ಬೊಲ್ತೇರ್ : ಧರ್ಮಸ್ಥಳಡ್ ಮುಖ್ಯ ಪ್ರವೇಶದ್ವಾರದ ಕೈತಲ್ ಪಾದಯಾತ್ರಿಲೆಗಾದ್ ಸ್ವಾಗತ ಕಚೇರಿನ್ ಸನಿಯಾರ ದೇವಲ್ಯೊದ ಮಣೆಗಾರೆರಾಯಿನ ಡಿ. ವಸಂತ ಭಟ್ ಉದಿಪನ ಮಲ್ತೆರ್.ನಾಡ್ ದ ಪವಿತ್ರಕ್ಷೇತ್ರ ಧರ್ಮಸ್ಥಳಳೊಡು ಮಾ.1 ತಾರಿಕ್ ಗ್ ಅಂಗಾರೆದಾನಿ ಶಿವರಾತ್ರಿ ವಿಶೇಷ ದಿನ ಆಯಿನೆರ್ದಾವರ ಊರು ಪರವೂರುರ್ದು ಭಕ್ತಾದಿಲು ಎಚ್ಚಾದ್ ಪಾದಯಾತ್ರೆಡ್ ಬರ್ಪೆರ್ .
ಸುಮಾರ್ ಮುಪ್ಪ ಸಾರ ಮಿಕ್ಕಿ ಭಕ್ತಾದಿಲು ಪಾದಯಾತ್ರೆಡ್ ಬರ್ಪಿನ ನಿರೀಕ್ಷೆ ಉಂಡು.
ಪ್ರತಿ ವರ್ಸೊದಲಕ ಈ ಸಲ ಬೆಂಗ್ಳೂರು, ಮೈಸೂರು, ಶಿವಮೊಗ್ಗ, ಹಾಸನ, ಚಿಕ್ಕಮಗಳೂರು ಇಂಚ ಬೇತೆ ಬೇತೆ ಊರುರ್ದು ಧರ್ಮಸ್ಥಳ ಪಾದಯಾತ್ರಿಲೆನ ಸಂಘದ ಒಟ್ಟು ಸೇರಿಗೆಡ್ ಭಕ್ತಾದಿಲು ಪಾದಯಾತ್ರೆ ಸುರು ಮಲ್ದೆರ್. ಸೋಮಾರ ಮಾತೆರ್ಲ ಉಜಿರೆ ಮುಟ್ಟು ವೆರ್ .ಅಂಗಾರೆದಾನಿ ಕಾಂಡೆ ಧರ್ಮಸ್ಥಳಗ್ ಬರಿಯೆರೆ ಉಲ್ಲೆರ್ .
ಪಾದಯಾತ್ರೆಡ್ ಭಜನೆ, ಪ್ರಾರ್ಥನೆ ಮಲ್ತೊಂದು ಬರ್ಪೆರ್. ಧರ್ಮಸ್ಥಳಡ್ ಪ್ರವೇಶದ್ವಾರದ ಕೈತಲ್ ಪಾದಯಾತ್ರಿಲೆಗಾದ್ ಸ್ವಾಗತ ಕಚೇರಿ ಸುರು ಮಲ್ದೆರ್ , ಅಲ್ಪ ಸ್ವಯಂಸೇವಕೆರ್ , ವೈದ್ಯರು, ದಾದಿನಕುಲು ಪಾದಯಾತ್ರಿಲೆನ ಸ್ವಾಗತ ಬೊಕ್ಕ ಸೇವೆಗಾದ್ ತಯಾರ್ ಆದ್ ಉಲ್ಲೆರ್ .ಧರ್ಮಾರ್ಥ ಪಾನಿಯ ಬೊಕ್ಕ ವಸತಿ ವ್ಯವಸ್ಥೆ ಮಲ್ದೆರ್ .ಉಜಿರೆಡ್ ಉಪ್ಪುನ ಎಸ್.ಡಿ.ಎಂ.ಆಸ್ಪತ್ರೆ ಮುತಾಲಿಕೆಡ್ ಸಂಚಾರಿಆಸ್ಪತ್ರೆ, ವೈದ್ಯಕೀಯ ಶಿಬಿರ, ಉಚಿತ ಶುಶ್ರೂಷೆ, ಅಂಬುಲೆನ್ಸ್ ಸೇವೆ ಏಪಲಾ ಉಂಡು .
