ಬದಿಯಡ್ಕ: ಪೆರ್ಮೆದ ತುಲುವೆದಿ, ಜೈ ತುಲುನಾಡ್ (ರಿ.) ಕೂಟೊದ ಪದುಕೆದಿ, ತುಳು ಕನ್ನಡ ಭಾಷೆಡ್ ಏಪಲ ಬರೆಯೊಂದು ಸಾಹಿತ್ಯ ವಲಯಡ್ ಭರವಸೆ ಪುಟ್ಟಾಯಿನ ಕಾಸ್ರೋಡು ಜಿಲ್ಲೆದ ಕುಂಬ್ಡಾಜೆ ಗ್ರಾ.ಪಂ.ದ ಕಜೆ ನಿವಾಸಿ ಶ್ವೇತಾ (23) ಮೇರ್ ನನ ನೆಂಪು ಮಾಯ್ರ. ಆರ್ ವಿಷ ಪ್ರಾಶನ ಪಾರ್ದ್ ದೇವೆರೆ ಪಾದೊ ಸೇರಿಯೆರ್.
ಮೂಜಿ ದಿನತ ಪಿರ ವಿಷ ಪರಿನ ಮೆರೆನ್ ಕೂಡ್ಲೆ ಮುಳ್ಳೇರಿಯಾ ಆಸ್ಪತ್ರೆಗ್ ಸೇರ್ಸಾದ್, ಅಲ್ಪರ್ದ್ ಪೆರಿಯಾರಂ ಮೆಡಿಕಲ್ ಕಾಲೇಜ್ ಗ್ ಬೊಕ್ಕ ಕೋಝಿಕ್ಕೋಡು ಮೆಡಿಕಲ್ ಕಾಲೇಜಿಗ್ ದಾಖಲ್ ಮಲ್ತೆರ್. ಅಲ್ಪ ಚಿಕಿತ್ಸೆ ಫಲಕಾರಿ ಅವಂದೆ ಕೋಡೆ (ಸೋಮಾರ) ರಾತ್ರೆ 8 ಗಂಟೆಗ್ ಆಸ್ಪತ್ರೆಡ್ ತೀರ್ ಪೋಯೆರ್ ಪಂದ್ ತೆರಿದ್ ಬೈದ್ಂಡ್. ನಾರಾಯಣ ಲಲಿತಾ ದಂಪತಿಲೆನ ಮಗಲ್ ಆಯಿನ ಮೇರ್ ಬಡ ಕುಟುಂಬಡ್ ಪುಟ್ಟುಂಡಲ ಎಲ್ಯೆರ್ದೆ ಸಾಹಿತ್ಯಡ್ ಆಸಕ್ತಿ ಬುಲೆಪಾದ್ ಕವನ, ಕಥೆ, ನೀಳ್ಗತೆ, ಕಾದಂಬರಿ, ಗಝಲ್ ನ್ ರಚನೆ ಮಲ್ತ್ ದ್ ಜನಕುಲೆನ ಪ್ರೀತಿ ಪಡೆತೆರ್. ತಾನ್ ಬರೆಯಿನ ಸಾಹಿತ್ಯನ್ ಫೆಸ್ಬುಕ್, ಇನ್ಸ್ಟಾ ಗ್ರಾಂ, ವಾಟ್ಸಫ್, ಪ್ರತಿಲಿಪಿ ಪನ್ಪುನ ಆಧುನಿಕ ಜಾಲತಾಣಡ್ ಪ್ರಕಟಣೆ ಮಲ್ತೊಂದು ಇತ್ತೆರ್. ಮೆರೆನ ಬರವುಲೆನ್ ಜನ ಮೆಚ್ಚೊಂದು ಇತ್ತೆರ್.
Editorial