August 23, 2021

ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ ಕುಕ್ಕೆ ಸುಬ್ರಹ್ಮಣ್ಯ ಘಟಕದ ವತಿರ್ದ್ ಸಾಮೂಹಿಕ ರಕ್ಷಾಬಂಧನ

ಕುಕ್ಕೆ : ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ ಕುಕ್ಕೆ ಸುಬ್ರಹ್ಮಣ್ಯ ಘಟಕದ ವತಿರ್ದ್ ಕುಕ್ಕೆ ಸುಬ್ರಹ್ಮಣ್ಯ ರಥಬೀದಿರ್ದ್ ಕುಮಾರಧಾರದ ಮುಟ , ದೇವಸ್ಥಾನದ ಸಿಬ್ಬಂದಿ, ಆದಿ ಸುಬ್ರಹ್ಮಣ್ಯ ದೇವಸ್ಥಾನದ ಸಿಬ್ಬಂದಿ, ಆಶ್ರಮ ಶಾಲೆ, ಪೋಲಿಸ್ ಠಾಣೆ, ಪಂಚಾಯತ್ , ಕೆ.ಎಸ್.ಎಸ್.ಕಾಲೇಜು, ಎಸ್. ಎಸ್. ಪಿ .ಯು. ಕಾಲೇಜು, ಕುಮಾರಸ್ವಾಮಿ ವಿದ್ಯಾಲಯ, ಬೊಕ್ಕ ನಮ್ಮ ಸಮಾಜನ್ ಪಗೆಲ್ ರಾತ್ರಿ ಪಂದ್ ಎನ್ನಂದೆ ಕೋವಿಡ್ ಸಾಂಕ್ರಾಮಿಕದಂಚಿನ ಮಾರಕ ಸೀಕ್ ರ್ದ್ ಜನಕ್ಲೆನ್ ರಕ್ಷಣೆ ಮಲ್ತ್ , ಆರೋಗ್ಯವಂತೇರಾದ್ ಮಲ್ಪುನ ವೈದ್ಯಕೀಯ ಸಿಬ್ಬಂದಿ ಮುಟಲ ರಕ್ಷೆ ಕಟ್ಟುನ ಮುಖೇನ ರಕ್ಷಾಬಂಧನ ದಿನನ್ ಗೌಜಿಡ್ ಅರ್ಥಪೂರ್ಣವಾದ್ ಆಚರಣೆ ಮಲ್ತೆರ್ .

ಕುಡ್ಲಡ್ ಪೊಸ “ಬಸ್ ಬೇ” ನಿರ್ಮಾಣಗ್ ಆದ್ಯತೆ

ಕುಡ್ಲ : ಕುಡ್ಲಡ್ ಇತ್ತೆ ಉಪ್ಪುನ ‘ಬಸ್-ಬೇ’ದ ಒಟ್ಟುಗು ನನಾತ್ ಪೊಸ ‘ಬಸ್-ಬೇ’ನ್ ಕಟ್ಟರೆ ಮಂಗಳೂರು ಮಹಾನಗರ ಪಾಲಿಕೆ ದುಂಬು ಬೈದುಂಡು .

ಕುಡ್ಲ ದಕ್ಷಿಣ ವಿಧಾನಸಭಾ ಕ್ಷೇತ್ರದ ಪ್ರಮುಖ ಮಾರ್ಗಡ್ ಜಾಸ್ತೀ ಆವೊಂದು ಉಪ್ಪುನ ಗಾಡಿದ ಸಂಚಾರನ್ ಸುಗಮವಾದ್ ಮಲ್ಪರೆ ಅನುಕೂಲ ಮಲ್ತ್ ಕೊರ್ಪಿನ ನೆಲೆಟ್ಟ್ ಬಸ್ ಬೇ’ ಮಲ್ಪರೆ ಉನಿರ್ಧಾರ ಮಲ್ದೆರ್ .

