ಕುಡ್ಲ: ತುಳುನಾಡ್ದ ಪ್ರಧಾನ ಗರಡಿ ಕ್ಷೇತ್ರಡ್ ಒಂಜಾಯಿನ ಕಂಕನಾಡಿ ಬ್ರಹ್ಮಬೈದರ್ಕಳ ಗರಡಿ ಕ್ಷೇತ್ರ ಸ್ಥಾಪನೆ ಆದ್ 150 ವರ್ಷ ಆಯಿನೆತ್ತ ಸಂಬುರ್ಮೊದ ಈ ಪೊರ್ತುಡು ಮಾರ್ಚ್ 3-7 ಮುಟ್ಟ ಸಹಸ್ರ ನಾರಿಕೇಳ ಗಣಯಾಗ, ಸಹಸ್ರ ಕುಂಭಾಭಿಷೇಕ, ನಾಗಬ್ರಹ್ಮಮಂಡಲೋಚ್ಚಯ ನಡಪರೆ ಉಂಡು ಪಂದ್ ಕಂಕನಾಡಿ ಬ್ರಹ್ಮಬೈದರ್ಕಳ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ಜೆ. ದಿನೇಶ್ ಅಂಚನ್ ಪಂಡೆರ್.
ಕಂಕನಾಡಿ ಗರಡಿ ಕ್ಷೇತ್ರಡ್ ಸನಿಯಾರ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿನ ಆರ್, ಕಂಕನಾಡಿ ಗರಡಿ ಕ್ಷೇತ್ರದ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಕೆ. ವಾಸುದೇವ ಶಾಂತಿ ಮೆರೆನ ಉಪಸ್ಥಿತಿಡ್ ಬಿ. ಗಂಗಾಧರ ಶಾಂತಿ ಮೆರೆನ ಮುತಾಲಿಕೆಡ್ ಅಂಚನೆ ಶ್ರೀ ನಾರಾಯಣ ಗುರು ವೈದಿಕ ಸಮಿತಿ ಕುಡ್ಲ ಉಂದೆತ್ತ ಮುತಾಲಿಕೆಡ್ ಧಾರ್ಮಿಕ ಕಾರ್ಯಕ್ರಮ ನಡಪರೆ ಉಂಡು ಪಂದ್ ಪಂಡೆರ್.
ಮಾ. 4 ಕ್ಕ್ ಕಾಂಡೆ 5 ಗಂಟೆಗ್ ಸಾವಿರ ತಾರಾಯಿದ ಗಣಯಾಗ, 11 ಗಂಟೆಗ್ ಪೂರ್ಣಾಹುತಿ, ಮಾ. 5 ಕ್ಕ್ ಕಾಂಡೆ 7 ಗಂಟೆಗ್ ಕ್ಷೇತ್ರದ ಪರಿವಾರ ದೈವದೇವೆರೆಗ್ ಕಲಶಾಭಿಷೇಕ, ಮಾ. 6 ಕ್ಕ್ ಕಾಂಡೆ 7.40 ಗ್ ಇಪ್ಪುನ ಮೀನ ಲಗ್ನಡ್ ಶ್ರೀ ಬ್ರಹ್ಮಬೈದೆರ್ಲೆಗ್ ಸಹಸ್ರ ಕುಂಭಾಭಿಷೇಕ, ಮಾ. 7 ಕ್ಕ್ ನಾಗಪಾತ್ರಿ ಕಾವೂರು ಮನೋಜ್ ಶಾಂತಿ ಬೊಕ್ಕ್ ಕೂಟರ್ದ್ ರಾತ್ರೆ 9 ಗಂಟೆಗ್ ಹಾಲಿಟ್ಟು ಸೇವೆ ಅಯಿರ್ದ್ ಬೊಕ್ಕ ರಾತ್ರೆ 12 ಕ್ಕ್ ನಾಗಬ್ರಹ್ಮ ಮಂಡಲೋಚ್ಚಯ ಸೇವೆ ನಡಪರೆ ಉಂಡು. ಅಂಚನೆ 5 ದಿನಲ ರಾತ್ರೆ ಬೇತೆ ಬೇತೆ ಕೂಟರ್ದ್ ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು ಪಂದ್ ಪಂಡೆರ್.
ಕಂಕನಾಡಿ ಬ್ರಹ್ಮಬೈದರ್ಕಳ ಗರಡಿ ಕ್ಷೇತ್ರದ ಅಧ್ಯಕ್ಷೆರ್ ಕೆ. ಚಿತ್ತರಂಜನ್ ಪಾತೆರ್ದ್, ಮಾರ್ಚ್ 3 ಕ್ಕ್ ಮಧ್ಯಾಹ್ನ 3 ಗಂಟೆಗ್ ಪುದೆಕಾಣಿಕೆ ಮೆರವಣಿಗೆ ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರರ್ದ್ ಸುರು ಆದ್ ಶ್ರೀ ನಾರಾಯಣಗುರು ಸರ್ಕಲ್, ಲಾಲ್ಬಾಗ್, ಪಿ.ವಿ.ಎಸ್ ಸರ್ಕಲ್, ಬಂಟ್ಸ್ ಹಾಸ್ಟೆಲ್ ಸರ್ಕಲ್, ಜ್ಯೋತಿ ಸರ್ಕಲ್, ಕಂಕನಾಡಿ, ಪಂಪವೆಲ್ ಸರ್ಕಲ್ದ ಮುಕೇನ ಶ್ರೀ ಕ್ಷೇತ್ರ ಗರಡಿಗ್ ಬರಿಯರೆ ಉಂಡು ಪಂದ್ ಪಂಡೆರ್.
ಗರಡಿ ಕ್ಷೇತ್ರಗ್ ಬರ್ರೆ ಉಲ್ಲೆರ್ ಸಿಎಂ
ಮಾ.7 ಕ್ಕ್ ಕಂಕನಾಡಿ ಗರಡಿ ಕ್ಷೇತ್ರಡ್ ನಡಪುನ ನಾಗಬ್ರಹ್ಮಮಂಡಲೋಚ್ಚಯ ಲೇಸ್ದ ಲೆಕ್ಕೊಡು ಬಯ್ಯಗ್ 6.30 ಗಂಟೆಗ್ ನಡಪುನ ಧರ್ಮ ಸಭೆಕ್ಕ್ ರಾಜ್ಯದ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಬರಿಯರೆ ಉಲ್ಲೆರ್. ಮೇರ್ನೊಟ್ಟುಗು ರಾಜ್ಯದ ಸಚಿವೆರ್, ಸಂಸದೆರ್, ಶಾಸಕೆರ್ ಪಾಲ್ ಪಡೆಯರೆ ಉಲ್ಲೆರ್.
ಪತ್ರಿಕಾಗೋಷ್ಠಿಡ್ ಕ್ಷೇತ್ರದ ಮ್ಯಾನೇಜರ್ ಜೆ. ಕಿಶೋರ್ ಕುಮಾರ್, ಪ್ರಧಾನ ಸಂಚಾಲಕೆರ್ ಎಂ. ಮೋಹನ್ ಉಜ್ಜೋಡಿ, ಕ್ಷೇತ್ರದ ಮೊಕ್ತೇಸರೆರ್ ಆಯಿನ ಬಿ. ವಿಠಲ, ಎ. ವಾಮನ, ಬಿ. ದಾಮೋದರ ನಿಸರ್ಗ, ದಿವರಾಜ್, ಜಗದೀಪ್, ಜಗದೀಪ್ ಡಿ. ಸುವರ್ಣ, ಜೆ. ವಿಜಯ ಇತ್ತೆರ್.
pallavi shetty