ಪುತ್ತೂರ್ ಚರ್ಚ್ ದ ಪೊಸ ಸ್ಮಶಾನ ಜಾಗೆ, ಪ್ರಾರ್ತನ ಮಂದಿರ ಉದಿಪನ

ಪುತ್ತೂರ್ ಚರ್ಚ್ ದ ಅದೀನಡ್ ಇಪ್ಪುನ ಏಳ್ಮುಡಿಡ್ ಪೊಸತಾಯಿನ ಸ್ಮಶಾನ ಜಾಗೆ ಬೊಕ್ಕ ಪ್ರಾರ್ತನ ಮಂದಿರದ ಆಶೀರ್ವಚನ ಮಾ.25 ಬಯ್ಯಗ್ 5.30 ಕ್ಕ್ ಬಲಿ ಪೂಜೆದೊಟ್ಟಿಗೆ ನಡತ್ಂಡ್.

ಬಲಿ ಪೂಜೆ ಸುರು ಆಪುನ ದುಂಬು ಲೇಸ್ ದ ಪ್ರಧಾನ ಧರ್ಮ ಗುರುಕುಲು ಬತ್ತಿನ ಕುಡ್ಲದ ಅತೀ ವಂದನೀಯ ಮೊನ್ಸಿಜೋರ್ ಮ್ಯಾಕ್ಸಿಮ್ ಎಲ್. ನೋರೊನ್ಹಾ ಮೆರೆಗ್ ಪುತ್ತೂರ್ ಚರ್ಚ್ ದ ಪ್ರಧಾನ ಧರ್ಮಗುರುಕುಲು ಅತೀ ವಂದನೀಯ ಲಾರೆನ್ಸ್ ಮಸ್ಕರೇನಸ್, ಸಹಾಯಕ ಧರ್ಮ ಗುರುಕುಲು ವಂದನೀಯ ಕೆವಿನ್ ಲಾರೆನ್ಸ್ ಡಿಸೋಜಾ, ಚರ್ಚ್ ಪಾಲನ ಮಂಡಳಿದ ಉಪಾಧ್ಯಕ್ಷೆರ್ ಜೆರಾಲ್ಡ್ ಡಿಕಾಸ್ಟ, ಕಾರ್ಯದರ್ಶಿ ಎವ್ಲಿನ್ ಡಿಸೋಜಾ ಮೆರೆನ್ ಹೂಗುಚ್ಛ ಕೊರ್ಪುನ ಮುಖೇನ ಎದ್ಕೊನಿಯೆರ್.

ಬೊಕ್ಕ ರಿಬ್ಬನ್ ನ್ ತುಂಡು ಮಲ್ಪುನ ಮುಖೇನ ಪ್ರಾರ್ತನ ಮಂದಿರದ ಉದಿಪನ ಮಲ್ತ್ ದ್, ಬಲಿ ಪೂಜೆನ್ ಮಲ್ತೆರ್. ಈ ಪೊರ್ತುಡು ಪುತ್ತೂರ್ ಧರ್ಮ ಗುರುಕುಲು ಅತೀ ವಂದನೀಯ ಲಾರೆನ್ಸ್ ಮಸ್ಕರೇನ್ಹಸ್, ಸಂತ ಫಿಲೋಮಿನಾ ಕಾಲೇಜ್ ದ ಕ್ಯಾಂಪಸ್ ನಿರ್ದೇಶಕೆರ್ ವಂದನೀಯ ಸ್ಟ್ಯಾನಿ ಪಿಂಟೊ, ಪುತ್ತೂರ್ ಸಂತ ಫಿಲೋಮಿನ ಪದವಿ ಕಾಲೇಜ್ ದ ಪ್ರಾಂಶುಪಾಲೆರ್ ವಂದನೀಯ ಪ್ರಕಾಶ್ ಮೊಂತೆರೋ, ಪುತ್ತೂರ್ ಸಂತ ಫಿಲೋಮಿನಾ ಪದವಿಪೂರ್ವ ಕಾಲೇಜ್ ದ ಪ್ರಾಂಶುಪಾಲೆರ್ ವಂದನೀಯ ಅಶೋಕ್ ರಾಯನ್ ಕ್ರಾಸ್ತಾ, ಬೊಕ್ಕ ವಂದನೀಯ ಡೆನ್ಜಿಲ್ ಲೋಬೋ ಇತ್ತೆರ್.

ಪೊಸತಾಯಿನ ಪ್ರಾರ್ತನ ಮಂದಿರ ಬೊಕ್ಕ ಸಭಾಂಗಣನ್ ಆಶೀರ್ವದಿಸಾದ್ ದೇವೆರೆನ ವಾಕ್ಯನ್ ಓದುದ್, ಪ್ರತಿಯೊರಿ ಕ್ರೈಸ್ತೆಲ ತನ್ನ ಕಷ್ಟಲೆನ್ ಎದುರಿಸಾದ್ ಉಂತುನ ಶಕ್ತಿನ್ ಕೊರ್ಪುನೆನೇ ಶಿಲುಬೆ, ಅಂಚೆನೆ ನರಮಾನಿಲು ಹಾಳ್ ಚಟರ್ದ್ ತನ್ನ ಜೀವನನ್ ನಾಶ ಮಲ್ಪರೆ ಬಲ್ಲಿ ಪಂದ್ ತನ್ನ ಪ್ರವಚನಡ್ ಅತೀ ವಂದನೀಯ ಮೊನ್ಸಿಜೋರ್ ಮ್ಯಾಕ್ಸಿಮ್ ಎಲ್. ನೊರೊನ್ಹಾ ಪಂಡೆರ್.

ಬಲಿ ಪೂಜೆದ ಬೊಕ್ಕ ಮಾತೆರೆನ್ಲಾ ಅತೀ ವಂದನೀಯ ಲಾರೆನ್ಸ್ ಮಸ್ಕರೇನ್ಹಸ್ ನೆಂಪು ಮಲ್ತೆರ್. ಚರ್ಚ್ ಪಾಲನ ಸಮಿತಿ ಮಂಡಳಿದ ಕಾರ್ಯದರ್ಶಿ ಎವ್ಲಿನ್ ಡಿಸೋಜಾ ಮೇರ್ ಪೊಸತಾಯಿನ ಪ್ರಾರ್ತನ ಮಂದಿರಗ್ ಉದಾರ ದೇಣಿಗೆನ್ ಕೊರ್ನ ಕಲೆನ ಪುದರ್ ನ್ ಓದಿಯೆರ್. ಅಕುಲೆನ್ ಮಾತೆರೆನ್ಲಾ ಪ್ರಧಾನ ಧರ್ಮಗುರುಕುಲು ತಮ್ಮನ ಮಲ್ತೆರ್.
ಚರ್ಚ್ ಪಾಲನಾ ಮಂಡಳಿದ ಉಪಾಧ್ಯಕ್ಷೆರ್ ಜೆರಾಲ್ಡ್ ಡಿಕೋಸ್ತಾ, ಸಮಿತಿದ ಸದಸ್ಯೆರ್ ಲೇಸ್ ನ್ ಪೊರ್ಲು ಮಲ್ಪರೆ ಸಹಕಾರ ಮಲ್ತೆರ್.