ತುಳುವೆರ್ನ ಬೇಡಿಕೆಗ್ ಇದ ಮುಟ್ಟ ವಾ ಪಕ್ಷಲ ಸ್ಪಂದನೆ ಕೊರ್ತಿಜಿ. ತುಳು ಭಾಷೆ ಅಂಚನೆ ತುಳುನಾಡ್ದ ಅಭಿವೃದ್ದಿ ಸಮಸ್ಯೆದ ಬಗೆಟ್ ಕರ್ನಾಟಕಡ್ ಒವ್ವೇ ಪಕ್ಷಲ ಇಡೆ ಮುಟ್ಟ ದಾಲ ಮಲ್ತ್ದಿಜಿ. ತುಳುವೆರ್ನ ಭಾಷೆರ್ದ್ ಪತ್ ದ್ ನೇತ್ರಾವತಿ ತುದೆ ಮುಟ್ಟ ಮಲ್ತಿನ ಮಾತ ಪೊರ್ಂಬಾಟನ್ ಒಂಜಿ ಕೆಬಿಕ್ಕ್ ಪಾಡ್ದ್ ನನೊಂಜಿ ಕೆಬಿಟ್ಟ್ ಬುಡ್ದು ಪಾಡ್ದೆರ್ ಪಂದ್ ಅಂತರಾಷ್ಟ್ರೀಯ ತುಳುನಾಡ ರಕ್ಷಣಾ ವೇದಿಕೆದ ಸ್ಥಾಪಕ ಅಧ್ಯಕ್ಷೆರ್ ಯೋಗೀಶ್ ಶೆಟ್ಟಿ ಜೆಪ್ಪು ಪಂಡೆರ್.
ಕುಡ್ಲಡ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿನ ಆರ್, ಕಾಲಿ ಒಂಜಿ ತುಳು ಸಾಹಿತ್ಯ ಅಕಾಡೆಮಿನ್ ಕೊರ್ದು ಉಂದೆನೇ ಮಲ್ಲ ಕೊಡುಗೆ ಪಂಡ್ದ್ ಪನ್ಪಿನ ರಾಜ್ಯ ಸರ್ಕಾರ ಬೊಡ್ಚಾಂದಿನೆಕ್ಕ್ ಕೋಟಿ ಕೋಟಿ ಕರ್ಚಿ ಮಲ್ಪುನಗ ತುಳು ಕಲ್ಪಾವುನ ಶಿಕ್ಷಕೆರೆಗ್ ತಿಂಗೊಲುಗು 3 ಸಾರ ಕಾಸ್ನ್ಲ ಕೊರಿಯರೆ ಸಾಧ್ಯ ಆಯಿಜಿ. ಉಂದೆನ್ ತೂನಗ ಮೊಕ್ಲೆಗ್ ತುಳುತ್ತ ಬಗೆಟ್ ಇಪ್ಪುನ ಕಾಳಜಿ ಏತ್ ಉಂಡು ಪಂದ್ ನಮ ತೆರಿಯೊನೊಲಿ.
ಮಸ್ತ್ ಸಮಯರ್ದ್ ಬೇಡಿಕೆನ್ ದೀವೊಂದು ಬತ್ತಿನ ವಿಷಯ ಪಂಡ ತುಳು ಭಾಷೆನ್ ರಾಜ್ಯದ ಅಧಿಕೃತ ಭಾಷೆಯಾದ್ ಘೋಷಣೆ ಮಲ್ಪುನವು, ತುಳು ಭಾಷೆನ್ 8ನೇ ಪರಿಚ್ಛೇದಗ್ ಸೇರ್ಸಾವುನವು, ಕುಡ್ಲಡ್ ಸರಕಾರಿ ವೈದ್ಯಕೀಯ ಕಾಲೇಜು, ತುಳುನಾಡ ಅಭಿವೃದ್ದಿ ಪ್ರಾಧಿಕಾರ, ಕಚೇರಿ, ಕೋರ್ಟುಲೆಡ್ ತುಳು ಭಾಷೆಗ್ ಮಾನ್ಯತೆ, ತುಳುನಾಡ್ಗ್ ಪ್ರತ್ಯೇಕ ಹೈಕೋರ್ಟು ಪೀಠ ಸ್ಥಾಪನೆ, ತುಳುನಾಡ್ದ ಜನಪದ ಕಲಾವಿದೆರೆಗ್ ಮಾಸಾಶನ, ತುಳುನಾಡ್ಡ್ ಜಾತಿ ಮತ ಭಾಷಾ ಸಾಮರಸ್ಯಗ್ ಒತ್ತು ಕೊರ್ಪುನವು, ತುಳುನಾಡು ಕೃಷಿ ಅಭಿವೃದ್ಧಿ ಮಂಡಳಿ, ತುಳುನಾಡ್ದ ಜಾಗೆದ ಪುದರ್ ಕುಡ ಪರಿಶೀಲನೆ, ತುಳುನಾಡ್ದ ದೈವಾರಾಧನೆದ ಬಗೆಟ್ ಜಾನಪದ ವಿಶ್ವವಿದ್ಯಾಲಯ, ತುಳುನಾಡ್ ದ ಕಲರಿ ಸಮರಕಲೆ ಪುನಶ್ಚೇತನಗ್ ಪ್ರತ್ಯೇಕ ಅಭಿವೃದ್ಧಿ ನಿಗಮ, ತುಳುನಾಡ್ಡ್ ಇಪ್ಪುನ 14 ಬುಡಕಟ್ಟು ಜನಾಂಗದಕ್ಲೆಗ್ ಪ್ರತ್ಯೇಕ ನಿಗಮ, ತುಳುನಾಡ್ದ ಕರಕುಶಲ ಕಾರ್ಮಿಕೆರ್ನ ಅಭಿವೃದ್ಧಿ ನಿಗಮ, ತುಳುನಾಡ್ಗ್ ಪ್ರತ್ಯೇಕವಾಯಿನ ಪ್ರವಾಸೋದ್ಯಮ ನಿಗಮ, ರೇಷನ್ ಅಂಗಡಿಲೆಡ್ ಉರ್ಪೆಲ್ ಅರಿ ವಿತರಣೆ, ತುಳುನಾಡ್ದ ಬೆನ್ನಿ ಬೆನ್ಪುನಕ್ಲೆಗ್ ವಿದರ್ಭ ಪ್ಯಾಕೇಜ್ ಮಾದರಿ ಪ್ಯಾಕೇಜ್, ಎತ್ತಿನಹೊಳೆ ನೇತ್ರಾವತಿ ತುದೆನ್ ತಿರ್ಗಾವುನೆನ್ ಕೈ ಬುಡ್ಪುನವು ಇಂಚಿತ್ತಿನ ಬೇಡಿಕೆನ್ ಮಸ್ತ್ ದಶಕರ್ದ್ ಕೇನೊಂದು ಬೈದೆರ್.
ಆಂಡ ಮಾತ ರಾಜ್ಯಗ್ ಪಕ್ಷಲು ಸುರುಕ್ಕಾದ್ ಕೇರಳ ಬೊಕ್ಕ ಕರ್ನಾಟಕಗ್ ತುಳುನಾಡ್ನ್ ಬುಡ್ದ್ ಕೊರ್ದಿತ್ತ್ದ್ ಅಯಿರ್ದ್ ಬೊಕ್ಕ ಜಾತಿ ಧರ್ಮದ ಪುದರ್ಡ್ ತುಳುನಾಡ್ನ್ ವಿಭಜನೆ ಮಲ್ತ್ದಿತ್ತ್ದ್, ನೇತ್ರಾವತಿ ನೀರ್ನ್ ಪಟ್ಟೊಂದು ವಿಭಜನೆ ಮಲ್ತ್ದಿತ್ತಿನವು ಮಾತ್ರ ತಳುವೆರೆಗ್ ರಾಜಕೀಯ ಪಕ್ಷಲು ಕೊರ್ತಿನ ಕೊಡುಗೆ. ಉಂದುವೇ ರೀತಿಡ್ ದುಂಬು ಪೋಂಡ ತುಳುವೆರ್ ಮಾತೆರ್ಲಾ ಒಟ್ಟು ಸೇರ್ದ್ ಪತ್ಯೇಕ ಪಕ್ಷನ್ ಮಲ್ಪುವ. ಇದ ಮುಟ್ಟ ಒಂಜಿ ರಡ್ಡ್ ಅಭ್ಯರ್ಥಿಲು ತುಳು ಪರವಾದ್ ಪಾತೆರ್ದೆರ್ ಬುಂಡ ಪವ್ವೇ ರಾಜಕೀಯ ಪಕ್ಷಲು ತನ್ನ ಚುನಾವಣಾ ಪ್ರಣಾಳಿಕೆಡ್ ತುಳುವೆರ್ನ ಸ್ಥಾನಮಾನದ ಬಗೆಟ್ ಪಾತೆರ್ದ್ಜೆರ್ ಪಂದ್ ಪಂಡೆರ್.
ಪತ್ರಿಕಾಗೋಷ್ಠಿಡ್ ಸಮಾಜ ಸೇವಕೆರ್ ಅಂಚನೆ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ತುಳು ವರ್ಲ್ಡ್ ಅಧ್ಯಕ್ಷೆರ್. ಡಾ ರಾಜೇಶ್ ಆಳ್ವ ಬದಿಯಡ್ಕ, ತುಳುಪರ ಪೊರ್ಂಬಾಟಗಾರೆರ್ ರೋಶನ್ ರೊನಾಲ್ಡ್ ಸೇರಿನಂಚ ಮಸ್ತ್ ಜನ ಇತ್ತೆರ್.