ಮಾ.31ತ್ತ ಉಲಯಿ ಆಧಾರ್​ ಕಾರ್ಡ್ – ಪಾನ್ ಕಾರ್ಡ್ ಗ್ ಲಿಂಕ್ ಮಲ್ಪೊಡು

ಕೇಂದ್ರ ಸರ್ಕಾರ ಕರಿನ ಕೆಲವು ವರ್ಷೊದಿಂಚ ಪಾನ್​ಕಾರ್ಡ್​ಗ್ ಆಧಾರ್ ಕಾರ್ಡ್ ಲಿಂಕ್ ಮಲ್ಪೆರೆ ಸಾರ್ವಜನಿಕೆರೆಡ ಬಿನ್ನಾಪು ಮಲ್ತೊಂದು ಬೈದ್ಂಡ್‌. ನೆಕ್ಕಾದ್ ಗುಡು ವಿಸ್ತರಣೆ ಮಲ್ತೊಂದು ಉಂಡು. ಆಂಡ ಇದ ಮುಟ್ಟ ಶೇ.100 ಗುರಿ ಸಾಧ್ಯ ಆತಿಜಿ. ಅಂಚಾದ್ ಇತ್ತೆ ಮಾ.31 ತಾರೀಕ್ ಅಕೇರಿದ ಅವಕಾಶ ಕೊರ್ತುಂಡು. ಈ ಗಡುತ್ತುಲಯಿ ಲಿಂಕ್ ಮಲ್ತಿಜಿಂಡ ಪಾನ್ ಕಾರ್ಡ್ ರದ್ದಾಪುನ ಸಾಧ್ಯತೆ ಉಂಡು ಪಂದ್ ತೆರಿಪಾದ್ಂಡ್.

ಆದಾಯ ತೆರಿಗೆ ವಂಚನೆ, ಬೇನಾಮಿ ಆಸ್ತಿ, ಪಿದಯಿ ದೇಶಲೆರ್ದ್ ಬರ್ಪಿನ ಕಾಸ್ ದ ಮಿತ್ತ್ ತೀವ್ರ ನಿಗಾ ಸೇರ್ಸಾದ್, ಕಲ್ವ ತಾದಿಡ್ ಬರ್ಪಿನ ಕಾಸ್ ಗ್ ಮೂಂಕುಬಲ್ಲ್ ಪಾಡಿಯೆರೆ ನೆರ್ದ್ ಸಾಧ್ಯ ಆಪುಂಡು. ಅಂದಾಜಿ 142 ಕೋಟಿಗ್ ಎಚ್ಚ ಜನಸಂಖ್ಯೆ ಇಪ್ಪುನ ಭಾರತಡ್ 61 ಕೋಟಿಗ್ ಎಚ್ಚ ಜನಟ ಪಾನ್ ಕಾರ್ಡ್ ಉಂಡು. ಅಯಿಟ್ 2023ತ್ತ ಫೆಬ್ರವರಿ ಅಕೇರಿಡ್ 48.5 ಕೋಟಿ ಜನತ್ತ ಆಧಾರ್ ಕಾರ್ಡ್​ ಸಂಖ್ಯೆ ಪಾನ್ ಕಾರ್ಡ್ ಗ್ ಲಿಂಕ್ ಆತ್ಂಡ್. ನನ ಒರಿನಕುಲು ಗಡುತ್ತ ಉಲಯಿ ಲಿಂಕ್ ಮಲ್ಪೊಡೇ ಪಂದ್ ತೆರಿಪಾದ್ಂಡ್.

ದೇಶಡ್ 2017 ಜು.1 ಕ್ಕ್ ರಡ್ಡ್ ಕಾರ್ಡ್ ದಲ ಲಿಂಕ್ ಪ್ರಕ್ರಿಯೆ ಸುರು ಆತ್ಂಡ್. ಅನಿರ್ದ್ 2022ತ್ತ ಮಾ.31 ಮುಟ್ಟ 7,8 ಸರ್ತಿ ಅವಧಿ ವಿಸ್ತರಣೆ ಮಲ್ದೆರ್. ಆಂಡಲ ಶೇ.100 ಗುರಿ ಸಾಧ್ಯ ಆತಿಜಿ. ಇಂಚಾದ್ ಮಾ.31 ಮುಟ್ಟ ಲಿಂಕ್ ಮಲ್ಪೆರೆ ಗಡುವು ಕೊರ್ತುಂಡು. ಲಿಂಕ್ ಆಯಿಜಿಂಡ ಅವೆರ್ದ್ ಬೊಕ್ಕ 10 ಸಾರ ರೂ.ಗ್ ದಂಡ ಪಾಡಿಯೆರೆ ಚಿಂತನೆ ನಡಪಾದ್ಂಡ್.

ಕುಡ ಪಾನ್ ಕಾರ್ಡ್ ಪಡೆಯೆರೆ ಸಾಧ್ಯ ಇಜ್ಜಿ?: ಒರ ಪಾನ್ ಕಾರ್ಡ್ ಪಡೆಯಿನಕುಲು ಲಿಂಕ್ ಮಲ್ಪರೆ ಉದಾಸಿನ ಮಲ್ತ್ ದ್, ಕಾರ್ಡ್ ರದ್ದಾಂಡ ಕುಡ ಪೊಸ ಪಾನ್ ಕಾರ್ಡ್ ಪಡೆಯೆರೆ ಆಪುಜಿ. ಅತ್ತಂದೆ ಲಿಂಕ್ ಆಯಿಜಿಂಡ ಸರ್ಕಾರದ ಸೌಲಭ್ಯ ಪಡೆಯರೆ ತೊಂದರೆ ಆಪುಂಡು. ಇದ ಮುಟ್ಟ ಲಿಂಕ್ ಮಲ್ಪಂದಿನಕುಲು ಉಂದುವೇ ತಿಂಗೊಲ್ದ ಉಲಯಿ ಮಲ್ಪವೊಡು.

