ಒಡಿಪು: ಕಲ್ಯಾಣಪುರದ ನೇಜಾರ್ ಶ್ರೀ ಭಗವತೀ ತೀಯಾ ಸಮಾಜ (ರಿ.) ದ ಮುತಾಲಿಕೆಡ್ ಬ್ರಹ್ಮಶ್ರೀ ನಾರಾಯಣ ಗುರು ಜನ್ಮದಿನಾಚರಣೆ ಸೆ.1 ಸುಕ್ರಾರ ನಡಪರೆ ಉಂಡು.
ಬಯ್ಯಗ್ ಭಜನೆ, ಗುರುವಂದನೆ ಸನ್ಮಾನ ಸಭೆ ಆಯಿ ಬೊಕ್ಕ ಕಲಾ ಸಾರಥಿ ತೋನ್ಸೆ ಪುಷ್ಕಳ ಕುಮಾರ್ ಮೆರೆರ್ದ್ ಶ್ರೀ ಗುರು ತತ್ವ ಸಂದೇಶ- ಶ್ರೀ ಲಕ್ಷ್ಮೀ ಸ್ವಯಂವರ ಪನ್ಪುನ ಹರಿಕಥೆ ನಡಪರೆ ಉಂಡು ಪಂದ್ ನೇಜಾರ್ ಶ್ರೀ ಭಗವತೀ ತೀಯಾ ಸಮಾಜ (ರಿ.) ದ ಅಧ್ಯಕ್ಷೆರ್ ಬೊಕ್ಕ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಮುಲ್ಕಿ: ಆಂಧ್ರ ಪ್ರದೇಶದ ಕುಪ್ಪಂ ಯುನಿವರ್ಸಿಟಿದ ಪಿಎಚ್ಡಿಗಾದ್ ತುಳು, ಕನ್ನಡ ಸಾಹಿತಿ ಡಾ.ವಿ.ಕೆ.ಯಾದವ್ ಮೇರ್ ಅಧ್ಯಯನ ಮಲ್ತ್ ದ್ ಬರೆತಿನ “ಮೊಗವೀರೆರ್ನ ಸಾಂಸ್ಕೃತಿಕ ಬದ್ ಕ್ ಬೊಕ್ಕ ಆರ್ಥಿಕ ಚಿಂತನೆ” ಪನ್ಪಿನ ಪ್ರಬಂಧದ ಬೂಕು ಬುಡುಗಡೆ ಐತಾರ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಅನ್ನಪೂರ್ಣ ಸಭಾಂಗಣಡ್ ನಡತ್ಂಡ್.
ಈ ಲೇಸ್ ನ್ ಜಿ.ಶಂಕರ್ ಫ್ಯಾಮಿಲಿ ಟ್ರಸ್ಟ್ ದ ಮುಖ್ಯಸ್ಥೆರ್, ನಾಡೋಜ ಜಿ.ಶಂಕರ್ ಉದಿಪನ ಮಲ್ತೆರ್.
ಈ ಪೊರ್ತುಡು ಪಾತೆರ್ನ ಆರ್, ಮೊಗವೀರ ಮಹಾಸಭಾಕ್ಕ್ 100 ನೇ ವರ್ಷದ ಗೌಜಿಡ್ ಉಂಡು. ಆ ನಿಲೆಟ್ಟ್ ಒಂಜಿ ವರ್ಷೊಡು ವಿಶ್ವ ಮೊಗವೀರ ಸಮ್ಮೇಳನ ಮಲ್ಪರೆ ಉಂಡು. ಅಯಿಕ್ಕ್ ಮಾತೆರ್ಲ ಸಾಕಾರ ಕೊರೊಡು ಪಂಡೆರ್.
ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಬಲೆತ್ತ ಕಲ್ಲಿರ್ದ್ ಬೂಕುಲೆನ್ ದೆತ್ತ್ ದ್ ಬುಡುಗಡೆ ಮಲ್ತೆರ್. ಸಸಿಹಿತ್ಲು ಶ್ರೀ ಭಗವತಿ ದೇವಸ್ಥಾನ ದ ಅನುವಂಶಿಕ ಮೊಕ್ತೇಸರೆರ್ ಶ್ರೀನಿವಾಸ ಯಾನೆ ಅಪ್ಪು ಪೂಜಾರಿ ಆಶೀರ್ವಚನ ಮಲ್ತೆರ್.
ಉಪನ್ಯಾಸಕೆರ್ ಡಾ. ಮಹಾಲಿಂಗ ಭಟ್ ಬೂಕುದ ಬಗೆಟ್ಟ್ ಪೊಲಬು ಕೊರಿಯೆರ್. ಆನಂದ್ ಸುವರ್ಣ ಉಳ್ಳಾಲ ಬೊಕ್ಕ ಹರಿಶ್ಚಂದ್ರ ಮೆಂಡನ್ ಪೊಲಿಪು ಮೊಕ್ಲೆರ್ದ್ ಕಡಲ್ದ ಮೀನ್ ಲೆನ ಚಲನೆದ ಬಗೆತ್ತ ತುಳು ಶಬ್ದೊಲೆನ ದಾಖಲೀಕರಣ ನಡತ್ಂಡ್.
