August 7, 2021

ಆರ್ಟ್ ಬೊಕ್ಕ ಆರ್ಟಿಕಲ್ಸ್ ಬೂಕು ಬುಡುಗಡೆ ಲೇಸ್

Aug 7, 2021

ಒಡಿಪು : ಆಗಸ್ಟ್ 7: ಸುನಾಗ್ ಆಸ್ಪತ್ರೆ ಕುಂಜಿಬೆಟ್ಟು ಒಡಿಪು ಮೆಕ್ಲೆನ ಒಟ್ಟು ಸೇರಿಗೆಡ್ ಸುನವ್ಯ ಬೊಕ್ಕ ಸಂಹಿತ ಮೆಕ್ಲೆನ ಆರ್ಟ್ ಬೊಕ್ಕ ಆರ್ಟಿಕಲ್ಸ್ ಪನ್ಪಿನ ಬೂಕು ಬುಡುಗಡೆದ ಲೇಸ್ ಬರ್ಪಿನ 9ನೇ ತಾರೀಕ್ ಸೋಮವಾರ ಬೈಯ್ಯಗ್ 5 ಗಂಟೆಗ್ ಒಡಿಪು ಕಡಿಯಾಳಿದ ಭರತಾಂಜಲಿ ಸಭಾಂಗಣಡ್ ನಡಪರೆ ಉಂಡು.

ಲೇಸ್ ದ ಗುರ್ಕಾರ್ಮೆನ್ ಡೆಂಟಾ ಕೇರ್ ನಿರ್ದೇಶಕ ಡಾ|ವಿಜಯೇಂದ್ರ ರಾವ್ ವಹಿಸರೆ ಉಲ್ಲೆರ್ , ಮಣಿಪಾಲ ಕೆಎಂಸಿದ ಮೂಳೆ ರೋಗ ತಜ್ಞರಾಯಿನ ಡಾ| ಕಿರಣ್ ಆಚಾರ್ಯ ಬೂಕುದ ಪೊಲಬು ಮಲ್ಪರೆ ಉಲ್ಲೆರ್. ಮಲ್ಲ ಬಿನ್ನೆರ್ ಆದ್ ಡಾ|ಎ.ವಿ ಬಾಳಿಗಾ ಆಸ್ಪತ್ರೆದ ನಿರ್ದೇಶಕೆರಾಯಿನ ಡಾ| ಪಿ. ವಿ ಭಂಡಾರಿ ಬರ್ರೆ ಉಲ್ಲೆರ್.

ಸಾಹಿತಿ ಡಾ. ಕಾತ್ಯಾಯಿನಿ ಕುಂಜಿಬೆಟ್ಟು ಬೂಕು ಬುಡುಗಡೆ ಮಲ್ಪರೆ ಉಲ್ಲೆರ್ ಪಂದ್ ಸುನಾಗ್ ಆಸ್ಪತ್ರೆದ ಆಡಳಿತ ನಿರ್ದೇಶಕೆರಾಯಿನ ಡಾ| ನರೇಂದ್ರ ಕುಮಾರ್ ಪಂಡೆರ್.

ಸಚಿವ ಸುನಿಲ್ ಕುಮಾರ್ ಮೆರೆಗ್ “ತುಳು ಮಹಾಭಾರತೊ” ಕೊರ್ದು ಎಡ್ಡೆಪ್ಪು ಬಯಕಿನ ತುಳು ಅಕಾಡಮಿ ಸದಸ್ಯೆರಾಯಿನ ತಾರಾ ಆಚಾರ್ಯ

Aug 7, 2021

ಒಡಿಪು, ಆಗಸ್ಟ್ 7: ಸಚಿವ ಸುನಿಲ್ ಕುಮಾರ್ ಮೆರೆಗ್ ಕೊಡವೂರುದ ಕವಿ ಅರುಣಾಬ್ದ ವಿರಚಿತ “ತುಳು ಮಹಾಭಾರತೊ” ಬೂಕು ನು ಅಮೃತ್ ಗಾರ್ಡಡ್ ಶುಕ್ರವಾರದಾನಿ ತುಳು ಅಕಾಡಮಿ ಸದಸ್ಯೆ ತಾರಾ ಆಚಾರ್ಯ ಕೊರ್ದು ಎಡ್ಡೆಪ್ಪುನು ಬಯಕಿಯೆರ್.