ಪಾನ್ ಕಾರ್ಡ್ ರದ್ದಾಂಡ ತೊಂದರೆ ದಾದ?:
ಪಾನ್ ಕಾರ್ಡ್ ರದ್ದಾಂಡ ಪಾನ್​ಗ್ ಲಿಂಕ್ ಮಲ್ತಿನ ಮಾತ ಬಗೆತ್ತ ಕಾಸ್ ದ ವೈವಾಟ್ ಉಂತುಂಡು‌. ಹೆಚ್ಚುವರಿಯಾದ್ ಆದಾಯ ತೆರಿಗೆ ಬಾಕಿ ರಿಟರ್ನ್ಸ್ ಪ್ರಕ್ರಿಯೆ ಉಂತುಂಡು. 50 ಸಾರರ್ದ್ ಎಚ್ಚ ಕಾಸ್ ದ ವೈವಾಟ್ ಬ್ಯಾಂಕ್​ದ ಮುಖೇನ ನಡಪಾಯೆರೆ ಸಾಧ್ಯ ಆಪುಜಿ. ನೆರ್ದ್ ವ್ಯವಹಾರ ಚಟುವಟಿಕೆದ ಮಿತ್ತ್ ದುಷ್ಪರಿಣಾಮ ಆಪುನ ಸಾಧ್ಯತೆ ಎಚ್ಚಾಪುಂಡು. ರಾಷ್ಟ್ರೀಕೃತ, ಪ್ರಾದೇಶಿಕ ಸೇರ್ದ್ ವಾ ಬ್ಯಾಂಕ್​ಲೆಡ್ಲಾ ಸಾಲದ ಸೌಲಭ್ಯ ತಿಕ್ಕುಜಿ ಪಂದ್ ತೆರಿಪಾದ್ಂಡ್.

ಲಿಂಕ್ ದಾಯೇ ಕಡ್ಡಾಯ?:
ಅನಧಿಕೃತ ಪಾನ್ ಸಂಖ್ಯೆನ್ ಉಪಯೋಗ ಮಲ್ತೊಂದು ವಂಚನೆ ಮಲ್ಪುನ ಕೇಸ್ ಲು ನಡತೊಂದು ಇಪ್ಪುನ ಬಗೆಟ್ ಈ ನಿರ್ಧಾರ ದೆತೊಂದುಂಡು. ಅಂಚೆನೆ, ಪೊಸ ಪಾನ್ ಕಾರ್ಡ್​ಗ್ ಅರ್ಜಿ ಸಂದಾವೊನಕುಲು ಆಧಾರ್ ಸಂಖ್ಯೆ ಲಿಂಕ್ ಮಲ್ಪುನೇ ಕಡ್ಡಾಯ ಆತ್ಂಡ್. ನೆಕ್ಕ್ ದುಂಬೇ ಪಾನ್ ಕಾರ್ಡ್ ಇಪ್ಪುನಕುಲು ಸರ್ಕಾರ ನಿಗದಿ ಮಲ್ತಿನ ಗಡುವುರ್ದ್ ದುಂಬೇ ಆಧಾರ್ ದೊಟ್ಟಿಗೆ ಪಾನ್ ಕಾರ್ಡ್ ಲಿಂಕ್ ಮಲ್ಪೊಡು. ಇಜ್ಜಿಂಡ ಪಾನ್ ಕಾರ್ಡ್ ರದ್ದಾಪುಂಡು. ಬ್ಯಾಂಕ್ ಮುಖೇನ ಕಾಸ್ ದ ಚಟುವಟಿಕೆ ನಡಪಾಯೆರೆ, ಮ್ಯೂಚುವಲ್ ಫಂಡ್​ಲೆಡ್ ಹೂಡಿಕೆ ಮಲ್ಪೆರೆ, ಆನ್​ಲೈನ್ ವೈವಾಟ್ ದ ಬಗೆಟ್ ಕೆವೈಸಿ ಮುಟ್ಟ, ಇಂಚ ಸುಮಾರ್ ಕಾಸ್ ದ ಚಟುವಟಿಕೆಲೆಗ್ ಪಾನ್ ಕಾರ್ಡ್ ಅಗತ್ಯ ಆತ್ಂಡ್.

ಪಾನ್ ಲಿಂಕ್ ಮಲ್ಪುನು ಎಂಚ?:
ಸಾರ್ವಜನಿಕೆರ್ ಆದಾಯ ತೆರಿಗೆ ಇಲಾಖೆ ವೆಬ್​ಸೈಟ್ http://bit.ly/3YMHTyMಗ್ ಭೇಟಿ ಕೊರ್ದು ಪಾನ್ ಕಾರ್ಡ್ ನ್ ಆಧಾರ್ ಸಂಖ್ಯೆದೊಟ್ಟಿಗೆ ಲಿಂಕ್ ಮಲ್ಪೊಲಿ.