August 3, 2021

ಪಂಜ ಕೊಯಿಕುಡೆ ನವಜ್ಯೋತಿ ಮಹಿಳಾ ಮಂಡಲೊಡು ಭಜನೆ ಕ್ಲಾಸ್ ಸುರು

ಪಕ್ಷಿಕೆರೆ : ಪಂಜ ಕೊಯಿಕುಡೆ ಗ್ರಾಮದ ನವಜ್ಯೋತಿ ಮಹಿಳಾ ಮಂಡಲ (ರಿ) ಉಂದೆತ್ತ ಆಶ್ರಯೊಡು ಭಜನೆ, ಹಾರ್ಮನಿ ಬೊಕ್ಕ ಕೀ ಬೋರ್ಡ್ ಕಲ್ಪಾವುನ ಕ್ಲಾಸ್ ಅಂಗಾರೆದಾನಿ ಸುರುವಾತ್ಂಡ್.

ಭಜನೆದ ಗುರು, ಸುರತ್ಕಲ್ ಶಿವರಂಜಿನಿ ಭಜನಾ ತಂಡದ ಸುದೇಶ್ ಹೊಸಬೆಟ್ಟು ಮೇರ್ ಬೊಲ್ಪು ಅರ್ಲಾದ್ ತರಗತಿನ್ ಉದಿಪನ ಮಲ್ತೆರ್.
ನವಜ್ಯೋತಿ ಮಹಿಳಾ ಮಂಡಲದ ಗೌರವಾಧ್ಯಕ್ಷೆರ್ ಶೈಲಜ ಎನ್. ಶೆಟ್ಟಿ, ಅಧ್ಯಕ್ಷೆರ್ ಅನಿತಾ ದೇವಾಡಿಗ, ಉಪಾಧ್ಯಕ್ಷೆರ್ ಕುಶಲ ಶೇಖರ್ ಅಂಚೆನೇ ಮಾತಾ ಸದಸ್ಯೆರ್ ಭಜನೆ ಕ್ಲಾಸ್ ದ ಉದಿಪನದ ಲೇಸ್ ಡ್ ಪಾಲ್ ಪಡೆಯೆರ್.ಪ್ರತಿ ಅಂಗಾರೆ ಕಾಂಡೆ 11 ಗಂಟೆರ್ದ್ 1 ಗಂಟೆ ಮುಟ್ಟ ಭಜನೆ ಕ್ಲಾಸ್ ನಡಪರೆ ಉಂಡು. ಮಹಿಳಾ ಮಂಡಲದ 10 ಸದಸ್ಯೆರ್ ಭಜನೆ ಕ್ಲಾಸ್ ಗ್ ಸೇರ್ದೆರ್. ಊರುದ ಆಸಕ್ತೆರ್ ಲ ತರಬೇತಿಗ್ ಸೇರರೆ ಅವಕಾಶ ಉಂಡು ಪಂಡ್ ದ್ ಮಹಿಳಾ ಮಂಡಳಿದಕುಲು ತೆರಿಪಾದೆರ್.

ಗಡಿಭಾಗಡ್ ನಿರ್ಬಂಧ ಪಾಡಿನ ನೆಲೆಟ್ಟ್ ವಿವಿ ಪರೀಕ್ಷೆ ರದ್ದು ಮಲ್ಪರೆ ಆದೇಶ ಕೊರಿನ ಜಿಲ್ಲಾಧಿಕಾರಿ

ಕುಡ್ಲ, ಆಗಸ್ಟ್ 3: ಕುಡ್ಲ ವಿಶ್ವವಿದ್ಯಾನಿಲಯದ ವ್ಯಾಪ್ತಿಡ್ ನಡತೊಂದು ಉಪ್ಪುನ ಮಾತಾ ಪರೀಕ್ಷೆಲೆನ್ ತಾತ್ಕಾಲಿಕ ನೆಲೆಟ್ ಉoತಾದ್ , ದುಂಬುದ ಆದೇಶ ಮುಟ ತರಗತಿ ಬೊಕ್ಕ ಪರೀಕ್ಷೆಲೆನ್ ದುಂಬು ಕೊನೊಯೆರೆ ಸೂಚನೆ ಕೊರ್ದು ದ.ಕ. ಜಿಲ್ಲಾಧಿಕಾರಿ ಡಾ. ರಾಜೇಂದ್ರ ಕೆ.ವಿ ಪಂಡೆರ್.