ಇತ್ತೆ ಕುಡ್ಲದ ಲಾಲ್‌ಭಾಗ್, ಅಂಬೇಡ್ಕರ್ ವೃತ್ತ, ನಂತೂರು, ಸರ್ಕ್ಯೂಟ್ ಹೌಸ್, ಕೂಳೂರು ನನಾತ್ ಕಡೆಟ್ ‘ಬಸ್-ಬೇ’ ಉಂಡು . ಇತ್ತೆ ಪೊಸತಾದ್ ಬಂಟ್ಸ್‌ ಹಾಸ್ಟೆಲ್, ಮಲ್ಲಿಕಟ್ಟೆ, ಮೇರಿಹಿಲ್, ಕುಲಶೇಖರಡ್ ಈ ಯೋಜನೆ ಪಾಡ್ದೆರ್.

ಮಾರ್ಗದ ಅಪಘಾತಡ್ ತೀರ್ ಪೋಯಿನ ಮಂಜೇಶ್ವರದ ಜವಣ್ಯೆ

ಮಂಜೇಶ್ವರ: ಬೈಕ್ ಬೊಕ್ಕ ಓಮ್ನಿ ನಡುಟು ನಡತಿನ ಅಪಘಾತಡ್ ಬೈಕ್ ಸವಾರ ತೀರ್ ಪೋಯಿನ ಘಟನೆ ಐತಾರ ಮಧ್ಯಾಹ್ನ ಪೈವಳಿಕೆ ಕೈತಲ್ದ ಬಾಯಿಕಟ್ಟೆಡ್ ನಡತುಂಡು.

ಮೃತರೆನ್ ಚಿಪ್ಪಾರ್ ಸೋಕೆದ ಮುಝಮ್ಮಿಲ್ (19) ಪಂದ್ ಗುರ್ತಿಸಾದೆರ್ .

ಕುಂಪಲ ನೂರಾನಿ ಯತೀಮ್ ಖಾನಾಗ್ ಪದುಕೆರ್ನ ಆಯ್ಕೆ

ಕುಡ್ಲ : ಕುಂಪಲ ನೂರಾನಿ ಯತೀಂ ಖಾನಾದ ಪದುಕೆರ್ನ ಆಯ್ಕೆ ಐತಾರ ನಡತುಂಡು .ಒತ್ತು ಗುರ್ಕಾರ್ಲಾದ್ ನೂರುದ್ದೀನ್ ಅನ್ಸಾರಿ, ಗುರ್ಕಾರ್ಲಾದ್ ಹಾಜಿ ಯುಎಸ್ ಅಬೂಬಕರ್, ಒತ್ತು ಗುರ್ಕಾರ್ಲಾದ್ ಹಾಜಿ ಕೆ.ಎಂ. ಅಬ್ದುಲ್ಲಾ, ಹಾಜಿ ಯುಎಂ ಮುಹಮ್ಮದ್, ಪಾರೆ ಇಸ್ಮಾಯೀಲ್ ಅಬ್ದುಲ್ಲಾ, ಕಾರ್ಯಂತೇರಾದ್ ಎನ್.ಎ.ಮುಹಮ್ಮದ್ ಇಕ್ಬಾಲ್, ಜೊತೆ ಒತ್ತು ಕಾರ್ಯಂತೇರಾದ್ ಹಾಜಿ ಡಿಎಂ ಅಬ್ದುಲ್ ನಝೀರ್, ಹಾಜಿ ಹಾರೂನ್ ಅಹ್ಸನಿ, ಲೆಕ್ಕ ಪರಿಶೋಧಕೆರಾದ್ ಕಾರ್ಯಂತೇರಾದ್ ಹಾಜಿ ಮುಹಮ್ಮದ್ ಫೈಝಲ್, ಕೋಶಾಧಿಕಾರಿಯಾದ್ ಹಾಜಿ ಅಬ್ದುಲ್ ಹಮೀದ್ ಆಯ್ಕೆಯಾತೆರ್ .

ಮಂತ್ರಾಲಯಡ್ “ದಾಸಮೃತ” ಲೇಸ್

ಕುಡ್ಲ : ಮಂತ್ರಾಲಯದ ಗುರು ರಾಘವೇಂದ್ರ ಸ್ವಾಮಿಲೆನ 350ನೇ ಆರಾಧನಾ ಮಹೋತ್ಸವದ ಪರವಾದ್ ಶನಿವಾರ (ಆ. 28) ಮಂತ್ರಾಲಯದ ರಾಘವೇಂದ್ರ ಮಠಟ್ ಪುತ್ತೂರು ದ ಖ್ಯಾತ ಗಾಯಕ ಜಗದೀಶ ಆಚಾರ್ಯ ಮೇರ್ ‘ದಾಸಾಮೃತ’ ಲೇಸ್ ನಡಪಾದ್ ಕೊರಿಯೆರ್ .

