ಕಾಸ್ರೋಡು: ಮಂಜೇಶ್ವರ ತಾಲೂಕ್ದ ಕೋಡಿ ಶ್ರೀ ರಕ್ತೇಶ್ವರೀ ಅಂಚನೆ ಪರಿವಾರ ದೈವಲೆನ ಕ್ಷೇತ್ರಡ್ ಎ.2 ಬೊಕ್ಕ 3 ಕ್ಕ್ ನೇಮೋಚ್ಚಯ ನಡಪರೆ ಉಂಡು.
ಅಂಚಾದ್ ಮಾ.26 ಕ್ಕ್ ಬಯ್ಯ 4 ಗಂಟೆಗ್ ಕೋರಿಗುಂಟ ಆಯರೆ ಉಂಡು. ಎ.2 ಕ್ಕ್ ಮಧ್ಯಾಹ್ನ 2 ಗಂಟೆಗ್ ಶ್ರೀ ದೈವಲೆಗ್ ತಂಬಿಲ ಸೇವೆ ಆದ್ ಬಯ್ಯ 4 ಗಂಟೆಗ್ ಪೊಸತ್ತಾದ್ ನಿರ್ಮಾಣ ಆಯಿನ ಮಹಾದ್ವಾರದ ಉದಿಪನ ಆಯರೆ ಉಂಡು. ರಾತ್ರೆ 11 ಗಂಟೆಗ್ ಮಲರಾಯ ಬೊಕ್ಕ ಬಂಟ ದೈವದ ನೇಮ ಆದ್ ಪ್ರಸಾದ ಕೊರ್ಪಿನ ಲೇಸ್ ನಡಪರೆ ಉಂಡು.
ಎ.3 ಕ್ಕ್ ಸಭೆ ಅಂಚನೆ ಮಾನಾದಿಗೆದ ಲೇಸ್ ನಡತ್ತ್ದ್ ರಾತ್ರೆ 9 ಗಂಟೆಗ್ ತುಳುನಾಡ ಸಿರಿ ಪನ್ಪಿನ ಯಕ್ಷಗಾನ ನಡಪರೆ ಉಂಡು. ರಾತ್ರೆ 2 ಗಂಟೆಗ್ ಶ್ರೀ ರಕ್ತೇಶ್ವರೀ ದೈವದ ನೇಮ, ಕೆಂಡಸೇವೆ ನಡಪರೆ ಉಂಡು. ಈ ಲೇಸ್ಗ್ ಮಾತ ಭಕ್ತೆರ್ ಬತ್ತ್ದ್ ಶ್ರೀ ದೈವದ ಗಂಧ ಪ್ರಸಾದನ್ ದೆತೊಂದು, ದೈವದ ಕೃಪೆಗ್ ಪಾತ್ರರಾವೊಡು ಪಂದ್ ಕ್ಷೇತ್ರದ ಆಡಳಿತ ಸಮಿತಿದ ಗೌರವಾಧ್ಯಕ್ಷೆರ್ ಶಂಕರ್ ಭಟ್ ಕೋಡಿ, ಅಧ್ಯಕ್ಷೆರ್ ವಾಸುದೇವ ಶೆಟ್ಟಿ ಪಳ್ಳತ್ತಡ್ಕ, ಸಂಚಾಲಕೆರ್ ದಿನಕರ್ ಭಟ್ ಕೋಡಿ, ಕಾರ್ಯಾಧ್ಯಕ್ಷೆರ್ ರಾಜಾನಂದ ಶೆಟ್ಟಿ ಪಳ್ಳತ್ತಡ್ಕ, ಕಾರ್ಯದರ್ಶಿ ಯೋಗೀಶ್ ಶೆಟ್ಟಿ ದರ್ಬೆ, ಕೋಶಾಧಿಕಾರಿ ನಿಶಾನ್ ರೈ ಪಳ್ಳತ್ತಡ್ಕ ಅಂಚನೆ ಮಾತ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
pallavi shetty