ಅತ್ತೂರು ಶ್ರೀ ವಿಷ್ಣುಮೂರ್ತಿ ದೇವಸ್ಥಾನದ ವ್ಯವಸ್ಥಾಪನಾ ಗುರ್ಕಾರ್ಲಾದ್ ಮನ್ಮಥ ಜೆ ಶೆಟ್ಟಿ ಆಯ್ಕೆ

ಕಾರ್ಕಳ, ಆಗಸ್ಟ್ 3: ಅತ್ತೂರು ಶ್ರೀ ವಿಷ್ಣುಮೂರ್ತಿ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಗೌರವಾಧ್ಯಕ್ಷರಾದ್ ಒಡಿಪು ಪೇಜಾವರ ಮಠದ ಶ್ರೀ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ, ಪೊಸ ಗುರ್ಕಾರ್ಲಾದ್ ಉದ್ಯಮಿ, ಅತ್ತೂರು ಮೊಯಿಲೊಟ್ಟು ನಿವಾಸಿ ಮನ್ಮಥ ಜೆ. ಶೆಟ್ಟಿ ಆಯ್ಕೆ ಆತೆರ್ . ಕಾರ್ಯಂತೆರಾದ್ ಆನಂದರಾಯ ನಾಯಕ್, ಸದಸ್ಯೆರಾದ್ ದೇವಸ್ಥಾನದ ಪ್ರಧಾನ ಅರ್ಚಕ ಎ. ಶ್ರೀನಿವಾಸ ಆಚಾರ್ಯ, ಮಹಾಬಲ ಸುವರ್ಣ, ಶ್ರೀಧರ ಸುವರ್ಣ ಎನ್., ಹರೀಶ್ ನಾಯ್ಕ, ಪ್ರತಿಮಾ ಹೆಗ್ಡೆ, ಚಂದ್ರಿಕಾ ದಿವಾಕರ ಕುಲಾಲ್ ಆಯ್ಕೆ ಆತೆರ್ .

ಕ್ಷತ್ರಿಯ ಮರಾಠ ಸಮಾಜದ ಸಾಧಕ ಜೋಕ್ಲೆಗ್ ಮಾನಾದಿಗೆ

ಕಾರ್ಕಳ, ಆಗಸ್ಟ್ 3: ಹಿರಿಯಂಗಡಿ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ಆಡಳಿತ ಮಂಡಳಿ ಬೊಕ್ಕ ಕ್ಷತ್ರಿಯ ಮರಾಠ ಸಮಾಜದ ವತಿರ್ದ್ ದ್ವಿತೀಯ ಪಿಯುಸಿ ವಿಜ್ಞಾನ ಬೊಕ್ಕ ವಾಣಿಜ್ಯ ವಿಭಾಗಡ್ ಜಾಸ್ತಿ ಅಂಕೊ ಪಡೆಯಿನ ಸಮುದಾಯದ 7 ಜನ ಜೋಕ್ಲೆಗ್ ಆ. 1ತಾರೀಖ್ ಗ್ ದೇವಸ್ಥಾನದ ಸಭಾಂಗಣಡ್ ಮಾನಾದಿಗೆ ಮಲ್ತೆರ್ .