ದಾಸರ ಪದ ಅತ್ತoದೆ , ದಿ. ಬೆಳಗೆರೆ ಮಹಾಲಕ್ಷ್ಮಮ್ಮ ರಚನೆ ಮಲ್ತಿನ ‘ನಮೋ ಮಹಾದೇವ ವ್ಯಾಘ್ರಮುಖದ ಭಾವ’ ಪನ್ಪಿನ ಪದಕ್ ತಾನೇ ರಾಗಸಂಯೋಜನೆ ಮಲ್ತ್ ಪದ ಪನ್ಪಿನ ಮುಖೇನ ಜಗದೀಶ ಮೇರ್ ಸೇರ್ದಿ ಜನಕ್ಲೆಗ್ ಮನೋರಂಜನೆ ಕೊರಿಯೆರ್.

ಶತಾಯುಷಿ ಗುರುವಜ್ಜನ ಮರಣಗ್ ಕಣ್ಣ ನೀರ ಪನಿತರ್ಪಣ ಮಲ್ತಿನ ಸಚಿವ ವಿ ಸುನಿಲ್ ಕುಮಾರ್

ಒಡಿಪು : ನಾಡ್ದ ಪೆರಿಯ ಜನಪದ ಕಲಾವಿದೆರಾಯಿನ ಗುರುವ ಕೊರಗ (105) ಮೆರ್ನ ಮರಣರ್ದ್ ನಾಡ್ ದ ಸಾಂಸ್ಕೃತಿಕ ಬೊಕ್ಕ ಜನಪದ ಕ್ಷೇತ್ರಗ್ ಬಾರಿ ಮಲ್ಲ ನಷ್ಟ ಆತುಂಡು ಪಂದ್ ಇಂಧನ, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಬೊಕ್ಕ ಒಡಿಪು ಜಿಲ್ಲಾಉಸ್ತುವಾರಿ ಸಚಿವ ವಿ ಸುನಿಲ್ ಕುಮಾರ್ ಕಣ್ಣ ನೀರ ಪನಿತರ್ಪಣ ಮಲ್ತೆರ್.

ಇನೋಳಿ ದೇವಸ್ಥಾನಡ್ ಗೃಹರಕ್ಷಕ ದಳರ್ದ್ ಸ್ವಚ್ಛತಾ ಶ್ರಮದಾನ

ಕುಡ್ಲ : ದುಂಬುಲ ದೇವಸ್ಥಾನದ ಪರಿಸರ ಸ್ವಚ್ಛತಾ ಬೇಲೆ ನಡತೊಂದು ಇತ್ತುಂಡು , ಇತ್ತೆ ಸ್ವಚ್ಛತೆದ ಒಟ್ಟುಗು ಶಿವಗ್ ಪ್ರಿಯವಾಯಿನ ಬಿಲ್ವಪತ್ರೆದ ದೈಲೆನ್ ನಡ್ಪಿನ ಮುಖೇನ ದೇವೆರ್ನ ಸೇವೆ ಮಲ್ತೊಂದು ಉಲ್ಲ ಪಂದ್ ಜಿಲ್ಲಾ ಗೃಹ ರಕ್ಷಕದಳದ ಸಮಾದೇಷ್ಠ ಡಾ.ಮುರಳೀ ಮೋಹನ್ ಚೂಂತಾರು ಪಂಡೆರ್ .

ಇನೋಳಿ ದೇವಂದ ಬೆಟ್ಟ ಶ್ರೀ ಸೋಮನಾಥೇಶ್ವರ ದುರ್ಗಾಪರಮೇಶ್ವರಿ ದೇವಸ್ಥಾನಡ್ ಐತಾರ ಗೃಹರಕ್ಷಕ ದಳರ್ದ್ ನಡತಿನ ಸ್ವಚ್ಛತಾ ಶ್ರಮಾದಾನ, ಬಿಲ್ವಪತ್ರೆ ದೈ ನಡ್ಪಿನ ಲೇಸ್ ಡ್ ಪಾಲ್ ಪಡೆದ್ ಪಾತೆರಿಯೆರ್.