ಮುಲ್ಕಿ ಸೀಮೆದ ಅರಸುಲು ದುಗ್ಗಣ್ಣ ಸಾವಂತೆರ್, ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ಅನುವಂಶಿಕ ಮೊಕ್ತೇಸರೆರ್ ಮನೋಹರ ಶೆಟ್ರ್, ಶಾಸಕೆರ್ ಉಮಾನಾಥ ಕೋಟ್ಯಾನ್, ಕುಡ್ಲ ವಿವಿ ತುಳು ಅಧ್ಯಯನ ಪೀಠದ ಮುಖ್ಯಸ್ಥೆರ್ ಡಾ.ಮಾಧವ ಎಂ.ಕೆ ಮೊಕುಲು ಮಾತ ಪಾತೆರ್ದ್ ಎಡ್ಡೆಪ್ಪುದ ನುಡಿ ಸೇಸೆ ಪಾಡಿಯೆರ್.
ಮಲ್ಲ ಬಿನ್ನೆರಾದ್ ದ.ಕ. ಮೊಗವೀರ ಮಹಾಜನ ಸಂಘ ಉಚ್ಚಿಲ ನೆತ್ತ ಅಧ್ಯಕ್ಷೆರ್ ಜಯ ಸಿ.ಕೋಟ್ಯಾನ್, ಉದ್ಯಮಿ ನಾರಾಯಣ ರಾವ್ ಬೆಂಗಳೂರು, ಮುಲ್ಕಿ ನಾಲ್ಕು ಪಟ್ಣ ಮೊಗವೀರ ಸಭಾದ ಅಧ್ಯಕ್ಷೆರ್ ಸುಜಿತ್ ಸಾಲ್ಯಾನ್, ಬಗ್ವಾಡಿ ಹೋಬಳಿ ಮೊಗವೀರ ಮಹಾಜನ ಸಂಘದ ಉದಯ ಕುಮಾರ್ ಹಟ್ಟಿಯಂಗಡಿ,ದ.ಕ. ಮೊಗವೀರ ಮಹಿಳಾ ಸಂಘ ಉಚ್ಚಿಲದ ಗುರ್ಕಾರ್ದಿ ಉಷಾರಾಣಿ ಡಿ.ಕೆ., ಸಾಹಿತಿ ಡಾ. ಜಿ.ಪಿ ಕುಸುಮ, ಉದ್ಯಮಿ ನಾರಾಯಣ ರಾವ್ ಮಿತ್ತರ್ಮೆಡ್ ಇತ್ತೆರ್.
ತಿರ್ತ ಚಾವಡಿದ ಮತ್ತರ್ಮೆದ ಬಲತ್ತ ಮೆಯಿಟ್ಟ್ ಸಾಹಿತಿಲು, ವಿದ್ವಾಂಸೆರ್ ಓಲಗ ಆದಿತ್ತೆರ್ಡ, ದತ್ತ್ ಮೆಯಿಟ್ಟ್ ತುಳುಕ್ಕಾದ್ ಬೇಲೆ ಮಲ್ದಿನ ಸಂಘಟಕೆರ್, ಪತ್ರಿಕಾ ಕೂಟದಕುಲು ಇತ್ತೆರ್.
ದಿಲೀಪ್ ಕುಮಾರ್ ಬೊಕ್ಕ ಆಕಾಶ್ ತಿಂಗಳಾಯ ಮೊಕುಲು “ಗೆಜ್ಜೇನವೂ ಗೆಜ್ಜೆ ನೇ..” ಪಂದ್ ಅಂಬಾ ಸುಗಿಪು ಮಲ್ತೆರ್. ಡಾ. ವಿ.ಕೆ.ಯಾದವ್ ಬಿನ್ನೆರೆನ್ ಎದ್ಕೊಂಡೆರ್. ಕುರಲ್ ಇಸ್ಟೆರ್ ಕುಡ್ಲದ ರಾಮದಾಸ್ ಪಾವಂಜೆ ಪಿಟ್ಕಾಯನದ (ಪ್ರಾಸ್ತಾವಿಕ) ಪಾತೆರ ಪಂಡೆರ್.
ನವೀನ್ ಕೋಟ್ಯಾನ್ ಸಸಿಹಿತ್ಲು ಬೊಕ್ಕ ಚಂದ್ರ ಕುಮಾರ್ ಸಸಿಹಿತ್ಲು ಐಚೋರ… ಐಚೋರ… ಪಂದ್ ಸೊರ ಲಕ್ಕಾಯೆರ್. ಎಸ್. ಆರ್. ಪ್ರಭಾತ್ ಲೇಸ್ ಸುಧಾರಿಕೆ ಮಲ್ತೆರ್. ಎಸ್ ಆರ್. ಪ್ರದೀಪ್ ಸೊಲ್ಮೆ ಸಂದಾಯೆರ್. ನೆರ್ದ್ ದುಂಬು ಸುಂಕದಕಟ್ಟೆ ನಿರಂಜನ ಸ್ವಾಮಿ ಕಾಲೇಜಿದ ಪ್ರಿನ್ಸಿಪಾಲ್ ಸುಧಾಕರ ಶೆಟ್ಟಿ ಮೆರೆನ ಗುರ್ಕಾರ್ಮೆಡ್ ತುಳು ಕವಿ ಗೋಷ್ಠಿ ನಡತ್ಂಡ್.
