ಕುಡ್ಲ: ಆಟೋ ರಿಕ್ಷಾಡ್ ಕುಕ್ಕರ್ ಬಾಂಬ್ ಪುಡಾದ್ ಮಸ್ತ್ ಪೆಟ್ಟಾದ್ ಆಸ್ಪತ್ರೆಗ್ ದಾಖಲ್ ಆಯಿನ ಉಜ್ಜೋಡಿ ನಿವಾಸಿ ಪುರುಷೋತ್ತಮ ಪೂಜಾರಿ ಮೆರೆನ ಇಲ್ಲ್ ಕಟ್ಟುನ ಕನ ಕಡೆಕ್ಕ್ಲ ನನಸ್ ಆಂಡ್.
ಗುರುಬೆಳದಿಂಗಳು ಸೇವಾ ಸಂಸ್ಥೆ ಮುತಾಲಿಕೆಡ್ 6 ಲಕ್ಷ ರೂಪಾಯಿ ಕಾಸ್ಡ್ ಪುನರ್ ನಿರ್ಮಾಣ ಮಲ್ತಿನ ಇಲ್ಲ್ನ್ ಯುಗಾದಿದಾನಿ ಹಸ್ತಾಂತರ ಮಲ್ತೆರ್.
ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ ಭಾವಚಿತ್ರನ್ ಪಾಡ್ದ್ ಅಯಿಕ್ಕ್ ಪೂಮಾಲೆ ಪಾಡ್ದ್ ತುಡರ್ ಅರ್ಲಾಯೆರ್. ಇಲ್ಲದ ಪುದರ್ ಪಲವೆನ್ ಅನಾವರಣ ಮಲ್ಪುನ ಮುಕೇನ ಸೈಂಟ್ ಆಂಟನಿ ಆಶ್ರಮದ ಫಾದರ್ ಜೆ ಬಿ ಕ್ರಾಸ್ತಾ ಶುಭ ಹಾರೈಸಾದ್ ಸಮಾಜ ಸೇವಾ ಸಂಘಟನೆದ ಕಾರ್ಯಗ್ ಎಡ್ಡೆಪ್ಪುನು ಬಯಕ್ಯೆರ್.
ಗುರುಬೆಳದಿಂಗಳು ಸೇವಾ ಸಂಸ್ಥೆದ ಅಧ್ಯಕ್ಷೆರ್ ಆರ್ ಪದ್ಮರಾಜ್ ಸೇವಾ ಸಂಘಟನೆದ ಬಗೆಟ್ ವಿವರಣೆ ಕೊರಿಯೆರ್. ನಾರಾಯಣ ಗುರುಕ್ಲೆನ ಪ್ರೇರಣೆದಲೆಕ ಈ ಬೇಲೆ ಆತ್ಂಡ್. ಇನಿ ನಮ್ಮ ಸಂಘಟನೆ ಬಡವೆರ್ನ ಕಣ್ಣ ನೀರ ಪನಿನ್ ಒಚ್ಚುನ ಬೇಲೆನ್ ಮಲ್ತೊಂದು ಬರೊಂದುಂಡು ಪಂದ್ ಪಂಡೆರ್.
ಮಲ್ಲ ಬಿನ್ನೆರಾದ್ ಮಾಜಿ ರಾಜ್ಯ ಸಭಾ ಸದಸ್ಯೆರ್ ಬಿ ಇಬ್ರಾಹಿಂ, ದೇವೇಂದ್ರ ಪೂಜಾರಿ, ಮೋಹನ್ ನೆಕ್ಕರೆ ಮಾರ್, ಇಂಡಿಯಾನಾ ಆಸ್ಪತ್ರೆದ ಡಾ ಯೂಸುಫ್ ಕುಂಬ್ಳೆ, ರೋಹನ್ ಕಾರ್ಪೋರೇಶನ್ ಎಂಡಿ ರೋಹನ್ ಮೊಂತೆರೋ, ಸತ್ಯಜಿತ್ ಸುರತ್ಕಲ್, ಕಾರ್ಪೊರೇಟರ್ ಪ್ರವೀಣ್ ಚಂದ್ರ ಆಳ್ವ, ಡಿ.ಕೆ ಅಶೋಕ್, ರಾಜೇಶ್ ಬಿ ಮೊಕಯಲು ಮಾತ ಲೇಸ್ಡ್ ಪಾಲ್ ಪಡೆದಿತ್ತೆರ್. ಈ ಪೊರ್ತುಡು ಇಲ್ಲದ ಯಜಮಾನೆರ್ ಪುರುಷೋತ್ತಮ ಪೂಜಾರ್ಲು ಬೊಕ್ಕ ಅರೆನ ಬೊಡೆದಿ ಜೋಕುಲು ಇತ್ತೆರ್. ಇಲ್ಲದ ಬೇಲೆಗ್ ಬೆನ್ತಿನಕ್ಲೆನ್ ಈ ಪೊರ್ತುಡು ಮಾನಾದಿಗೆ ಮಲ್ತೆರ್.
pallavi shetty