ಲಾಕ್ ಡೌನ್ ದ ಪೊರ್ತುಡು ಆಟೊರಿಕ್ಷಾದಕ್ಲೆಗ್ ವಿಶೇಷ ಪರಿಹಾರ ಪ್ಯಾಕೇಜ್ ಕೊರ್ಲೆ

ಮುಲ್ಕಿ : ಕೊರೊನಾ ಲಾಕ್ ಡೌನ್ ರ್ದಾತ್ರ ಮಾತೆರ್ಲ ಬಂಗೊಡು ಉಲ್ಲೆರ್. ಆಂಡ ರಿಕ್ಷಾ ಚಾಲನೆ ಮಲ್ತ್ ದ್ ಜೀವನ ಮಲ್ತೊಂದು ಪ್ಪುನಕುಲು ಮಸ್ತ್ ಕಷ್ಟೊಡು ಉಲ್ಲೆರ್. ಅಂಚಾದ್ ರಿಕ್ಷಾದಕಲೆಗ್ ಸರ್ಕಾರ ವಿಶೇಷ ಪರಿಹಾರ ಪ್ಯಾಕೇಜ್ ಕೊರೊಡು ಪಂಡ್ ದ್ ಮುಲ್ಕಿ ರಿಕ್ಷಾ ಚಾಲಕೆರ್ ಬೊಕ್ಕ ಮಾಲಕೆರ್ನ ಸಂಘದಕುಲು ಬಿನ್ನೈತ ಮಲ್ದೆರ್.

ಮುಲ್ಕಿ ರಿಕ್ಷಾ ಪಾರ್ಕ್ ಡ್ ಗುರುವಾರ ನಡತಿನ ಸುದ್ದಿಗೋಷ್ಠಿಡ್ ಸಂಘದ ಅಧ್ಯಕ್ಷೆರ್ ನಾಗರಾಜ್ ಕೊಲೆಕಾಡಿ ಈ ವಿಷಯ ತೆರಿಪಾಯೆರ್.
ಸದ್ಯದ ಸೆಮಿ ಲಾಕ್ ಡೌನ್ ಡ್ ಕಾಂಡೆ 6 ಗಂಟೆರ್ದ್ 9 ಗಂಟೆ ಮುಟ್ಟ ರಿಕ್ಷಾ ಚಾಲನೆ ಮಲ್ಪರೆ ಅವಕಾಶ ಉಂಡು. ಆಂಡ ಈ ಕಡಿಮೆ ಪೊರ್ತುಡು ದಾಲಾ ಸಂಪಾದನೆ ಆಪುಜಿ . ಮುಲ್ಕಿ ಬಸ್ ನಿಲ್ದಾಣದ ರಿಕ್ಷಾ ಪಾರ್ಕ್ ಡ್ ಒಂಜೆಟ್ಟೇ 173 ರಿಕ್ಷಾ ಉಂಡು. ಈತ್ ಕಮ್ಮಿ ಪೊರ್ತುಡು ಈತ್ ರಿಕ್ಷಾದಕಲೆಗ್ ಸಂಪಾದನೆ ಆಪುಜಿ. ಅಂಚೆನೇ ಎಚ್ಚಿನಕುಲು ಕೈತಲ್ದ ಪೆಜಮಾಡಿದ ಪ್ರಯಾಣಿಕೆರ್ ಮುಲ್ಕಿಡ್ ಉಲ್ಲೆರ್. ಇತ್ತೆದ ನಿಯಮದ ಪ್ರಕಾರ ರಿಕ್ಷಾ ಜಿಲ್ಲೆದ ಗಡಿ ದಾಟರೆ ಇಜ್ಜಿ. ಅಂಚಾದ್ ಬಾರಿ ಕಷ್ಟೊಡು ಉಲ್ಲ. ಈ ಕ್ಷೇತ್ರದ ಶಾಸಕೆರ್, ಉಸ್ತುವಾರಿ ಸಚಿವೆರ್ ರಿಕ್ಷಾದಕ್ಲೆನ ಕಷ್ಟೊನು ಅರ್ಥ ಮಲ್ತೊಂದು ಆಯಿನಾತ್ ಬೇಗ ವಿಶೇಷ ಪರಿಹಾರ ಪ್ಯಾಕೇಜ್ ಘೋಷಣೆ ಮಲ್ಪೊಡು ಪಂಡ್ ದ್ ಆರ್ ಮನವಿ ಮಲ್ತೆರ್.