ತೂಂಕಾಲ್ದ ಬೊಲ್ಪು, ಓಡೊಡು ಬತ್ತಿನ ಬೂಕು
ಮೊಗವೀರೆರ್ನ ಬದ್ ಕ್ ದ ಬಂಡಿಯೇ ಆದುಪ್ಪುನ ಓಡದ ನಡುಟ್ಟು ಕಟ್ ದಿನ ತೂಂಕಾಲ್ ಗ್ ಎಣ್ಣೆ ಮಯಿತ್ ದ್ ಬೊಲ್ಪು ಅರ್ಲಾದ್ ಲೇಸ್ ಉದಿಪನ ಮಲ್ತಿನವು ಒಂಜಿ ವಿಶೇಷ ಆಂಡ ಕಲಸೆಡ್ ಪುಡಯಿಗ್ ಬಾರ್ ದೊರಿತ್ ದ್ ಲೇಸ್ ಸುರು ಮಲ್ತಿನವು ಕುಡೊಂಜಿ ವಿಶೇಷ. ಅವ್ವತ್ತಾಂದೆ ಓಡದ ಉಲಯಿ ಬಲೆತ್ತ ಕಲ್ಲಿಡ್ ಬುಡುಗಡೆ ಆವರೆ ಇತ್ತಿನ ಬೂಕುನು ದೀವೊಂದು ಓಡದ ಅಡಿಕ್ಕ್ ದಡೆ ಪಾಡೊಂದು ಓಡ ಜಾರಾವೊಂದು ಬತ್ತ್ ದ್ ಅಯಿರ್ದ್ ಬೊಕ್ಕ ರಡ್ಡ್ ಜನ ಪುಗ್ಗೆಲ್ ಗ್ ದಂಡ್ ಪಾಡ್ದ್ ಬೂಕು ಇತ್ತಿನ ಕಲ್ಲಿನ್ ಮಿತ್ತರ್ಮೆಗ್ ಕೊನೊದು ಅವುಲು ಬಿನ್ನೆರ್ ಕಲ್ಲಿನ್ ಗಿರ್ತ್ ದ್ ಬೂಕು ಬುಡುಗಡೆ ಮಲ್ತ್ ದ್ ಈ ಲೇಸ್ ಗ್ ಪೊಸ ದೇಖಿ ಕೊರಿಯೆರ್.
ಕರ್ನಾಟಕ ಸರ್ಕಾರದ ಮಾಜಿ ಸಚಿವೆರ್, ಕಾರ್ಲದ ಶಾಸಕೆರ್ ವಿ ಸುನಿಲ್ ಕುಮಾರ್ ಆ.21 ದಾನಿ ಸೋಮವಾರ ನಾಗರ ಪಂಚಮಿದ ವಿಶೇಷ ದಿನತಾನಿ ಒಡಿಪು ಬೊಕ್ಕ ದಕ್ಷಿಣ ಕನ್ನಡ ಜಿಲ್ಲೆದ ಮಾತಾ ಕುಟುಂಬದಕುಲ್ ಶ್ರೀ ನಾಗ ದೇವೆರ್ನ ಪೂಜಾ ಕಾರ್ಯಕ್ರಮ ನಡಪಾವೆರೆ ಅನುಕೂಲ ಆಪುನ ದೃಷ್ಟಿರ್ದ್ ಶಾಲಾ-ಕಾಲೇಜಿ ಸೇರಿನಂಚನೆ ಮಾತಾ ಸರ್ಕಾರಿ ಕಚೇರಿಲೆಗ್ ಸಾರ್ವತ್ರಿಕ ರಜೆ ಘೋಷಣೆ ಮಲ್ಪೊಡು ಪಂದ್ ರಡ್ದು ಜಿಲ್ಲೆದ ಜಿಲ್ಲಾಧಿಕಾರಿಲೆಗ್ ಮನವಿ ಮಲ್ತ್ ದೆರ್.
ಒಡಿಪು: ಬ್ರಹ್ಮಶ್ರೀ ನಾರಾಯಣ ಗುರು ಜಯಂತಿ ಆಚರಣೆ ಬೊಕ್ಕ ಮಾಜಿ ಮುಖ್ಯಮಂತ್ರಿ ದೇವರಾಜ ಅರಸು ಜಯಂತಿ ಆಚರಣೆದ ಅಟ್ಟಣೆದ ಸಭೆ ಬಗ್ಗೆ ಒಡಿಪು ಜಿಲ್ಲಾಧಿಕಾರಿ ಕಚೇರಿಡ್ ನಡತ್ಂಡ್.
ಒಡಿಪು ಶಾಸಕೆರ್ ಯಶ್ ಪಾಲ್ ಸುವರ್ಣ ಸಭೆಟ್ಟ್ ಪಾಲ್ ಪಡೆದ್, ಮಹನೀಯೆರ್ನ ಜಯಂತಿನ್ ಅರ್ಥಪೂರ್ಣವಾದ್ ಆಚರಣೆ ಮಲ್ಪೊಡು ಪಂದ್ ಸಲಹೆ ಕೊರಿಯೆರ್. ಸಭೆತ ಅಧ್ಯಕ್ಷತೆನ್ ಒಡಿಪು ಜಿಲ್ಲಾಧಿಕಾರಿ ಡಾ. ಕೆ. ವಿದ್ಯಾ ಕುಮಾರಿ ಒಯಿಸ್ ದಿತ್ತೆರ್.
