ಹೆಜಮಾಡಿ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನ : ವರ್ಷದ ಮಲ್ಲ ಸಭೆ

ಹೆಜಮಾಡಿ : ಹೆಜಮಾಡಿ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಜೀರ್ಣೋದ್ಧಾರದ ಒಂಜನೆ ಹಂತದ ಕಾಮಗಾರಿ ಮುಗಿದುಂಡು , ಇತ್ತೆ ರಡ್ಡನೇ ಹಂತದ ಕಾಮಗಾರಿಲು ಬಾರಿ ಬೇಗ ಬೇಗ ಆವೊಂದು ಉಂಡು , ಈ ಬಗ್ಗೆ ಅಗೋಸ್ಟ್ 10 ಕ್ಕ್ ಜೀರ್ಣೋದ್ಧಾರ ಸಮಿತಿದ ಕಾರ್ಯಂತೆರ್ ಆಯಿನ ಶ್ರೀ ಎಚ್.ಎಸ್ ರಘುಪತಿರಾವ್ ಮೆರ್ನ ಗುರ್ಕಾರ್ಮೆಡ್ ಊರ್ದ ಪತ್ತ್ ಸಮಸ್ತೆರ್ನ ಗ್ರಾಮಸಭೆ ನಡತುಂಡು . ಜೀರ್ಣೋದ್ಧಾರ ಸಮಿತಿದ ಕೋಶಾಧಿಕಾರಿ ಶ್ರೀ ರಮೇಶ್ ಭಟ್ ಒಂಜನೆ ಹಂತದ ಕಾಮಗಾರಿದ ಸಂಪೂರ್ಣ ಲೆಕ್ಕಪತ್ರ ತೋಜಾಯೆರ್ .

ದೇವಸ್ಥಾನದ ಆಡಳಿತ ಮೋಕೆಸ್ತರೆರಾಯಿನ ಶ್ರೀ ದಯಾನಂದ ಹೆಜಮಾಡಿ, ದೇವಸ್ಥಾನದ ಜೀರ್ಣೋದ್ಧಾರ ಸಮಿತಿದ ಗುರ್ಕಾರ್ಲಾಯಿನ ಪಠೇಲರ ಮನೆ ಶ್ರೀ ಜಯಂತ ಶೆಟ್ಟಿ ಪೂನ ಮೆರ್ನ ಮುತಾಲಿಕೆಡ್ ಸುರುತ ಹಂತದ ಸುಮಾರ್ 4 ಕೋಟಿರ್ದ್ ಜಾಸ್ತಿ ದ ಕಾಮಗಾರಿ ನಡತುಂಡು ಸುಮಾರ್ 2.50 ಕೋಟಿ ಪನವುಡು ರಡ್ಡನೇ ಹಂತದ ಕಾಮಗಾರಿಗ್ ಇತ್ತೆ ಚಾಲನೆ ಕೊರ್ತೆರ್.

ಈ ಲೇಸ್ ಡ್ ಜೀರ್ಣೋದ್ಧಾರ ಸಮಿತಿದ ಒತ್ತು ಗುರ್ಕಾರ್ಲಾಯಿನ ಶ್ರೀ ಜಿನರಾಜ್ ಬಂಗೇರಾ, ಗುತ್ತಿನಾರ್ ಶ್ರೀ ಅರುಣ್ ಕುಮಾರ್ ಶೆಟ್ಟಿ, ಹಿರಿಯ ಅರ್ಚಕ ಶ್ರೀ ರಾಮಚಂದ್ರ ಭಟ್, ಕೋಶಾಧಿಕಾರಿ ಶ್ರೀ ರಮೇಶ್ ಭಟ್, ಕಾರ್ಯದರ್ಶಿ ಶ್ರೀ ದಿವಾಕರ ಹೆಮ್ಮಾಡಿ ಪಾಲ್ ಪಡೆದಿತ್ತೆರ್. ಜೀರ್ಣೋದ್ಧಾರ ಸಮಿತಿದ ಒತ್ತು ಗುರ್ಕಾರ್ಲಾಯಿನ ಶ್ರೀ ಜಿನರಾಜ್ ಬಂಗೇರಾ ಪಾತೆರಿಯೆರ್.

2 ಸಲ ಕೋವಿಡ್ 19ದ ಲಾಕ್ ಡೌನ್ ನೆಲೆಟ್ಟ್ ದೇವಸ್ಥಾನದ ಕಾಮಗಾರಿ, ಧನಸಂಗ್ರಹ ಅಂಚನೇ ಬೇತೆ ಬೇತೆ ಲೇಸ್ನ್ ಪಾರದರ್ಶಕವಾದ್ ಶಿಸ್ತುಬದ್ಧವಾದ್ , ವಾಸ್ತು ಬದ್ಧವಾದ್ ಸಂಪೂರ್ಣ ಧಾರ್ಮಿಕತೆರ್ದ್ ಅಚ್ಚುಕಟ್ಟಾದ್ ಜೀರ್ಣೋದ್ಧಾರ ಕಾರ್ಯಕ್ರಮನ್ ಮಲ್ತಿನ ಆಡಳಿತ ಮಂಡಳಿ ಬೊಕ್ಕ ಜೀರ್ಣೋದ್ಧಾರ ಸಮಿತಿದ ಕಾರ್ಯವೈಖರಿನ್ ಗ್ರಾಮಸ್ತೆರ್ ಪುಗರಿಯೆರ್.

ಈ ಪೊರ್ತುಡು ನಡತಿನ ಆಡಳಿತ ಮಂಡಳಿದ ವಾರ್ಷಿಕ ಗ್ರಾಮ ಸಭೆಟ್ ಶ್ರೀ ಶೇಷಗಿರಿರಾವ್ ಮೇರ್ ದೇವಸ್ಥಾನದ 2020-21 ಸಾಲ್ ದ ವಾರ್ಷಿಕ ಲೆಕ್ಕಪತ್ರ ಮಂಡನೆ ಮಲ್ತೆರ್ .ಕಡೆಟ್ ಜೀರ್ಣೋದ್ಧಾರ ಸಮಿತಿದ ಕಾರ್ಯಂತೆರ್ ಆಯಿನ ಶ್ರೀ ದಿವಾಕರ ಹೆಲ್ಮಾಡಿ ಸೊಲ್ಮೆ ಸಂದೈತ ಮಲ್ತೆರ್ .