ ವಾತಾವರಣ ಇತ್ತ್‌ದ್, ತೆಡಿಲ್‌ದ ಸಬ್ದ ಕೇಂದ್ ಬರೊಂದುಂಡು. ನನ ಪನಿಪನಿ ಬರ್ಸ ಬರೊಂದಿತ್ತ್‌ದ್ ಭಾರೀ ಬರ್ಸ ಬರ್ಪಿನ ಸಾಧ್ಯತೆ ಉಂಡು. ಮೀನುಗಾರೆರ್ ಕಡಲ್‌ಗ್ ಪೋವಂದಿಲೆಕ ಎಚ್ಚೆರ್ಗೆ ಕೊರ್ತೆರ್.