ಈ ಪೊರ್ತುಡು ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಎಚ್. ಪ್ರಸನ್ನ, ಅಪರ ಜಿಲ್ಲಾಧಿಕಾರಿ ವೀಣಾ ಬಿ. ಎನ್., ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಹಾಯಕ ನಿರ್ದೇಶಕೆರ್ ಪೂರ್ಣಿಮ, ಜಿಲ್ಲಾ ಪಂಚಾಯತ್ ಮಾಜಿ ಅಧ್ಯಕ್ಷೆರ್ ಜನಾರ್ಧನ ತೋನ್ಸೆ, ಬಿ. ಎನ್. ಶಂಕರ ಪೂಜಾರಿ, ನಗರ ಸಭೆ ಮಾಜಿ ಅಧ್ಯಕ್ಷೆರ್ ಕಿರಣ್ ಕುಮಾರ್ ಬೈಲೂರು, ಬಿಲ್ಲವ ಸಮುದಾಯದ ಗಣ್ಯೆರಾಯಿನ ಹರೀಶ್ ಚಂದ್ರ ಅಮೀನ್, ಕಾಮರಾಜ್ ಸುವರ್ಣ, ಮಲ್ಪೆ ರಾಘವೇಂದ್ರ, ಬೊಕ್ಕ ವಿವಿಧ ಇಲಾಖೆದ ಅಧಿಕಾರಿಲು ಇತ್ತೆರ್.
ಮುಲ್ಕಿ: ಜಾಗತಿಕ ಬಂಟರ ಸಂಘಗಳ ಒಕ್ಕೂಟ (ರಿ) ಕುಡ್ಲ ನೆತ್ತ ಮುತಾಲಿಕೆಡ್ ಅಕ್ಟೋಬರ್ 28 ಬೊಕ್ಕ 29 ದಾನಿ ಒಡಿಪುಡು ವಿಶ್ವ ಬಂಟರ ಸಮ್ಮಿಲನ ನಡಪರೆ ಉಂಡು ಪಂದ್ ಜಾಗತಿಕ ಬಂಟರ ಸಂಘದ ಒಕ್ಕೂಟದ ಅಧ್ಯಕ್ಷೆರ್ ಐಕಳ ಹರೀಶ್ ಶೆಟ್ಟಿ ತೆರಿಪಾದೆರ್.
ಆರ್ ಮುಲ್ಕಿದ ಕನ್ಯಾನ ಸದಾಶಿವ ಶೆಟ್ಟಿ ಸಂಕೀರ್ಣದ ಪ್ರವೀಣ್ ಭೋಜ ಶೆಟ್ಟಿ ಆಡಳಿತ ಕಚೇರಿಡ್ ನಡತಿನ ಒಕ್ಕೂಟದ ಸಭೆಟ್ ಅಧ್ಯಕ್ಷತೆ ಒಯಿಸೊಂದು ಪಾತೆರಿಯೆರ್.
ಅಕ್ಟೋಬರ್ 28 ದಾನಿ ಒಡಿಪುದ ಅಜ್ಜರಕಾಡ್ ಮೈದಾನಡ್ ವಿಶ್ವ ಬಂಟರ ಕ್ರೀಡಾಕೂಟ ಬೊಕ್ಕ ಅಕ್ಟೋಬರ್ 29 ದಾನಿ ಒಡಿಪುದ ಅಂಬಾಗಿಲು ಅಮೃತ ಗಾರ್ಡನ್ಡ್ ವಿಶ್ವ ಬಂಟರ ಸಾಂಸ್ಕೃತಿಕ ವೈಭವ ನಡಪೆರೆ ಉಂಡು ಪಂದ್ ತೆರಿಪಾದೆರ್.
ಈ ಲೇಸ್ದ ಸಾಂಸ್ಕೃತಿಕ ಸಮಿತಿ ಸಂಚಾಲಕೆರಾದ್ ಚಂದ್ರಹಾಸ ಶೆಟ್ಟಿ ರಂಗೋಲಿ, ಉಪ ಸಂಚಾಲಕೆರಾದ್ ಕರ್ನೂರು ಮೋಹನ್ ರೈ, ಬೊಕ್ಕ ಕ್ರೀಡಾ ಸಮಿತಿದ ಸಂಚಾಲಕೆರಾದ್ ಗಿರೀಶ್ ಶೆಟ್ಟಿ ತೆಳ್ಳಾರ್, ಉಪ ಸಂಚಾಲಕೆರಾದ್ ರೋಶನ್ ಕುಮಾರ್ ಶೆಟ್ಟಿ ಮೊಕ್ಲೆನ್ ಸಭೆಟ್ ಆಯ್ಕೆ ಮಲ್ತೆರ್. ಚೆನೆ ಉಪಸಮಿತಿಲೆನ್ ರಚನೆ ಮಲ್ಪೆರೆ ತೀರ್ಮಾನ ಮಲ್ತೆರ್.
ಊಟೋಪಚಾರದ ಸಮಿತಿ ಸಂಚಾಲಕೆರಾದ್ ಒಡಿಪು ಸಂತೋಷ್ ಶೆಟ್ಟಿ, ಮಾಧ್ಯಮ ಸಮಿತಿ ಸಂಚಾಲಕೆರ್ ಬಾಳ ಜಗನ್ನಾಥ ಶೆಟ್ಟಿ ಬೊಕ್ಕ ರಾಜೇಶ್ ಶೆಟ್ಟಿ ಒಡಿಪು ಮೊಕ್ಲೆನ್ ಆಯ್ಕೆ ಮಲ್ತೆರ್. ಈ ಲೇಸ್ಡ್ ಸಾಧಕರೆಗ್ ಗೌರವ, ಯಕ್ಷಗಾನ ಮೇಳದ ಯಜಮಾನೆರೆಗ್ ಮಾನಾದಿಗೆ ಅಂಚನೆ ರಾಜಕಾರಣಿಲು, ಸಿನಿಮಾ ನಟೆರೆನ್ ಲೇಸ್ ಗ್ ಲೆಪ್ಪೆರೆ ತೀರ್ಮಾನ ಮಲ್ತೆರ್.
ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಜಯಕರ ಶೆಟ್ಟಿ ಇಂದ್ರಾಳಿ ಪ್ರಾಸ್ತಾವಿಕವಾದ್ ಪಾತೆರಿಯೆರ್. ಉಪಾಧ್ಯಕ್ಷೆರ್ ಕರ್ನಿರೆ ವಿಶ್ವನಾಥ ಶೆಟ್ಟಿ ಪಾತೆರ್ದ್ ವಿಶ್ವ ಬಂಟರ ಸಮ್ಮಿಲನ ಕಾರ್ಯಕ್ರಮ ಯಶಸ್ವಿ ಆವರೆ ಮಾತಾ ವಲಯ, ತಾಲೂಕು ಬಂಟರ ಸಂಘ ಕೈ ಜೋಡಿಸಾದ್ ಕೆಲಸ ಮಲ್ಪೊಡು ಪಂಡೆರ್.
ವೇದಿಕೆಡ್ ಮುಲ್ಕಿ ಬಂಟರ ಸಂಘದ ಅಧ್ಯಕ್ಷೆರ್ ಪುರುಷೋತ್ತಮ ಶೆಟ್ಟಿ, ಬಂಟ್ವಾಳ ಬಂಟರ ಸಂಘದ ಅಧ್ಯಕ್ಷೆರ್ ಚಂದ್ರ ಹಾಸ ಶೆಟ್ಟಿ ರಂಗೋಲಿ, ಬೊಲ್ತೆರ್ ಬಂಟರ ಸಂಘದ ಅಧ್ಯಕ್ಷೆರ್ ಜಯರಾಮ ಶೆಟ್ಟಿ, ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಲೋಕಯ್ಯ ಶೆಟ್ಟಿ ಮುಂಚೂರು, ಸಾಲೆತ್ತೂರು ಬಂಟರ ಸಂಘದ ಅಧ್ಯಕ್ಷೆರ್ ದೇವಪ್ಪ ಶೇಖ, ಗುರುಪುರ ಬಂಟರ ಮಾತೃಸಂಘದ ಅಧ್ಯಕ್ಷೆರ್ ಸಂತೋಷ್ ಶೆಟ್ಟಿ, ಕುಕ್ಕುಂದೂರು ಬಂಟರ ಸಂಘದ ಅಧ್ಯಕ್ಷೆರ್ ರವಿ ಶೆಟ್ಟಿ, ತೋನ್ಸೆ ಬಂಟರ ಸಂಘದ ಅಧ್ಯಕ್ಷೆರ್ ಮನೋಹರ ಶೆಟ್ಟಿ, ಒಡಿಪು ಜಿಲ್ಲಾ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆ ಅಧಿಕಾರಿ ರೋಶನ್ ಕುಮಾರ್ ಶೆಟ್ಟಿ ಮೊಕುಲ್ ಪಾಲ್ ಪಡೆಯೆರ್.
ಸುರತ್ಕಲ್ ಬಂಟರ ಸಂಘದ ನಿಕಟಪೂರ್ವ ಅಧ್ಯಕ್ಷೆರ್ ಸುಧಾಕರ ಪೂಂಜ, ಸುದರ್ಶನ್ ಶೆಟ್ಟಿ ಗುರುಪುರ, ಮೋಹನ್ ಶೆಟ್ಟಿ ಒಡಿಪು, ಪ್ರಕಾಶ್ ಶೆಟ್ಟಿ ಪಡುಬಿದ್ರೆ, ಸತ್ಯ ಪ್ರಕಾಶ್ ಶೆಟ್ಟಿ ಜಪ್ಪು, ಪುಷ್ಪರಾಜ ಶೆಟ್ಟಿ ಕುಡುಂಬೂರು, ಶಮೀನಾ ಆಳ್ವ, ಕೊಲ್ಲಾಡಿ ಬಾಲಕೃಷ್ಣ ರೈ, ಬಾಳ ಜಗನ್ನಾಥ ಶೆಟ್ಟಿ, ಜೀವನ್ ಮುಲ್ಕಿ, ಸಾಯಿನಾಥ ಶೆಟ್ಟಿ, ಸಚ್ಚಿದಾನಂದ ಹೆಗ್ಡೆ ಕೊಳ್ಕೆಬೈಲು, ರವಿ ಶೆಟ್ಟಿ ಜತ್ತಬೆಟ್ಟು, ಶರತ್ ಶೆಟ್ಟಿ ಕಿನ್ನಿಗೋಳಿ, ನಿಶಾಂತ್ ಶೆಟ್ಟಿ ಕಿಲೆಂಜೂರು, ರೋಹಿನಿ ಶೆಟ್ಟಿ, ಅಮೂಲ್ಯ ಶೆಟ್ಟಿ ಕಟೀಲು, ಭಾರತಿ ಶೆಟ್ಟಿ ಮೊಕುಲ್ ಮಾತಾ ಸಲಹೆ ಸೂಚನೆ ಕೊರಿಯೆರ್.
ಆಗಸ್ಟ್ 11 ದಾನಿ ಬಯ್ಯಗ್ 4 ಗಂಟೆಗ್ ಒಡಿಪುದ ಅಂಬಾಗಿಲು ಅಮೃತ ಗಾರ್ಡನ್ ಡ್ ವಿಶ್ವ ಬಂಟರ ಸಮ್ಮೇಳನದ ಬಗ್ಗೆ ಸಭೆ ನಡಪೆರೆ ಉಂಡು, ಸಮಾಜ ಬಾಂಧವೆರ್ ಹೆಚ್ಚಿನ ಸಂಖ್ಯೆಡ್ ಭಾಗವಹಿಸುವೊಡ್ ಪಂದ್ ತೆರಿಪಾದೆರ್.