90ರ್ದ್ ಜಾಸ್ತಿ ಅಂಕೊ ಪಡೆಯಿನ ಜೋಕುಲಾಯಿನ ಸಂಜನಾ, ಮನ್ವಿತಾ, ಶ್ರದ್ಧಾ, ಶ್ರೀ ಲಕ್ಷ್ಮಿ, ಸಹನಾ, ನಯನ್ ಕುಮಾರ್, ವಿದಿಶಾ ವೈ ರಾವ್ ಮೆಕ್ಲೆಗ್ ಮಾನದಿಗೆ ಮಲ್ದೆರ್. ಶುಭದ ರಾವ್ ಗುರ್ಕಾರ್ಮೆ ವಹಿಸ್ದಿತ್ತೆರ್ . ಕಾರ್ಕಳ ರೋಟರಿ ರಾಕ್ ಸಿಟಿ ಗುರ್ಕಾರ್ಲಾಯಿನ ಪ್ರಕಾಶ್ ಪೈ, ಮುನಿಯಾಲು ಸರಕಾರಿ ಪದವಿ ಪೂರ್ವ ಕಾಲೇಜ್ ದ ಉಪನ್ಯಾಸಕಿ ಶ್ರೀಮತಿ ಬೇಬಿ, ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಆಡಳಿತ ಮೊಕ್ತಸರ ಗಿರೀಶ್ ರಾವ್, ಮೊಕೇಸ್ತರೆರ್ , ರೋಟರಿ ಕ್ಲಬ್ ಸದಸ್ಯೆರ್ ಪಾಲ್ ಪಡೆದಿತ್ತೆರ್ . ಪ್ರಕಾಶ್ ರಾವ್ ಜಾದವ್ ಎದುಕೊಂಡೆರ್.

ಕರ್ನಾಟಕ ಪತ್ರಕರ್ತೆರ್ನ ಸಂಘ ಪುತ್ತೂರು ಘಟಕರ್ದ್ ಆಟಿದ ಲೇಸ್

ಪುತ್ತೂರು, ಆಗಸ್ಟ್ 3 : ಕರ್ನಾಟಕ ಪತ್ರಕರ್ತರ ಸಂಘ ಪುತ್ತೂರು ತಾಲೂಕು ಘಟಕದ ವತಿರ್ದ್ ಪತ್ರಿಕಾ ಲೇಸ್ ಬೊಕ್ಕ ಆಟಿ ಲೇಸ್ ಸೋಮಾರ ದಾನಿ ಕಾಂಡೆ ಪುತ್ತೂರು ಮಾತೃಛಾಯಾ ಸಭಾಭವನಡ್ ನಡತುಂಡು.

ಈ ಪೊರ್ತುಡು ಕರ್ನಾಟಕ ಪತ್ರಕರ್ತರ ಸಂಘ ಪುತ್ತೂರು ತಾಲೂಕು ಘಟಕದ ಗುರ್ಕಾರ್ಲಾಯಿನ ಯೂಸುಫ್ ರೆಂಜಲಾಡಿ ಗುರ್ಕಾರ್ಮೆ ವಹಿಸಿಯೆರ್.

ಸಂಘದ ಉಪಾಧ್ಯಕ್ಷೆ ಶೈಲಜಾ ಸುದೇಶ್ ಬತ್ತಿ ಬಿನ್ನೆರೆನ್ ಎದುಕೊಂಡೆರ್ . ಕಾರ್ಯದರ್ಶಿ ಲಕ್ಷ್ಮಿಕಾಂತ್ ರೈ ಅನಿಕೂಟೇಲು ಲೇಸ್ ನಡಪಾದ್ ಕೊರಿಯೆರ್. ಸದಸ್ಯ ತಿಲಕ್ ರೈ ಕುತ್ಯಾಡಿ ಸೊಲ್ಮೆ ಸಂದೈತ ಮಲ್ತೆರ್ . ಐರ್ದ್ ಬೊಕ್ಕ ಆಟಿದ ತೆನಸ್ ದ ಅಟ್ಟನೆ ಮಲ್ತಿತ್ತೆರ್.