ಮೊಕಲೆಗ್ ಆನಗ ನಿಕಲೆಗ್ ದಾಯೆಗ್ ಆಪುಜಿ…..?

ಓಟು ಬನ್ನಗ ರಾಜಕೀಯವಾದ್ ಇತ್ತೆ ತುಲುತ ಬಾರಿ ಚರ್ಚೆ ಆವೊದುಂಡು. ಒಂಜಿ ಕಡೆ ತುಲು ಕೊಡಿ ಕನ್ನಡ ಕೊಡಿಡ್ದ್ ಮಿತ್ತ್ ರಾಪಯೆರ್ ಪಂದ್ ವಿವಾದ, ಕುಡೊಂಜಿ ಕಡೆಟ್ ಏಪಲಾ ಗಲಸಂದಿನ ತುಲು ಕೊಡಿನ್ ಪಾಡೊಂದು ಅಭ್ಯರ್ಥಿಲೆನ ಪ್ರಚಾರ ಐತ ನಡುಟು ತುಲುಪರವಾದ ಪೊರುಂಬಾಟ ಮಲ್ಪುನ ಸಂಘ ಸಂಸ್ಥೆಲೆಡ್ದು ನೋಟ ಪಾಡರೆ ಅಭಿಯಾನ.

ತುಲುಪರವಾದ್ ಬೇಲೆ ಮಲ್ಪುನ ಎಂಕ್ ಇತ್ತೆ ದಾದನ ಒಂಜಿ ಕುಸಿ ಈ ವರ್ಷ ತುಲುಕು ತಿಕೊಂದುಪ್ಪುನ ಪ್ರಾಮುಖ್ಯತೆ ಬಹುಶ ದುಂಬು ಏಪಲಾ ತಿಕುದಿಜ್ಜಾಂಡ್. ಉಂದಂತು ಸತ್ಯ ಪಂಚ ದ್ರಾವಿಡ ಬಾಸೆಲೆಡ್ ಒಂಜಾಯಿನ ತುಲು ಬಾಸೆಗ್ ಬಾಕಿ ನಾಲ್ ಬಾಸೆಗ್ ತಿಕಿನ ಸ್ಥಾನಮಾನ ತಿಕುಜಿ ಐಕ್ ಕಾರನೊಲೆನ್ ತುಲಿತೊಂದು ಪೊಂಡ ಅಲ್ಪ ನೆಗತ್ತ್ ತೋಜುನ ಒಂಜಿ ಅಂಶ ರಾಜಕೀಯ ಇಚ್ಚಾ ಸಕ್ತಿದ ಕೊರತೆ. ಅಂದ್ ನಮ್ಮ ರಾಜಕಾರಣಿನಕಲೆಗ್ ತುಲುವೆರ್ ಓಟು ಪಾಡರೆಗ್ ಮಾತ್ರ ಬೋಡು ಆಂಡ ಗೆಂದಿ ಬೊಕ್ಕ ತುಲು ಬಾಸೆಗಾದ್ ದಾದಾಂಡಲ ಮಲ್ಪುಗ ಪನ್ಪಿನ ಮನಸ್ಥಿತಿ ಎರೆಗ್ಲಾ ಇಜ್ಜಿ. ಆಂಡ ಈ ಪಾತೆರಗ್ ಅಪವಾದ ಕುಡ್ಲದ ರಡ್ಡ್ ಕಾರ್ಪೊರೇಟರ್‌ನಕುಲು ಬಂಗ್ರ ಕೂಳೂರು 16ನೇ ವಾರ್ಡ್‌ದ ಕಾರ್ಪೊರೇಟರ್ ಶ್ರೀ ಕಿರಣ್ ಕುಮಾರ್ ಕೋಡಿಕಲ್ ಅಂಚೆನೇ ಸುರತ್ಕಲ್‌ದ ಕಾರ್ಪೊರೇಟರ್ ಶ್ರೀ ವರುಣ್ ಚೌಟ. ಮೊಕಲೆನ್ ತೂನಗ ಬಾರಿ ಪೆರ್ಮೆ ಆಪುಂಡು , ತುಲುನು ರಾಜಕೀಯವಾದ್ ತೂವಂದೇ ಅಪ್ಪೆ ಬಾಸೆದ ಮಿತ್ತ್ ವಿಶೇಷವಾಯಿನ ಮೋಕೆ ದೀವೊಂದು ತುಲುಪರವಾದ್ ಸುಮಾರ್ ಕಜ್ಜ ಮಲ್ದೆರ್. ತುಲುನಾಡ್‌ಡ್ ಒವ್ವೆ ರಾಜಕಾರಣಿ ಇದಮುಟ್ಟ ಮಲ್ಪಂದಿನ ತುಲು ಲಿಪಿ ಕಲ್ಪುನ ಕಜ್ಜೊನು ಶ್ರೀ ಕಿರಣ್ ಕುಮಾರ್ ಕೋಡಿಕಲ್ ಮೇರ್ ಶ್ರೀ ನಾರಾಯಣಗುರು ಸೇವಾ ಮಂದಿರ ಕೋಡಿಕಲ್ಡ್ ನಡಪಾಡ್ ಕೊರಿಯೆರ್ . ತಾನ್ ಸ್ವತ ತುಲು ಲಿಪಿ ಕಲ್ತುದು , ತನ್ನ ಬುಡೆದಿ ಸುದೀಕ್ಷಾ ಮೆರೆಗ್ ತುಲು ಲಿಪಿ ಅಂಚೆನೇ ತುಲುಟು MA ಮಲ್ಪರೆ ಅವಕಾಶ ಮಲ್ತುದು ಕೊರ್ದು ಒಂಜಾತ್ ಜನ ತುಲು ಲಿಪಿ ಕಲ್ಪುಲೆಕ ಮಲ್ತೆರ್. ಜೈ ತುಲುನಾಡ್ ಸಂಘಟನೆ ಕೊರ್ತಿನ ಮನವಿಗ್ ಬಿಲೆ ಕೊರ್ದು ತನ್ನ ವಾರ್ಡ್‌ದ 13 ಜಾಗೆಲೆಗ್ ತುಲು ಲಿಪಿಟ್ ಪುದರ್ ಪಲವೆ ಪಾಡ್ದೆರ್ ಅಂಚೆನೇ ತುಲುವೆರೆ ಆಟಿ ಇಂಚಿನ ಎತೋ ಕಜ್ಜೊಲೆಗ್ ಸಕಾಯ ಕೇನ್ನಗ ಕುಸಿ ಕುಸಿಟ್ ಬೆರಿತಾಂಗ್ ಆದ್ ಉಂತುದೆರ್.