ಕಾಪು: ಸುಮಾರ್ 30 ಕೋಟಿ ರೂ. ಕರ್ಚಿಡ್ ಬಾಗಲಕೋಟೆದ ಇಳ್ಕಲ್ ಶಿಲೆಟ್ಟ್ ನಿರ್ಮಾಣ ಆವೊಂದಿಪ್ಪುನ ಇತಿಹಾಸ ಪ್ರಸಿದ್ಧ ಕಾಪು ಪೊಸ ಮಾರಿಗುಡಿತ್ತ ಜೀರ್ಣೋದ್ಧಾರಗ್ ಶ್ರೀ ಕ್ಷೇತ್ರ ಧರ್ಮಸ್ಥಳರ್ದ್ 15 ಲಕ್ಷ ರೂ ದೇಣಿಗೆನ್ ಕೊರ್ತೆರ್.
ಕ್ಷೇತ್ರದ ಅಭಿವೃದ್ಧಿ ಸಮಿತಿದ ಅಧ್ಯಕ್ಷೆರ್ ಕೆ ವಾಸುದೇವ ಶೆಟ್ಟಿ ಮೇರ್ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ದಿ ಯೋಜನೆದ ಒಡಿಪು ಜಿಲ್ಲಾ ನಿರ್ದೇಶಕೆರ್ ಡಿ. ಶಿವಾನಂದ ಪ್ರಭು ಮೇರೆಗ್ ನಡತೊಂದಿಪ್ಪುನ ಕಾಮಗಾರಿದ ಬಗ್ಗೆ ಬೊಕ್ಕ ಸಮಗ್ರ ಜೀರ್ಣೋದ್ಧಾರದ ಬಗೆಟ್ಟ್ ಮಾಹಿತಿ ಕೊರಿಯೆರ್.
ಈ ಪೊರ್ತುಡು ದೇವಳ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ರಮೇಶ್ ಹೆಗ್ಡೆ ಕಲ್ಯಾ, ಕ್ಷೇತ್ರದ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಶ್ರೀನಿವಾಸ ತಂತ್ರಿ ಕಲ್ಯಾ, ವ್ಯವಸ್ಥಾಪನಾ ಸಮಿತಿದ ಮಾಜಿ ಅಧ್ಯಕ್ಷೆರ್ ಬೊಕ್ಕ ಗೌರವ ಸಲಹೆಗಾರೆರ್ ರತ್ನಾಕರ ಶೆಟ್ಟಿ ನಡಿಕೆರೆ, ಜೀರ್ಣೋದ್ಧಾರ ಸಮಿತಿದ ಉಪಾಧ್ಯಕ್ಷೆರ್ ಗಂಗಾಧರ ಸುವರ್ಣ, ದೇವಿಪ್ರಸಾದ್ ಶೆಟ್ಟಿ ಬೆಳಪು, ಮಾಧವ ಆರ್ ಪಾಲನ್, ಮನೋಹರ ಶೆಟ್ಟಿ, ಆರ್ಥಿಕ ಸಮಿತಿದ ಪ್ರಧಾನ ಸಂಚಾಲಕೆರ್ ಉದಯ ಸುಂದರ್ ಶೆಟ್ಟಿ, ಪ್ರಚಾರ ಸಮಿತಿದ ಪ್ರಧಾನ ಸಂಚಾಲಕೆರ್ ಯೋಗೀಶ್ ವಿ ಶೆಟ್ಟಿ ಬಾಲಾಜಿ, ಗ್ರಾಮ ಸಮಿತಿದ ಪ್ರಧಾನ ಸಂಚಾಲಕೆರ್ ಅರುಣ್ ಶೆಟ್ಟಿ ಪಾದೂರು, ವ್ಯವಸ್ಥಾಪನಾ ಸಮಿತಿದ ಸದಸ್ಯೆರಾಯಿನ ಚಂದ್ರಶೇಖರ್ ಅಮೀನ್, ರವೀಂದ್ರ ಎಂ, ಬಾಬು ಮಲ್ಲಾರ್, ಕಾಪು ಪುರಸಭಾ ಸದಸ್ಯೆರ್ ಅನಿಲ್ ಕುಮಾರ್, ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ಕಾಪು ತಾಲೂಕ್ದ ಯೋಜನಾಧಿಕಾರಿ ಜಯಂತಿ, ಕಾಪು ವಲಯದ ಮೇಲ್ವಿಚಾರಕೆರ್ ಸರಿತಾ, ಸಿದ್ದಿದಾತ್ರಿ ತಂಡದ ಸಂಚಾಲಕೆರಾಯಿನ ಜಗದೀಶ್ ಮೆಂಡನ್, ಬೊಕ್ಕ ಪ್ರಬಂಧಕೆರ್ ಗೋವರ್ಧನ್ ಸೇರಿಗಾರ್ ಲೇಸ್ ಡ್ ಪಾಲ್ ಪಡೆಯೆರ್.
ಒಡಿಪು: ಸಾಫ್ಟ್ವೇರ್ ಕೆಲಸ ಬುಡ್ದು ಬೈಕ್ ಡ್ ಸುಮಾರ್ 18000 ಜಾಸ್ತಿ ಕಿ.ಮೀ. ಪ್ರಯಾಣ ಮಲ್ತಿನ ಒಡಿಪುದ ಸಿದ್ಧ್ವೀನ್ ಶೆಟ್ಟಿ(28), ತುಳುನಾಡ ಕೊಡಿನ್ ವಿಶ್ವದ ಅತೀ ಎತ್ತರದ ಉಮ್ಮಿಂಗ್ ಲಾ ಬೊಕ್ಕ ಮೌಂಟ್ ಎವರೆಸ್ಟ್ ಬೇಸ್ ಕ್ಯಾಂಪ್ ದ ಮಿತ್ ರಾಪಾದ್ ವಿಶೇಷ ಸಾಧನೆ ಮಲ್ತ್ ದೆರ್.
