August 4, 2021

ಪುಣೆಡ್ ಬೇರ ಮಲ್ಪುನಕ್ಲೆನ ಸಂಘಟನೆರ್ದ್ ಘಂಟಾನಾದ ಆಂದೋಲನ

ಪುಣೆ, ಆಗಸ್ಟ್ 4 : ಕೊರೋನಾ ಸೋಂಕು ಉಂತಾಯೆರೆ ಸರಕಾರ ದೆತೊನ್ದಿನ ನಿರ್ಬಂಧನ್ ಪುಣೆಡ್ ನನಲ ದುಂಬರಿತೊಂದು ಉಪ್ಪುನೆರ್ದಾವರ ಪುಣೆದ ಬೇರ ಮಲ್ಪುನಕ್ಲೆನ ಒಕ್ಕೂಟ ಬೊಕ್ಕ ಹೋಟೆಲ್ ಅಸೋಸಿಯೇಶನ್ ವತಿರ್ದ್ ಆ 3ಕ್ಕ್ ಪೇಂಟೆದ ಸುಮಾರ್ 27 ಕಡೆಟ್ ಘಂಟಾನಾದ ಆಂದೋಲನ್ ಪನ್ಪಿ ಪುದರ್ಡ್ ಪ್ರತಿಭಟನೆ ನಡಪಾಯೆರ್ . ಪೇಂಟೆದ ಬೇರ ಮಲ್ಪುನಕ್ಲೆಗ್ ಬೈಯ್ಯಗ್ 4ಗಂಟೆ ಮುಟ ಮಾತ್ರ ಬೇರ ಮಲ್ಪರೆ ಅವಕಾಶ ಕೊರೊಂದು ಉಲ್ಲೆರ್ ಪಂದ್ ಬೇರ ಮಲ್ಪುನಕ್ಲೆಗ್ ಬಾರಿ ಮಲ್ಲ ನಷ್ಟ ಆವೊಂದು ಉಂಡು ಪೊರ್ತುದ ಮಿತಿನ್ ಬೈಯ್ಯ ಗಂಟೆ 7 ಮುಟ ಆಂಡಲಾ ಜಾಸ್ತಿ ಮಲ್ಪೊಡು ಪಂದ್ ಆಂದೋಲನನ್ ನಡಪಾಯೆರ್ . ಅಂಚನೇ ಹೋಟೆಲ್ದ ಬೇರದಕ್ಲೆಗ್ ಬಾರಿ ಬಂಗ ಆವೊಂದು ಉಪ್ಪುನೆರ್ದಾವರ ಬೈಯ್ಯಗ್ 4 ಗಂಟೆ ಮುಟ ಉಪ್ಪುನೆರ್ದಾವರ ಬೇರಗ್ ಒವ್ವೆ ರೀತಿದ ಪ್ರಯೋಜನ ಇಜ್ಜಿ. ರಾತ್ರಿ 11 ಗಂಟೆ ಮುಟ ಪೊರ್ತು ಜಾಸ್ತಿ ಮಲ್ಪರೆ ಆಂದೋಲನಡ್ ಪಾಲ್ ಪಡೆದಿಯೆರ್ . ಮಸ್ತ್ ಜನಕುಲು ಸೇರ್ದ್ ಪೇಂಟೆದ ಗುಡ್ಲಕ್ ಚೌಕ್ ಡ್ ಬೇರದಕುಲು ,ಹೊಟೇಲ್ ದಕುಲು ವನಸ್ ದ ಬಟ್ಟಲ್ ನ್ ಬೊಟ್ಟುದು ,ಘಂಟೆನ್ ಬೊಟ್ಟುದು ,ಪ್ರತಿಭಟನಾ ಫಲಕನ್ ಪತ್ದ್ ವಿರೋಧ ವ್ಯಕ್ತ ಮಲ್ತೆರ್ .

