ಕುಡ್ಲ , ಫೆ. 18: ಕಲಾಭಿ ಕಲಾಸಂಸ್ಥೆದ ವತಿರ್ದ್ ಫೆ. 24 ನೇ ಗುರುವಾರದಾನಿ ಬೈಯ್ಯಗ್ 6ಗಂಟೆಗ್ ಖ್ಯಾತ ನಿರ್ದೇಶಕೆರಾಯಿನ ಗಣೇಶ ಮಂದಾರ್ತಿ ನಿರ್ದೇಶನೊಡು ಕುಡ್ಲದ ಸಂತ ಅಲೋಶಿಯಸ್ ಕಾಲೇಜ್ದ ಎಲ್ ಸಿಆರ್ಐ ಚಾವಡಿಡ್ ‘ಮಮತೆಯ ಸುಳಿ’ ನಾಟಕ ಪ್ರದರ್ಶನ ಆಯರೇ ಉಂಡು.
ಕುಡ್ಲಡ್ ಗುರುವಾರದಾನಿ ಪತ್ರಿಕಾಗೋಷ್ಠಿಡ್ ಪಾತೆರಿನ ಸಂಸ್ಥೆದ ಗುರ್ಕಾರ್ಲಾಯಿನ ಡಾ|| ಮೀನಾಕ್ಷಿ ರಾಮಚಂದ್ರ, ಸಂತ ಅಲೋಶಿಯಸ್ ಕಾಲೇಜ್ದ ಪ್ರಾಂಶುಪಾಲೆರಾಯಿನ ವಂ। ಪ್ರವೀಣ್ ಮಾರ್ಟಿಸ್ ಪ್ರದರ್ಶನ ಉದಿಪನ ಮಲ್ಪರೆ ಉಲ್ಲೆರ್ ಪಂದ್ ಪಂಡೆರ್ . ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಹಾಯಕ ನಿರ್ದೇಶಕೆರಾಯಿನ ರಾಜೇಶ್, ಸಾಹಿತಿ ಅಂಚನೆ ರಂಗಕರ್ಮಿ ಡಾ|.. ನಾ. ದಾಮೋದರ ಶೆಟ್ಟಿ ಪೆರಿಯ ರಂಗಕರ್ಮಿ ಚಂದ್ರಹಾಸ ಉಳ್ಳಾಲ ಪಾಲ್ ಪಡೆಯರೇ ಉಲ್ಲೆರ್ . ಕುವೆಂಪುನ ಶ್ರೀ ರಾಮಾಯಣ ದರ್ಶನಂ ಆಧಾರಿತ ನಾಟಕ ಉಂದು ಆದ್ ಉಂಡು , ಒಂಜರೆ ಗಂಟೆದ ಪೊರ್ತು ಮತ್ತರ್ ಮೆಡ್ ಪ್ರದರ್ಶನ ಆಯರೇ ಉಂಡು.
2020 ನೇ ಇಸವಿಡ್ ಸುರು ಆಯಿನ ಸಂಸ್ಥೆ ಇತ್ತೇ ಆನ್ಲೈನ್ ಮಾಧ್ಯಮದ ಮುಖೇನ ಶಿಖಿ, ನಡಿಬೆಟ್ಟ ಬೆಳಗುಜಾವ, ಡಿಲೆಮಾ ಇಂಚಿನ ಕೊಡುಗೆ ಕೊರ್ಪಿನೆತ್ತ ಒಟ್ಟುಗು
ಛಾಯಾಚಿತ್ರ ಪ್ರದರ್ಶನ, ರಂಗಭೂಮಿ ಕಾರ್ಯಾಗಾರನ್ಲಾ ಅಟ್ಟನೆ ಮಲ್ದೆರ್ . ಇತ್ತೇ ಸುರುತ ಸಲ ರಂಗದ ಮಿತ್ತ್ ಪ್ರದರ್ಶನ ಅಟ್ಟನೆ ಮಲ್ದೆರ್ ಪಂದ್ ಪಂಡೆರ್ . ಗೌರವಾಧ್ಯಕ್ಷೆರಾಯಿನ ಸುರೇಶ್ ಪಟ್ಟೇಕಳ , ಕಾರ್ಯ ರ್ಶಿ ಉಜ್ವಲ್ ಯು.ವಿ., ಉಪಾಧ್ಯಕ್ಷೆ ರತ್ನಾವತಿ ಜೆ.ಬೈಕಾಡಿ, ಪೆರಿಯ ಸದಸ್ಯೆರಾಯಿನ ಕಲಾ ಕಿರಣ್ ಕಲಾಂಜಲಿ ಪಾಲ್ ಪಡೆದಿತ್ತೆರ್ .
ಇಲ್ಲಗ್ ಬರಿಯೆರೆ ಉಂಡು ನಾಟಕ : ವಿಶೇಷ ಪ್ರಯೋಗದ ಒಟ್ಟುಗು ಕಲಾಭಿ ಕೂಟ
ಜನಕುಲು ಇತ್ತಿನಡೆ ನಾಟಕ ಕೊನೊಪಿನ ನೆಲೆಟ್ಟ್ ಮನ – ಮನೆಗೆ ರಂಗಭೂಮಿ ‘ ಪನ್ಪಿನ ಪುದರ್ ಡ್ ವಿನೂತನ ಪ್ರಯೋಗನ್ ಕಲಾಭಿ ಅಟ್ಟನೆ ಮಲ್ದುಂಡು . ಈ ಮುಖೇನ ಇಲ್ಲಡೆ , ವಸತಿ ಸಮುಚ್ಚಯಡ್ ನಾಟಕ ಪ್ರದರ್ಶನ ಅಟ್ಟನೆ ಮಲ್ಪುನ ಮುಖೇನ ಸೀದಾ ಜನಕ್ಲೆನಡೆ ಬರ್ಪಿನ ಉದ್ದೇಶ ಕೂಟದ ಆದ್ ಉಂಡು. ಸುರುತ ಸಲ ಇಂಚಿನ ಪ್ರಯೋಗನ್ ರಂಗಭೂಮಿಡ್ ಮಲ್ತೊಂದು ಉಲ್ಲ ಉಂದು ಯಶಸ್ವಿಯಾಪಿನ ನಂಬಿಕೆ ಉಂಡು ಪಂದ್ ಡಾ| ಮೀನಾಕ್ಷಿ ರಾಮಚಂದ್ರ ಪಂಡೆರ್ .
pallavi shetty