ಒಡಿಪುದ ಸುರೇಶ ಕೃಷ್ಣ ಶೆಟ್ಟಿ ಬೊಕ್ಕ ಸುಜಯ ಎಸ್ ಶೆಟ್ಟಿ ಮೊಕ್ಲೆನ ಮಗೆ ಸಿದ್ವಿನ್ ಶೆಟ್ಟಿ ಮೇ 6 ದಾನಿ ಒಡಿಪು ರ್ದ್ ಅರೆನ ಹಿಮಾಲಯನ್ ಬೈಕ್ ಡ್ ಪ್ರಯಾಣ ಆರಂಭ ಮಲ್ತ್ ಭಾರತ, ನೇಪಾಲ ಬೊಕ್ಕ ಭೂತಾನ್ ದೇಶನ್ ಸುತ್ ದ್, ಭಾರತದ 21 ರಾಜ್ಯ, 5 ಕೇಂದ್ರಾಡಳಿತ ಪ್ರದೇಶಲೆನ್ ತಿರ್ಗ್ ದ್ ಜು.19 ದಾನಿ ಒಡಿಪು ಗ್ ವಾಪಸ್ ಆತೆರ್. ನೆತ್ತ ಒಟ್ಟಿಗೆ ಅತೀ ಎತ್ತರದ (19,024 ಅಡಿ) ಎತ್ತರದ ಪ್ರದೇಶ ಆಯಿನ ಉಮ್ಮಿಂಗ್ ಲಾ ಬೊಕ್ಕ ಮೌಂಟ್ ಎವರೆಸ್ಟ್ ಬೇಸ್ ಕ್ಯಾಂಪ್(17,598 ಅಡಿ) ಬೊಕ್ಕ ವಿಶ್ವದ ಪ್ರದೇಶದ ಶಿವ ದೇವಾಲಯ ತುಂಗನಾಥ್ ಇಡೆಲ ಪೋದು ಬೈದೆರ್.
ನೆತ್ತ ಬಗೆಟ್ಟ್ ಪಾತೆರ್ನ ಆರ್ ಎನ್ನ ಬೈಕ್ ಸವಾರಿದ ಸಮಯಡ್ ಸಂಕ, ಭೂ ಕುಸಿತ, ಪ್ರವಾಹ ಪ್ರದೇಶ, ತುದೆ, ಮಂಜು ಪ್ರದೇಶ, ದಟ್ಟ ವಾಯಿನ ಕಾಡ್ ಉಂದೆನ್ ಮಾತಾ ದಾಟ್ ದ್ ದುಂಬು ಪೋತೆ. ಕೆಲವೊಂಜಿ ದಿನಟ್ ಒಂಜಿ ಸಲ ವನಸ್ ಮಲ್ತಿನ ದಿನಲ ಉಂಡು ಪಂದ್ ತೆರಿಪಾದೆರ್.
ಬೈಕ್ ಪ್ರಯಾಣ ಡ್ 100 ಲ ಜಾಸ್ತಿ ದೇವಸ್ಥಾನ ಲು, ಗುರುದ್ವಾರ, ಚರ್ಚ್, ಬೊಕ್ಕ ಮಸೀದಿದ ವಾಸ್ತುಶಿಲ್ಪನ್ ಅನುಭವ ಮಲ್ಪುನ ಅವಕಾಶ ತಿಕ್ ದ್ಂಡ್. ಈ ಪೊರ್ತುಡು ಮಾತಾ ಧರ್ಮದ ಸಂಸ್ಕೃತಿ, ಆಚಾರ-ವಿಚಾರಲೆನ್ ತೆರಿಯೊನ ರೆ ಆಂಡ್ ಪಂದ್ ತೆರಿಪಾದೆರ್.
ಒಡಿಪು: ಪ್ಯಾರ ಮೆಡಿಕಲ್ ಕಾಲೇಜಿದ ಪಾಯಿಕಾನೆಡ್ ಕಲ್ಪಾರ್ಥಿಲೆನ ವಿಡಿಯೋ ಮಲ್ತಿನ ಆರೋಪ ಕೆಂದ್ ಬರೊಂದುಂಡ್. ಮೂಜಿ ಕಲ್ಪಾರ್ಥಿನಕ್ಲೆಗ್ ಒಡಿಪು ಒಂಜನೇ ಹೆಚ್ಚುವರಿ ಸಿವಿಲ್ ಬೊಕ್ಕ ಜೆಎಂಎಫ್ಸಿ ನ್ಯಾಯಾಲಯ ಸುಕ್ರಾರ ಷರತ್ತ್ ಬದ್ದ ಜಾಮೀನ್ ಮಂಜೂರು ಮಲ್ತ್ ಆದೇಶ ಕೊರ್ತೆರ್.
ವಿಡಿಯೋ ಮಲ್ತಿನ ಆರೋಪಿಲಾಯಿನ ಶಬನಾಜ್, ಆಲ್ಫಿಯಾ, ಆಲಿಮಾತುಲ್ ಶಾಫಿಯಾ ಮೊಕ್ಲೆನ ವಿರುದ್ದ ಮಲ್ಪೆ ಪೊಲೀಸ್ ಠಾಣೆಡ್ ಕಲಂ;509,204,175,34 ಐ.ಪಿ.ಸಿ ಬೊಕ್ಕ 66(ಇ) ಐಟಿ ಕಾಯಿದೆಡ್ ಪ್ರಕರಣ ದಾಖಲಾತ್ಂಡ್.
