ತುಳುನಾಡ್ ಪೊಸತ್ತೊಂಜಿ ಕೃಷಿ ವಲಯ ಆವೊಡು: ಶ್ರೀಕಾಂತ ಶೆಟ್ಟಿ ಕಾರ್ಲ ಮುಲ್ಕಿ ಬಂಟರ ಸಂಘ, ಮಹಿಳಾ ಸಂಘದ ಮುತಾಲಿಕೆಡ್ ಬಿಸು ಪರ್ಬದ ಗೌಜಿ

ಮುಲ್ಕಿ : ನಮ್ಮ ತುಳುನಾಡ್ ನನ ಪೊಸ ಕೃಷಿ ವಲಯ ಆವೊಡು, ಇಂಡಸ್ಟ್ರಿಯಲ್ ವಲಯ ಆವರೆ ಬಲ್ಲಿ ಪಂದ್ ಪತ್ರಕರ್ತೆರ್, ಧಾರ್ಮಿಕ ಚಿಂತಕೆರ್ ಶ್ರೀಕಾಂತ್ ಶೆಟ್ರ್ ಪಂಡೆರ್.

ಆರ್ ಮುಲ್ಕಿ ಬಂಟರ ಸಂಘ ಬೊಕ್ಕ ಮಹಿಳಾ ಸಂಘದ ಮುತಾಲಿಕೆಡ್ ಕಾರ್ನಾಡ್ ಬಂಟರ ಭವನದ ಚಾವಡಿಡ್ ಸುಕ್ರಾರ ನಡತಿನ ಬಿಸು ಪರ್ಬ ಆಚರಣೆದ ಲೇಸ್ ಡ್ ಪಾತೆರಿಯೆರ್.

ಸುರುಟ್ಟು ತುಳುನಾಡ್ ಕೃಷಿ ಬೂಮಿ ಆದಿತ್ತಿಜಿ. ನಮ್ಮ ಹಿರಿಯೆರ್ ಕಂಡ, ತೋಡು ಮಲ್ತ್ ದ್, ಗೆಲ್ಲ್ ಕಡ್ತ್ ದ್ , ಪಜಿರ್ ಕೆತ್ ದ್ ಅವೆನ್ ಕೃಷಿ ಸಮೃದ್ಧಿದ ಬೂಮಿ ಆದ್ ಪರಿವರ್ತನೆ ಮಲ್ತ್ ದಿತ್ತೆರ್. ಆಂಡ ಇತ್ತೆ ಕೃಷಿ ಕಂಡೊಲು ಪಡಿಲ್ ಬೂರ್ದುಂಡು. ಬೆನಿಯರೆ ಮನಸ್ ದಾಂತೆ ರಿಯಲ್ ಎಸ್ಟೇಟ್ ಗ್ ಕಂಡ ನಿಗಿತೊಂದುಲ್ಲ. ನಮ ನಿಗಿಪುನು ಕಂಡೊಲೆನ್ ಅತ್ತ್, ತುಳುನಾಡ್ ದ ಇಡೀ ಕೃಷಿ ಸಂಸ್ಕೃತಿನ್ ಪಂದ್ ಆರ್ ಬೇಜಾರ್ ಪಟ್ಟೊಂಡೆರ್.

ನಮ್ಮ ಹಿರಿಯೆರ್ ದೈವೊಲೆಡ ” ಅಲೆ, ಅಂಬಿ, ಬುಲೆಸಲೆ ಭಾಗ್ಯೊಲೆನ್ ಕೊರ್ದು ಕಾಪುಲೆ” ಪಂದ್ ಪ್ರಾರ್ತನೆ ಮಲ್ತೊಂದಿತ್ತೆರ್. ಇತ್ತೆ ನಮ್ಮ ಕೃಷಿ ಸಂಸ್ಕೃತಿ ನಾಶ ಆವೊಂದುಂಡು. ಅಂಚಾದ್ ನಮ ನಮ್ಮ ಪ್ರಾಚೀನ ಕೃಷಿ ಬದ್ ಕ್ ನ್ ಕುಡೊರ ಸುರು ಮಲ್ಪೊಡು ಪಂದ್ ಪಂಡೆರ್.

ತುಳುವೆರ್ನ ಪೊಸ ವರ್ಷನೇ ಬಿಸು ಪರ್ಬ. ಪಂಜಾಬ್ ಡ್ ಬೈಸಾಖಿ, (ವೈಶಾಖ), ಒಡಿಸ್ಸಾಡ್ ಬಿಹು, ಕೇರಳಡ್ ಬಿಷು ತುಳುನಾಡ್ ಡ್ ಬಿಸು ಪಂದ್ ಆಚರಣೆ ಮಲ್ಪುವೆರ್. ಉಂದು
ಸೂರ್ಯ ದೇವೆರೆಗ್ ಸಂಬಂಧ ಪಟ್ಟಿನ ಆಚರಣೆ ಪಂದ್ ಪಂಡೆರ್.

