August 11, 2021

ಜೈ ತುಳುನಾಡ್ ಸಂಘಟನೆದ 7ನೇ ವರ್ಷಗ್ ಎಡ್ಡೆಪ್ಪು ಬಯಕುನ ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆ

ಜೈ ತುಳುನಾಡ್ ಸಂಘಟನೆ ಒಂಜಿ ಕಲ್ಪವೃಕ್ಷ (ತಾರೆ) ಇತ್ತಿಲೆಕ ಈ ತಾರೆದ ಮರಟ್ ಒಂಜಿಲ ದಕ್ಕುನ ಸೊತ್ತು ಇಜ್ಜಿ! ಪೂರ ನಮೂನೆಡ್ಲ ಜನಕುಲೆಗ್ ಉಪಕಾರನೆ. ತುಳು ಬಾಸೆ, ತುಳು ಲಿಪಿ, ತುಳುನಾಡ್‌ದ ಪರಪೋಕುಲೆನ್ ಒರಿಪಾವುನ ಬೇಲೆನ್ ಸ್ವಾರ್ತ ದಾಂತೆ ಮಲ್ತ್ತೊಂದುಂಡು ಜೈ ತುಳುನಾಡ್ ಸಂಘಟನೆ.

ಸಂಘಟನೆದ ಲೋಗೋಡ್ ಪಿಲಿತ ಚಿತ್ರ ಎಂಚ ಲಕ್ಕದ್ ತೋಜುಂಡ ಅಂಚನೆ ಈ ಸಂಘಟನೆಡ್ ಇತ್ತಿನ ಪ್ರತಿ ಒರಿಯೆಲ ತುಳುಕಾದ್ ಪಿಲಿತಲೆಕ ರಾಜರೋಷವಾಯಿನ ಪತ್ತಿನ ಬೇಲೆ ಕೋಡಿ ಎತ್ತುನೆಟ ಬೆರಿ ಬುಡಂದೆ ಚಲ ಬುಡಂದೆ ಮಲ್ಪುನೆರ್ದಾತ್ರ ಜೈ ತುಳುನಾಡ್ ಸಂಘಟನೆ ಮಲ್ಲ ಮಟ್ಟಡ್ ಬುಲೆಯೆರೆ ಸಾಧ್ಯ ಅಂಡ್. 2013ನೆ ಇಸವಿಡ್ ತುಳುಕು ಸ್ವಾರ್ತದಾಂತೆ ಬೆನ್ಪುನ ಸಂಘಟನೆ ಬೋಡ್ ಪಂದ್ ಟೈಮ್ಸ್ ಆಫ್ ಕುಡ್ಲದ ಕುಡ್ಲ ಚಾವಡಿಡ್ ತುಳುತ ಅಭಿಮಾನಿಲೆನ ಕೂಡು ಪಟ್ಟಾಂಗ ನಡತ್ ಇತ್ತ್ಂಡ್, ಆನಿದ ಕೂಡು ಪಟ್ಟಾಂಗ ಆಯಿ ಬೊಕ್ಕ ಒಂಜತ್ತ್ ಒಂಜಾತ್ ತುಳು ಸಂಘಟನೆಲು ಪುಟ್ಟಿಯ. ಈ ಕೂಡು ಪಟ್ಟಂಗೊಡ್ ಜೈ ತುಳುನಾಡ್‌ದ ಕೆಲವು ಪದುಕೆರ್ಲ ಇತ್ತೆರ್. ಆನಿರ್ದ್ ತುಳು ಅಭಿಮಾನಿಲ್‌ನೊಟ್ಟು ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆದ ಕೊಂಡಿ ಗಟ್ಟಿ ಆಂಡ್ , 10.08.2014 ರ್ದ್ ಜೈ ತುಳುನಾಡ್ ದೊಟ್ಟು ಟೈಮ್ಸ್ ಆಫ್ ಕುಡ್ಲ ಬೆರಿತಾಂಗ್ ಕೊರ್ದು ಉಂತುಂಡು. ಇನಿಕ್ ಈ ಸಂಸ್ಥೆ ಮಲ್ಲ ಆದ್ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆಗ್ ಬೆರಿತಾಂಗ್ ಕೊರೊಂದ್ ಉಂಡು.

ಜೈ ತುಳುನಾಡ್ ಸಂಘಟನೆದ ತುಳು ಬುಲೆಚ್ಚಿಲ್ದ ಬೆನ್ನಿ ಇಂಚನೇ ದುಂಬು ಪೋವಡ್, ಜೈ ತುಳುನಾಡ್ ಸಂಘಟನೆಡ್ ಬೆನ್ಪುನ ಮಾತೆರೆಗ್ಲಾ ತುಳುನಾಡ್ಡ ದೈವ ದೇವೆರ್ ಎಡ್ಡೆಪ್ಪುದ ಆಶೀರ್ವಾದ ಕೊರಡ್ ಪಂದ್ ಸುಗಿಪುವ.