” Gouji Gammat ” Tulu film released at Tulunadu ತುಳುನಾಡ್ ಡ್ ಬುಡುಗಡೆ ಆಂಡ್ ಗೌಜಿ ಗಮ್ಮತ್ ತುಳು ಪಿಕ್ಚರ್

ಕುಡ್ಲ: ಮೋವಿನ್ ಫಿಲಂಸ್ ಲಾಂಛನಡ್ ತಯಾರ್ ಆಯಿನ ಗೌಜಿಗಮ್ಮತ್ ತುಳು ಪಿಕ್ಚರ್ ಸುಕ್ರಾರ ಭಾರತ್ ಮಾಲ್ ದ ಬಿಗ್ ಸಿನಿಮಾಸ್ ಡ್ ಬುಡುಗಡೆ ಆಂಡ್.

ಲೇಸ್ ಡ್ ತುಡರ್ ಅರ್ಲಾಪುನ ಮುಖೇನ ಉದಿಪನ ಮಲ್ತ್ ದ್ ಪುಗರ್ತೆದ ರಂಗಕರ್ಮಿ, ಚಲನ ಚಿತ್ರ ನಿರ್ದೇಶಕೆರ್ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ಮೇರ್ ಪಾತೆರ್ದ್, ನಿರ್ಮಾಪಕೆರಾಯಿನ ಮೋಹನ್ ಭಟ್ಕಳ್ ಬೊಕ್ಕ ವಿನಾಯಕ ತೀರ್ಥಹಳ್ಳಿ ಮೆರೆನ ಶ್ರಮ ಗೌಜಿ ಗಮ್ಮತ್ ಸಿನಿಮಾ ಯಶಸ್ಸ್ ತೂಪುನ ಮುಖೇನ ನನಾತ್ ಜನಕ್ಕ್ ಪ್ರೇರಣೆ ಅವಡ್, ಪಿಕ್ಚರ್ ನ್ ತುಳುನಾಡ್ ದ ಸರ್ವಧರ್ಮದ ಜನಕುಲು ಇಷ್ಟಪಡೆಪುನ ಮುಖೇನ ಪಿಕ್ಚರ್ ಯಶಸ್ಸು ಅವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಬೊಕ್ಕ ಅರವಿಂದ್ ಬೋಳಾರ್ ಮೇರ್ ಪಾತೆರ್ದ್, ಶ್ರಮ ಒಯಿಸಾದ್ ನಿರ್ಮಾಣ ಆದ್ ಬುಡುಗಡೆ ಆಯಿನ ಈ ಪಿಕ್ಚರ್ ಗೆಲ್ಪೊಡು. ನೇರ್ದ್ ತುಳು ಪಿಕ್ಚರ್ ನಿರ್ಮಾಪಕೆರೆಗ್ ನನಾತ್ ಎಡ್ಡೆ ಪಿಕ್ಚರ್ ಮಲ್ಪರೆ ಧೈರ್ಯ ಬರ್ಪುಂಡು ಪಂದ್ ಪಂಡೆರ್.

ಪಿಕ್ಚರ್ ದ ನಿರ್ಮಾಪಕೆರ್, ನಿರ್ದೇಶಕೆರ್ ಪ್ರಕಾಶ್ ಪಾಂಡೇಶ್ವರ್ ಪಾತೆರ್ದ್, ಗೌಜಿ ಗಮ್ಮತ್ ಪಿಕ್ಚರ್ ನ್ ಮತ ತುಳುವೆರ್ ತೂದು ಚಿತ್ರತಂಡನ್ ಆಶೀರ್ವಾದ ಮಲ್ಪೊಡು. ತುಳು ಚಿತ್ರರಂಗದ ಮತೆರ್ಲಾ ಒಗ್ಗಟ್ಟಾಂಡ ನಮ್ಮ ನೆಲತ್ತ ತುಳು ಪಿಕ್ಚರ್ ಯಶಸ್ಸ್ ಅಪುಂಡು ಪಂದ್ ಪಂಡೆರ್.

