Beedi rollers will get employed in the garments sector if Congress comes to power – B K Hariprasad Karavali Prajadwani yatra and Congress public meeting at Mulki ಕಾಂಗ್ರೆಸ್ ಅಧಿಕಾರೊಗು ಬತ್ತ್ಂಡ ಬೀಡಿ ಕಟ್ಟುನಕ್ಲೆಗ್ ಗಾರ್ಮೆಂಟ್ಸ್ ಡ್ ಬೇಲೆ : ಬಿ.ಕೆ.ಹರಿಪ್ರಸಾದ್ ಮುಲ್ಕಿಡ್ ಕರಾವಳಿ ಪ್ರಜಾ ಧ್ವನಿ ಯಾತ್ರೆ ಬೊಕ್ಕ ಕಾಂಗ್ರೆಸ್ ಸಮಾವೇಶ

ಮುಲ್ಕಿ : ತುಳುನಾಡ್ ದ ಅಭಿವೃದ್ಧಿಗ್ ಬೋಡುತ್ತಿನ ಪ್ರತ್ಯೇಕ ಪ್ರಣಾಳಿಕೆನ್ ತಯಾರ್ ಮಲ್ದಿನ ಕಾಂಗ್ರೆಸ್, ಬರ್ಪಿನ ವಿಧಾನಸಭೆತ್ತ ವೋಟುಡು ಗೆಂದ್ ದ್ ಅಧಿಕಾರೊಗು ಬತ್ತ್ಂಡ, ಬೀಡಿ ಕಟೊಂದು ಜೀವನ ಮಲ್ತೊಂದಿತ್ತಿನಕ್ಲೆಗ್ ಪೊಸ ಉದ್ಯೋಗ ಕೊರ್ಪಿನ ನಿಲೆಟ್ಟ್ ಕುಡ್ಲಡ್ ಐಟಿ ಪಾರ್ಕ್ ಬೊಕ್ಕ ಗಾರ್ಮೆಂಟ್ ಇಂಡಸ್ಟ್ರಿ ಪಾರ್ಕ್ ಸ್ಥಾಪನೆ ಮಲ್ತ್ ದ್ 1 ಲಕ್ಷ ಜನಕ್ಕ್ ಉದ್ಯೋಗ ಕೊರ್ಪಿನ ಯೋಜನೆ ಪಾಡ್ದ್ಂಡ್ ಪಂದ್ ವಿಧಾನ ಪರಿಷತ್ ಸದಸ್ಯೆರ್, ತುಳುನಾಡ ಪ್ರಜಾ ಧ್ವನಿ ಯಾತ್ರೆದ ಮುಖ್ಯಸ್ಥೆರ್
ಬಿ ಕೆ ಹರಿಪ್ರಸಾದ್ ಪಂಡೆರ್.

ಆರ್ ಮೂಲ್ಕಿ- ಬೆದ್ರ ಕ್ಷೇತ್ರದ ವ್ಯಾಪ್ತಿಡ್ ಸೋಮವಾರ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ಕೈತಲ್ದ ಅನ್ನಪೂರ್ಣೇಶ್ವರಿ ಸಭಾಭವನಡ್ ನಡತಿನ ತುಳುನಾಡ ಪ್ರಜಾ ಧ್ವನಿ ಯಾತ್ರೆ ಬೊಕ್ಕ ಕಾಂಗ್ರೆಸ್ ಸಮಾವೇಶಡ್ ಪಾತೆರಿಯೆರ್.

ಗೃಹ ಲಕ್ಷ್ಮಿ ಯೋಜನೆಡ್ ಪ್ರತಿ ಇಲ್ಲದ ಪೊಂಜೊವುಲೆಗ್ ತಲಾ 2,000 ರೂ. ಪನವುದ ಸಕಾಯ ಕೊರ್ಪಿನ ಅಂಚೆನೆ ಗೃಹ ಜ್ಯೋತಿ ಯೋಜನೆಡ್ ಪ್ರತಿ ಇಲ್ಲಗ್ 200 ಯುನಿಟ್ ಫ್ರೀ ಕರೆಂಟ್ ಕೊರ್ಪಿನ ಕಾಂಗ್ರೆಸ್ ಪಕ್ಷದ ಭರವಸೆದ ಬಗೆಟ್ ವಿರೋಧ ಪಕ್ಷದಕುಲು ಟೀಕೆ ಮಲ್ತೊಂದುಲ್ಲೆರ್.ಕಾಂಗ್ರೆಸ್ ಅಧಿಕಾರೊಗು ಬತ್ತ್ಂಡ ಅವೆನ್ ಖಂಡಿತವಾದ್ ಲ ಕೊರ್ಪಾವ. ನೆಟ್ಟ್ ಸಂಸಯ ಬೊಡ್ಚಿ ಪಂದ್ ಭರವಸೆ ಕೊರಿಯೆರ್.

ದೇಶಭಕ್ತಿದ ಪುದರ್ ಡ್ ದ್ವೇಷ ಪುಟ್ಟಾವುನ ಬಿಜೆಪಿ, ಇತ್ತೆ ಪೊಲಿಟಿಕಲ್ ಟೂರಿಸಮ್ ಮಲ್ತ್ ದ್ ಮತದಾರೆರೆನ್ ತಪ್ಪು ಸಾದಿಗ್ ಒಯಿತೊಂದುಂಡು. ಆ ಸರ್ಕಾರೊನು ಬದಲ್ ಮಲ್ಪರೆ ಸರಿಯಾಯಿನ ಪೊರ್ತು ಬೈದ್ಂಡ್ ಪಂದ್ ಪಂಡೆರ್.