ಪರಿಸರ ಪ್ರೇಮಿಲಾಯಿನ ಮಾಧವ ಉಳ್ಳಾಲ್, ರಾಕೇಶ್, ದೇವಸ್ಥಾನದ ಕಾರ್ಯದರ್ಶಿ ಶ್ರೀನಿ ವಾಸ ಇನೋಳಿ, ಟ್ರಸ್ಟಿಲಾಯಿನ ಗೋಪಾಲ ಶೆಟ್ಟಿ ಬಾರ್ಲ, ಪ್ರಭಾ ಕರ ನಾಯಕ್, ಸೇವಾ ಸಮಿತಿದ ಸದಸ್ಯೆರಾಯಿನ ಕಿರಣ್ ಶೆಟ್ಟಿ ಕಿಲ್ಲೂರು ಲಕ್ಕೆ, ಗೋಪಾಲ ಕೋರ್ಯ, ಸಂದೇಶ ಪೊರ್ಸೋಟ, ಪ್ರವೀಣ್, ಕರುಣಾಕರ ಶೆಟ್ಟಿ ದೇವರ ಗುಡ್ಡೆ, ಸುಜಿ ತ್ ಇನೋಳಿ, ಘಟಕಾಧಿಕಾರಿ ಬಾಸ್ಕರ್, ಸುನಿಲ್ ಪಾಲ್ ಪಡೆದಿತ್ತೆರ್.

ಒಡಿಪುಡು ದೇವರಾಜ ಅರಸು ಆಚರಣೆ

ಒಡಿಪು : ಡಿ.ದೇವರಾಜು ಅರಸು ಮೆರ್ನ 106ನೇ ಪುಟ್ಟು ಪರ್ಬನ್ ಮಣಿಪಾಲಡ್ ಉಪ್ಪುನ ಜಿಲ್ಲಾಧಿಕಾರಿಲೆನ ಸಭಾಂಗಣಡ್ ಆಚರಣೆ ಮಲ್ತೆರ್. ಲೇಸ್ ಡ್ ಜಿಲ್ಲಾಧಿಕಾರಿ ಜಿ.ಜಗದೀಶ್ ಅರಸು ಭಾವಚಿತ್ರಗ್ ಪೂತರ್ಪಣೆ ಮಲ್ತೆರ್.

ಒಡಿಪುಡು ಸದ್ಯ ಶಾಲೆ ಸುರು ಮಲ್ಪುಜ : ಡಿಸಿ ಜಗದೀಶ್

ಒಡಿಪು : ಜಿಲ್ಲೆದ ಪಾಸಿಟಿವಿಟಿ ಪ್ರಮಾಣ ಶೇ.2ರ್ದ್ ಜಾಸ್ತಿ ಉಪ್ಪುನೆರ್ದಾವರ ಒಡಿಪುಡು ಸದ್ಯ ಶಾಲೆ ಸುರು ಮಲ್ಪುಜ ಪಂದ್ ಉಡುಪಿ ಜಿಲ್ಲಾಧಿಕಾರಿ ಜಿ.ಜಗದೀಶ್ ಪಂಡೆರ್ .

ಪಾಸಿಟಿವಿಟಿ ರೇಟ್ ಕಮ್ಮಿ ಉಪ್ಪುನ ಜಿಲ್ಲೆಡ್ ಇನಿರ್ದ್ ಶಾಲೆ ಸುರು ಮಲ್ಪುನ ವಿಚಾರದ ಬಗ್ಗೆ ಪಾತೆರ ಆನಗ ಒಡಿಪುದ ಜಿಲ್ಲಾಧಿಕಾರಿಲು ಜಿಲ್ಲೆಡ್ ಸದ್ಯ ಶಾಲೆ ಸುರು ಮಲ್ಪುಜ ಪಂದ್ ಪಂಡೆರ್.