ಅಂಚೆನೇ ಕುಡ್ಲ ಪುರಸಭೆಟ್ ಸೂರ್ಯ ಚಂದ್ರೆ ಇತ್ತಿನ ಕೇಪುಲ ರಂಗ್‌ದ ಸೋಲ್ ಪಾಡೊಂದು ತುಲುಕಾದ್ ಸೊರ ಲಕ್ಕಾಯಿನ ಕುಡೊರಿ ತುಲುವಪ್ಪೆನ ಪೆರ್ಮೆದ ಮಗೆ ಶ್ರೀ ವರುಣ್ ಚೌಟ . ಬಿಜೆಪಿ ಯುವ ಮೋರ್ಚಾದ ವತಿಡ್ದ್ ಬಾರಿ ಗೌಜಿಡ್ ತುಲು ದಿಬ್ಬಣ ಲೇಸ್ ಮಲ್ಪಾಯೆರ್, ಅಂಚೆನೇ ಈ ಸಲತ ಪಾಲಿಕೆದ ಬಜೆಟ್‌ಡ್ ತುಲುಕಾದ್ ಒಂಜಾತ್ ಲಕ್ಷ ದೀಪಿನಲ್ಪ ಮಲ್ಲ ಕಜ್ಜ ಬೆನ್ತಿನಾರ್. ಪಾಲಿಕೆದ ಪೂರ ಇಲಾಖೆ ಬೊಕ್ಕ ಕಟ್ಟೊನಡ್ ತುಲು ಲಿಪಿ ಗಲಸರೆ ಪಾತೆರಕತೆಲಾ ಮಲ್ತೊಂದುಲ್ಲೆರ್. ಇಂಚಿನ ರಾಜಕಾರಣಿನಕುಲು ನಮ್ಮ ಪೆರ್ಮೆ. ಕಾರ್ಪೊರೇಟರ್ ಆದ್ ಒರಿ ಈತ್ ತುಲುಪರ ಬೇಲೆ ಮಲ್ಪುನಗ ನಮ್ಮ ಸಚಿವೆರ್, ಶಾಸಕೆರ್ಲಾ ಬೇಲೆ ಮಾಲ್ಪೊಡು ಅತೆ? . ತುಲುನಾಡ್‌ಡ್ ಒಂಜೇ ಪಕ್ಷದ ಸುಮಾರ್ ಜನ ಶಾಸಕೆರ್ ಉಲ್ಲೆರ್ ಮಾತೆರ್ಲ ಸೇರ್ದ್ ಮನಸ್ ಮಲ್ತುಂಡ ತುಲು ರಾಜ್ಯ ಬಾಸೆ ಆವರೆ ಮಸ್ತ್ ದಿನ ತಾಗಂದ್. ಸಚಿವೆರ್ ತನ್ನ ವೈಯಕ್ತಿಕ ಲಾಭನ್ ಬರಿಕ್ ದೀದ್ ತುಲು ಬಾಸೆತ ಬಗೆಟ್ ಒಂಜಾತ್ ಯೋಚನೆ ಮಲ್ದುವೆರ್ಡ ಈತ್ ಪೊರ್ತು ತುಲುವೆರೆ ಕನ ನನ ಆತು. ಎಂಚಿನನೇ ಆವಡ್ ಈ ಸಲ ತುಲುವೆರ್ ಲಕುದೆರ್ , ತುಲು ಬಾಸೆಗ್ ಮಾನಾದಿಗೆ ಕೊರ್ರೆ ಟೊಂಕ ಕಟುದು ಉಂತುದೆರ್ . ಪ್ರತಿಯೊರಿಯನಲ ವೋಟು ಬಾರಿ ಮುಖ್ಯ , ರಾಜಕಾರಣಿನಕುಲು ಈ ವಿಷಯಡ್ ಗಮನ ಕೊರೊಡು.