ಈ ಪೊರ್ತುಡು ಅರ್ಜುನ್ ಕಾಪಿಕಾಡ್, ಪ್ರಕಾಶ್ ತೂಮಿನಾಡ್, ನಿರ್ಮಾಪಕೆರ್ ವಿನಾಯಕ ತೀರ್ಥಹಳ್ಳಿ, ಮೋಹನ್ ಭಟ್ಕಳ್, ನಿರ್ದೇಶಕೆರ್ ಎಜೆ ಮಣಿ ಕಾರ್ತಿಕೇಯನ್, ಪೆರಿಯ ನಟಿ ಜಯಶೀಲ, ಜಗನ್ನಾಥ ಶೆಟ್ಟಿ ಬಾಳ, ಮೋಹನ್ ಕೊಪ್ಪಲ, ಪ್ರಭಾಕರ ಬ್ರಹ್ಮಾವರ್, ರಾಮದಾಸ್ ಸಸಿಹಿತ್ಲು, ಗಣೇಶ್ ಕಾಮತ್, ಸಂದೀಪ್ ಬೆದ್ರ, ನಾಯಕೆ ನಟ ಕರ್ಣ ಉದ್ಯಾವರ, ನಟಿ ಸ್ವಾತಿ ಪ್ರಕಾಶ್ ಶೆಟ್ಟಿ, ಕಿಶೋರ್ ಬೆದ್ರ, ಚೇತಕ್ ಪೂಜಾರಿ, ಡಿ ಬಿ ಮಂಜುನಾಥ ಇತ್ತೆರ್.

ವೀಕ್ಷಿತ್ ಕೆಮ್ತೂರ್ ಲೇಸ್ ದ ಸುಧಾರಿಕೆ ಮಲ್ತೆರ್. ಈ ಪಿಕ್ಚರ್ ಕುಡ್ಲದ ರೂಪವಾಣಿ, ಬಿಗ್ ಸಿನಿಮಾಸ್, ಪಿವಿಆರ್, ಸಿನಿಪೊಲಿಸ್ ಡ್, ಒಡಿಪುದ ಕಲ್ಪನಡ್, ಮಣಿಪಾಲದ ಭಾರತ್ ಸಿನಿಮಾ, ಐನಾಕ್ಸ್ ಡ್, ಪಡ್ಡೆದ್ರದ ಭಾರತ್ ಸಿನಿಮಾಡ್, ಸುರತ್ಕಲ್ ದ ನಟರಾಜ್, ಸಿನಿ ಗ್ಯಾಲಕ್ಸಿಡ್, ಪುತ್ತೂರ್ ದ ಅರುಣಾ, ಭಾರತ್ ಸಿನಿಮಾಡ್, ಬೆದ್ರದ ಅಮರಶ್ರೀಡ್, ಕಾರ್ಲದ ರಾಧಿಕಾಡ್ ಬುಡುಗಡೆ ಆಂಡ್.

ಈ ಪಿಕ್ಚರ್ ದ ಕಥೆತ್ತ ಸಾರಾಂಶ

ಸುಂದರ ಕುಟುಂಬದ ಹಾಸ್ಯವಾದ್ ಇಪ್ಪುನ ಕಥೆ ಸಾರಾಂಶದ ಪಿಕ್ಚರೇ ಗೌಜಿ ಗಮ್ಮತ್. ಒಂಜಿ ಸಂಸಾರಡ್ ಬೇತೆ ಬೇತೆ ರೀತಿದ ಮನಸ್ಥಿತಿದಕುಲು ಇಪ್ಪುವೆರ್. ಯಾನ್ ಪಂಡಿನನೇ ಸರಿ, ಯಾನ್ ಮಲ್ತಿನನೇ ಸರಿ ಪನ್ಪುನ ಸ್ಫರ್ಧಾತ್ಮಕ ವ್ಯಕ್ತಿತ್ವದಕುಲು ಇಪ್ಪುವೆರ್. ಅವು ಸಮಾಜಗ್ ಕೆಲವೊರ ಹಾಸ್ಯವಾದ್ ತೋಜುಂಡು. ಕೆಲವೊರ ಗಂಭೀರವಾದ್ ತೋಜುಂಡು. ಆಂಡ ಆ ಮನಸ್ಥಿತಿ ಇಪ್ಪುನ ಭಾವನೆಲು ಕೆಲವೊರ ಮನಸ್ ಮುಟ್ಟುಲೆಕ್ಕ ಇಪ್ಪುಂಡು. ಆ ಭಾವನೆಲು ಬೊಕ್ಕ ಭಾವನೆದ ಉದ್ದೇಶಲು, ಜೀವನಡ್ ಎದುರಾಪುನ ಸಮಸ್ಯೆಲೆನ್ ಆ ಪಾತ್ರಲು ಎಂಚ ಸರಿ ಮಲ್ಪುವ ಪನ್ಪುನೆನ್ ಹಾಸ್ಯ ಮಿಶ್ರಿತವಾದ್ ತೊಜಿಪಾಯಿನ ಕಥೆನೇ ಗೌಜಿ ಗಮ್ಮತ್.

” Gouji Gammat ” Tulu film released at Tulunadu

” Gouji Gammat” Tulu film made under the Movin films banner was released at Bharat Mall Mangalore on Friday.