ಒಡಿಪು: ಬಿಸ್ಕೆಟ್ ಕೊರ್ಪೆ ಪಂದ್ ಐನ್ ವರ್ಷದ ಬಾಲೆದ ಮಿತ್ತ್ ಲೈಂಗಿಕ ದೌರ್ಜನ್ಯ ಮಲ್ತಿನ ಆರೋಪಿನ್ ಅರೆಸ್ಟ್ ಮಲ್ತಿನ ಘಟನೆ ಪಡುಬಿದ್ರಿಡ್ ನಡತ್ಂಡ್.
ಪಶ್ವಿಮ ಬಂಗಾಲದ ಮುರ್ಷಿದಾಬಾದ್ ಜಿಲ್ಲೆದ ನಿವಾಸಿ ಮುಫೀಐಲ್ ಶೇಖ(26) ಅರೆಸ್ಟ್ ಆಯಿನ ಆರೋಪಿ.
ಬಿಸ್ಕೆಟ್ ಕೊರ್ಪೆ ಪಂದ್ ಬಾಲೆದ ಅಪ್ಪೆ-ಅಮ್ಮಡ ಪಂದ್ ಬಾಲೆನ್ ಆಯನ ರೂಮ್ಗ್ ಲೆತೊಂದು ಪೋದ್ ಲೈಂಗಿಕ ದೌರ್ಜನ್ಯ ಮಲ್ತ್ದೆ ಪಂದ್ ಪೊಲೀಸೆರ್ ಮಾಹಿತಿ ಪಡೆಯೊಂದೆರ್. ಬಾಲೆ ಬಂಜಿ ಬೇನೆ ಪಂದ್ ಪನ್ನಗ ಅಲೆನ್ ಪಡುಬಿದ್ರಿ ಪ್ರಾಥಮಿಕ ಆರೋಗ್ಯ ಕೇಂದ್ರಗ್ ಲೆತೊಂದು ಪೋದು ವೈದ್ಯೆರ್ ಪರಿಶೀಲನೆ ಮಲ್ಪುನಗ ಲೈಂಗಿಕ ದೌರ್ಜನ್ಯ ಆತಿನ ಸಂಶಯ ಬೈದ್ಂಡ್.
ಬೊಕ್ಕ ಬಾಲೆನ್ ಪಡುಬಿದ್ರಿ ಠಾಣಾ ಮಹಿಳಾ ಸಿಬ್ಬಂದಿ ಆಲೆನ ಅಪ್ಪ-ಅಮ್ಮನ ಒಟ್ಟಿಗೆ ಒಡಿಪು ಸರಕಾರಿ ಜೊಕ್ಲೆನ ಆಸ್ಪತ್ರೆಗ್ ಲೆತೊಂದು ಪೋದು ವೈದ್ಯಕೀಯ ಪರೀಕ್ಷೆ ಮಲ್ಪುನಗ ಲೈಂಗಿಕ ದೌರ್ಜನ್ಯ ಆತಿನ ದೃಢ ಪಂದ್ ಪೊಲೀಸೆರ್ ತೆರಿಪಾದೆರ್.
ಒಡಿಪು: ಖಾಸಗಿ ನರ್ಸಿಂಗ್ ಕಾಲೇಜಿದ ಶೌಚಾಲಯಡ್ ವಿದ್ಯಾರ್ಥಿಲೆನ ವೀಡಿಯೋ ಚಿತ್ರೀಕರಣ ಮಲ್ತಿನ ಪ್ರಕರಣದ ವಿಚಾರಣೆ ಮಲ್ಪರೆ ರಾಷ್ಟ್ರೀಯ ಮಹಿಳಾ ಆಯೋಗದ ಸದಸ್ಯೆ, ಮಾಜಿ ಚಿತ್ರ ನಟಿ ಖುಷ್ಬೂ ಗುರುವಾರ ಆ ಕಾಲೇಜಿಗ್ ಭೇಟಿ ಕೊರ್ತೆರ್.
ಇನಿ ಬೊಲ್ಪುಗು ನೇತ್ರಜ್ಯೋತಿ ಪ್ಯಾರಾ ಮೆಡಿಕಲ್ ಕಾಲೇಜ್ಗ್ ಭೇಟಿ ಕೊರ್ತೆರ್. ಕಾಲೇಜ್ದ ಆಡಳಿತ ಮಂಡಳಿದ ಮುಖ್ಯಸ್ಥೆ ಲಕ್ಷ್ಮೀ ಕೃಷ್ಣ ಪ್ರಸಾದ್ ಮೇರ್ ಖುಷ್ಬೂ ಮೆರೆನ್ ಎದ್ಕೊಂಡೆರ್. ಕಾಲೇಜಿಡ್ ವೀಡಿಯೊ ಮಲ್ತಿನ ಜಾಗೆಗ್ ಖುಷ್ಬೂ ಪೋದು ಪರಿಶೀಲನೆ ಮಲ್ತೆರ್. ಆಡಳಿತ ಮಂಡಳಿದ ಒಟ್ಟಿಗೆ ಒಂಜಿ ಗಂಟೆ ಪಾತೆರ್ದ್ ಮಾಹಿತಿ ದೆತೊಂಡೆರ್.
