ಅಶ್ವತ್ ತುಳುವೆ ಜೈ ತುಳುನಾಡ್ ದ ಪೊಸ ಗುರ್ಕಾರ್ಲು

ತೊರ್ತಾಲ್ :ಜೈ ತುಲುನಾಡ್ (ರಿ.) ಕೂಟದ ಪದಗ್ರಹಣ ಲೇಸ್ ಬೊಕ್ಕ ಪೆರಿಯಿನಯೊ (ಮಹಾಸಭೆ) 27 ಫೆಬ್ರವರಿ 2022 ಐತಾರೊದಾನಿ ಕಾಂಡೆ 10 ಗಂಟೆಗ್ ಸುರತ್ಕಲ್‌ದ ಚಾವಡಿ ಲೇಸ್‌ದ ಹಾಲ್‌ಡ್ ನಡತ್ತ್ಂಡ್.
ತಾಪಕ ಸಮಿತಿದ ಮುತಾಲಿಕೆಡ್ ನಡತ್ತಿನ ಕೂಟದ ಪೆರಿಯಿನಯೊಡು ವರ್ಸದ ವರದಿನ್ ಸ್ಥಾಪಕ ಸಮಿತಿದ ಪದುಕೆರಾಯಿನ ಕಿರಣ್ ತುಳುವೆ ಮೇರ್ ಮಂಡನೆ ಮಲ್ತೆರ್. ವರ್ಸೊದ ಲೆಕ್ಕ ಪತ್ರೊನು ಪಣವುದ ಪಾಲವೆರಾಯಿನ ಅವಿನಾಶ್ ಮುಕ್ಕ ಮಂಡನೆ ಮಲ್ತೆರ್.

ತುಲು ಬರವು ಸಮಿತಿದ ಒಲವುನು ಶರತ್ ಕೊಡವೂರು ತೆರಿಪಾಯೆರ್ ಅವೆರ್ದ್ ಬೊಕ್ಕ 2022-23 ಸಾಲ್‌ದ ಪೊಸ ಪದಾಧಿಕಾರಿಲೆನ್ ಪದುಕೆರೆನ ಒತ್ತುಪಾಲ್‌ಡ್ ಅಜಪುನ ಕಜ್ಜೊ ನಡತ್ತ್ಂಡ್.

2022-23 ನೇ ಸಾಲ್‌ದ ಪೊಸ ಗುರ್ಕಾರೆ ಆದ್ ಅಶ್ವತ್ ತುಲುವೆ, ಒತ್ತು ಗುರ್ಕಾರ್ಲು ಆದ್ ಹರಿಕಾಂತ್ ಕಾಸ್ರೋಡ್, ವಿಶು ಶ್ರೀಕೇರ, ಜಗದೀಶ್ ಗೌಡ ಕಲ್ಕಳ, ಪ್ರಧಾನ ಕಾರ್ಯಂತೆರ್ ಆದ್ ಅವಿನಾಶ್ ಮುಕ್ಕ, ಒತ್ತು ಕಾರ್ಯಂತೆರ್ ಆದ್ ರಾಜೇಶ್ ತುಲುವೆ, ಪಣವುದ ಪಾಲವೆರ್ ಆದ್ ರಕ್ಷಿತ್ ಕೋಟ್ಯಾನ್, ಸಂಘಟನಾ ಕಾರ್ಯಂತೆರ್ ಆದ್ ಸದಾಶಿವ ಮುದ್ರಾಡಿ, ಒತ್ತು ಸಂಘಟನಾ ಕಾರ್ಯಂತೆರ್ ಆದ್ ಪೃಥ್ವಿ ತುಲುವೆ. ಅಂಚೆನೆ ಉಪ ಸಮಿತಿಲಾಯಿನ ತುಲು ಬರವು(ಲಿಪಿ) ಸಮಿತಿಗ್ ನಿದಯಂತೆರಾದ್ ನಿಶ್ಚಿತ್ ರಾಮಕುಂಜ ಬೊಕ್ಕ ಒತ್ತು ನಿದಯಂತೆರಾದ್ ರಂಜನ್ ಎಸ್ ವೈ, ತುಲು ಸಾಂಸ್ಕೃತಿಕ ಸಮಿತಿಗ್ ನಿದಯಂತೆರಾದ್ ಡಾ. ರವೀಶ್ ಪರವ ಪಡುಮಲೆ, ತುಲು ಬಾಸೆ ಬೊಕ್ಕ ಸಾಹಿತ್ಯ ಸಮಿತಿಗ್ ನಿದಯಂತೆರಾದ್ ಕುಶಲಾಕ್ಷಿ ಕಣ್ವತೀರ್ಥ ಬೊಕ್ಕ ಒತ್ತು ನಿದಯಂತೆರಾದ್ ಗೀತಾ ಲಕ್ಷ್ಮೀಶ್, ಮಾಹಿತಿ ಬೊಕ್ಕ ತಂತ್ರಜ್ಞಾನ ಸಮಿತಿಗ್ ನಿದಯಂತೆರಾದ್ ಸುಮಂತ್ ಪೂಜಾರಿ ಹೆಬ್ರಿ, ಪ್ರಚಾರ ಸಮಿತಿಗ್ ನಿದಂಯಂತೆರಾದ್ ವಿನಯ್ ರೈ ಕುಡ್ಲ ಅಜತ್‌ ಬೈದೆರ್.

ಪೊಸ ಸಮಿತಿಗ್ ಸ್ಥಾಪಕ ಸಮಿತಿದ ಪರವಾದ್ ಯತೀಶ್ ಮುಂಡೋಡಿ ತುಲು ಕೊಡಿ ಕೊರ್ಪುನ ಮುಕೆನ ಕರ್ತಾದಿಗೆ ಕೈಪಗತೆರ್. ಅಂಚೆನೆ ಪೊಸ ಸಮಿತಿದ ಮುತಾಲಿಕೆಡ್ ತುಲು ಬರವು ಕಲ್ದಿನ ಕಲ್ಪಾರ್ತಿಲೆಗ್ ಆಜೋಲೆ ಪಟ್ಟುನ ಒಟ್ಟುಗು ತುಲು ಬರವು ಕಲ್ಪಾಯಿನ ಕಲ್ಪಾದಿಲೆಗ್ ಮಾನಾದಿಗೆದೋಲೆನ್ ಕೊರ್ದು ಮಾನಾದಿಗೆ ಮಲ್ತ್ಂಡ್. ಸಾಹಿತಿಲು ಆಯಿನ ಕುಶಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ ಬೊಕ್ಕ ಗೀತಾ ಲಕ್ಷ್ಮೀಶ್ ಸ್ವರಚಿತ ತುಲು ಕಬಿತೆನ್ ಪಂಡೆರ್, ಕಿರಣ್ ತುಲುವೆ ಎದ್ಕೊಂಡೆರ್, ಸುಮಂತ್ ಪೂಜಾರಿ ಹೆಬ್ರಿ ಸೊಲ್ಮೆ ಸಂದೈತ ಮಲ್ತೆರ್. ಲೇಸ್‌ ಸುದಾರಿಕೆನ್ ಅವಿನಾಶ್ ಮುಕ್ಕ ಮಲ್ತೆರ್.