ಅಂಚೆನೇ ಒಂಜಿ ಬಿನ್ನಾಪು, ತುಲು ಕೊಡಿನ್ ರಾಜಕೀಯ ಡೊಂಬರಾಟದ ವಸ್ತು ಮಲ್ಪೊಡ್ಚಿ. ಸೂರ್ಯೆ ಚಂದ್ರೆ ಇತ್ತಿನ ಕೇಪುಲ ರಂಗ್‌ದ ಕೊಡಿ ನಮ್ಮ ಅಸ್ಮಿತೆ ಅವ್ ಪ್ರತಿ ತುಲುವನ ಪೆರ್ಮೆ . ತುಲು ಕೊಡಿ ಒವ್ವೆ ರಾಜಕೀಯ ಪಕ್ಷದ ಚಿಹ್ನೆ ಆರೆ ಬಲ್ಲಿ. ಇತ್ತೆ ಕರ್ನಾಟಕದ ಕೊಡಿನ್ ನಮ ಎಂಚ ಕನ್ನಡ ಪಕ್ಷದ ಕೊಡಿ ಪಂದ್ ಕುಚ್ಚನೆ ಮಲ್ಪುವನಾ ಅಂಚೆನೇ ಎಲ್ಲೆ ನಮ್ಮ ಕೊಡಿಕ್ಲಾ ಅವ್ವೆ ಸ್ಥಿತಿ ಬರು.

ತುಲುವೆರ್ ಲಕುದೆರ್ ಈ ಸಲ ಪಕ್ಷದ ಮೋಕೆನ್ ಬರಿಕ್ ದೀದ್ ತುಲುಕು ರಾಜ್ಯ ಬಾಸೆದ ಅಧಿಕೃತ ಸ್ಥಾನಮಾನ ಕೊರ್ಪುನು ಗಟ್ಟಿ ನಿರ್ಧಾರದೊಟ್ಟುಗು ಉಂತುದೆರ್. ಆ ನಿರ್ಧಾರಗ್ ಬಲ ತಿಕ್ಕೊಡು ಪೂರ ತುಲುವೆರ್ ಒಂಜಿ ನಿರ್ಧಾರಗ್ ಬರೊಡು. ತುಲು ರಾಜ್ಯ ಬಾಸೆ ಆವೊಡು, ತುಲುವಪ್ಪೆ ಗೆಂದೊಡು.

✍️ ಗೀತಾ ಲಕ್ಷ್ಮೀಶ್