ಈ ಪೊರ್ತುಡು ಸಚಿವ ಕೂಟ ಶ್ರೀನಿವಾಸ ಪೂಜಾರಿ, ಶಾಸಕ ಕೆ. ರಘುಪತಿ ಭಟ್, ಕರಾವಳಿ ಪ್ರಾಧಿಕಾರದ ಗುರ್ಕಾರ್ಲಾಯಿನ ಮಟ್ಟಾರು ರತ್ನಾಕರ್ ಹೆಗ್ಡೆ ಪಾಲ್ ಪಡೆದಿತ್ತೆರ್ .

ಟೋಕಿಯೋ ಒಲಂಪಿಕ್ಸ್ : ಕಂಚ್ ದ ಪದಕ ಗೆಂದಿನ ಭಜರಂಗ್ ಪೂನಿಯ

Aug 7, 2021

ಟೋಕಿಯೊ: ಭಾರತದ ತಾರಾ ಕುಸ್ತಿಪಟು ಭಜರಂಗ್ ಪೂನಿಯಾ ಟೋಕಿಯೊ ಒಲಿಂಪಿಕ್ಸ್ಡ್ ಕಂಚ್ದ ಪದಕ ಗೆಂದ್ ದೆರ್ . ಆಣ್ಜೊವ್ಲೆನ 65 ಕೆಜಿ ಫ್ರೀಸ್ಟೈಲ್ ವಿಭಾಗೊಡು ಭಜರಂಗ್ ಪೂನಿಯಾ ಕಂಚ್ ಗೆಂದ್ದೆರ್ .

ಇನಿ ನಡತಿನ ಪಂದ್ಯಡ್ ಭಜರಂಗ್ ಪೂನಿಯಾ ಮೇರ್ ಕಜಕಿಸ್ಥಾನದ ನಿಯಾಜ್ ಬೆಕೊವ್ ವಿರುದ್ಧ 8-0 ಅಂಕ ಗೆಂದಿಯೆರ್.

ಒಲಿಂಪಿಕ್ಸ್ ಡ್ ಪದಕ ಗೆಂದಿನ ಭಾರತದ ಐನೇ ಕುಸ್ತಿಪಟು ಪನ್ಪಿನ ಪುಗಾರ್ತೆ ಪಡೆಯಿನ ಭಜರಂಗ್ ಪೂನಿಯಾ . 2012ರ್ದ್ ಬೊಕ್ಕ ಸುರುತ ಸಲ ಭಾರತ ಒಂಜಿ ಒಲಿಂಪಿಕ್ಸ್ ಡ್ ರಡ್ಡ್ ಕುಸ್ತಿಪದಕ ಗೆಂದ್ ದೆರ್ .

ಟೋಕಿಯೊ ಓಲಂಪಿಕ್ 2021 : ಭಾರತೊಗು ಬಂಗಾರ್ದ ಪದಕ

Aug 7, 2021

ಟೋಕಿಯೊ ಆ7 : ಬಾರತ ದೇಶದ ಪೆರ್ಮೆದ ಜವನೆ ನಿರಜ್ ಚೊಪ್ರ ಇನಿ ನಮ ಮಾತೆರ್ ಗ ಲಾ ಬಾರಿ ಖುಷಿತ ಸುದ್ದಿ ಕೊರಿಯೆರ್ , ಮೇರ್ ಇನಿ ನಡತಿನ ಜಾವಲಿನ್ ತ್ರೋಡು 87.58 ಮೀ. ದೂರ ದಕ್ ದ್ ದೇಶಗು ಬಂಗಾರದ ಪದಕ ಗೆಂದ್ದ್ಎಡ್ಡೆ ಸುದ್ದಿ ಬತ್ತಂಡ್.ಬಾರತ್ ಮಾತಾ ಕೀ ಜೈ.ವಂದೇ ಮಾತರಂ.

ಜಿಲ್ಲಾ ನ್ಯಾಯಾಧಿಶೆಯಾದ್ ಆಯ್ಕೆ ಆಯಿನ ಒಡಿಪುದ ಎಡಿಪಿ ಮಮ್ತಾಝ್

Aug 7, 2021

ಒಡಿಪು : ಆಗಸ್ಟ್ 7: ಒಡಿಪು ಕಾನೂನು ಅಧಿಕಾರಿ ಕಿರಿಯ/ಎಡಿಪಿ (Assistant Director of Prosecution )ಆಯಿನ ಮಮ್ತಾಝ್ ಜಿಲ್ಲಾ ನ್ಯಾಯಾಧೀಶೆಯಾದ್ ಆಯ್ಕೆ ಆಯೆರ್.