ಬೆಂಗ್ಳೂರುದ ಪುಗಾರ್ತೆದ ವೈದ್ಯ ಡಾ.ಕೆ.ಎಲ್. ಪಂಚಾಕ್ಷರಿ ಮುತಾಲಿಕೆಡ್ ಡಾ.ನಾಗರಾಜು, ಡಾ.ಮಂಜುನಾಥ್, ಬೊಕ್ಕ ಡಾ.ರೇಣುಕಾ ಸ್ವಯಂ ಪ್ರೇರಣೆಡ್ ದರ್ಮಾರ್ಥ ವೈದ್ಯಕೀಯ ಸೇವೆ ಕೊರೊಂದು ಉಲ್ಲೆರ್ .
ಅಂಗಾರೆ ಬಯ್ಯಗ್ ೬ ಗಂಟೆಗ್ ಪ್ರವಚನ ಮಂಟಪಡ್ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರ್ ಶಿವಪಂಚಾಕ್ಷರಿ ಪಠಣ ಲೇಸ್ ಉದಿಪನ ಮಲ್ಪರೆ ಉಲ್ಲೆರ್ . ಅವ್ವೆ ದಿನ ಅಹೋ ರಾತ್ರಿ ಭಕ್ತಾದಿಲು ಶಿವಪಂಚಾಕ್ಷರಿ ಪಠಣ, ಭಜನೆ ಪನಿಯೆರೆ ಉಲ್ಲೆರ್ .
ದೇವಲ್ಯೊಡು ನಾಲ್ ದಿಕ್ಕ್ ಡ್ ಭಕ್ತೆರ್ ವಿಶೇಷವಾದ್ ಶತರುದ್ರಾಭಿಷೇಕ ಸೇವೆ ಮಲ್ಪರೆ ಉಲ್ಲೆರ್ .ಶಂಖ, ಕೊಂಬು, ಕಹಳೆ, ಇಂಚಿನ ಜಾನಪದ ಕಲಾವಿದೆರ್ ಬತ್ತ್ ದ್ ಕಲಾ ಸೇವೆ ಮಲ್ಪರೆ ಉಲ್ಲೆರ್ .
ಪಾದಯಾತ್ರಿಲೆಗ್ ಸೂಚನೆ :
ಪಾದಯಾತ್ರಿಲು ಬನ್ನಗ ಅಂಚನೆ ಉಂತುನ ಜಾಗೆಡ್ ಸರ್ಕಾರದ ಮಾರ್ಗಸೂಚಿದ ಪ್ರಕಾರ ಮಾಸ್ಕ್‌ ಪಾಡ್ದ್ , ದೈಹಿಕಅಂತರ ಕಾತೊಂದು ಅಂಚೆನೆ ಸಾನಿಟೈಸರ್ ಗಲಸುನ ಕಡ್ಡಾಯವಾದುಂಡು.
ಉಂತುನ ಜಾಗೆಡ್ ನಿರ್ಮಲ ಉಪ್ಪೊಡು ಅಂಚನೆ. ಹಿತ-ಮಿತವಾಯಿನ ತೆನಸ್ ಸೇವನೆ ಮಲ್ಪೊಡು .ಶ್ರದ್ಧಾ-ಭಕ್ತಿಡ್ ದೃಢಸಂಕಲ್ಪಡ್ ಪಾದಯಾತ್ರೆ ಮಲ್ಪೊಡು .ಮಾರ್ಗಡ್ ಸಂಚಾರ ನಿಯಮನ್ ಪಾಲನೆ ಮಲ್ಪೊಡು. ಗಾಡಿದಕ್ಲೆನ ದಟ್ಟಣೆ ಜಾಸ್ತಿ ಉಪ್ಪುನೆರ್ದಾವರ ಪಾಡುನ ಅಂಗಿ ದ ಪಿರವುದ / ತರೆತ ದಿರಿಸ್ ಡ್ ಪ್ರತಿಫಲಕ ಕಡ್ಡಾಯವಾದ್ ಬಳಕೆ ಮಲ್ಪೊಡು .
Editorial