ಕಟೀಲ್ ಶ್ರೀ ಶಿರ್ಡಿ ಸಾಯಿಬಾಬಾ ಮಂದಿರ ಉದಿಪನ, ಸಾಧಕೆರೆಗ್ ಮಾನಾದಿಗೆ

ಕಿನ್ನಿಗೋಳಿ: ಕಟೀಲ್ ಕೈತಲ್ದ ಉಲ್ಲಂಜೆ ಸಾಯಿಧಾಮ ಜುಮಾದಿಗುಡ್ಡೆದ ಕಟೀಲ್ ಶ್ರೀ ಶಿರ್ಡಿ ಸಾಯಿಬಾಬಾ ಮಂದಿರದ ಉದಿಪನದ ಲೇಸ್ ಭಾರೀ ಶ್ರದ್ಧಾ ಭಕ್ತಿಡ್ ನಡತ್ಂಡ್.

ಈ ಲೇಸ್ ನ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಅನುವಂಶಿಕ ಅರ್ಚಕೆರ್ ಕೆ. ಲಕ್ಷ್ಮೀನಾರಾಯಣ ಆಸ್ರಣ್ಣ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ರಾಜ್ಯ ಕನ್ನಡ ಸಾಹಿತ್ಯ ಪರಿಷತ್ ದ ಮಾಜಿ ಗುರ್ಕಾರೆ, ಧರ್ಮದರ್ಶಿ ಡಾ.ಹರಿಕೃಷ್ಣ ಪುನರೂರು, ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್.

ಮಲ್ಲ ಬಿನ್ನೆರಾದ್ ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್, ಯುಗಪುರುಷ ಸಂಪಾದಕೆರ್ ಭುವನಾಭಿರಾಮ ಉಡುಪ, ಕೊಡೆತ್ತೂರು ಶ್ರೀ ಅರಸು ಕುಂಜರಾಯ ದೈವೊಲ್ಯದ ಗುರ್ಕಾರೆ ದೇವಿ ಪ್ರಸಾದ್ ಶೆಟ್ಟಿ, ಉಲ್ಲಂಜೆ ಬರ್ಕೆ ಫ್ರೆಂಡ್ಸ್ (ರಿ.) ದ ಪ್ರೇಮ್ ರಾಜ್ ಶೆಟ್ಟಿ, ಸಮಾಜ ಸೇವಕೆರ್ ಸಂಜೀವ ಮಡಿವಾಳ ಕಟೀಲ್, ಅಮ್ಮುಂಜೆ ಜನಾರ್ಧನ, ಸೀತಾರಾಮ ಕುಮಾರ್ ಕಟೀಲ್, ಎಕ್ಕಾರು ಲಯನ್ಸ್ ಕ್ಲಬ್ ದ ಗುರ್ಕಾರೆ ದಯಾನಂದ ರೈ ಚಾವಡಿಡ್ ಇತ್ತೆರ್.

ಅಂಚೆನೆ ಭಜನೆ, ತಾಳಮದ್ದಳೆ, ಭಕ್ತಿಸುಗಿಪು, ಸಾಧಕೆರೆಗ್ ಸನ್ಮಾನ, ಯಕ್ಷಗಾನ ಲೇಸ್ ನಡತ್ಂಡ್.

ಈ ಪೊರ್ತುಡು ಕಟೀಲ್ ಶ್ರೀ ಶಿರ್ಡಿ ಸಾಯಿಬಾಬಾ ಮಂದಿರದ ಪ್ರಧಾನ ಅರ್ಚಕೆರ್ ರಾಜ ಭಟ್ ಮೆರೆಗ್ ಸನ್ಮಾನ ನಡತ್ಂಡ್.