ಫ್ರೆಬವರಿ- ಮಾರ್ಚ್‌ಡ್ ನ್ಯಾಯಾಧೀಶ ಹುದ್ದೆಗ್ ನಡತಿನ ಪರೀಕ್ಷೆಡ್ ಜಿಲ್ಲಾ ನ್ಯಾಯಾಧೀಶರಾದ್ ಆಯ್ಕೆಯಾಯಿನ 12 ಜನಟ್ ಮೇರ್ ರಾಜ್ಯಡ್ ಸುರುತ ರ‍್ಯಾಂಕ್ ಪಡೆತೆರ್ ..

ರಾಜ್ಯೋಡು 1805 ಜನಕ್ ಕೋವಿಡ್ ಪಾಸಿಟಿವ್

Aug 7, 2021

ಬೆಂಗ್ಳೂರು, : ರಾಜ್ಯೋಡು ಶುಕ್ರವಾರ 1,805 ಪೊಸ ಕೊರೋನ ಪ್ರಕರಣ ದೃಢ ಆತುಂಡು . 36 ಜನ ಸೋಂಕುಗು ಬಲಿಯಾತೆರ್ , 1,854 ಜನ ಹುಷಾರ್ ಆತೆರ್ .

ರಾಜ್ಯೋಡು ಇತ್ತೆ ಒಟ್ಟು ಸೋಂಕಿತೆರ್ನ ಸಂಖ್ಯೆ 29,15,317ಕ್ಕ್ ಮುಟ್ಟು ದುಂದು . ಇತ್ತೆ ಮುಟ ಒಟ್ಟು ಸೈತಿಕ್ಲೆನ ಸಂಖ್ಯೆ 36,741ಕ್ ಮುಟ್ಟುದುಂಡು .ಒಟ್ಟು ಸಕ್ರಿಯ ಕೊರೋನ ಪ್ರಕರಣ ಸಂಖ್ಯೆ 24,328ಕ್ ಏರಿಕೆಯಾತುಂಡು.

ಉಜಿರೆ: ಎಸ್.ಡಿ.ಎಂ. ಆಸ್ಪತ್ರೆಡ್ ಸಿ.ಟಿ. ಸ್ಕ್ಯಾನಿಂಗ್ ಸೌಲಭ್ಯ

Aug 7, 2021

ಉಜಿರೆ: ಧರ್ಮಸ್ಥಳದ ಎಸ್.ಡಿ.ಎಂ. ಮೆಡಿಕಲ್ ಟ್ರಸ್ಟ್ ಒಟ್ಟು ಸೇರಿಗೆಡ್ ಉಜಿರೆಡ್ ಬೇಲೆ ಮಲ್ತೊಂದು ಉಪ್ಪುನ ಎಸ್.ಡಿ.ಎಂ. ಆಸ್ಪತ್ರೆಡ್ 13 ಜನ ತಜ್ಞ ವೈದ್ಯೆರ್ ಬೊಕ್ಕ 12 ಜನ ವೈದ್ಯೆರ್ ಬೇತೆ ಬೇತೆ ವಿಭಾಗೋಡು ಕಮ್ಮಿ ಕಾಸ್ ಡ್ ಉತ್ತಮ ಗುಣಮಟ್ಟದ ಸೇವೆ ಕೊರೊಂದು ಉಲ್ಲೆರ್ . ಅಗತ್ಯವಿತ್ತುಂಡ ಕುಡ್ಲರ್ದ್ ತಜ್ಞ ವೈದ್ಯೆರ್ನ ಸೇವೆನ್ಲಾ ದೆತೊನೊಂದು ಉಲ್ಲೆರ್ ಪಂದ್ ಆಸ್ಪತ್ರೆದ ವೈದ್ಯಕೀಯ ಅಧೀಕ್ಷಕ ಡಾ. ರಂಜನ್ ಕುಮಾರ್ ಪಂಡೆರ್.