ಮಲ್ಲ ಬಿನ್ನೆರಾದ್ ಬತ್ತಿತ್ತಿನ ರಾಜ್ಯ ಹಿಂದುಳಿದ ವರ್ಗದ ಅಧ್ಯಕ್ಷೆರ್ ಮಧು ಬಂಗಾರಪ್ಪ ಪಾತೆರ್ದ್, ಮಾಜಿ ಮುಖ್ಯಮಂತ್ರಿ, ಕಾಂಗ್ರೆಸ್ ದ ಮಲ್ಲ ನಾಯಕೆರ್ ದಿ.‌ಬಂಗಾರಪ್ಪ ಮೇರ್ ಮಲೆನಾಡ್ ಮಾತ್ರ ಅತ್ತಾಂದೆ ತುಳುನಾಡ್ ದ ಕನಕ್ಲೆನಲ ಮನಸ್ ಗೆಂದಿನಾರ್. ಅಂಚಾದ್ ಈ ಸರ್ತಿ ಕಾಂಗ್ರೆಸ್ ಸರ್ಕಾರೊನು ಅಧಿಕಾರಗು ಕನಲೆ ಪಂದ್ ಬಿನ್ನಾಪು ಮಲ್ತೆರ್.

ಮಾಜಿ ಸಚಿವೆರ್, ಕೆಪಿಸಿಸಿ ಉಪಾಧ್ಯಕ್ಷೆರ್ ಅಭಯಚಂದ್ರ ಜೈನ್ ಕ್ಷೇತ್ರದ ಅಭಿವೃದ್ಧಿ ಗ್ ಪುನೆಯಿನ ದಿ.ಸೋಮಪ್ಪ ಸುವರ್ಣ, ದಾಮೋದರ ಮುಲ್ಕಿ ಮೊಕ್ಲೆನ್ ನೆಂಪು ಮಲ್ತ್ ದ್ , ನಿಕುಲು ಮಾತೆರ್ಲ ತಾನೇ ಕಾಂಗ್ರೆಸ್ ದ ಅಭ್ಯರ್ಥಿ ಪಂದ್ ಕೆಲಸ ಮಲ್ಪುಲೆ. ಜಯ ನಮ್ಮ ಪಾಲ್ ಒದಗುಂಡು ಪಂಡೆರ್.

ಬಿನ್ನೆರಾದ್ ವಿಧಾನಪರಿಷತ್ ಸದಸ್ಯೆರ್ ಹರೀಶ್ ಕುಮಾರ್ , ಕೆಪಿಸಿಸಿದ ರೋಜಿ ಜಾನ್, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಬೊಕ್ಕ ಮುಲ್ಕಿ ಬೆದ್ರ ವಿಧಾನಸಭೆ ಕ್ಷೇತ್ರದ ಉಸ್ತುವಾರಿ ಮಿಥುನ್ ರೈ, ಯು.ಟಿ.ಖಾದರ್,  ಕೆಪಿಸಿಸಿ ಕಾರ್ಯದರ್ಶಿಲಾಯಿನ ಮಮತಾ ಗಟ್ಟಿ, ಅಪ್ಪಿ, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಕೃಪಾ ಆಳ್ವ, ಡಾ.ರಾಜಶೇಖರ ಕೋಟ್ಯಾನ್, ಯುವ ಕಾಂಗ್ರೆಸ್ ಅಧ್ಯಕ್ಷೆರ್ ಲುಕ್ಮಾನ್ ಬಂಟ್ವಾಳ, ಅಬ್ದುಲ್ ರವೂಫ್, ಲಾರೆನ್ಸ್ ಡಿಸೋಜ, ಶಾಲೆಟ್ ಪಿಂಟೊ ಮಾಜಿ ಮೇಯರ್ ಕವಿತಾ ಸನಿಲ್ ಕೆಪಿಸಿಸಿ ವಕ್ತಾರೆರ್ ವಸಂತ ಬೆರ್ನಾಡ್, ಕಿಲ್ಪಾಡಿ ಗ್ರಾಮ ಪಂಚಾಯತ್ ಲೀಲಾ ಮೊಕುಲು ಮಾತ ಇತ್ತೆರ್.

ಮುಲ್ಕಿ ಬ್ಲಾಕ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್ ಬಿನ್ನೆರೆನ್ ಎದ್ಕೊಂಡೆರ್. ಕೆಪಿಸಿಸಿ ಉಪಾಧ್ಯಕ್ಷೆರ್ ಮಂಜುನಾಥ ಭಂಡಾರಿ ಪ್ರಾಸ್ತಾವಿಕವಾದ್ ಪಾತೆರ್ದ್, ಪ್ರತಿಯೊರಿಲ ಕಾಂಗ್ರೆಸ್ ದ ಅಭ್ಯರ್ಥಿ ಪಂದ್ ಕೆಲಸ ಮಲ್ಪೊಡು ಪಂಡೆರ್. ಪ್ರಕಾಶ್ ಆಚಾರ್ಯ ಕಿನ್ನಿಗೋಳಿ ದೇವೆರೆನ್ ಸುಗಿತ್ ದ್ ಲೇಸ್ ಸುಧಾರಿಕೆ ಮಲ್ತೆರ್.