ಪುಣೆ ರೆಸ್ಟೋರೆಂಟ್ & ಹೋಟೆಲಿಯರ್ಸ್ ಅಸೋಸಿಯೇಶನ್ ಗುರ್ಕಾರ್ಲಾಯಿನ ಗಣೇಶ್ ಶೆಟ್ಟಿ ಮೇರ್ ಪಾತೆರ್ದ್ ಸುಮಾರ್ 800ರ್ದ್ ಲ ಜಾಸ್ತಿ ಹೋಟೆಲ್ಲು ಲಾಕ್ ಡೌನ್ ದಾವರ ಬಾರಿ ಸಂಕಷ್ಟಡ್ ಉಲ್ಲೆರ್ ಪುಣೆ ಬೊಕ್ಕ ಪಿಂಪ್ರಿ -ಚಿಂಚ್ವಾಡ್ ಪೇಂಟೆಡ್ ಶಾಶ್ವತವಾದ್ ಬಾಕಿಲ್ ಪಾರ್ದುಂಡು . ಬೈಯ್ಯ 4 ಗಂಟೆ ಮುಟ ಪೊರ್ತು ಕೊರಿನ ಹೊಟೇಲ್ದಕ್ಲೆಗ್ ಒವುಲಾ ಪ್ರಯೋಜನ ಇಜ್ಜಿ . ರಾತ್ರಿ 11 ಮುಟ ಹೋಟೆಲ್ನ್ ದೀಯರೇ ಅವಕಾಶ ಕೊರೊಡು ಪಂದ್ ಪಂಡೆರ್ .

ಯುನೈಟೆಡ್ ಹಾಸ್ಪಿಟಾಲಿಟಿ ಅಸೋಸಿಯೇಶನ್ ವತಿರ್ದ್ ಹೋಟೆಲ್ದ ಗುರ್ಕಾರ್ಲು ಬೊಕ್ಕ ಹೋಟೆಲ್ ಕಾರ್ಮಿಕೆರ್ ಸೇರಿನಂಚ ಸುಮಾರ್ 200 ಜನಕುಲು ಗುಡ್ ಲಕ್ ಚೌಕ್ ಡ್ ಆಂದೋಲನಡ್ ಪಾಲ್ ಪಡೆದ್ ಸರಕಾರದ ವಿರುದ್ಧ ಪ್ರತಿಭಟನೆ ಮಲ್ತೆರ್ . ಸಂಸ್ಥೆದ ಕೋಶಾಧಿಕಾರಿಯಾಯಿನ ಸಮೀರ್ ಶೆಟ್ಟಿ ಪಾತೆರ್ದ್ ಸರಕಾರ ಇತ್ತೆ ನಮ್ಮ ಹೊಟೇದಕ್ಲೆಗ್ ಕಷ್ಟ ಆತುಂಡು. ಇನಿತ ಆಂದೋಲನದ ಮುಖೇನ ಸರಕಾರದ ಕಣ್ಣು ಬುಡ್ಪಾದ್ ನಮ್ಮಕ್ಲೆಗ್ ನ್ಯಾಯ ಕೊರ್ಪಿನ ಉದ್ದೇಶ ನಮ್ಮ ಪಂದ್ ಪಂಡೆರ್ .
ಯುನೈಟೆಡ್ ಹಾಸ್ಪಿಟಾಲಿಟಿ ಅಸೋಸಿಯೇಶದ ಸದಸ್ಯೆರಾಯಿನ ಬೊಕ್ಕ ಪುಣೆ ಬಂಟರ ಸಂಘದ ಯುವ ವಿಭಾಗದ ಕಾರ್ಯಾಧ್ಯಕ್ಷ ಯಶ್ ರಾಜ್ ಶೆಟ್ಟಿ ಪಾತೆರ್ದ್ ನಮ ಹೊಟೇಲ್ದಕುಲು ಸರಕಾರದ ನಿಯಮಾವಳಿದಲಕ ಬೇಲೆ ಮಲ್ತೊಂದು ಉಲ್ಲೆರ್. ಮಾತಾ ರೀತಿದ ಸಾಕಾರನ್ ಸರಕಾರಗ್ ಕೊರೊಂದು ಇತ್ತುಂಡಲ ನಿರಂತರವಾದ್ ನಮಕ್ ಸರಕಾರರ್ದ್ ಅನ್ಯಾಯ ಆವೊಂದು ಉಪ್ಪುನ ಬೇಜಾರ್ ದ ಸಂಗತಿ ಆತುಂಡು . ರಾತ್ರಿ 11 ಗಂಟೆ ಮುಟ ಆಂಡಲಾ ಹೋಟೆಲ್ ಚಾಲ್ ದೀಯರೇ ಅವಕಾಶ ಕೊರ್ತೆರ್ ಬೊಕ್ಕ ಪರಿಹಾರ ಪ್ಯಾಕೇಜ್ ನ್ ಹೋಟೆಲ್ ಉದ್ಯಮಗ್ ಕೊರೊಡಾಯಿನ ಆವಶ್ಯಕತೆ ಉಂಡು . ಇಜ್ಜಿನ್ದ ದುಂಬುದ ದಿನಟ್ ಹೋಟೆಲ್ ಉದ್ಯಮಗ್ ಉಳಿವು ಇಜ್ಜಿ .