ಮಾರ್ಚ್ ತಿಂಗೊಲುಡು ಪರ ಇರೆ ತಾಲ್ ದ್ ಪೊಸ ತೆಗ್ ಲ್ ತೆಗ್ ಲ್ದ್, ಪೂ ಬಡ್ದು ಕಾಯಿ ಕಜಿಪು, ಪರ್ಂದ್ ಆಪಿನ ಪೊರ್ತು. ಅಂಚಾದ್ ನಮಕ್ಕ್ ಪೊಸ ವರ್ಷ ಪಂಡ ಯುಗಾದಿ, ಅವ್ವೇ ಬಿಸು ಪರ್ಬ ಪಂದ್ ಶ್ರೀ ಕಾಂತ್ ಶೆಟ್ರ್ ಪೊಲಬು ಮಲ್ತ್ ಕೊರಿಯೆರ್.

ಬಿಸು ಪನ್ಪಿನ ಶಬ್ದದ ಉಲಯಿ ಒಂಜಿ ಅರ್ತ ಉಂಡು. ಉಂದೆನ್ ತೆರಿಯೊಡಾಂಡ ವೇದಾಂಗಲೊನ್ ತೆರಿಯೊಡು. ನಮ ಕಾಂಡೆ ಲಕ್ ದ್ ಸಮೃದ್ಧಿ ತೂವೊಡು. ಅಯಿಕ್ಕ್ ಬೋಡಾದ್ ಬಿಸು ಆಚರಣೆ ಮಲ್ತೊಂದುಲ್ಲ. ಕಲಸೆ ನಿಲಿಕೆ ಅರಿ, ಬೇತೆ ಬೇತೆ ಕಾಯಿ ಕಜಿಪು, ಕನ್ನಡಿ ದೀದ್ ಕಣಿ ದೀಪ,ಅಯಿಟ್ಟ್ ದೇವೆರೆನ್ ತೂಪ, ಅಪ್ಪೆ ಅಮ್ಮನ ಆಶೀರ್ವಾದ ದೆತೊನುವ. ಆಂಡ ಇತ್ತೆ ಇಲ್ಲಡ್ ಕಣಿ ದೀಪಿನ ಕ್ರಮಲ ಕಮ್ಮಿ ಆತ್ಂಡ್. ದೇವಸ್ಥಾನಗ್ ಪೋದು ಕಣಿ ತೂವೊಡಾದ್ ಬೈದ್ಂಡ್. ಕೃಷಿ ಸಂಸ್ಕೃತಿ ನಾಶ ಆಯಿನೆತ್ತ ಪರಿಣಾಮವಾದ್ ಗ್ಲೋಬಲ್ ವಾರ್ಮಿಂಗ್ ಎಚ್ಚಾದ್ ಬೂಮಿಡ್ ಬೆಚ್ಚ ಜಾಸ್ತಿ ಆತ್ಂಡ್. ತೋಡು, ತುದೆತ್ತ ನೀರ್ ಆಜಿದ್ ದೂರದ ವಾರಾಹಿ, ತುಂಬೆರ್ದ್ ಕೆಮಿಕಲ್ ಪಾಡ್ದಿನ ನೀರ್ ನ್ ಪರೊಡಾದ್ ಬೈದ್ಂಡ್ ಪಂದ್ ಪಂಡೆರ್.

ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ರ್ ಲೇಸ್ ಉದಿಪನ ಮಲ್ತ್ ದ್ ಎಡ್ಡೆಪ್ಪು ಬಯಕಿಯೆರ್. ಮುಲ್ಕಿ ಬಂಟರ ಸಂಘದ ಅಧ್ಯಕ್ಷೆರ್ ಪುರುಷೋತ್ತಮ ಶೆಟ್ರ್ ಗುರ್ಕಾರ್ಮೆ ಒಯಿಸ್ ದಿತ್ತೆರ್. ಅಶೋಕ್ ಕುಮಾರ್ ಶೆಟ್ರ್, ಮಹಿಳಾ ಸಂಘದ ಚಂದ್ರಕಲಾ, ಗಂಗಾಧರ ಶೆಟ್ರ್   ಮಿತ್ತರ್ಮೆಡ್ ಇತ್ತೆರ್.

ಎಳತ್ತೂರು ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಸಂತೋಷ್ ಕುಮಾರ್ ಹೆಗ್ಡೆ ಪ್ರಾಸ್ತಾವಿಕ ವಾದ್ ಪಾತೆರಿಯೆರ್. ಜತೆ ಕಾರ್ಯದರ್ಶಿ ಸಾಯಿನಾಥ್
ಶೆಟ್ರ್ ಸೊಲ್ಮೆ ಸಂದಾಯೆರ್. ಶರತ್ ಶೆಟ್ಟಿ ಕಿನ್ನಿಗೋಳಿ ಲೇಸ್ ಸುಧಾರಿಕೆ ಮಲ್ತೆರ್. ಮಹಿಳಾ ಸಂಘದ ಸದಸ್ಯೆರೆರ್ದ್ ಸಾಂಸ್ಕೃತಿಕ ಕಾರ್ಯಕ್ರಮ ನಡತಿ ಬೊಕ್ಕ ಬಿಸು ವನಸ್ ದ ವ್ಯವಸ್ಥೆ ಇತ್ತ್ಂಡ್.