ವಿಜಯಕುಮಾರ್ ಕೊಡಿಯಾಲ್ ಬೈಲ್ ರೆನ ಪೊಸ ನಾಟಕ “ಮೈತಿದಿ”

ತುಳು ರಂಗಭೂಮಿ ಬೊಕ್ಕ ಚಿತ್ರರಂಗದ ಪುಗರ್ತೆದ ನಿರ್ದೇಶಕೆ, ನಿರ್ಮಾಪಕೆ ವಿಜಯಕುಮಾರ್ ಕೊಡಿಯಾಲ್‌ಬೈಲ್ ಮೇರೆನ
“ಶಿವದೂತೆ ಗುಳಿಗೆ” ನಾಟಕ ಸುಮಾರ್ 500 ಪ್ರದರ್ಶನದ ಕೈತಲ್ ಉಂಡು. ಈ ನಾಟಕ ಕನ್ನಡಡ್ಲಾ ಡಬ್ಬಿಂಗ್ ಆತ್ಂಡ್. ಮಲಯಾಳ, ಮರಾಠಿಡ್ಲಾ ಪ್ರದರ್ಶನ ಆವೆರೆ ಉಂಡು. ದೇಶದ ಮಲ್ಲ ಮಲ್ಲ ಪೇಂಟೆಲೆಡ್ ಒಂಜೇ ದಿನ 2-3 ಪ್ರದರ್ಶನ ಕೊರ್ದು ಸುದ್ದಿ ಆಯಿನ ಈ ನಾಟಕ ಪಿದಯಿ ದೇಶಡ್ ಲ ಇಡೀ ಸುದ್ದಿ ಆತ್ಂಡ್. ಈ ಮಾತ ಕಾರಣರ್ದ್ ಪೊಸ ನಾಟಕ ಪ್ರದರ್ಶನಗ್ ಮೆರೆಗ್ ಅವಕಾಶ ತಿಕಿಜಿ. ಮಾತೆರ್ಲಾ ಶಿವದೂತೆ ಗುಳಿಗ ನಾಟಕನೇ ಕೇನೊಂದು ಇತ್ತೆರ್. ಇತ್ತೆ ಮೆರೆನ ಪೊಸ ನಾಟಕ “ಮೈತಿದಿ” ಪ್ರದರ್ಶನಗ್ ತಯಾರ್ ಆತ್ಂಡ್. ಉಂದೆನ್ ದುಂಬೇ ಬರೆದ್ ತಯಾರ್ ಮಲ್ತಿತ್ತೆರ್.

ಈ ಸರ್ತಿ ಮೈತಿದಿ ನಾಟಕದ ಮೂರ್ತದ ದಿನ ನೆಕ್ಕಿ ಆತ್ಂಡ್. ಸೆಪ್ಟಂಬರ್‌ಡ್ ಈ ನಾಟಕ ಪ್ರದರ್ಶನ ಆಪುಂಡು. ಸುರುತ್ತ ದಿನನೇ ಮೂಜಿ ಪ್ರದರ್ಶನ ಕೊರಿಯೆರೆ ಉಂಡು ಪನ್ಪುನವೇ ಪೆರ್ಮೆದ ಸಂಗತಿ ಆತ್ಂಡ್.

ಇತ್ತೆನೇ ಈ ನಾಟಕದ 50 ರ್ದ್ ಎಚ್ಚ ಕ್ಯಾಂಪ್ ನಿಗದಿ ಆತ್ಂಡ್. ಉಂದು ಕೊಡಿಯಾಲ್‌ಬೈಲ್ ಮೆರೆನ ನಾಟಕಗ್ ಇಪ್ಪುನ ಶಕ್ತಿನ್ ತೂಪಾವೊಂಡು. ಮೈತಿದಿ ನಾಟಕ ಸಾಮಾಜಿಕ ಆತ್ಂಡ್. ಸಮಾಜಗ್ ಒಂಜಿ ಎಡ್ಡೆ ಸಂದೇಶನ್ ಕೊರ್ಪುಂಡು.‌ ಗುಳಿಗ ಪುಗರ್ತೆದ ಸ್ವರಾಜ್ ಶೆಟ್ಟಿ ಈ ನಾಟಕಡ್ ಪ್ರಮುಖ ಪಾತ್ರಡ್ ಅಭಿನಯ ಮಲ್ದೆರ್. ರೂಪಾ ವರ್ಕಾಡಿ, ಚಂದ್ರ ಶೇಖರ ಸಿದ್ದಕಟ್ಟೆ ಸೇರಿನಂಚನೆ “ಶಿವದೂತೆ ಗುಳಿಗೆ” ನಾಟಕದ ಮಾತ ಕಲಾವಿದೆರ್ ಮೈತಿದಿ ನಾಟಕಡ್ ಉಲ್ಲೆರ್. ದುಂಬುದಲೆಕ್ಕನೇ ಎ.ಕೆ. ವಿಜಯ್ (ಕೋಕಿಲಾ) ಮೆರೆನ ಸಂಗೀತ ಈ ನಾಟಕಗ್ ಉಂಡು.

ವಿಜಯಕುಮಾರ್ ಕೊಡಿಯಾಲ್ ಬೈಲ್ ಮೆರೆನ ನಾಟಕದ ಅಲೋಜನೆನೆ ಭಿನ್ನ ಆದಿಪ್ಪುಂಡು. ಆಯಿಟ್ಲಾ ಗಟ್ಟಿ ತಿರ್ಲ್, ಸಮಾಜಗೊಂಜಿ ಸಂದೇಶ, ಹಾಸ್ಯದೊಟ್ಟಿಗೆ, ನವರಸದ ಮನೋರಂಜನೆಗ್ ಕೊರತೆ ಇಪ್ಪುಜಿ. ಇಂಚಿನ ಭಿನ್ನತೆನೇ ಮೆರೆನ ಮಾತ ನಾಟಕ ಬೊಕ್ಕ ಪಿಕ್ಚರ್ ನ್ ಜನ ಮೆಚ್ಚುಲೆಕ್ಕ ಮಲ್ದ್ಂಡ್. ಇತ್ತೆ “ಮೈತಿದಿ” ನೆಕ್ಕ್ ಬಿನ್ನ ಆತಿಜಿ ಪನ್ಪುನವು ಕಲಾಸಂಗಮದ ಅಭಿಪ್ರಾಯ. ರಂಗಭೂಮಿ ಪ್ರಿಯೆರ್ ಮೈತಿದಿ ನಾಟಕಗಾದ್ ಕಾತೊಂದು ಉಲ್ಲೆರ್. ಉಂದು ಬುಡುಗಡೆ ಆಯಿನ ಬೊಕ್ಕ ಯಶಸ್ಸ್ ದ ಮುಖೇನ ತುಳು ರಂಗಭೂಮಿಗ್ ಕುಡೊಂಜಿ ಕಲಾಕಾಣಿಕೆ ಆಪುಂಡು ಪನ್ಪಿನ ವಿಶ್ವಾಸ ಮಾತೆರೆಡಲ ಉಂಡು.

“ಮೈತಿದಿ” ನಾಟಕದ ಬುಕ್ಕಿಂಗ್ (9449664389) ಸುರು ಆತ್ಂಡ್.