ಸಂಘದ ಸದಸ್ಯೆರ್ ವಿಲ್ಫ್ರೆಡ್ ಕೊಲ್ಲೂರು ಮೇರ್ ಪಾತೆರ್ದ್, ಕಾಂಡೆ 6 ರ್ದ್ 9 ಗಂಟೆ ಮುಟ್ಟ ಕಾಲಿ ಮೂಜಿ ಗಂಟೆದ ಪೊರ್ತುಡು ರಿಕ್ಷಾದಕಲೆಗ್ 300 ರೂಪಾಯಿ ಸಂಪಾದನೆ ಆಂಡಲ ಪೆಟ್ರೋಲ್, ಡೀಸೆಲ್ ಪಂಡ್ ದ್ 200 ರೂಪಾಯಿ ಕರ್ಚಿ ಆಪುಂಡು. ಒರಿನ 100 ರೂಪಾಯಿಡ್ ಎಂಕುಲು ಜೀವನ ದೆಪ್ಪುನು ಎಂಚ ಪಂಡ್ ದ್ ಕೇಂಡಿನ ಆರ್, ರಿಕ್ಷಾ ಚಾಲನೆ ಮಲ್ಪರೆ ಕಾಂಡೆ 6 ಗಂಟೆರ್ದ್ ಮಧ್ಯಾಹ್ನ 12 ಗಂಟೆ ಮುಟ್ಟ ಅವಕಾಶ ಮಲ್ತ್ ಕೊರೊಡು ಪಂಡ್ ದ್ ಆರ್ ಮನವಿ ಮಲ್ತೆರ್.
ಸದಸ್ಯೆರ್ ಗಣೇಶ್ ಕಕ್ವ ಮೇರ್ ಪಾತೆರ್ದ್, ಕರಿನ ವರ್ಷ ಲಾಕ್ ಡೌನ್ ಪೊರ್ತುಡು ರಾಜ್ಯ ಸರ್ಕಾರ ಘೋಷಣೆ ಮಲ್ತ್ ದಿತ್ತಿನ 5,000 ರೂಪಾಯಿ ಪ್ಯಾಕೇಜ್ ಬ್ಯಾಡ್ಜ್ ದ ಸಮಸ್ಯೆರ್ದಾತ್ರ ಎಂಕ್ಲೆಗ್ ಎಚ್ಚಿನಕ್ಲೆಗ್ ತಿಕ್ ದಿಜಿ. ಆಂಡ ಎಂಕುಲು ಮಾತೆರ್ಲ ನೂದು ನೂದು ರೂಪಾಯಿ ಕರ್ಚಿ ಮಲ್ತ್ ದ್ ಅರ್ಜಿ ಪಾಡ್ದಿತ್ತ. ಆಂಡ ಕಾಲಿ 30 ರಿಕ್ಷಾದಕಲೆಗ್ ಮಾತ್ರ ಆ ಪರಿಹಾರ ತಿಕ್ ದ್ಂಡ್. ಈ ಸರ್ತಿ ಮಾತಾ ರಿಕ್ಷಾದಕಲೆಗ್ಲ ಪರಿಹಾರ ಘೋಷಣೆ ಮಲ್ಪೊಡು ಪಂಡ್ ದ್ ಒತ್ತಾಯ ಮಲ್ತೆರ್.ದೀಪಕ್ ಕಕ್ವ ಬೊಕ್ಕ ಬೇತೆ ಸದಸ್ಯೆರ್ ಸುದ್ದಿಗೋಷ್ಠಿಡ್ ಪಾಲ್ ಪಡೆದಿತ್ತೆರ್.