ಆಜಿ ತಿಂಗೊಲ್ ದ ಉಲಯಿ ಒಂಜರೆ ಕೋಟಿ ರೂ. ಮೌಲ್ಯದ ಸಿ.ಟಿ. ಸ್ಕ್ಯಾನಿಂಗ್ ಸೌಲಭ್ಯ ಸುರು ಆಯರೇ ಉಂಡು ಪಂದ್ ಆರ್ ಪಂಡೆರ್ .
ಆಸ್ಪತ್ರೆಡ್ ಶುಕ್ರವಾರ ಸುದ್ದಿಗೋಷ್ಠಿಡ್ ಮೇರ್ ಬೇತೆ ಬೇತೆ ಸೇವಾ ಸೌಲಭ್ಯದ ಬಗ್ಯೆ ಸವಿವರ ಮಾಹಿತಿ ಕೊರಿಯೆರ್ .
ಆಸ್ಪತ್ರೆದ ನಿರ್ದೇಶಕ ಎಂ. ಜನಾರ್ದನ್ ಪಾತೆರ್ದ್ , ಆಸ್ಪತ್ರೆಡ್ 181 ಹಾಸಿಗೆ ಸೌಲಭ್ಯ, 9 ತುರ್ತು ನಿಗಾ ಘಟಕ, ಹೊರರೋಗಿ ಚಿಕಿತ್ಸಾ ವಿಭಾಗ, ನೇತ್ರಾ ಚಿಕಿತ್ಸಾ ವಿಭಾಗ, ಮೂಜಿ ಅಂಬ್ಯುಲೆನ್ಸ್, ಔಷಧಿ ವಿಭಾಗ, ಪೆದ್ದುನ ವಿಭಾಗ ದಿನತ 24 ಗಂಟೆಲಾ ಸೇವೆಗ್ ಲಭ್ಯ ಉಂಡು .
ತುರ್ತು ಪೊರ್ತುಡು ಪುನ ಕೊನೊಯರೇ “ಮುಕ್ತಿ” ಗಾಡಿದ ಉಚಿತ ಸೇವೆ ಉಂಡು . ಆಸ್ಪತ್ರೆ 26 ವಿಮಾ ಕಂಪೆನಿದೊಟ್ಟುಗು ಒಪ್ಪಂದ ಮಲ್ದುಂದು , ರಿಯಾಯಿತಿ ದರೊಟ್ಟು ಉತ್ತಮ ಸೇವೆ ಕೊರೊಂದು ಉಂಡು . ಆಸ್ಪತ್ರೆಡ್ ಸ್ವಚ್ಛತೆ, ಎಡ್ಡೆ ಗಾಳಿ -ಬೊಲ್ಪು , ಪ್ರಶಾಂತ ಪರಿಸರ ಬೊಕ್ಕ ಸೌಜನ್ಯ ಪೂರ್ಣ ಸೇವೆಗ್ ಆದ್ಯತೆ ಕೊರೊಂದು ಉಲ್ಲಾ ಪಂದ್ ಆರ್ ಪಂಡೆರ್ .
ಎಚ್ಚದ ಮಾಹಿತಿಗಾದ್ ಲೆಪ್ಪು ಕೊರ್ಲೆ: 08256-295 611, ಸಂಚಾರಿ ದೂರವಾಣಿ: 8105256611
ಡಾ. ಸಾತ್ವಿಕ್ ಜೈನ್, ಪತ್ರಕರ್ತರ ಸಂಘದ ಗುರ್ಕಾರ್ಲಾಯಿನ ಅಚ್ಚುಶ್ರೀ ಬಾಂಗೇರು, ಕಾರ್ಯoತೆರಾಯಿನ ಜಾರಪ್ಪ ಪೂಜಾರಿ ಪಾಲ್ ಪಡೆದಿತ್ತೆರ್ .ಡಾ. ರಂಜನ್ ಕುಮಾರ್ ಎದುಕೊಂಡೆರ್ .ಲೇಸ್ ನಡಪಾದ್ ಕೊರಿನ ಸಾರ್ವಜನಿಕ ಸಂಪರ್ಕಾಧಿಕಾರಿ ಸಂಗೀತಾ ಸೊಲ್ಮೆ ಸಂದೈತ ಮಲ್ತೆರ್ .

ಪ್ರೊ. ಸ್ಯಾಮುಯೆಲ್ ಗ್ ಅತ್ಯುತ್ತಮ ಪ್ರಾಂಶುಪಾಲೆರ್ನ ಮಾನದಿಗೆ

Aug 7, 2021

ಬ್ರಹ್ಮಾವರ : ಹೊಸದಿಲ್ಲಿದ ಅಖಿಲ ಭಾರತ ಅಸೋಸಿಯೇಷನ್ ಫಾರ್ ಕ್ರಿಶ್ಚಿಯನ್ ಹೈಯರ್ ಎಜುಕೇಶನ್ ಬೊಕ್ಕ ದೇಶದ ಮಾತಾ ಕ್ರಿಶ್ಚಿಯನ್ ಉನ್ನತ ಶಿಕ್ಷಣ ಸಂಸ್ಥೆದ ಸದಸ್ಏರ್ ಒಡಿಪು ಜಿಲ್ಲೆದ ಬ್ರಹ್ಮಾವರದ ಕ್ರಾಸ್‌ಲ್ಯಾಂಡ್ ಕಾಲೇಜ್ ದ ನಿವೃತ್ತ ಪ್ರಾಂಶುಪಾಲ ಪ್ರೊ. ಸ್ಯಾಮುಯೆಲ್ ಕೆ. ಮೆರೆನ್ 2018-19ನೇ ಸಾಲ್ ದ ದೇಶದ ಅತ್ಯುತ್ತಮ ಪ್ರಾಂಶುಪಾಲೆರ್ನ ಮನಾದಿಗೆಗ್ ಆಯ್ಕೆ ಮಲ್ದೆರ್ .

ಈ ಪ್ರತಿಷ್ಠಿತ ರಾಷ್ಟ್ರೀಯ ಪ್ರಶಸ್ತಿನ್ ಎಐಎಸಿಎಚ್‌ಇ ಶೈಕ್ಷಣಿಕ ನಾಯಕತ್ವದ ಗುರುತಿಸುವಿಕೆ, ಶೈಕ್ಷಣಿಕ ಉತ್ಕೃಷ್ಟತೆ, ಶೈಕ್ಷಣಿಕ ಆವಿಷ್ಕಾರದ ಪೊಲಬುಡು ಪಾಲ್ ಪಡೆಯುನೆತ್ತ ಮಿತ್ತ್ , ಜೋಕ್ಲೆನ ಸಮಗ್ರ ಅಭಿವೃದ್ಧಿದ ಕಾಳಜಿ ಬೊಕ್ಕ ವೃತ್ತಿಪರ ನೈತಿಕತೆದ ಉನ್ನತ ಗುಣಮಟ್ಟನ್ ಗೇನೋಡು ದೀಯೊಂದು ಕೊರೊಂದು ಉಲ್ಲೆರ್ .

ಇನಿ ಒಡಿಪುಡು ಲಸಿಕಾ ಶಿಬಿರ ಇಜ್ಜಿ

Aug 7, 2021

ಒಡಿಪು ,ಆಗಸ್ಟ್ 7: ಶನಿವಾರ ಒಡಿಪು ಜಿಲ್ಲೆಡ್ ಒವ್ವೆ ಕೋವಿಡ್-19 ಲಸಿಕಾ ಶಿಬಿರ ಇಜ್ಜಿ ಪಂದ್ ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣಾಧಿಕಾರಿ ಡಾ.ನಾಗಭೂಷಣ ಉಡುಪ ಪಂಡೆರ್ .

ತುಲು ಭಾಷೆನ್ 8ನೇ ಪರಿಚ್ಚೇದಗ್ ಸೇರಾಯೆರೆ ಶ್ರೀ.ರಾಜನಾಥ್ ಸಿಂಗ್ ಮೆರೆಗ್ ಬಿನ್ನಾಪು

Aug 7, 2021

ಕುಡ್ಲ, ಆಗಸ್ಟ್ 7: ಸಂಸದ ಶ್ರೀ. ನಳಿನ್ ಕುಮಾರ್ ಕಟೀಲ್, ಓಡಿಪು -ಚಿಕ್ಕಮಗಳೂರು ಸಂಸದೆ ಕು.ಶೋಭಾ ಕರಂದ್ಲಾಜೆ ಇನಿ ಮಾನ್ಯ ಕೇಂದ್ರ ಗೃಹ ಸಚಿವೆರಾಯಿನ ಶ್ರೀ.ರಾಜನಾಥ್ ಸಿಂಗ್ ಮೆರೆನ್ ಪಾರ್ಲಿಮೆಂಟ್ ಹೌಸ್ ಡ್ ಭೇಟಿಯಾದ್ ತುಳು ಭಾಷೆನ್ 8 ನೇ ಪರಿಚ್ಛೇದಗ್ ಸೇರಾವೊಡು ಪಂದ್ 2019 ನೇ ಇಸವಿಡ್ ಕೊರಿನ ಬಿನ್ನಾಪು ಇತ್ತೆ ಕುಡ ಸೋಶಿಯಲ್ ಮೀಡಿಯಡ್ ವೈರಲ್ ಆವೊಂದು ಉಂಡು . ಕರಾವಳಿ ಸಂಸದೆರ್ನ ಬಿನ್ನಾಪುಗು ಸಕಾರಾತ್ಮಕವಾದ್ ಸ್ಪಂಧನೆ ಕೊರಿನ ಗೃಹ ಸಚಿವೆರ್ ತುಳು ಭಾಷೆನ್ ಸಂವಿಧಾನದ 8ನೇ ಪರಿಚ್ಛೇದಗ್ ಸೇರಾವುನ ಭರವಸೆ ಕೊರಿಯೆರ್ ಪಂದ್ ಸಂಸದೆರ್ ಪ್ರಕಟಣೆಡ್ ತೆರಿಪಾದಿತ್ತೆರ್ .